Jeptōm̧ba 25–Oktoba 1. Galetia: ‘Etetal kōn Jetōb,’” Itok, Ļoor Eō—N̄an Būraimere: Kalim̧m̧ur Ekāāl 2023 (2022)
“Jeptōm̧ba 25–Oktoba 1. Galetia,” Itok, Ļoor Eō—N̄an Būraimere: 2023
Jerkakpej Rilo̧mo̧o̧r ekar loļo̧k Paul ilo kaļbuj (lale Jerbal 23:11). Jisōs Kraist emaron̄ kanemkwoj kōj jān “ine in kam̧akoko” (Galetia 5:1).
Jeptōm̧ba 25–Oktoba 1
Galetia
“Etetal kōn Jetōb”
Ilo am̧ riiti Galetia, ta en̄jake ko komaron̄ kōm̧m̧ani n̄an ajri ro ilo kūlaajruum̧ eo am̧ n̄an ekkatak?
Kajjitōk bwe ren Kwaļo̧k
Leļo̧k n̄an ajri ro jejjo iien n̄an jin̄n̄aik juon men rekar ekkatak kōn gospel eo ilo m̧weo ak ilo m̧ōnjar eo. Kōtļo̧k bwe ajri ro ren kwaļo̧k ta eo kajjojo iaan jin̄n̄a kein rej pinej jenkwan.
Katakin Katak eo: Ajri ro Reddikļo̧k
Jetōb Kwojarjar eo ej jipan̄ eō en̄jake iakwe, lan̄lōn̄, im aenōm̧m̧an.
Ajri ro remaron̄ kile leen Jetōb. Menin enaaj keppoj er n̄an kappukot im̧we eo an Jetōb Kwojarjar ilo aolepen mour ko aer.
M̧akūtkūt ko Maron̄ Kōm̧m̧ani
-
Kwaļo̧k pijain leen wōjke ko, im kajjitōk ippān ajri ro n̄an kōmeļeļeiki elmen lemen kajjojo leen wōjke. Kōmeļeļeiki bwe āinwōt an oktak lemen ko aer, jemaron̄ en̄jake Jetōb Kwojarjar ilo elōn̄ wāween ko roktak, āinwōt iakwe im aenōm̧m̧an. Kōmeļeļeik jet wāween ko kwaar en̄jake Jetōb Kwojarjar ilo mour eo am̧, im kōtļo̧k bwe ajri ro ren kwaļo̧k elmen an Jetōb Kwojarjar im̧we er.
Aolep ajri remaron̄ en̄jake “leen Jetōb.”
-
Riiti Galetia 5:22–23 ippān ajri ro, im kōmeļeļeiki naan ko me emaron̄ jab alikkar. Kajjitōk ippān kajjojo ajri n̄an kāālet juon leen Jetōb kar kwaļo̧ke ilo eoon kein, im jipan̄ er ļōmņake juon iien ke rekar en̄jake. Kajjitōk ippān ajri ro n̄an jin̄aiki pija ko kōn en̄jake ko aer.
Jisōs Kraist ekōņaan bwe in jipan̄ ro rej aikuj.
Kōmeļeļe ilo Galetia 6:2 ej āinwōt katak ko an Alma ilo Mosaia 18:8 n̄an armej ro rej tin peptaij. Bōk iien in em̧m̧an n̄an jipan̄ ajri ro kōppopo n̄an bujen ko an peptaij.
M̧akūtkūt ko Maron̄ Kōm̧m̧ani
-
Kwaļo̧k juon pija in juon ajri ej an peptaij (āinwōt Gospel Art Book,, no. 104). Kajjitōk ippān ajri ro ta eo ajri eo ej kōm̧m̧ane. Kōmeļeļeiki bwe ke jaar peptaij, jej kōm̧m̧ani bujen ko, ak kallim̧ur ko. Riiti Galetia 6:2 ak Mosaia 18:8 n̄an jipan̄ ajri ro meļeļe juon iaan men ko jej kallim̧ur n̄an kōm̧m̧ane: ineek eddodo ko an doon. Kajjitōk ippān ajri ro n̄an jin̄aik pija in wāween ko remaron̄ jipan̄ doon ro rej ineek eddodo ko.
