“Oktoba 23–29. 1 im 2 Timote; Taitōs; Pailimōn: ‘A Kwōn juon Jon̄ak n̄an ro rej Tōmak,’” Itok, Ļoor Eō—N̄an Būraimere: Kallim̧ur Ekāāl 2023 (2021)
“Oktoba 23–29. 1 im 2 Timote; Taitōs; Pailimōn,” Itok, Ļoor Eō—N̄an Būraimere: 2023
Oktoba 23–29
1 im 2 Timote; Taitōs; Pailimōn
“ A Kwōn Juōn Wanjon̄ak n̄an ro rej Tōmak”
Paul ekar kwaļo̧k bwe “ Jeje ko otemjej eṃōj letok kōn …katakin im kajiṃwe” (2 Timote 3:16). Ilo am̧ ekkatak leta kein, kōļmenļo̧kjeņ elmen aer maron̄ im̧we ajri ro n̄an mour jim̧we.
Kajjitōk bwe ren Kwaļo̧k
Kajjitōk ippān ajri ro n̄an kōnono kōn juon eo ej kwaļo̧k “waanjon̄ak an ritōmak ro” n̄an er. Ta eo rej aikuj kōm̧m̧an n̄an erom̧ waanjon̄ak em̧m̧an n̄an ritōmak ro jet?
Katakin Katak eo: Ajri ro Reddikļo̧k
Bisop ro rej tōl ward eo āinwōt ro rikarejeraņ Anij.
Paul ekar katakin Timote im Taitōs kōn aorōkin bisop ro. Ewi wāween am̧ maron̄ katakin ajri ro kōn ta eo bisop ro rej kōm̧m̧ane? (Juon branch būreejtōn ej āinwōt bisop eo.)
M̧akūtkūt ko Maron̄ Kōm̧m̧ani
-
Jin̄aiki juon pijain bisop eo am̧ ioon bo̧o̧t eo. Kajjitōk ippān ajri ro n̄an kwaļo̧k men ko rejeļā kōn bisop eo. Elmen e? Ta eo ej kōm̧m̧ane? Elmen an kōjeraam̧m̧an ward eo? (Komaron̄ lo paoktokin bisop ro ilo 1 Timote 3:1–2 im Taitōs 1:7–9.) Kajjitōk ippān ajri ro n̄an kwaļo̧k ļōmņak ko, je ioon jidik peba im kōtļo̧k an ajri ro likūti ioon bo̧o̧t eo n̄an jin̄aiki.
-
Je eddo ko an juon bisop ioon jidik peba—āinwōt jipan̄ ajri ro im jodikdik ro ilo ward eo, bōk juon m̧ōttan jon̄oul ko im jāān in joortak ko, leļo̧k kūr ko, intōrpiuki membōr ro, im jipan̄ ro ilo aikuj. Likūt peba kein ilo juon bo̧o̧ļ, im kajjitōk ippān kajjojo ajri n̄an bōk juon. Innām jipan̄ ajri ro ikkure kōn eddo ko ippam̧. Kwaļo̧k am̧ naan in kam̧ool bwe bisop eo ekar kūr jān Anij.
-
Kajjitōk ippān ajri ro n̄an jin̄aiki juon pija in bisop eo jerbal n̄an membōr ro. Kwaļo̧k bwe ren leļo̧k jin̄a ko aer n̄an kam̧m̧oolol e. Ta eo jemaron̄ kōm̧m̧ane n̄an jipan̄ e?
“Ejjeļo̧k armej en kajeko̧o̧n eok kōn am̧ likao, a kwōn juon jon̄ak n̄an ro rej tōmak” (1 Timote 4:12).
Imaron̄ “juon wanjon̄ak n̄an ro rej tōmak.”
Ta eo komaron̄ kōm̧m̧ane n̄an imwe ajri ro n̄an “waanjon̄ak n̄an ro rej tōmak”?
M̧akūtkūt ko Maron̄ Kōm̧m̧ani
-
Al ippān ajri ro “Do as I’m Doing” (Children’s Songbook, 276). Kajjitōk ippān ajri ro n̄an ļoor waanjon̄ak eo am̧ n̄an kōm̧m̧an m̧akūtkūt ko kwoj kōm̧m̧ani. Kōtļo̧k an ajri ro bōk koņaer tōl aolepen kūlaaj eo n̄an ļoor m̧akūtkūt ko aer. Riiti 1 Timote 4:12, im kajjitōk ippān ajri ro ta eo remaron̄ kōm̧m̧an n̄an waanjon̄ak em̧m̧an n̄an ro jet.
