Oktoba 9–15.

Pilippai; Kolosse

“I Maron̄ in Kōm̧m̧an Men Otemjej ilo Eo ej Kōkajoor Eō.”

N̄aat eo āliktata kwaar riiti en̄jake ko am̧ ilo jetōb me kwar je ilo iien am̧ kar ekkatak jān jeje ko rekwojarjar? Emaron̄ lukkun jipan̄ n̄an etale im̧we kein me kwar en̄jake.

Je En̄jake ko Rej Im̧we Eok

Paul eaar je leta ko an n̄an ri Pilippai im ri Kolosse ke ekar pād ilo kalbuuj ilo Rom. Ak leta kein ejjeļo̧k ainikien me kwonej kōtmene jān juon armej ilo kalbuuj. Paul ekar ļap an kōnono kōn lan̄lōn̄, m̧ōņōņō, im kam̧m̧olool ijeļo̧kin an kōnono kōn en̄taan im mellijon̄ ko: “Em̧ōj kwaļo̧k Kraist,” ekar ba, “im ij lan̄lōn̄ kake, aet im inaaj lan̄lōn̄” (Pilippai 1:18). Im “men̄e ij ettoļo̧k jān kom̧ ilo kanniōk, mekarta ij pād ippemi ilo jetōb, im lan̄lōn̄ im ilo ami jim̧we … im e pen ami lōke Kraist” (Kolosse 2:5). Ilo m̧ool, “aeņōm̧m̧an jān Anij” me Paul ekar en̄jake ilo iien ko reppen rekar “eļļā jān jeļā otemjej” (Pilippai 4:7), ak mekarta rekar m̧ool. Ilo mellijon̄ ko ad make, jemaron̄ en̄jake ejja aeņōm̧m̧an in wōt im “lan̄lōn̄ ilo Irooj iien otemjej” (Pilippai 4:4). Jemaron̄, āinwōt kar Paul, ekar pedped wōt ioon Jisōs Kraist, “Ej pinmuur n̄an kōj” (Kolosse 1:14). Jemaron̄ ba, āinwōt kar Paul, “I maron̄ in kōm̧man men otemjej ilo Eo ej kakajoor eō” (Pilippai 4:13; bar lale Kolosse 1:11).

Ļōmņak ko n̄an Ekkatak Jeje Ko Rekwojarjar Ippam̧ Make

Pilippai 2:5–11; Kolosse 1:12–23

Tōmak eo aō ej pedped wōt ioon Jisōs Kraist.

Būreejtōn Russell M. Nelson eakr bwe ke ekar mijōk wōt an ekkatak eoon ko kōn Jisōs Kraist, ekar en̄jake eļap oktak ilo e jon̄an ekar en̄jake “juon [em̧m̧aan] eoktak!” (“Bōktok Kajoor eo an Jisōs Kraist ilo Mour ko Ad,” Liaona, Māe 2017, 39). Ļōmņak kōn waanjon̄ak in an ilo am̧ riiti Pilippai im Kolosse (lale eļaptata Pilippai 2:5–11; Kolosse 1:12–23). Ta eo kwoj ekkatak kōn Rilo̧mo̧o̧r? Ewi wāween an m̧ool kein jipan̄ eok erom̧ “juon [em̧m̧aan] eoktak” ak kōrā?

Pilippai 2:12–13

Jej ke “jerbale [mour in] ļomo̧o̧r [eo ad make]”?

Jet armej rej kōjerbal naan in “jerbale [mour in] lo̧mo̧o̧r [eo ami make]” (Pilippai 2:12) n̄an rie ļōmņak in ke jej bōk lo̧mo̧o̧r jān wōt kijejeto ko ad make. Ro jet rej kōjerbal katak ko an Paul “kōn jouj em̧ōj lo̧mo̧o̧remi kōn tōmak” (Epesōs 2:8) n̄an kam̧ool bwe emenin aikuj jerbal n̄an bōk lo̧mo̧o̧r. Ijoke, jeje ko rekwojarjar, ekoba jeje ko an Paul, ealikkar an katakin aikuj ko jim̧or jouj an Jisōs Kraist im kijejeto ko an juon make n̄an bōk lo̧mo̧o̧r. Im barāinwōt ilo kijejeto ko ad rem̧m̧an n̄an jerbale lo̧mo̧o̧r ko ad, “[ej Anij] eo ej jerbal ilo kom̧” (Pilippai 2:13; bar lale Pilippai 1:6; 2 Nipai 25:23; Bible Dictionary, “Grace”).

Pilippai 3:4–14

Eļap tokjen aolep wūjlepļo̧k ko ad ilo gospel eo an Jisōs Kraist.

Paul ekar wūjlepļo̧k eļap ke ekar oktak n̄an gospel eo an Jisōs Kraist, ekoba jikin eo eaorōk ekar kōm̧m̧ane ilo jukjuk in pād eo an ri Ju ro āinwōt juon ri Parisi. Ilo Pilippai 3:4–14, kappukot ta tōprak eo an Paul kōn wōt an kar ikdeleel n̄an wūjlepļo̧k n̄an gospel eo. Ewi wāween an en̄jake kōn an wūjlepļo̧k?

