“Oktoba 2–8. Epesōs: ‘N̄an Koweeppānļo̧k ro Rem̧m̧an,’” Itok, Ļoor Eō—N̄an Būraimere: Kalim̧m̧ur Ekāāl 2023 (2022)
“Oktoba 2–8. Epesōs,” Itok, Ļoor Eō—N̄an Būraimere: 2023
Oktoba 2–8
Epesōs
“N̄an Koweeppānļo̧k ro Rem̧m̧an”
Ilo am̧ ekkatak Leta eo n̄an Epesōs, ļōmņak kōn ta pedped ko komaron̄ kwaļo̧ki n̄an kōjeraam̧m̧an ajri ro kwoj katakin. Je jabdewōt ļōmņak ko rej itok n̄an kōļmenļo̧kjeņ ilo am̧ riit.
Kajjitōk bwe ren Kwaļo̧k
Kajjitōk ippān ajri ro n̄an jutak ilo juon ļain. Jino ilo tum̧aanin ļain eo, leļo̧k n̄an kajjojo ajri jidik iien n̄an kwaļo̧k men eo ekar ekkatak kake kōn gospel in ilo iien ekkatak jejej ko rekwojarjar an baam̧le, ilo Būraimere, ak jikin ko jet.
Katakin Katak eo: Ajri ro Reddikļo̧k
Membōr in Kabun̄ in reaikuj m̧ōttāik im “citizen ippān ro rem̧m̧an.”
Ajri ro ilo kūlaaj eo am̧ rej “ruwamāejet” ak “citizen ippān ro rem̧m̧an” ippān ro jt im ippān ward membōr ro jet? Jipan̄ er meļeļe bwe men̄e joktak jān doon, Rilo̧mo̧o̧r ej jipan̄ kō n̄an juon wōt n̄an iakwe doon.
M̧akūtkūt ko Maron̄ Kōm̧m̧ani
-
Likūt juon pijain Rilo̧mo̧o̧r eo ilo io̧lepen ruum̧ eo. Kajjitōk ippān ajri ro n̄an jutak ilo jikin ko roktak ilo ruum̧ eo n̄an pinej jenkwoan “ruwamāejet” ak “rilikin.” Jipan̄ er meļeļe bwe naan kein meļeļe armej ro jejjab jeļā kajjier. Ilo am̧ riiti Epesōs 2:19, kajjitōk ippāer n̄an kōm̧akūt pijain Kraist m̧ae iien rej jutak ippān doon. Kwaļo̧k n̄an er ilo ad epaakļo̧k Rilo̧mo̧o̧r, jemaron̄ erom̧ juon wōt ippān ro rej “citizen ippān ro rem̧m̧an,” ak ro m̧ōttad.
-
Kapukkot pij in ajri ro jān m̧ōttan ko reoktak jān laļin, im ņooji ipeļaakin ruum̧ eo. Likūt juon pijain Rilo̧mo̧o̧r eo ilo im̧aanin ruum̧ eo. Ilo kūlaaj eo am̧ kōm̧m̧ani kurup ko āinwōt mijinede im bōk kuņaer pukote pijain juon “ruwamāejet” n̄an jikin eo epaakeļo̧k pijain Rilo̧mo̧o̧r. Jipan̄ er meļeļe bwe n̄e armej ro rej peptaij, rej erom̧ m̧ōttan ro uwaan Kabun̄ in ad, ak “m̧weo im̧ōn Anij” Ewi wāween ad jipan̄ juon armej en̄jake karuwainene eo?
Jemedwōj Ilan̄ ekōņaan bwe in pokake ro jibu im jim̧m̧aō.
Ilo am̧ riiti Epesōs 6:1–3, ļōmņaki wāween ko komaron̄ jipan̄ ajri ro meļeļe etke eaorōk n̄an pokake ro jineer im jemeer.
M̧akūtkūt ko Maron̄ Kōm̧m̧ani
-
Riiti Epesōs 6:1 n̄an kūlaaj eo, ak jipan̄ juon iaan ajri ro riiti. Jipan̄ er ļōmņake iien ko rekr pokake jineer im jemeer. Kajjitōk ippāer n̄an kwaļo̧k elmen aer kar jeraam̧m̧an n̄an pokake im elmen aer kar en̄jake n̄e rej pokake. Etke eaorōk n̄an pokake jined im jemed?
