Oktoba 16–22

1 im 2 Tessalonika

“Koweeppān Ami Tōmak”

Ilo am̧ lukkuun riiti 1 im 2 Tessolonika ippān ajri ro ilo kōļmenļo̧kjeņ, kwonaaj lo pedped ko me reaikuj meļeļe.

Kajjitōk bwe ren Kwaļo̧k

Ilo katak eo ļo̧k, kwaar ke kajjitōk ippān ajri ro n̄an mour kake ta eo rekar ekkatak ilo bar juon wāween? Kōtļo̧k an ajri ro kōjerbal minit ko jinointata ilo kūlaaj wiik in n̄an kwaļo̧k en̄jake ko aer.

Katakin Katak eo: Ajri ro Reddikļo̧k

2 Tessalonika 5:1–6

Ilo aō pokake kien ko an Anij, inaaj pojak n̄an Itok eo Kein Karuo an Jisōs Kraist.

Jejjab jeļā n̄āāt eo Rilo̧mo̧o̧r enaaj jepļaaktok n̄an laļin. Ak jemaron̄ kalimjōk E im pojak n̄an itok eo An.

M̧akūtkūt ko Maron̄ Kōm̧m̧ani

• Kūrtok juon m̧am̧a n̄an kōmeļeļe jidik ta kar en̄jake eo n̄an kōttar an nin̄nin̄ eo nejin ļotak. Riiti 1 Tessolonika 5:2–3, im kwaļo̧k n̄an ajri ro bwe Jisōs Kraist enaaj bar itok n̄an laļin, ak ejjeļo̧k juon ejeļā n̄āāt—āinwōt an juon m̧am̧a jab lukkuun jeļā n̄āā eo nin̄nin̄ eo nejin enaaj ļotak.

• Kajjitōk ippān ajri ro n̄an kōnono kōn juon iien ke rekar kōppopo n̄an juon tūreep ak m̧akūtkūt. Ta eo jekar kōm̧m̧an n̄an kōppopo? Bōktok juon juutkeij ka bāāk, im kōtļo̧k an ajri ro katen wōt n̄e rej kepoje n̄an juon tūreep. Kōn aolep menin pojak ko ilo bāāk eo, jipan̄ ajri ro ļōmņake juon wāween jemaron̄ kōppopo n̄an itok eo an bar Jisōs Kraist.

• Riit 1 Tessolonika 5:6 n̄an ajri ro, im kōmeļeļeiki bwe n̄e jejjab pojak n̄an bar itok eo an Jisōs, ej āinwōt n̄e jej kiki im jejjab pojak n̄an E. Karuwaineneik ajri ro n̄an katen wōt n̄e rej kiki. Kōmeļeļeiki bwe n̄e jej pojak, ej āinwōt n̄e jej ruj im kōttar E. Kajjitōk bwe ren ruj.

• Al juon al kōn Itok eo Kein Karuo, eo āinwōt “When He Comes Again” (Children’s Songbook,, 82–83).

2 Tessalonika 2:1–3

Paul ekar kwaļo̧k bwe juon bun̄ jān tōmak enaaj bar waļo̧k m̧okta jān an Jisōs Kraist bar itok

Kabun̄ eo me Jisōs Kraist ekar kajutake em̧ool ekar bun̄ jān tōmak, meļeļein bwe mālim eo an priesthood im m̧ool ko an gospel in rekar jako jān laļin. Paul ekar kanaan bwe bun̄ jān tōmak in, ak “bun̄ eo,” enaaj waļo̧k m̧okta jān Itok eo Kein Karuo an Rilo̧mo̧o̧r.

