Oktoba 2–8

Epesōs

“N̄an Koweeppānļo̧k Ro Rem̧m̧an”

Kwoj ke lo jabdewōt koneekjen ko ikōttan ennaan ko ilo kweilo̧k eo eļap im Leta eo an Paul n̄an ri Epesōs?

Je En̄jake ko Rej Im̧we Eok

Ke gospel eo ekar jino ajeded ilo Epesōs, ekar kōm̧m̧an an “eļap pok” (Jerbal 19:23) ilubwiljin ri Epesōs ro. Armej m̧oņ ro rej kōm̧m̧an jikin n̄an juon anij ekjab rekar lo Kūrijtin āinwōt juon menin kamijak n̄an mour ko aer, im ejjab to “rej obrak kōn illu, … im aolepen jikin kweilo̧k e obrak kōn keroro” (lale Jerbal 19:27–29). Pijaikļo̧k juon armej eo ej kab oktak tok n̄an gospel in ilo juon kain jekjek rot in. Elōn̄ ri Epesōs ro rekar bōk im mour kōn gospel eo jekdo̧o̧n “keroro” (Acts 19:40), im Paul ekar kam̧ooli bwe “Kraist … aeņōm̧m̧an eo ad” (Epesōs 2:13–14). Naan kein, ippānļo̧k kūr in n̄an “len jako jān kom̧ meo̧ otemjej, im kwi, im illu, im airuwaro, im kōnono ņae” (Epesōs 4:31), āinwōt rej kōm̧m̧an im kaeņōm̧m̧an kiiō jān kar tōre ko etto? N̄an ri Epesōs ro, āinwōt kōj aolep, kajoor eo n̄an jelm̧ae apan̄ ej itok “ilo Irooj, im ilo kajoor in maron̄ eo An” (lale Epesōs 6:10–13).

Ļōmņak ko n̄an Ekkatak Jeje Ko Rekwojarjar Ippam̧ Make

Epesōs 1:4–11, 17–19

Anij ekar kāālet, ak kar Kapiti, eō n̄an kakūrm̧ool jejjo eddo ko ioon laļ in.

Paul ekar kōnono kōn Armej ro Rekwojarjar aer kar “pepe” jān Anij im “An kāālōt kōj … m̧okta jān jinoin laļ” n̄an erom̧ armej ro An. Ijoke, āinwōt an Būreejtōn Henry B. Eyring kar je, ejjab meļeļein “ke Anij ekar baj kālet wōt m̧okta wōn ro Nejin enaaj kar lo̧mo̧o̧ren er im leļo̧k n̄an er gospel eo, ak ro jet me rejjan̄in ron̄ kōn gospel eo ej kōnke rekar jab ‘chosen’ er. … Karōk eo an Anij eļap an em̧m̧an im etūriamo̧ jān jon̄an en jej ļōmņake. Jemedwōj Ilan̄ ej ikdeleel n̄an kobaik im kōjeraam̧m̧an aolepān baam̧le eo An” (“Kakobaik Baam̧le eo an Anij,” Liaona, Māe 2017, 20–21). Aolep ajri ro nejin Anij remaron̄ bōk gospel eo im kain̄i ko kōn jerbal eo rekar kōm̧m̧ane n̄an ro remej ilo tampeļ ko rekwojarjar.

Men̄e ejjeļo̧k ej pepe n̄an bōk ak jab bōk lo̧mo̧o̧r, revelesōn ko raan kein rej katakin bwe jet iaan ajri ro nejin Anij kar kālet er, ak “kar kapit m̧okta,” ilo mour eo iinoin n̄an kakūrm̧ool jejjo eddo ko n̄an kadedeikļo̧k kōttōpar ko an Anij ioon laļ in. Ilo am̧ riiti Epesōs 1 im Gospel Topics, “Foreordination” (topics.ChurchofJesusChrist.org), kejokļo̧kjeņ kōn wāween an m̧ool in iookļo̧k waj eok.

Epesōs 1:10

Anij enaaj “kakobaiktok aolep men ko ilo Kraist bwe ren juon wōt.”

Etke kwoj ļōmņak raan kein rej ņa etan “epepen ilo iien ko re jejjet”? Ta meļeļe in n̄an “kuktok ippān doon ilo juon wōt kōn men ko otemjej ilo Kraist”? Ilo am̧ kejokļo̧kjeņ kōn naan kein, riiti eoon kein rej ellaajrak: Epesōs 4:13; 2 Nipai 30:7–8; Katak im Bujen Ko 110:11–16; 112:30–32; 128:18–21. Kwomaron̄ en̄jake im̧we n̄an je kōmeļeļe ko am̧ make kōn naan kein.

Bar lale David A. Bednar, “Kuktok Ippān Doon ilo Juon wot Kōn Men Otemjej ilo Kraist,” Liaona, Nob. 2018, 21–24.

Epesōs 2:19–22; 3:1–7; 4:11–16

Kabun̄ in ej pedped ioon rijilōk im rikanaan ro, im Jisōs Kraist ej dōkā in jabōn em̧

Ekkar n̄an Epesōs 2:19–22; 3:1–7; 4:11–16, etke ewōr ad rikanaan im rijilōk? Ļōmņak kōn ennaan ko jān rikanaan ro im rijilōk ro kwar ron̄ ilo iien kweilo̧k eo eļap. Ewi wāween an katak ko aer kakūrm̧ool kōttōpar ko me Paul ekar kōmeļeļeiki? N̄an waanjon̄ak, ewi wāween an katak kein jipan̄ eok jab “m̧akūtkūt kōn jabdewōt kōto in katak”?

