16–22 ʻOkatopa

1 mo e 2 Tesalonika

“Fakakakato ʻA Ia ʻoku Toe ʻi Hoʻomou Tuí”

ʻI hoʻo lau ʻi he faʻa lotu ʻa e 1 mo e 2 Tesalonika mo e fakakaukau ki he fānaú, te ke maʻu ai ha ngaahi tefitoʻi moʻoni ne nau fie maʻu ke mahino kiate kinautolu.

Fakaafeʻi e Feʻinasiʻakí

ʻI he lēsoni ʻo e uike kuo ʻosí, naʻá ke fakaafeʻi nai e fānaú ke nau fakaʻaongaʻi ʻa e ngaahi meʻa ne nau akó ʻi ha faʻahinga founga pē? Tuku ki he fānaú ke nau fakaʻaongaʻi e ngaahi ʻuluaki miniti siʻi ʻo e kalasi ʻi he uike ní ke vahevahe ʻenau ngaahi aʻusiá.

Akoʻi e Tokāteliné: Fānau Iiki Angé

1 Tesalonika 5:1–6

ʻI heʻeku muimui ki he ngaahi fekau ʻa e ʻOtuá, te u mateuteu ai ki he Hāʻele ʻAnga Ua Mai ʻa Sīsū Kalaisí.

ʻOku ʻikai ke tau ʻilo e taimi ʻe toe hāʻele mai ai ʻa e Fakamoʻuí ki he māmaní. Ka te tau lava ʻo tokanga kiate Ia mo teuteu ki Heʻene hāʻele maí.

Ngaahi ʻEkitivitī ʻe Ala Fakahokó

• Fakaafeʻi ha faʻē ke ne vahevahe nounou pe ko e hā ʻene ongo ʻi heʻene tatali ke fāʻeleʻi ʻene pēpeé. Lau e 1 Tesalonika 5:2–3, pea talaange ki he fānaú ʻe toe hāʻele mai ʻa Sīsū Kalaisi ki he māmaní, ka ʻoku ʻikai ʻilo pau ha taha ki he taimí—hangē ko e ʻikai ʻilo ʻe ha faʻē ʻa e taimi ʻe fanauʻi ai ʻene pēpeé.

• Kole ki he fānaú ke nau talanoa fekauʻaki mo ha taimi ne nau teuteu ai ki ha fononga ʻeveʻeva pe kātoanga. Ko e hā ne nau fai ke nau teuteu aí? ʻOmi ha kato vala pe kato, pea tuku ki he fānaú ke nau pehē pē ʻoku nau faʻo ia ko e teuteu ki ha fononga ʻeveʻeva. Ko e meʻa kotoa pē ʻoku fakangalingali ʻe he fānaú ke faʻo ki he kató, tokoni ke nau fakakaukau ki ha founga ʻe taha ʻe lava ke tau teuteu ai ki he toe hāʻele mai ʻa Sīsū Kalaisí.

• Lau e 1 Tesalonika 5:6 ki he fānaú pea fakamatalaʻi ange kapau ʻoku ʻikai ke tau teuteu ki he toe hāʻele mai ʻa Sīsuú, ʻoku hangē ia kuo tau tō ʻo mohe pea ʻikai ke tau mateuteu kiate Iá. Fakaafeʻi e fānaú ke nau pehē pē ʻoku nau mohe. Fakamatalaʻi ange kapau te tau mateuteu, ʻoku hangē ia ʻoku tau ʻāʻā ʻo tatali kiate Iá. Fakaafeʻi ke nau ʻā hake.

• Hivaʻi fakataha ha foʻi hiva fekauʻaki mo e Hāʻele ʻAnga Ua Maí, hangē ko e “ʻO Ka Ne Ka Toe Haʻú” (Tohi Hiva ʻa e Fānaú, 46–47).

2 Tesalonika 2:1–3

Naʻe akoʻi mai ʻe Paula ʻe hoko ha hē mei he moʻoní kimuʻa pea toe hāʻele mai ʻa Sīsū Kalaisí.

Naʻe faifai pea hē ʻa e Siasi naʻe fokotuʻu ʻe Sīsū Kalaisí mei he moʻoní, ko hono ʻuhingá naʻe ʻave ʻa e mafai ʻo e lakanga fakataulaʻeikí mo e ngaahi moʻoni ʻo e ongoongoleleí mei he māmaní. Naʻe kikiteʻi ʻe Paula ʻe hoko ʻa e hē ko ʻeni mei he moʻoní, pe ko e “liliu koví,” kimuʻa ʻi he Hāʻele ʻAnga Ua Mai ʻa e Fakamoʻuí.