-
Al ippān doon juon al kōn pokake Irooj, eo āinwōt “Quickly I’ll Obey” (Children’s Songbook,, 197). Kōtļo̧k an ajri ro bōk kuņaer kwaļo̧k etan men ko jineer im jemeer rekar kajjitōk ippāer n̄an kōm̧m̧ane, im kajjitōk ippāer n̄an katen wōt n̄e rej kōm̧m̧ane men eo.
-
Kwaļo̧k juon pija in Jisōs Kraist an peptaij (lale Gospel Art Book, no. 35), im kwaļo̧k elmen an Rilo̧mo̧o̧r kar pokake Jemedwōj Ilan̄ jān peptaij (lale 2 Nipai 31:6–7). Kwaļo̧k juon en̄jake me kwaar pokake jinōm̧ im jem̧ōm̧ im kwaar jeraam̧m̧an. Etke Jemedwōj Ilan̄ ekōņaan bwe jen pokake ro jined im jemed?
Kein tariņae an Anij emaron̄ kōjparok kōj jān nana.
Elmen am̧ naaj jipan̄ ajri ro meļeļe bwe kōm̧m̧ani men ko rejim̧we ej āinwōt kōņak kein tariņae?
M̧akūtkūt ko Maron̄ Kōm̧m̧ani
-
Kwaļo̧k juon pijain armej eo ej kōņak kein tariņae, āinwōt eo ilo peij in m̧akūtkūt eo an wiik in ak laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko. Ilo am̧ kōmeļeļeiki Epesōs 6:10–18, kwaļo̧k n̄an ajri ro elmen oktakin kōņak kein tariņae kōjparok m̧ōttan ko ilo ānbwiniid. (Lale “The Whole Armor of God,” Jera, Juun 2016, 24–25.)
-
Bōktok jān menin ekkatak n̄an kūlaaj eo me emaro pinej jenkwan m̧ōttan nuknuk in tariņae an waļo̧k ilo Epesōs 6:14–17 (n̄an waanjon̄ak, at ak nuknuk), ak kōm̧m̧an m̧ōttan nuknuk in tariņae jān m̧ōttan peba. Kōm̧m̧an bwe ajri ro ren bōk kūņaer kōņak “nuknuk in tariņae.” Jipan̄ er meļeļe elmen ad kōņak nuknuk in tariņae an Anij (n̄an waanjon̄ak, jān ekkatak jeje ko rekwojarjar, jerbal n̄an ro jet, pokake, im ko jet). Kōnono elmen kōm̧m̧ani men kein n̄an kōjparok kōj jān nana.
Katakin Katak eo: Ajri ro Rerūttoļo̧k
Elmen ad “citizen ippān ro rem̧m̧an” ilo m̧weo im̧ōn Anij.
Ajri ro rej kajoorļo̧k n̄e ewōr ro m̧ōttaer io gospel in. Elmen am̧ maron̄ jipan̄ er kōļapļo̧k jem̧jerā ko rem̧m̧an n̄an doon?
Jej “citizen ippān ro rem̧m̧an” ippān ro Rekwojarjar an Anij.
M̧akūtkūt ko Maron̄ Kōm̧m̧ani
-
Riiti Epesōs 2:19 ippān doon, im kōnono ta meļeļein ruwamāejet ak rūlikin. Kwaļo̧k juon waanjon̄ak me kwaar en̄jake āinwōt juon ruwaimājet ak rūlikin im juon eo ekar jipan̄ eok en̄jake ruwainene im m̧ōttā. Kajjitōk ippān ajri ro n̄an kwaļo̧k en̄jake ko aer reinļakwōt. Ta eo jemaron̄ kōm̧m̧ane n̄an erom̧ “citizen ippān ro rem̧m̧an” ijeļo̧kin ruwaimāejet? Ewōr ke jabdewōt ajri ilo kūlaaj eo am̧ me ejakutkut an kobatok, bōlen kōnke er ruwaimāejet? Jipan̄ ajri ro itok kōn juon karōk n̄an jipan̄ membōr ro me rej en̄jake ruwainene im iakwe.
