“26 Tīsema–1 Sānuali. ʻOku Tau Fatongia ʻAki ʻEtau Akó,” Haʻu, ʻo Muimui ʻIate Au—Maʻá e Palaimelí: Fuakava Foʻoú 2023 (2022)
“26 Tīsema–1 Sānuali. ʻOku Tau Fatongia ʻAki ʻEtau Akó,” Haʻu, ʻo Muimui ʻIate Au—Maʻá e Palaimelí: 2023
26 Tīsema–1 Sānuali
ʻOku Tau Fatongia ʻAki ʻEtau Akó
ʻI hoʻo lau e ngaahi potufolofola ʻi he lēsoni ko ʻení, hiki ha faʻahinga ongo fakalaumālie pē te ke maʻu. Te ke fakatokangaʻi ʻoku ʻi he lēsoni takitaha ʻi he tohi lēsoni ko ʻení ha ngaahi ʻekitivitī maʻá e fānau iiki angé mo e fānau lalahi angé, ka te ke lava ke fakafeʻungaʻi ha faʻahinga ʻekitivitī pē ki hoʻo kalasí.
Fakaafeʻi e Feʻinasiʻakí
ʻI he kamataʻanga ʻo e kalasi takitaha, ʻoange ki he fānaú ha ngaahi faingamālie ke nau vahevahe ai ʻa e meʻa ʻoku nau ako fekauʻaki mo e ongoongoleleí. Hangē ko ʻení, te ke lava ʻo fakaafeʻi kinautolu ʻi he uiké ni ke nau vahevahe e ngaahi talanoa kau kia Sīsū Kalaisi ʻoku nau saiʻia taha aí.
Akoʻi e Tokāteliné: Fānau Iiki Angé
ʻOku finangalo ʻa Sīsū Kalaisi ke u muimui ʻiate Ia.
Te ke lau mo e fānaú he taʻú ni ha ngaahi talanoa lahi mei he moʻui ʻa Sīsū Kalaisí. Tokoni ke mahino ki he fānaú ko e ʻuhinga ʻoku tau ako ai e ngaahi talanoá ni, ke tau lava ʻo muimui lelei ange ai ki he sīpinga haohaoa ʻa Sīsū Kalaisí.
Ngaahi ʻEkitivitī ʻe Ala Fakahokó
-
Talanoa ki he fānaú fekauʻaki mo e fakaafe ʻa e Fakamoʻuí ke “Muimui ʻiate au,” ʻa ia ʻoku maʻu ʻi he Mātiu 4:18–22. Fai ha foʻi vaʻinga ʻoku fai ai ʻe ha tamasiʻi/taʻahine ha ngāue peá ne talaange ki he toenga e fānaú ke nau, “Muimui ʻiate au.” Fakaafeʻi ʻa e fānaú ke nau toe fai ʻa e ngāue tatau.
-
Fakaʻaliʻali ha ʻū fakatātā ʻo ha kakai ʻoku nau muimui ki he Fakamoʻuí ʻi ha ngaahi founga kehekehe, lolotonga ʻEne ngāue ʻi he māmaní pea mo hotau kuongá fakatouʻosi. Te ke lava ʻo maʻu ha ʻū fakatātā ʻi he Tohi Fakatātā ʻo e Ongoongoleleí pe Ngaahi makasini ʻa e Siasí. Tuku ki he fānaú ke nau fakahā e founga ʻoku muimui ai e kakaí ki he Fakamoʻuí.
-
Tokoniʻi e fānaú ke nau fakakaukau ki he ngaahi meʻa ʻoku nau fai ke muimui ai ki he Fakamoʻuí. ʻE lava ke nau maʻu ha ngaahi fakakaukau ʻi hono hivaʻi e “Fekumi Kei Siʻi ki he ʻEikí,” (Tohi Hiva ʻa e Fānaú, 67). Tuku ke nau tā ha ʻū fakatātā ʻo kinautolu ʻi heʻenau fai e ngaahi meʻá ni.
ʻE lava ke maʻu ʻe he fānaú ʻenau ngaahi fakamoʻoni ki he ngaahi moʻoni fakafolofolá.
ʻOku moʻoni ʻa e folofolá.
ʻE lava ke maʻu ʻe he fānaú ha fakamoʻoni ʻoku moʻoni ʻa e folofolá neongo ʻa e ʻikai ke nau lava ʻo lau iá. ʻI hoʻo ako e folofolá mo e fānaú he taʻu ní, ʻe lava ke ke tokoniʻi ke nau ʻiloʻi ʻiate kinautolu pē ʻoku moʻoni ʻa e folofolá.
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke nau fakamatala fekauʻaki mo ha ngaahi meʻaʻofa ʻoku nau saiʻia taha ai kuo nau maʻu ʻi he hokosia honau ʻaho fāʻeleʻí pe ko ha taimi kehe. ʻOmi ha tatau ʻo e folofolá kuo ʻosi kofu fakameʻaʻofa, tuku ke fakaava ia ʻe ha tokotaha, pea fakamoʻoni ko e folofolá ko ha meʻaʻofa ia mei he Tamai Hēvani kiate kitautolu.
-
Fakaʻaliʻali ki he fānaú ha ʻū tohi ʻoku ʻi ai ha ngaahi talanoa faʻu, pea fehuʻi ange fekauʻaki mo e ngaahi talanoa ʻoku nau saiʻia taha aí. Fakaʻaliʻali kiate kinautolu ʻa e ngaahi folofolá, pea fakamoʻoni ʻoku ʻi he ngaahi folofolá ʻa e lea ʻa e ʻOtuá kiate kitautolú. ʻOku nau talanoa ki he kakai naʻa nau moʻui moʻoni kae pehē ki ha ngaahi meʻa naʻe hoko moʻoni.