M̧akūtkūt ko Maron̄ Kōm̧m̧ani

• Ālkin riiti 2 Tessolonika 2:3 ippān ajri ro, kōtļo̧k bwe ren jipan̄ eok kalōk juon tawōr kōm̧m̧an jeb kab būlajtik ko ak būļak. Kwaļo̧k n̄an ajri ro ke kab ko ak būļak ko ren pinej jenkwan m̧ōttan m̧ool ko raorōk an Kabun̄ in, āinwōt m̧ool ko an gospel in, priesthood eo, liāp ilo tampeļ, im rikanaan ro. Ālkin an Paul im Rijilōk ro mej, men kein rekar jako, im Kabun̄ eo em̧ool ekar jaab pād ioon laļin elōn̄ iiō ko. Kajjitōk ippān juon ajri n̄an kōm̧akūt tawōr eo, im kōmeļeļeiki bwe en̄in ej ņaetan Bun̄ jān Tōmak ak “bun̄ eo.” Ke Jisōs Kraist ekar kōro̧o̧ltok Kabun̄ eo An, ekar ņaetan Jepļaaktok eo.

• Kwaļo̧k juon Bok in Mormon im pijain rikanaan eo im juon tampeļ. Kajjitōk ippān ajri ro n̄an ba “Bun̄ jān Tōmak” n̄e kwoj ņooj aitōm̧ ko ilo juon bāāk im “Jepļaaktok” n̄e kwoj bōktok aitōm̧ ko.

• Al al ko me rej kwaļo̧k kōn m̧ool ko kar jako ilo iien Bun̄ jān Tōmak im kar bar jepļaaktok eo ilo tōre in ad, āinwōt “Kabun̄ eo an Jisōs Kraist,” “Jepļaaktok eo an Priesthood,” im “I Love to See the Temple” (Children’s Songbook, 77, 89, 95).

Katakin Katak eo: Ajri ro Rerūttoļo̧k

1 Tessalonika 5:1–6

Ilo aō ļoor kien ko an Anij, inaaj pojak n̄an Itok eo Kein Karuo an Jisōs Kraist.

Kapilōk eo an Paul emaron̄ jipan̄ kōj pojak im lale raan eo eļap n̄e Rilo̧mo̧o̧r enaaj bar itok n̄an laļin.

M̧akūtkūt ko Maron̄ Kōm̧m̧ani

• Kajjitōk ippān juon ajri n̄an riiti 1 Tessolonika 5:1–6 ilo an ajri ro jet ļoore. Ālkin kajjojo eoon, kajjitōk ippān ajri eo n̄an kōmeļeļeiki ta eo eoon in ej ba. Kwomaron̄ kōņaan kōmeļeļeiki bwe “raan eo an Irooj” meļeļein Itok eo Kein Karuo an Jisōs Kraist. Etke Itok eo Kein Kauro kar keidi n̄an juon rikoot ilo bon̄ ak juon kōrā me ej tin wōr nejin?

• Kwaļo̧k n̄an ajri ro n̄an antoone bwe Rilo̧mo̧o̧r enaaj lolo̧k kūlaaj eo am juon raan. Ewi wāween ad pojak n̄an lotok eo An? Jipan̄ ajri ro ļōmņake men ko remaron̄ kōm̧m̧ani n̄an jipan̄ kōj kōppopo n̄an jeplaaktok eo an Jisōs Kraist. N̄an waanjon̄ak, jemaron̄ ukweļo̧k, jeo̧rļo̧k bōd, kōkm̧anm̧anļo̧k jemdo̧o̧n ko ad ippān baam̧le eo ad, ļoor rikanaan eo, kappukot im̧we eo an Jetōb Kwojarjar, im kōjparok bujen ko ad. Rōjan̄ ajri ro n̄an kāālet juon men renaaj kōm̧m̧ane n̄an kepooj er make n̄an bōk Rilo̧mo̧o̧r ilo Itok eo An.

2 Tessalonika 2:1–3

Paul ekar kwaļo̧k bwe juon bun̄ jān tōmak enaaj waļo̧k m̧okta jān bar itok eo an Jisōs Kraist.

N̄e ajri ro remeļeļe bwe Kabun̄ eo an Jisōs Kraist im gospel eo An rekar jako jān laļin ilo iien Bun̄ jān Tōmak eo Eļap, Jepļaaktok eo emenin aikuj enaaj bar alikkar n̄an er.

