“Oktoba 9–15. Pilippai; Kolosse: ‘ I Maron̄ in Kōm̧m̧an Men Otemjej ilo Eo ej Kakajoor Eō,’” Itok, Ļoor Eō—N̄an Būraimere: Kalim̧m̧ur Ekāāl 2023 (2022)
“Oktoba 9–15. Pilippai, Kolosse,” Itok, Ļoor Eō—N̄an Būraimere: 2023
Oktoba 9–15
Pilippai; Kolosse
“I Maron̄ in Kōm̧m̧an Men Otemjej ilo Eo ej Kōkajoor Eō”
Riit Pilippai im Kolosse, ļōmņak kōn ajri ro kwoj katakin. Kappukot im̧we elmen am̧ katakin er pedped ko ilo leta kein.
Kajjitōk bwe ren Kwaļo̧k
Kajjitōk ippān ajri ro ta eo rekar kōm̧m̧an wiik eo ļo̧k n̄an jerbale men ko raar ekkatak ilo kūlaaj wiik eo ļo̧k. N̄an waanjon̄ak, elmen aer kar tōpar eo me eaikuj juon m̧ōttan?
Katakin Katak eo: Ajri ro Reddikļo̧k
Pilippai 1:3–4; Kolosse 1:3, 9
Ritōl ro an Kabun̄ in rej iakwe eō im jar kōn eō.
Paul emakijkij an jeje im kwaļo̧k an iakwe n̄an membōr ro an Kabun̄ eo im jiron̄ er ke ej jar kōn er. Ļōmņake elmen am̧ maron̄ jipan̄ ajri ro meļeļe bwe ritōl ro an Kabun̄ in rej iakwe er.
M̧akūtkūt ko Maron̄ Kōm̧m̧ani
-
Riiti Pilippai 1:3–4 im Kolosse 1:3, 9 eļaaj, im kajjitōk ippān ajri ro n̄an nukuj peier im jillo̧k bōraer aolep iien n̄e rej ron̄ naan ko jar, jar, im jar. Kōmeļeļeiki bwe Rijilōk Paul ekar jar kōn membōr an Kabun̄ eo, āinwōt bar ritōl ro an Kabun̄ in jar kōn kōj rainin.
-
Kwaļo̧k juon pijain Jisōs Kraist, im jet eoon ko jān jeje ko rekwojarjar me rej kōmeļeļeiki An jar kōn ro jet (n̄an waanjon̄ak Luk 22:32; 3 Nipai 19:21, 23). Ta eo Jisōs Kraist ekar kajjitōk ke E ekar jar kōn ro jet?
-
Jipan̄ ajri ro kwaļo̧k etan jet iaan ritōl ro an Kabun̄ in, āinwōt būreejtōn eo an Būraimere, bisop eo, im Būreejtōn eo an Kabun̄ in. Kōmeļeļeiki bwe ritōl rein rej kajjitōk ippān Jemedwōj Ilan̄ n̄an kōjeraam̧m̧an ajri ro im jipan̄ er mour jim̧we. Ļōmņak in kwaļo̧k n̄an ajri ro ta eo kwaar ba ilo am̧ jar kōn er.
Imaron̄ m̧ōņōņō ilo Irooj.
Paul ekar rōjan̄ ro Rikwojarjar n̄an m̧ōņōņō—men̄e raar ioon apan̄ ko im Paul make ekar pād ilo kalbuuj. Elmen am̧ naaj jipan̄ ajri ro ļoor Jisōs Kraist n̄an bōktok lan̄lōn̄?
M̧akūtkūt ko Maron̄ Kōm̧m̧ani
-
Kajjitōk ippāer n̄an ron̄jake n̄an āliji naan eo ilo am̧ riiti Pilippai 4:4. Kajjitōk ippān ajri ro n̄an kwaļo̧k n̄an eok ta eo rej kōm̧m̧ane n̄e rej m̧ōņōņō. Kwaļo̧k n̄an ajri ro etke kwoj “lan̄lōn̄ ilo Irooj”—etke kwoj m̧ōņōņō kōn Jisōs Kraist. Kajjitōk ippān ajri ro n̄an kwaļo̧k ekōjkan aer en̄jake kōn Jisōs.
