loki ako Palaimelí

Ko Hono Feau e Ngaahi Fiemaʻu ʻa e Fānau ʻoku Faingataʻaʻia Fakatuʻasinó

ʻOku fatongia ʻaki ʻe he kau taki ʻo e Palaimelí ʻa hono akoʻi ʻo e ongoongolelei ʻo Sīsū Kalaisí ki he fānau kotoa pē, kau ai ʻa kinautolu ʻoku faingataʻaʻia fakatuʻasinó. ʻI he Palaimelí, ʻoku totonu ke talitali lelei, ʻofaʻi, tokangaʻi, mo fakakau ʻa e kiʻi tamasiʻi/taʻahine kotoa pē. ʻI he ʻātakai ko ʻení, ʻoku faingofua ange ke mahino ki he fānau kotoa pē ʻa e ʻofa ʻa ʻetau Tamai Hēvaní mo Sīsū Kalaisí, pea ke ongoʻi mo fakatokangaʻi ʻa e ivi tākiekina ʻo e Laumālie Māʻoniʻoní. ʻE lava ke tokoni atu ʻa e ngaahi fakakaukau ko ʻení ke feau ʻa e ngaahi fiemaʻu ʻa e fānau ʻoku faingataʻaʻia fakatuʻasinó.

• Ako ki he ngaahi fiemaʻu pau ʻa e fānau takitaha. Ko e founga lelei taha ke fakahoko ʻaki ʻení ko e talanoa ki he mātuʻa pe kau tauhi ʻa e fānaú. Feinga ke ʻiloʻi ʻa e founga lelei taha ʻoku ako ai ʻa e fānaú pea mo e founga ʻoku tokoni lahi tahá. Te ke lava foki ʻo fealeaʻaki mo e kau taki kehe mo e kau faiako Palaimeli ʻoku nau taukeí mo maʻu ha ngaahi fakakaukau ke vahevahé.

• Faʻu ha ʻātakai lelei ʻa ia ʻe ongoʻi malu mo ʻofaʻi ai ʻa e fānaú kotoa. Ako ʻa e ngaahi hingoa ʻo e fānau kotoa ʻi hoʻo kalasí, pea tokoniʻi kinautolu ke nau ongoʻi ʻoku talitali lelei, ʻofaʻi, mo fakakau mai kinautolu. ʻOku faʻa fakaangaʻi ʻa e fānau ʻoku faingataʻaʻia fakatuʻasinó, ko ia kumi ha ngaahi faingamālie ke fakalāngilangiʻi ai kinautolu ʻi honau ngaahi ʻulungaanga leleí.

• Fai ha ngaahi liliu kae lava ke kau mai ʻa e tokotaha kotoa pē. ʻE lava ke fai ha ngaahi liliu iiki ki he ngaahi ʻekitivitií ke fakapapauʻi ʻoku lava ʻa e fānau kotoa ʻo ako, kau ai kinautolu ʻoku ʻi ai honau ngaahi fakangatangata fakatuʻasinó pe faingataʻa ke akó. Hangē ko ʻení, kapau ʻoku fokotuʻu mai ʻe ha ʻekitivitī ke fakaʻaliʻali ha fakatātā, te ke lava ʻo hivaʻi ha foʻi hiva ʻoku fekauʻaki mo iá kae lava ke kau mai ʻa kinautolu ʻoku palopalema ʻenau sió.

• Fokotuʻu ha ngaahi founga pe faʻunga angamaheni ʻi he loki akó. Ko e founga ʻe taha ke fai ai ʻení ko hono faʻu ha pousitā ʻo e taimi-tēpile ʻa e kalasí ʻoku fokotuʻutuʻu ʻa e anga hono fakalele ʻo e kalasí. ʻE ala kau atu ki hoʻo taimi-tēpilé ʻa e lotú, taimi akoʻí mo e taimi ʻekitivitií. ʻE lava ke tokoni ʻeni ke holoki ʻa e ngaahi ongo veiveiua ʻa ia te nau fakalahi ʻa e loto-hohaʻa ʻi ha niʻihi ʻo e fānaú.

• Fakaʻaongaʻi ha ʻū fakaʻilonga ʻoku ʻilongá. ʻE ʻaonga ki he fānau ʻoku ʻi ai hanau ngaahi faingataʻaʻia fakatuʻasino pe faingataʻaʻia fakaeʻulungāngá, ʻa e ʻū fakaʻilongá hangē ko ha ʻū fakatātā ʻoku nau fakaʻaliʻali mai ʻa e ngaahi ʻulungaanga ʻoku tāú hangē ko hono hiki ki ʻolunga ha nima ʻo ha tokotaha kimuʻa pea tali ha fehuʻi.

• Maʻu ha mahino ki he ʻuhinga ʻoku hoko ai ha ngaahi faingataʻaʻia fakaeʻulungāngá. Ako ki he ngaahi faingataʻaʻia fakatuʻasinó pe ngaahi tūkunga te ne ala tākiekina ha kiʻi tamasiʻi/taʻahine ke ne fai ha tōʻonga taʻetaau. Tokanga ʻaupito ki he meʻa ʻoku hoko ʻi he taimi ʻoku hoko ai ha ngaahi ʻulungaanga ʻoku faingataʻa. Fakakaukau ʻi he faʻa lotu ki he founga ke fakaleleiʻi ʻaki ʻa e tūkungá kae lava ke poupouʻi lelei ange ʻa e kiʻi tamasiʻí/taʻahiné.