“Ngaahi Maʻuʻanga Tokoni Makehe ki hono Akoʻi ʻo e Fānaú,” Haʻu, ʻo Muimui ʻIate Au—Maʻá e Palaimelí: Fuakava Foʻoú 2023 (2023)
“Ngaahi Maʻuʻanga Tokoni Makehe ki hono Akoʻi ʻo e Fānaú,” Haʻu, ʻo Muimui ʻIate Au—Maʻá e Palaimelí: 2023
Ngaahi Maʻuʻanga Tokoni Makehe ki hono Akoʻi ʻo e Fānaú
ʻE ala maʻu ʻa e ngaahi maʻuʻanga tokoni ko ʻení ʻi he polokalama Gospel Library mo e ChurchofJesusChrist.org.
Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí
Te ke lava ʻo liliu ʻa e ngaahi ʻekitivitī mei he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fakaʻaongaʻi ʻi hoʻo kalasi Palaimelí. ʻOua te ke hohaʻa kapau kuo ʻosi fai ʻe he fānaú ʻa e ngaahi ʻekitivitī ko ʻení mo honau ngaahi fāmilí ʻi ʻapi; ʻe tokoni hono toutou fakahokó ke ako ai e fānaú. ʻE ala fie maʻu ʻe he fānaú ke talanoa atu fekauʻaki mo e founga ne nau fakahoko ʻaki e ngaahi ʻekitivitií mo honau ngaahi fāmilí pea mo e meʻa ne nau akó.
Ngaahi Himí mo e Tohi Hiva ʻa e Fānaú
ʻOku fakaafeʻi ʻe he hiva toputapú ʻa e Laumālié, tokoniʻi kitautolu ke tau ongoʻi ʻa e ʻofa ʻa e ʻOtuá, mo akoʻi ʻa e tokāteliné ʻi ha founga fakangalongataʻa. Makehe mei he ngaahi tatau kuo paaki ʻo e Ngaahi Himí mo e Tohi Hiva ʻa e Fānaú, te ke lava ʻo maʻu e hiki tatau ʻo e ngaahi fasi mo e ngaahi vitiō ʻo ha ngaahi himi mo ha ngaahi hiva maʻá e fānaú ʻi he music.ChurchofJesusChrist.org mo e ongo polokalama Sacred Music mo e Gospel Media.
Ki ha ngaahi fakakaukau, vakai “Ko Hono Fakaʻaongaʻi ʻo e Hivá ke Akoʻi ʻa e Tokāteliné” mo e “Ko Hono Tokoniʻi e Fānaú ke Ako mo Manatuʻi ʻa e Ngaahi Hiva Palaimelí mo e Ngaahi Himí” ʻi he fakamtala fakalahi ʻo e tohi lēsoni ko ʻení.
Vakai Ki Hoʻomou Fānau Īkí
Ko e lahi taha ʻo e ngaahi tefito ʻoku ʻasi ʻi he tohi lēsoni Vakai ki Hoʻomou Fānau Īkí: Tohi Lēsoni Nesilií ʻoku tatau ia mo e ngaahi tefito te ke akoʻi ʻi he Palaimelí. Tautautefito kapau ʻokú ke akoʻi e fānau iiki angé, fakakaukau ke fekumi ʻi he tohi lēsoni ʻa e nesilií ki ha ngaahi hiva, talanoa, ngaahi ʻekitivitī mo e ngāue fakameaʻa makehe.
Ko e Kaumeʻá
ʻOku ʻomi ʻi he makasini Ko e Kaumeʻá ha ngaahi talanoa mo e ʻekitivitī ʻe lava ʻo fakalahi ki he ngaahi tefitoʻi moʻoni ʻokú ke akoʻi mei he Haʻu, ʻo Muimui ʻIate Au—Maʻá e Palaimelí.
Ngaahi Talanoa mei he Fuakava Foʻoú
ʻE ala tokoni ʻa e Ngaahi Talanoa ʻo e Fuakava Foʻoú ki he fānaú ke nau ako ʻa e tokāteliné mo e ngaahi talanoa ʻi he Fuakava Foʻoú. Te ke lava foki ʻo maʻu e ngaahi vitiō ʻo e ʻū talanoa ko ʻení ʻi he polokalama Gospel Library mo e GospelMedia.ChurchofJesusChrist.org.
Tohi Tā Valivali ʻo e Ngaahi Talanoa Fakafolofolá—Fuakava Foʻoú
ʻOku ʻi he maʻuʻanga tokoni ko ʻení ha ʻū peesi ʻekitivitī tā valivali fakamānako naʻe faʻu ke fakatupulaki e ako ʻa e fānaú mei he Fuakava Foʻoú.
Ngaahi Vitioó mo e Tā Valivalí
ʻE lava ʻe he ʻū fakatātaá mo e ngaahi vitioó ʻo tokoniʻi e fānau ʻokú ke akoʻí ke mahino kiate kinautolu ʻa e tokāteliné pea sioloto ki he ngaahi talanoa ʻoku felāveʻi mo e ngaahi folofolá. Hū ki he Gospel Media ʻi he GospelMedia.ChurchofJesusChrist.org ke vakaiʻi e ngaahi maʻuʻanga tokoni fakamītia kuo tānaki ʻe he Siasí. ‘Oku toe maʻu atu foki ʻa e Gospel Media ko ha polokalama fakatelefoni toʻotoʻo. Ko ha konga lahi ʻo e ʻū fakatātā ʻe lava ke ke fakaʻaongaʻi ʻi he kalasí ʻoku maʻu ia ʻi he Tohi Fakatātā ʻo e Ongoongoleleí.
Ko e Faiako ʻi he Founga ʻa e Fakamoʻuí
ʻE lava ke tokoni atu ʻa eKo e Faiako ʻi he Founga ʻa e Fakamoʻuí ke ke ako mo ngāue ʻaki ʻa e ngaahi tefitoʻi moʻoni ʻo e faiako faka-Kalaisí. ʻOku aleaʻi mo akoako fakahoko ʻa e ngaahi tefitoʻi moʻoni ko ʻení ʻi he ngaahi fakataha alēlea fakafaiakó.