Innem ļōmņak kōn mour eo am̧ āinwōt juon rikaļoor. Ta eo kwar wūjlepļo̧k n̄an gospel eo an Jisōs Kraist? Ta eo kwar en̄jake ak bōke? Elōn̄ ke bar jet wūjlepļo̧k ko kwoj en̄jake kwoj aikuj kōm̧m̧ani n̄an erom̧ juon rikaļoor eo ewūjlepļo̧k an n̄an Rilo̧mo̧o̧r?

Bar lale 3 Nipai 9:19–20; Katak im Bujen Ko 58:2–5; Taylor G. Godoy, “One More Day,” Liaona, Māe 2018, 34–36.

Pilippai 4:1–13

Imaron̄ lo lan̄lōn̄ ilo Kraist, jekdo̧o̧n jekjek ko ij iooni.

Mour eo an Paul ej juon kōmeļeļe ekajoor kōn m̧ool eo kar kōmeļeļeiki jān Būreejtōn Russell M. Nelson: “N̄e mour ko ad rej pedped wōt ilo Jisōs Kraist im gospel eo An, jemaron̄ en̄jake m̧ōņōņō jekdo̧o̧n ta eo ej waļo̧k—ak ejjab waļo̧k—ilo mour ko ad. Mōņōņō ej itok jān im kōn E” (“Lan̄lōn̄ im Mour ilo Jetōb,” Liaona, No̧b. 2016, 82).

Ilo am̧ riiti Pilippai—eļaptata jeptar 4—kappukot naan ko me remaron̄ jipan̄ eok lo lan̄lōn̄ ilo jabdewōt jekjek in mour eo am̧. N̄eet eo kwar en̄jake “aeņōm̧m̧an jān Anij” ilo iien ko reppen? (eoon 7). N̄aat eo kwar lo kajoor “kōn Kraist” n̄an kōm̧m̧ani men ko reppen? (eoon 13). Etke kwoj ļōmņak eaorōk n̄an “jokane” ilo aolep jekjek ko? (eoon 11). Ewi wāween ilo ad mour kōn m̧wil kein ilo eoon 8 jipan̄ eok lo lan̄lōn̄ ilo jekjek ko am̧?

Lale Alma 33:23; Dieter F. Uchtdorf, “Kam̧m̧oolol ilo Jabdewōt Jekjek ko,” Liaona, Māe 2014, 70–77.

Kolosse 3:1–17

Rikaļoor ro an Jisōs Kraist rej erom̧ armej “kāāl” ilo aer mour kōn gospel eo An.

Ewi wāween an m̧ool kein jipan̄ eok erom̧ “juon [em̧m̧aan] eoktak” ak kōrā? Juon wāween kejokļo̧kjeņ kōn menin ej n̄an lale Colossians 3:1–17 im kōm̧m̧ane juon laajrak in m̧wil ko, manit, im jerbal an “armej eo m̧okta” im bar juon laajrak in m̧wil, manit, im jerbal ko an juon “armej ekāāl.”

Rekoote ļōmņak eo am̧ kōn wāween an Rilo̧mo̧o̧r ukukote eok, bwe kwon maron̄ etale ilju im jekļaj im kejokļo̧kjeņ kōn wāween am̧ eddōkļo̧k im wōnm̧aanļo̧k.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Pilippai.Baam̧le eo am̧ emaron̄ kile naan kein lan̄lōn̄ ak m̧ōņōņō ekkā aer āliji ilo bok in Pilippai. Kajjojo iien kwoj lo naan kein, kwomaron̄ bōjrak im kōmeļeļeik ta eo Paul ekar katakin kōn wāween kappukot lan̄lōn̄.

Pilippai 2:14–16.Ewi wāween ad “waļo̧k āinwōt meram ko ilo laļ”?

Pilippai 4:8.Ro uwaan baam̧le eo remaron̄ lale ta ko remaron̄ “ļōmņak kōn” me ejejjet n̄an kōmeļeļe ko ilo eoon in (bar lale Laajrak in Tōmak Ko 1:13). Ewi wāween an baam̧le eo am̧ jeraam̧m̧an ilo an ļoor kapilōk eo an Paul?

Kolosse 1:23; 2:7.Bolen baam̧le eo am̧ emaron̄ riiti eoon kein ilo aer jijet ilo turin wōjke eo ak kalimjōk juon pija in juon wōjke (āinwōt eo me ejejjet n̄an laajrak in). Ta meļeļein n̄an “pedped” im “likūt okram̧” ilo Kraist? Ewi wāween ad jipan̄ doon kōkajoorļo̧k okar in jetōb ko ad?

Kolosse 2:2–3.Baam̧le eo am̧ emaron̄ lan̄lōn̄ ilo aer kanne “juon bo̧o̧k in nien men aorōkrōk ko” ippān men ko me rej bōk jikin “m̧weie” im “men ko aorōk ikkijeen mālōtlōt im jeļāļo̧kjeņ” kwoj loe ilo gospel eo.

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Rejoice, the Lord Is King!,” Hymns, no. 66.

Kōkm̧anm̧anļo̧k Ad Katakin

Mour kōn naan in kam̧ool eo am̧. “Kwon katakin ta eo kwoj katak,” Elder Neal A. Maxwell eaar katakin. “M̧wilim naaj ļapļo̧k kemeemeje … jān juon m̧ool ealikkar ilo juon katak ealikkar” (ilo Teaching in the Savior’s Way, 13).

Paul ekar katakin bwe tōmak eo ad ej aikuj “likūt okram̧” ilo Jisōs Krais (Kolosse 2:7).