-
Riiti n̄an ajri ro naan in jān Galetia 6:2: “Koṃwin bōk men in eddo ko an doon.” N̄an kalikkar ta meļeļein menin, leļo̧k n̄an ajri ro jet men reddo n̄an ineki. Innām kajjitōk bwe juon en baļentier n̄an jipan̄ ajri eo inek men eo. Kōmeļeļeik n̄an ajri ro ke elōn̄ men ko remaron̄ en̄jake āinwōt eddo, āinwōt nan̄inmej ak būrom̧ōj ak ajimakeke. Ta eo jemaron̄ kōm̧m̧ane n̄an jipan̄ armej eo kōn kain eddo rot in?
Makūtkūt ko ad, jim̧or em̧m̧an im nana, ewōr jem̧ļo̧kier.
Kwaļo̧k bwe jej m̧adm̧ōde ta eo jej kallibwi, āinwōt an kōmeļeļeiki ilo Galetia 6:7–9, komaron̄ katakin ajri ro n̄an ļōmņaki m̧akūtkūt ko aer.
M̧akūtkūt ko Maron̄ Kōm̧m̧ani
-
Kwaļo̧k juon ine ak juon leen wōjke. Riiti Galetia 6:7–9 n̄an ajri ro. Kajjitōk ippān ajri ro n̄an katen wōt n̄e rej katōk ine eo n̄e rej ron̄ naan eo kalbwin. Kajjitōk ippāer n̄an katen wōt n̄e rej ebbōk leen wōjke jān juon menin eddōk n̄e rej ron̄ naan eo m̧adm̧ōd.
-
Kwaļo̧k n̄an ajri ro jet kain leen wōjke ko, im jipan̄ er pukoti ine ko aer. Likūt ine ko ilo juon nine, im kōtļo̧k bwe ajri ro ren bōk kuņaer kālete juon im kwaļo̧k ta eo leen wōjke eo enaaj eddōkļo̧k n̄e rej katōke. Jipan̄ er bwe ilo an ine ko jej katōki me leen wōjke ko jej būki, kāālet jej kōm̧m̧ani kōn jekjek ko im kōjeraam̧m̧an ko jej buki.
-
Kōm̧m̧ane juon ļain ioon laļ kōn teip. Likūt juon mej elem̧ōņōņō im juon mej ebūrom̧ōj ilo jem̧ļo̧kin ļain ko. Kajjitōk ippān juon ajri n̄an jutak ilo io̧lepen ļain eo, im jipan̄ ajri ro jet ļōmņaki kāālet ko me renaaj tōlļo̧k n̄an m̧ōņōņō ak būrom̧ōj. N̄an kajjojo kāālet, kajjitōk ippān ajri eo ilo io̧lep bwe en kem̧antak n̄an jait eo em̧ōņōņō ak jait eo ebūrom̧ōj. Ālijin m̧akūtkūt in elōn̄ alen, im kōtļo̧k bwe ajri ro ren bōk kuņaer jutak ilo teip eo.
Katakin Katak eo: Ajri ro Rerūttoļo̧k
Peptaij ej kōm̧m̧an bwe jen “juon ilo Kraist.”
Paul ekar katakin ro Rikwojarjar ilo Galetia bwe ke rekar peptaij rekar erom̧ “juon ilo Kraist Jisōs.” Elmen am̧ maron̄ jipan̄ ajri ro kajjieon̄ in juon wōt ilo ak kōmeļeļeiki ilo Galetia 3:26–28?
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an riiti Galetia 3:26–28 ippān kajjitōk in ilo kōļmenļo̧kjeņ: Ta eo ej waļo̧k n̄e ij peptaij? Kwomaron̄ kōņaan pedped wōt ilo naan in āinwōt “likūt ioon Kraist” ak “juon ilo Kraist.” Ta meļeļein naan kein? Elmen “likūt ioon Kraist” āinļo̧k wōt bōk iood make Etan? (lale Katak im Bujen Ko 20:75–79). Ta eo jemaron̄ kōm̧m̧ane n̄an kwaļo̧k n̄an ro jet ke em̧ōj ad bōk?
-
Riit ippān doon Galetia 3:28, im kalikkar jet iaan wāween ko armej ro rekar kile er make ke rekar peptaij ilo tōre ko an Paul. Jipan̄ ajri ro kwaļo̧k jet iaan wāween ko remaron̄ kalikkar er make rainin. Ta eo Paul ej kajjieon̄ katakin kōj kōn kile ad aikuj loe ippān doon ke jaar peptaij?