M̧akūtkūt ko Maron̄ Kōm̧m̧ani

• Kajjitōk ippān juon iaan ajri ro n̄an riiti 2 Tessolonika 2:1–3. Ekkar n̄an eoon kein, ta eo ekar waļo̧k m̧okta “jān raan eo an Kraist,” eo meļeļein Itok eo Kein Karuo? Ta meļeļein naan in “bun̄ eo?” Lukkuun lale bwe ajri ro ren meļeļe ta meļeļein Bun̄ jān Tōmak Eļap, eo ekar waļo̧k ālkin mej eo an Rijilōk ro an Rilo̧mo̧o̧r. Kwomaron̄ kōņaan kwaļo̧k meļeļe eo jān “Apostasy” Unin Tōl eo n̄an Jeje ko Rekwojarjar (scriptures.ChurchofJesusChrist.org).

• Jipan̄ ajri ro kōlaajraki ioon bo̧o̧t eo jet iaan m̧ool ko im kōjeraam̧m̧an ko jej m̧ōņōņō kaki kōn wōt gospel in. Jeeri men ko juon ilo̧k juon, im kajjitōk ippān ajri ro elmen an mour ko aer kar oktak n̄e eban kar men kein. Kōmeļeļeiki bwe m̧ool kein rekar jako ilo Bun̄ jān Tōmak eo Eļap. Etke eaorōk bwe Kabun̄ eo an Jisōs Kraist en bar jepļaaktok n̄an laļin ilo raan kein āliktata? Kajjitō ippān ajri ro n̄an “kōjepļaaktok” ak bar je m̧ool ko im kōjeraam̧m̧an ko ioon bo̧o̧t eo.

2 Tessalonika 3:7–13

Jemedwōj Ilan̄ ekōņaan bwe in jerbal.

Elmen am̧ maron̄ jipan̄ ajri ro lo jerbal eo āinwōt juon kōjeraam̧m̧an, ejjab juon men bajjōk n̄an bōbraiki?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an bōk kuņaer n̄an riiti eoon kein jān 2 Tessolonika 3:7–13 im lali jorrāān ko ro Rekwojarjar rekar iooni. Etke Jemedwōj Ilan̄ ekōņaan bwe jān jerbal? Ta eo ekar waļo̧k n̄e jen kar jeļā kōn lukkuun jerbal? Kōtļo̧k bwe ajri ro ren bōk kuņaer jerbal ko ilo an ajri ro jet kajjidedeik ta eo rej kōm̧m̧ane.

• Kajjitōk ippān ajri ro n̄an kōnono kōn juon iien ke rekar lukkuun jerbale juon jerbal, juon būrookjāāk, ak juon kōttōbar. Elmen aer kar en̄jake kōn er make n̄e rekar kadedeļo̧k? Ta meļeļein “kom̧win jab m̧ōk ilo ami kōm̧anm̧an em̧m̧an”? 1 Tessolonika 5:13). Ta eo ej jipan̄ kōj etal wōt n̄an jerbal?

Kōketak Ekkatak ilo M̧weo

Kajjitōk ippān ajri ro n̄an ba n̄an baam̧le eo ak ro m̧ōttad kōn juon wun rej kam̧m̧oolol kake bwe ewōr ippād gospel in ioon laļin rainin (peij in m̧akūtkūt eo an wiin in emaron̄ tōl er).

Kōkōm̧anm̧anļo̧k Ad Katakin

Jipan̄ ro jinen im jemen ajri ro. “Ro jinen im jemān rej rūkaki ro raorōktata ilo gospel eo n̄an ajri ro nejier—ewōr ippād jim̧or eddo im kajoor eo eļaptata n̄an ukōt ajri ro nejier (lale Deuteronomi 6:6–7). Ilo am̧ katakin ajri ro ilo mōnjar eo, jar im kappukōt wāween ko n̄an rie ro jineer im jemāer” (Teaching in the Savior’s Way, 25).