Ngaahi ʻEkitivitī ʻe Ala Fakahokó

• Hili hono lau mo e fānaú e 2 Tesalonika 2:3, tuku ke nau tokoni atu ʻi hono langa ha taua ʻaki ha ʻū ipu pelesitiki pe poloka. Talaange ki he fānaú ʻoku fakafofongaʻi ʻe he ʻū ipú pe poloká ʻa e ngaahi konga mahuʻinga ʻo e Siasi moʻoní, hangē ko e ngaahi moʻoni ʻo e ongoongoleleí, lakanga fakataulaʻeikí, sila ʻi he temipalé, mo e kau palōfitá. Hili e pekia ‘a Paula mo e kau ʻAposetolo kehé, naʻe mole e ngaahi meʻá ni, pea naʻe ʻikai ke ʻi he māmaní ʻa e Siasi moʻoní ʻi ha ngaahi taʻu lahi. Fakaafeʻi ha taha he fānaú ke ne holoki e tauá, pea fakamatalaʻi ange ʻoku ui ʻeni ko e Hē mei he Moʻoní pe “liliu koví.” ʻI he taimi naʻe fakafoki mai ai ʻe Sīsū Kalaisi ʻa Hono Siasí, naʻe ui ia ko e Fakafoki Mai ʻo e Ongoongoleleí.

• Fakaʻaliʻali ha Tohi ʻa Molomona mo e ʻū fakatātā ʻo e palōfitá mo ha temipale. Fakaafeʻi e fānaú ke nau lea ʻaki e “Hē mei he Moʻoní” ʻi he taimi te ke fufuuʻi ai e ʻū meʻá ʻi ha kato, pea lea ʻaki e “Fakafoki Mai e Ongoongoleleí” ʻi he taimi te ke toʻo ai e ʻū meʻá ki tuʻá.

• Hivaʻi ha ngaahi hiva ʻokú ne akoʻi e ngaahi moʻoni naʻe ʻave lolotonga e Hē mei he Moʻoní pea fakafoki mai ʻi hotau kuongá, hangē ko e “Ko e Siasi ʻo Sīsū Kalaisí,” “Mafai Kuo Toe ʻOmí,” mo e “Fie Siofia Ha Temipale” (Tohi Hiva ʻa e Fānaú, 48, 60, 99).

Akoʻi e Tokāteliné: Fānau Lalahi Angé

1 Tesalonika 5:1–6

ʻI heʻeku muimui ki he ngaahi fekau ʻa e ʻOtuá, te u mateuteu ai ki he Hāʻele ʻAnga Ua Mai ʻa Sīsū Kalaisí.

ʻE lava ke tokoniʻi kitautolu ʻe he akonaki ʻa Paulá ke tau teuteu mo tokanga ki he ʻaho lahi ko ia ʻe toe hāʻele mai ai e Fakamoʻuí ki māmaní.

Ngaahi ʻEkitivitī ʻe Ala Fakahokó

• Fakaafeʻi ha taha ʻi he fānaú ke ne lau e 1 Tesalonika 5:1–6 lolotonga e muimui atu e toenga ʻo e fānaú. Hili e veesi takitaha, kole ki ha taha he fānaú ke ne fakamatalaʻi fakanounou e meʻa ʻokú ne fakakaukau ʻoku lave ki ai e vēsí. Mahalo te ke fie fakamatalaʻi ange ʻoku ʻuhinga e “ʻaho ʻo e ʻEikí” ki he Hāʻele ʻAnga Ua Mai ʻa Sīsū Kalaisí. Ko e hā e ʻuhinga ʻoku fakahoa ai ʻa e Hāʻele ʻAnga Ua Maí ki ha tangata kaihaʻa ʻi he poʻulí pe ko ha fefine ʻoku ʻamanaki ke ne fanauʻi ha pēpeé?

• Talaange ki he fānaú ke nau fakakaukauloto ʻe ʻaʻahi mai ʻa e Fakamoʻuí ki hoʻomou kalasí ʻi ha taimi he ʻahó ni. Te tau teuteu fēfē nai ki Heʻene ʻaʻahi maí? Tokoniʻi e fānaú ke nau fakakaukau ki he ngaahi meʻa te tau lava ʻo fai ke tau teuteuʻi ai kitautolu ki he ʻaho ʻe toe hāʻele mai ai ʻa Sīsū Kalaisí. Hangē ko ʻení, te tau lava ʻo fakatomala, fakamolemoleʻi, fakaleleiʻi hotau vā fetuʻutaki mo hotau fāmilí, muimui ki he palōfitá, fekumi ke maʻu e tākiekina ʻa e Laumālie Māʻoniʻoní, mo tauhi ʻetau ngaahi fuakavá. Poupouʻi e fānaú ke nau fili e meʻa ʻe taha te nau fai ke teuteuʻi ai kinautolu ke nau tali ʻa e Fakamoʻuí ʻi Heʻene Hāʻele Maí.

2 Tesalonika 2:1–3

Naʻe akoʻi mai ʻe Paula ʻe hoko ha hē mei he moʻoní kimuʻa pea toe hāʻele mai ʻa Sīsū Kalaisi.

Kapau ʻe mahino ki he fānaú naʻe ʻave ʻa e Siasi ʻo Sīsū Kalaisí mo ʻEne ongoongoleleí mei he māmaní lolotonga ʻa e Hē Fakaʻaufuli mei he Moʻoní, ʻe mahino ange kiate kinautolu e mahuʻinga ʻo e Fakafoki Mai ʻo e Ongoongoleleí.