N̄e ij “etetal ilo Jetōb,” Inaaj bōk “leen Jetōb.”
Ke jaar peptaij im bōk menin letok eo an Jetōb Kwojarjar, jemaron̄ bōk eļapļo̧k leen Jetōb ilo mour ko ad. Ekōjkan ad maron̄ jipan̄ ajri ro kile leen jetōb in ilo mour ko aer?
M̧akūtkūt ko Maron̄ Kōm̧m̧ani
-
Leļo̧k n̄an kajjojo ajri jidik peba (komaron̄ m̧wijiti peba eo n̄an āinwōt leen wōjke ko), im kajjitōk ippān ajri ro n̄an pukōt juon “leen Jetōb” ej elaajrak ilo Galetia 5:22–23. Kajjitōk ippāer n̄an je juon iaan leen ko ioon peba eo aer im juon naan ej oktan meļeļein ilo rājet eo juon. (Jipan̄ er meļeļe naan ko me remaron̄ jab jeļā kaki.) Kajjitōk ippāer n̄an jeere leen jetōb ko aer ippān kūlaaj eo. Ta eo jemaron̄ kōm̧m̧an n̄an bōk Jetōb Kwojarjar iien otemjej ippād?
-
Kajjitōk ippān ajri ro n̄an riit kōn leen Jetōb ilo Galetia 5:22–23 im je kake ak jin̄aiki juon pija in juon tōre rekar en̄jake juon iaan leen ko. Kajjitōk ippāer n̄an kwaļo̧k bwebwenato ko aer ak pija eo ippān bar juon armej ilo kūlaaj eo. Etke leen eo ej juon wāween eo em̧m̧an n̄an jipan̄ kōj meļeļe elmen an Jetōb im̧we kōj?
Makūtkūt ko ad, jim̧or em̧m̧an im nana, ewōr jem̧ļo̧kier.
Jipan̄ ajri ro meļeļe bwe jekjek in m̧wiļ ko ad jet iien em̧ōkaj ar waļo̧k im jet iien rej itok “iien ekkar” (eoon 9).
M̧akūtkūt ko Maron̄ Kōm̧m̧ani
-
Riit ippān doon Galetia 6:7–9. Leļo̧k juon laajrak in m̧akūtkūt ko (ak ine ko jej “kalbwini”) im jekjek ko (ak leen eo jej “m̧adm̧ōde”) Kajjitōk ippān ajri ro n̄an kōmejāāji m̧akūtkūt ko n̄an jekjek ko aer.
-
Kajjitōk ippān ajri ro n̄an laajrakin jet iaan kōjeraam̧m̧an ko rej kōtmeni n̄an būki jān Jemedwōj Ilan̄. Jipan̄ ajri ro ļōmņak kōn “ine ko” rej kallibwin bwe ren “m̧adm̧ōde” kōjeraam̧m̧an kein.
Kōketak Ekkatak ilo M̧weo
Jipan̄ ajri ro pukōt wāween ko me m̧ool ko rekar ekkatak rainin n̄an mour kaki ilo mour ko aer. N̄an waanjon̄ak, komaron̄ kajjitōk ippāer n̄an kappukoti jekjek ko rem̧m̧an ak “leen,” me rej itok kōn wōt kāālet ko rem̧m̧an rej kōm̧m̧ani.
Kōkm̧anm̧anļo̧k Ad Katakin
Ukukōt m̧akūtkūt ko n̄an dettan iiō eo an ajri ro. Leļo̧k n̄an ajri ro iien em̧m̧an n̄an kam̧m̧oolol, ak keememej bwe maron̄ eo aer n̄an kōm̧m̧ani naaj ekkar n̄an iiō im jeļā eo aer. Ajri ro reddik remaron̄ aikuj ļōm̧ņak im tōl ko reļļapļo̧k Ilo aer rūttoļo̧k, ajri ro remaron̄ leļo̧k elapļo̧k ak maron̄ em̧m̧anļo̧k aer kwaļo̧k ļōmņak ko aer. (Lale Teaching in the Savior’s Way,, 25–26.)