-
Kwaļo̧k juon en̄jake ke kwaar kajjieon̄ in juon waanjon̄ak em̧m̧an n̄an ro jet ke ro jet rekar juon waanjon̄ak em̧m̧an n̄an eok (bōlen ekoba ajri ro ilo kūlaaj eo am̧). Kajjitōk ippān ajri ro n̄an waanjon̄ak ko rem̧m̧an n̄an ro uwaan baam̧le eo im ro m̧ōttaer.
Jeje ko Rekwojarjar renaaj jipan̄ eō jeļā m̧ool eo.
N̄e komaron̄ jipan̄ ajri ro n̄an iakwe jeje ko rekwojarjar, katak ko ilo jeje ko rekwojarjar renaaj kōjeraam̧m̧an mour ko aer ilo iiō ko rej itok.
M̧akūtkūt ko Maron̄ Kōm̧m̧ani
-
Kwaļo̧k jet jeje ko rekwojarjar, im jipan̄ ajri ro jino jeļā kaki ilo kwaļo̧k taitōļ peij ko ilo Baibōļ, Bok in Mormon, Katak im Bujen Ko, im Bōōr eo Eļap Wōnāān. Kajjitōk ippān ajri ro n̄an kotak bok kein ilo am riit 2 Timote 3:15–17. Kwaļo̧k n̄an ajri ro etke em̧m̧an ippam̧ jeje ko rekwojarjar, im kōtļo̧k aer kwaļo̧k en̄jake ko aer.
-
Kajjitōk ippān ajri ro n̄an kōnono kake aorōkier. Ta eo koj kōm̧m̧ane kōn menin? Elmen aer kaorōkki? Kōtļo̧k aer bōk koņaer jibwe jeje ko rekwojarjar im kōkm̧anm̧an ālōkki peij ko. Ta eo jej kōjerbal jeje ko rekwojarjar kaki? Etke jej aikuj kōjparoki? Kam̧ool bwe jeje ko rekwojarjar epād ie m̧ool ko me Jemedwōj Ilan̄ ekōņan bwe jen jeļā.
-
Jipan̄ ajri ro kōm̧m̧ani m̧akūtkūt ko ilo al eo kōn jeje ko rekwojarjar, āinwōt “Search, Ponder, im Pray” (Children’s Songbook, 109).
Katakin Katak eo: Ajri ro Rerūttoļo̧k
Imaron̄ “juon wanjon̄ak n̄an ro rej tōmak.”
Timote ekar dik n̄an juon ritōl an Kabun̄, ak Paul ekar kōņaan bwe en jeļā ke emaron̄ juon waanjon̄ak. Komaron̄ im̧we ajri ro n̄an kwaļo̧k waanjon̄ak ko rem̧m̧an n̄an ro ipeļakier.
M̧akūtkūt ko Maron̄ Kōm̧m̧ani
-
Riit ippān doon 1 Timote 4:12, im kajjitōk ippān ajri ro n̄an pukōt jiljino wāween ko Paul ekar ba jemaron̄ in “juon waanjon̄ak an ritōmak ro.” Kejnoļo̧k ajri ro ilo ruo m̧ōttan ko, im kajjitōk ippān kajjojo kurup n̄an ļōmņake jekjek eo me remaron̄ juon jon̄ak n̄an ro rej ritōmak. Kajjitōk ippāer n̄an ikkure kōn jekjek ko aer n̄an kūlaaj eo.
-
Kajjitōk ippān ajri ro n̄e remaron̄ kwaļo̧k jabdewōt en̄jake n̄e rej kajjieon̄ in juon jon̄ak n̄an ro jet. Kwaļo̧k n̄an ajri ro elmen aer maron̄ waanjon̄ak n̄an ro rej tōmak n̄an eok im elmen am̧ kile waanjon̄ak eo em̧m̧an ilo er n̄an ro jet.
Men ko indeeo raorōkļo̧k jān jāān.
Laļ in ej kaorōkļo̧k jāān im men ko jāān emaron̄ wiaiki Elmen am̧ maron̄ jipan̄ ajri ro kōjparok mije eo aer im iakwe n̄an Jemedwōj Ilan̄ im Jisōs Kraist?