Ngaahi ʻEkitivitī ʻe Ala Fakahokó

• Fakaafeʻi ha taha ʻi he fānaú ke ne lau e 2 Tesalonika 2:1–3. Fakatatau ki he ngaahi veesi ko ʻení, ko e hā ne pau ke hoko kimuʻa ʻi he “ʻaho ʻo Kalaisí,” ʻa ia ʻoku ʻuhinga ki he Hāʻele ʻAnga Uá? Ko e hā e ʻuhinga ʻo e kupuʻi lea ko e “liliu kovi”? Fakapapauʻi ʻoku mahino ki he fānaú ʻoku ʻuhinga ia ki he Hē Fakaʻaufuli mei he Moʻoní, ʻa ia ne hoko hili e pekia ʻo e kau ʻAposetolo ʻa e Fakamoʻuí. Mahalo te ke fie vahevahe e fakamatala mei he “Hē Mei he Moʻoní” ʻi he Fakahinohino ki he Ngaahi Folofolá (scriptures.ChurchofJesusChrist.org).

• Tokoniʻi e fānaú ke nau lisi ʻi he palakipoé ha niʻihi ʻo e ngaahi moʻoni mo e ngaahi tāpuaki ʻoku tau fiefia ai koeʻuhi ko e ongoongoleleí. Tamateʻi taha taha e ngaahi meʻa ko ʻení, pea fehuʻi ki he fānaú pe ʻe kehe fēfē nai ʻenau moʻuí o ka taʻe kau ai e ngaahi meʻá ni. Fakamatalaʻi ange, naʻe mole ʻa e ngaahi moʻoni ko ʻení lolotonga e Hē Fakaʻaufuli mei he Moʻoní. Ko e hā e ʻuhinga naʻe mahuʻinga ai ke fakafoki mai ʻa e Siasi ʻo Sīsū Kalaisí ki he māmaní ʻi he ngaahi ʻaho kimui ní? Fakaafeʻi e fānaú ke nau “toe fakafoki” pe toe tohi e ngaahi moʻoní mo e ngaahi tāpuakí ʻi he palakipoé.

2 Tesalonika 3:7–13

ʻOku finangalo ʻa e Tamai Hēvaní ke u ngāue.

Te ke lava fēfē ʻo tokoniʻi e fānaú ke nau vakai ki he ngāué ko ha tāpuaki kae ʻikai ko ha meʻa ke fakaʻehiʻehi mei ai?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau taufetongi ʻi hono lau e ngaahi veesi mei he 2 Tesalonika 3:7–13 pea fekumi ki he palopalema naʻe fepaki mo e Kāingalotú. Ko e hā e ʻuhinga ʻoku finangalo ai e Tamai Hēvaní ke tau ngāué? Ko e hā e meʻa ʻe hoko kapau he ʻikai ʻaupito ke tau ako ke ngāue mālohi? Tuku ki he fānaú ke nau taufetongi ʻi hono fakatātaaʻi ha ngaahi ngāue faingofua kae mateʻi ʻe he toenga ʻo e fānaú ʻa e meʻa ʻoku nau faí.

• Fakaafeʻi e fānaú ke nau talanoa ki ha taimi ne nau ngāue mālohi ai ʻi ha ngāue ne vahe ange, pe ko ha taumuʻa. Ko e hā ʻenau ongo kiate kinautolu ʻi he taimi ne ʻosi ai ʻenau ngāué? ʻOku ʻuhinga ki he hā ke “ʻoua naʻa mou fiu ʻi he fai leleí”? (2 Tesalonika 3:13). Ko e hā e meʻa ʻokú ne tokoniʻi kitautolu ke tau kei hokohoko atu ʻi he taimi ʻoku faingataʻa ai ʻa e ngāué?

Poupouʻi e Ako ʻi ʻApí

Fakaafeʻi e fānaú ke nau talaange ki ha mēmipa ʻo e fāmilí pe kaungāmeʻa, ha ʻuhinga ʻe taha ʻoku nau houngaʻia ai ʻi heʻetau maʻu ʻa e ongoongoleleí ʻi māmani he ʻaho ní (ʻe ala tokoni ʻa e peesi ʻekitivitī ki he uike ní ke nau maʻu ai ha ngaahi fakakaukau).

Fakatupulaki ʻEtau Founga Akoʻí

Poupouʻi e ngaahi mātuʻa ʻa e fānaú. “Ko e ngaahi mātuʻá ko e kau faiako mahuʻinga taha kinautolu ʻo e ongoongoleleí ki heʻenau fānaú—ʻoku nau fakatou maʻu e tefitoʻi fatongia mo e mālohi lahi taha ke tākiekina ʻenau fānaú (vakai, Teutalōnome 6:6–7). ʻI hoʻo akoʻi e fānaú ʻi he lotú, fekumi ʻi he faʻa lotu ki he ngaahi founga ke poupou ai ki heʻenau mātuʻá ʻi honau fatongia mahuʻingá” (Ko e Faiako ʻi he Founga ʻa e Fakamoʻuí, 25).