Ewi wāween an Jisōs Kraist āinwōt juon jabōn em̧ n̄an Kabun̄ in? Ewi wāween An āinwōt juon dōkā in jabōn em̧ ilo mour eo am̧?

Bar lale Jerbal 4:10–12.

Jisōs Kraist ej dōkā in jabōn em̧ an Kabun̄ in.

Epesōs 5:21–6:4

Ļoor waanjon̄ak eo an Rilo̧mo̧or emaron̄ kōkajoorļo̧k jem̧jerā eo an baam̧le eo am̧.

Ilo am̧ riiti Epesōs 5:21–6:4, ļōmņak kōn wāween an kapilōk in ilo eoon kein maron̄ kōkajoorļo̧k jem̧jerā eo an baam̧le eo am̧.

Eaorōk n̄an ņoote naan ko an Paul ilo Epesōs 5:22–24 kar je ilo naan ko me rejejjot im rekkar n̄an tōre eo. Rikanaan ro im rijilōk ro rej katakin bwe em̧m̧aan ro rejjab utiej ļo̧k jān kōrā ro im bwe ripālele ro rej aikuj “juon wōt” (lale “Baam̧le Eo: Juon Kean̄ n̄an Laļ in,” ChurchofJesusChrist.org). Men̄e menin, kwomaron̄ kappukot kapilōk eo an eaorōk ilo Epesōs 5:25–33. N̄an waanjon̄ak, ewi wāween an Kraist kwaļo̧k iakwe eo An n̄an Armej ro Rekwojarjar? Ta eo menin ej kwaļo̧k kōn wāween an ripālele, āinwōt paatnōr ro rej juōn wōt, rej aikuj kōm̧m̧an n̄an doon? Ta ennaan ko kwoj loi n̄an eok make ilo eoon kein?

Epesōs 6:10–18

Kein tariņae an Anij enaaj jipan̄ eō jutak ņae nana.

Ilo am̧ riiti Epesōs 6:10–18, ļōmņak etke Paul ekar likūt etan kajjojo m̧ōttan kein tariņae ko ilo wāween eo ekar kōm̧m̧ane. Ta eo “aolepen kein tariņae an Anij” ej kōjparok kōj jān e? Ta eo jemaron̄ kōm̧m̧an n̄an lukkuun kalibobo kōn kajjojo m̧ōttan kein tariņae ko aolep raan?

Bar lale 2 Nipai 1:23; Katak im Bujen Ko 27:15–18.

Ļōmņak ko n̄an Ekkatak Jeje ko Rekwojarjar an Nokon in Jota an Baam̧le

Epesōs 1:10.N̄an katakin kōn eoon in, Elder David A. Bednar ekar kōjerbal waanjon̄ak in kōn juon to kileplep (lale “Kuktok Ippān Doon ilo Juon wot Kōn Men Otemjej ilo Kraist”). Ļōmņak in kwaļo̧k n̄an ro uwaan baam̧le eo juon to kileplep im kōtļo̧k bwe ren dāpij im etale ilo am̧ kwaļo̧k m̧ōttan ko ilo ennaan eo an Elder Bednar Ewi wāween an Anij aiintok aolep men ko ippān ilo Kraist? Ewi wāween ad jeram̧m̧an kōn aiintok doon in?

Epesōs 2:4–10; 3:14–21.Karuwaineneik ro uwaan baam̧le eo am̧ n̄an kwaļo̧k en̄jake ko me rekar en̄jake iakwe im tūriam̧o an Anij im Jisōs Kraist kar kōmeļeļeiki ilo eoon kein.

Epesōs 2:12–19.Baam̧le eo am̧ emaron̄ lan̄lōn̄ kōn oror ko jān bet ko ak men ko jet ilo m̧ōko innem kakkuri. Ke Paul ekar kōnaan kōn “oror” ikōtaan Ri aelōn̄ ko im Ri ju ro, kain oror rōt eo ej kōjepel kōj rainin? Ewi wāween an Jisōs Kraist “rubi” oror kein? Ewi wāween An “kōllaajrak [kōj] ippān Anij”? (eoon 16).

Epesōs 6:10–18.Baam̧le eo am̧ remaron̄ make kōm̧m̧ane aer “kein tariņae an Anij” ilo aer kōjerbal men ko ilo m̧weo. Bitio eo “The Armour of God” (ChurchofJesusChrist.org) emaron̄ jipan̄ ro uwaan baam̧le eo pijaiki kein tariņae in, im remaron̄ lo jet iaan kōmeļeļe ko ilo “The Whole Armor of God” (Friend, June 2016, 24–25). Ewi wāween an m̧ōttan ko kajjojo ilo kein tariņae ko kōjparok kōj ilo jetōb? Ta eo jemaron̄ kōm̧m̧ane n̄an jipan̄ doon “kōņak aolepen kein tariņae an Anij” (Epesōs 6:11) aolep raan?

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere

Al eo kar elmakote: “Hope of Israel,” Hymns, no. 259.

Kōkm̧anm̧anļo̧k Am̧ Ekkatak Ippam̧ Make

Kōm̧m̧an bwe Jetōb eo en tōl ekkatak eo am̧. En m̧ōkaj am̧ kile unoojdikdik ko An ilo An tōl m̧aanļo̧k eok n̄an men ko me kwoj aikuji n̄an ekkatak kajjojo raan, jekdo̧o̧n eļan̄n̄e unojidikdik ko An rej kwaļo̧k bwe kwon riit ak ekkatak juon unin kōnono eoktak jān am̧ kijon̄ ak ilo juon wāween eoktak

Kanōk nuknuk in tariņae ko an Anij emaron̄ kōjparok eok ilo jetōb.