-
N̄an jipan̄ ajri ro kōkajoorļo̧k jemdoon ko aer n̄an doon, je jet kajjitōk ko ioon bo̧o̧t eo me ej im̧we er n̄an kwaļo̧k men ko kōn er make, āinwōt N̄āāt eo ekar uwaak jar eo am̧? ak Ta men eo em̧m̧an ippām n̄an kōm̧m̧an n̄an baam̧le eo am̧? Kōjepel ajri ro n̄an kurup ko, im kajjitōk ippāer n̄an kajjitōkin doon kōn kajjitōk in. Ta eo jej ekkatak jān ro jet?
Jemedwōj Ilan̄ ekōņaan bwe in pokake im kautiej jinō im jema.
Ilo am̧ ļōmņaki wāween ko komaron̄ jipan̄ ajri ro meļeļe etke eaorōk n̄an pokake ro jineer im jemeer.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an riiti Epesōs 6:1–3 juon make im kalikkar naan ko me ejuktok ippāer. Kajjitōk n̄an er naan kein im etke naan kein raorōk.
-
Jipan̄ ajri ro kappukote im kōnono kōn waanjon̄ak in armej ro ilo jeje ko rekwojarjar me rekar pokake im kautiej jineer im jemeer, āinwōt Rilo̧mo̧o̧r (lale Luk 2:42–52), Rut (lale Rut 1), ak Nipai (lale 1 Nipai 3:1–8). Etke eaorōk n̄an pokake im kautiej jined im jemed?
-
Leļo̧k n̄an kajjojo ajri juon m̧ōttan peba kōn naan in kautiej ilo lōn̄in. Kōnono ta meļeļein naan eo. Kajjitōk ippān ajri ro n̄an je ak jin̄aiki peba ko aer men ko remaron̄ kōm̧m̧ane n̄an kwaļo̧k bwe rej kautiej jineer im jemeer.
Kein tariņae an Anij emaron̄ kōjparok kōj jān nana.
Ilo am̧ riiti Epesōs 6:10–18, ļōmņake jet iaan men ko rekauwōtata an jetōb me armej ro rej iooni im elmen am̧ maron̄ jipan̄ kōkajoorļo̧k ajri ņae er.
M̧akūtkūt ko Maron̄ Kōm̧m̧ani
-
Ilo an ajri ro riiti Epesōs 6:10–18, kajjitōk ippān bar juon ajri n̄an kōlaajraki ak jin̄aik ioon bo̧o̧t eo m̧ōttan nuknuk in tariņae ko kar kwaļo̧ki. Etke eaorōk kōņak kein tariņe ilo tariņae? Elmen ad kōņak kein tariņae ilo jetōb aolep raan?
-
Leļo̧k n̄an kajjojo ajri bwe ren jin̄a ak ļābōļe jidik m̧ōttan kein tariņae ilo Epesōs 6:14–17. Elmen an m̧ōttan kein tariņae in kōjparok kōj jān nana? Ta eo Irooj ekar kallim̧ur n̄an ro rej kōņak kein tariņa an Anij? (lale Epesōs 6:13). Ta meļeļein menin n̄an “juṃae ilo raan eo e nana”?
Kōketak Ekkatak ilo M̧weo
Kajjitōk ippān ajri ro n̄an lale wiik in n̄an ro jet me rej en̄jake āinwōt ruwamāejet. Mālijjon̄e er n̄an kōm̧m̧ane n̄an tōpar armej eo.
Kōkōm̧anm̧anļo̧k Ad Katakin
Jipan̄ ajri ro katak jān jeje ko rekwojarjar. Ajri ro reddik remaron̄ katak jān jeje ko rekwojarjar, bōtaab rej aikuj pedped wōt ioon juon eoon ilo jeje ko rekwojarjar ak juon naan. Kwomaron̄ kajjitōk ippān ajri ro n̄an jutak n̄e rej ron̄ juon naan eaorōk. (Lale Teaching in the Savior’s Way,,25–26.)