-
Kwaļo̧k menin ekkatak ko ak pija ko me rej pinej jenkwan men ko me ejipan̄ eok “lan̄lōn̄ ilo Irooj” (Pilippai 4:4), āinwōt kōm̧anm̧an ko An, tampeļ, Jerkakpeje eo An, ak baam̧le. Kōtļo̧k an ajri ro bōk kuņaer kāālet juon pija ak menin ekkatak eo, innām ba n̄an er etke ekōm̧m̧an am̧ m̧ōņōņō. Kajjitōk ippāer n̄an kwaļo̧k men ko me ejipan̄ er lan̄lōn̄ ilo Irooj.
-
Riiti Pilippai 4:8 ippān doon, im jipan̄ ajri ro ļōmņaki men ko me ekkar n̄an kōmeļeļe eo ilo eoon in (bar lale Laajrak in Tōmak Ko 1:13). Kajjitōk ippān ajri ro n̄an jin̄aiki pija ko kein.
Tōmak eo aō eaikuj tōt “okraņ” ilo Jisōs Kraist.
N̄e ajri ro rej kalōk mour im tōmak ko aer ippān Rilo̧mo̧o̧r, renaaj maron̄ in jutak ņae lan̄ ko an mour in.
M̧akūtkūt ko Maron̄ Kōm̧m̧ani
-
Kwaļo̧k pija in juon wōjke jān laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko ilo am̧ riiti naan ko raorōk jān Kolosse 1:23; 2:6–7 (ak kwaļo̧k pija in alooj eo “Spiritual Whirlwinds” on ChurchofJesusChrist.org). Ta eo enaaj waļo̧k n̄an wōjke in n̄e juon lan̄ ej itok im wōjke eo ekar jab lukkuun tōt okraņ? Kōtļo̧k bwe ajri ro ren jutak im kanten wōt n̄e er wōjke eo me em̧ōjņo̧ okraņ ilo juon lan̄ innām juon wōjke ekajoor okraņ. Kam̧ool bwe tōmak ilo Rilo̧mo̧o̧r ejipan̄ kōj āinwōt juon wōjke me ekajoor okraņ. Innām jemaron̄ dipuk “lan̄ ko,” āinwōt kapo ko im iien ko reppen.
-
Kajjitōk ippān juon ajri n̄an jin̄aiki juon wōjke ioon bo̧o̧t eo. Kajjitōk ippān ajri ro kwaļo̧k etan jet men ko remaron̄ kōm̧m̧ane bwe en tōt “okraer” ilo Jisōs Kraist. Kajjojo iien juon ajri en kwaļo̧k etan men eo, kajjitōk ippān bwe en kobaiki ilo jin̄a eo.
Katakin Katak eo: Ajri ro Rerūttoļo̧k
N̄e ewōr aō tōmak ilo Jisōs Kraist, Imaron̄ m̧ōņōņō ilo iien ko reppen.
Paul ekar en̄taan elōn̄ apan̄ ko, ak ekar m̧ōņōņō kōnke ewōr an tōmak ilo Jesus Christ.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an antoone n̄e ren kar pād ilo kalbuuj, āinwōt kar Rijilōk Paul ke ekar je Leta eo n̄an armej in Pilippai ro. Riiti Pilippai 4:4–13 ippān ajri ro, im kajjitōk ippāer n̄an lali naan ko “lan̄lōn̄,” “aenōm̧m̧an,” im “jum̧ae.” Etke Paul ekar maron̄ in lan̄lōn̄ im en̄jake aenōm̧m̧an ilo kalbuuj? Innām kajjitōk ippān ajri ro n̄an lali naan ko “Irooj,” “Anij,” im “Kraist” ilo eoon ko. Jipan̄ er meļeļe bwe tōmak eo an Paul ilo Jisōs Kraist ekar kōm̧m̧an bwe en m̧ōņōņō.