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an kōnono kake ta eo remaron̄ wiaiki n̄e elōn̄ aer jāān ilo laļin. Riit 1 Timote 6:7–12 ippān ajri ro, im kajjitōk ippāer n̄an kōmeļeļeiki ta eo Paul ekar katakin Timote kōn m̧ani. Innām kajjitōk ippān ajri ro n̄an riit eoon 11–12 bar juon alen, lali men ko Paul ekar kwaļo̧ki me eļapļo̧k aer aorōk jān m̧ani.
-
Kwaļo̧k pijain men ko an laļin (āinwōt m̧ani, kein ikkure, ak kein kalimomo ko) im men ko an indeeo (āinwōt baam̧le ko ak tampeļ ko). Kajjitōk ippān ajri ro n̄an aiini pija ko ilo ruo m̧ōttan ko—men ko rej kepaakļo̧k kōj n̄an Kraist im men ko remaron̄ kōm̧ad kōj jān Kraist n̄e jej iakwe er eļapļo̧k jān ad iakwe E. Etke “arōk ṃani … ej okran nana otemjej”? Elmen mije wōt Jisōs Kraist ekōm̧m̧an ad m̧ōņōņō?
Jemedwōj Ilan̄ ekar letok n̄an kōj jeje ko rekwojarjar n̄an jipan̄ kōj jeļā jim̧we jān bōd.
Ilo am̧ katakin ajri ro kōn jeje ko rekwojarjar, lale wāween ko n̄an rōjan̄ er n̄an bōk aer make en̄jake kōn naan in Anij.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an riiti 2 Timote 3:15–17. Kwaļo̧k pija ko rej kwaļo̧k juon bwebwenato jān kajjojo jon̄ak in jerbal ko emen, im kajjitōk ippān jet ajri n̄an bōk juon pija im kwaļo̧k bwebwenato eo. (Komaron̄ lo pija ko ilo Gospel Art Book im ilo Itok, Ļoor Eō kein ekkatak ko.) Kajjitōk ippān ajri ro n̄an kwaļo̧k jabdewōt men rejeļā kake kōn bok in jeje ko rekwojarjar. Elmen an jeje ko rekwojarjar “maron̄ in kamālōtlōt [kōj] n̄an lo̧mo̧o̧r”?
-
Kwaļo̧k eoon eo em̧m̧an jān jeje ko rekwojarjar ak juon en̄jake n̄e jeje ko rekwojarjar rekar jipan̄ eok kalōk tōmak eo am̧ ilo Jemedwōj Ilan̄ im Jisōs Kraist. Kajjitōk ippān ajri ro n̄an kwaļo̧k juon eoon em̧m̧antata ippāer ak juon aer make en̄jake.
-
Kajjitōk ippān juon ajri n̄an riit Moronai 10:4–5. Ta kar kallim̧ur eo an Moronai ilo eoon kein? Kajjitōk ippān ajri ro ekōjkan ad maron̄ jeļā bwe jeje ko rekwojarjar rej m̧ool. Kajjitōk ippāer n̄an riiti ak ron̄jake kajjojo raan jeje ko rekwojarjar im kajjitōk ippān Anij n̄e rej m̧ool.
Kōketak Ekkatak ilo M̧weo
Kajjitōk ippān ajri ro n̄an kwaļo̧k n̄an baam̧le ko aer ta eo rekar ekkata kōn jeje ko rekwojarjar im lale juon eoon me remaron̄ kwaļo̧k n̄an kūlaaj eo wiik in tok (kōn jipan̄ an ro jinen im jemen, n̄e aikuji).
Kōkōm̧anm̧anļo̧k Ad Katakin
Kōm̧m̧ane m̧akūtkūt ko n̄an jipan̄ aikuj ko. Ijjello̧kin lali unin tōl kein āinwōt kadkad ko me kwoj aikuj ļoori ilo am̧ katakin, kōjerbali āinwōt juon kein jipan̄ katakin kōn ļōmņak ko n̄an kōketak im̧we eo am̧ make ilo am̧ kejōkļo̧kjeņ kōn aikuj ko an ajri ro kwoj katakin. Kwomaro ukōt m̧akūtkūt ko n̄an katakin ajri ro lo jabdewōt iiō.