-
Kajjitōk bwe ajri ro rej jipan̄ eok kadedeļo̧k jentōj in āinwōt: “Imaron̄ pād ilo marok im maron̄ loe wōt men ko n̄e ij . Imaron̄ pād ņam̧ōj ilo raan eo ebwiļ im maron̄ en̄jake em̧ōļoļo Imaron̄ en̄taan im loe wōt lan̄lōn̄ n̄e ij .” Ta eo Pilippai 4:4–13 ej ba jemaron̄ kōm̧m̧ane n̄an lo lan̄lōn̄? Kajjitōk ippān ajri ro n̄an kwaļo̧k jet al in jar ak eoo ko kōn Jisōs me emaron̄ jipan̄ er en̄jake lan̄lōn̄ ilo iien ko reppen.
Imaron̄ “ļōmņake” men ko me rem̧ool, m̧ool, im erreeo.
Ajri ro emakijkij aer ioon men ko me renana im retonoon. Kwomaron̄ jipan̄ ajri ro kappukote men ko n̄an ļōn̄aj im kwojarjar.
M̧akūtkūt ko Maron̄ Kōm̧m̧ani
-
Kajjitōk ippān juon ajri n̄an riiti Pilippai 4:8 eļaaj ilo an ro jet lale naan ko jet ilo Laajrakin Tōmak Ko 1:13 me rej āinwōt juon. Kajjitōk ippāer n̄an je naan kein ioon boot eo. Kajjitōk ippān ajri ro ta meļeļein naan ko, im jipa er kōmeļeļeiki n̄e ekkar. Etke jej “ļōmņaki” men kein? Elmen ad “kappukoti”?
-
Kajjitōk ippān ajri ro n̄an kwaļo̧k etan men ko me rekkar kar kōmeļeļeiki ilo Pilippai 4:8. Kajjitōk ippāer n̄an kōm̧m̧ane juon laajrak ilo wiik in kōn jabdewōt me rej keememej ke ekar n̄an kōmeļeļe kein. Rōjan̄ er n̄an bōktok laajrak eo aer n̄an Būraimere wiik in tok im kwaļo̧ke ta eo rej loe.
Tōmak eo aō eaikuj tōt “okraņ” ilo Jisōs Kraist.
Setan ej kajjieon̄ in kam̧ōjņo̧ikļo̧k tōmak eo ad kōn kapo ko im katak ko rebōd. Elmen am̧ maron̄ im̧we ajri ro n̄an kōkajoorļo̧k tōmak eo aer ilo Rilo̧mo̧o̧r bwe ren “jab eṃṃakūt jān kōjatdikdik in gospel eo”? (Kolosse 1:23).
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an jin̄aiki pija ko me rej pinej jenkwan m̧ool ko rej waļo̧k ilo Kolosse 1:23; 2:6–7. Kōtļo̧k bwe ren kwaļo̧k pija ko ilo kūlaaj im kōmeļeļeiki m̧ool ko ilo pija ko.
-
Kwaļo̧k pija in alooj eo “Spiritual Whirlwinds.” Ta jet iaan kapo ko im katak ko rebōd ilo laļin rainin me remaron̄ kam̧ōjņo̧ik tōmak eo ad? Rōjan̄ ajri ro n̄an je juon me remaron̄ kōm̧m̧ane n̄an kōkajoorļo̧k tōmak eo aer bwe en tōt “okrar” (Kolosee 2:7) ilo Jisōs Kraist. Kajjitōk ippān n̄an kwaļo̧k men in ijoko renaaj loe kajjojo raan.
Kōketak Ekkatak ilo M̧weo
Kajjitōk ippān ajri ro n̄an kwaļo̧k n̄an baam̧le ko aer ta eo rekar ekkatak kōn Jisōs Kraist Remaron̄ kōjerbal peij in m̧akūtkūt eo an wiik in ak juon eoon rej riit ilo kūlaaj eo rainin.
Kōkm̧anm̧anļo̧k Ad Katakin
Ajri ro rej m̧ōņōņō ilo aer ekkatak jān en̄jake ko reokkotaktak. Kōjerbal makūtkūt ko me rej jipan̄ er itok limoer, kōjerbal aolep en̄jake ko, im kajjieon̄ kōjerbal men ko rekāāl. Kakkobaba ko ilo “Tōpar Aikuj ko an Ajri ro Reddikļo̧k” ilo jinoin bok in ekkatak in emaron̄ jipan̄. (Lale barāinwōt Teaching in the Savior’s Way,, 25–26.)