-
Vahevahe ʻa e ngaahi pōpoaki ʻi he 2 Tīmote 3:15 mo e Molonai 10:3–5, ke tokoniʻi e fānaú ke nau toe lea ʻaki ha ngaahi kupuʻi lea. Tokoniʻi ke mahino kiate kinautolu, ʻe lava ke nau ʻiloʻi ʻiate kinautolu pē ʻoku moʻoni ʻa e folofolá.
-
Fufuuʻi ha fakatātā ʻo e Fakamoʻuí, pea ʻoange ki he fānaú ha ngaahi fakaʻilonga ke tokoni ke nau ʻiloʻi ai ia. Tokoni ke mahino ki he fānaú ʻa e founga ʻe lava ke tokoni ai e fekumi ʻi he folofolá, ke tau ʻiloʻi ʻa Sīsū Kalaisí. Tuku ki he fānaú ke nau taufetongi ʻi hono fufuuʻi e fakatātaá pea ʻoange ha fanga kiʻi fakaʻilonga tokoni ki he toenga e fānaú.
-
Hivaʻi fakataha ha foʻi hiva fekauʻaki mo hono ako ʻo e ongoongoleleí, hangē ko e “Fekumi, Fifili pea mo Lotu” (Tohi Hiva ʻa e Fānaú, 66), pea tokoniʻi e fānaú ke nau faʻu hano fakatātaaʻi ke fakahoko fakataha mo hono hivaʻí. Vahevahe mo e fānaú ha potufolofola ʻe taha pe ua ʻokú ke manako taha ai, pea talaange kiate kinautolu e founga naʻá ke ʻiloʻi ai ʻoku moʻoni ʻa e folofolá. Kapau ʻoku ʻi ai ha ngaahi folofola pe talanoa manako e fānaú mei he folofolá, fakaafeʻi ke nau vahevahe ia.
Akoʻi e Tokāteliné: Fānau Lalahi Angé
ʻOku finangalo ʻa Sīsū Kalaisi ke u ako kau kiate Ia pea muimui ʻiate Ia.
Fakakaukau ki ha founga kuó ke ʻiloʻi ai ʻa Sīsū Kalaisi. Ko e hā ha meʻa te ke fai ke tokoni ki he fānaú ke nau ako pea muimui kiate Ia?
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke nau talanoa ki ha kaungāmeʻa ofi ʻoku nau ʻiloʻi pea fakamatalaʻi ʻa e founga naʻe hoko ai ʻa e tokotahá ni ko ha kaungāmeʻá. Lau pea aleaʻi e Sione 5:39 mo e Sione 14:15 ke ʻiloʻi ha ngaahi founga te tau lava ʻo ongoʻi ofi ai kia Sīsū. Kole ki he fānaú ke nau vahevahe ha ngaahi taimi ne nau ongoʻi ofi ai kiate Ia.
-
Lue takai mo hoʻo kalasí ʻi he ʻapisiasí. Fakaafeʻi e fānaú ke hiki honau nimá ʻi heʻenau sio ki ha meʻa lolotonga ʻenau lué, ʻokú ne fakamanatu kiate kinautolu ha founga te nau lava ai ʻo muimui ki he Fakamoʻuí (hangē ko e faiʻanga papitaisó pe ko ha fakatātā).
-
Hivaʻi fakataha mo e fānaú ha foʻi hiva fekauʻaki mo e muimui kia Sīsū Kalaisí, hangē ko e “Muimui ʻIate Au” (Ngaahi Himí, fika 57). Fakaafeʻi e fānaú ke nau vahevahe ha ngaahi taimi kuo nau muimui ai ki he sīpinga ʻa e Fakamoʻuí.
ʻOku ou lava ʻo ako ʻa e folofolá maʻaku.
ʻI hoʻo lau ʻa e folofolá mo e fānaú pea fai ha ngaahi fehuʻí, ʻoku lava ke ke langaki e loto-falala ʻi he fānaú te nau lava ʻo ako mei he ngaahi folofolá mo maʻu ha ngaahi mataʻikoloa mahuʻinga ʻo e ʻiló.
Ngaahi ʻEkitivitī ʻe Ala Fakahokó
-
Lau fakataha ʻa e Sione 5:39 mo e Ngāue 17:10–11, pea fehuʻi ki he fānaú e meʻa ne nau ako fekauʻaki mo e founga ke ako ai e folofolá.
-
Fili ha ngaahi potufolofola faingofua mo mālohi mei he Fuakava Foʻoú, tohi takitaha ia ʻi ha laʻipepa, pea fufuuʻi e ʻū laʻipepá. Faʻu ha ngaahi fakaʻilonga tokoni te ne taki ʻa e fānaú ʻi ha “kumi koloa fufū” ʻi he loki akó pe falelotú, ke maʻu ai ʻa e ngaahi potufolofola ko ʻení. Hili ʻenau maʻu ʻa e potufolofola takitaha, aleaʻi e ʻuhinga ʻo e potufolofolá mo e ʻuhinga ʻoku hoko ai ia ko ha mataʻikoloá.
-
Vahevahe ha potufolofola ʻe niʻihi ʻokú ke mahuʻingaʻia ai pea fakamatalaʻi ange ʻa e ʻuhinga ʻoku ʻuhingangamālie ai ia kiate koé. Tauhi ha lisi fakakalasi ʻo e ngaahi potufolofola mahuʻinga naʻe maʻu ʻe he fānaú ʻi he Fuakava Foʻoú he taʻu ní—ʻi ʻapi pe ʻi he lolotonga e Palaimelí.
-
Fai ha fealēleaʻaki mo e fānaú ki he ʻuhinga ʻoku faʻa faingataʻa ai he taimi ʻe niʻihi ke lau e folofolá. Kole ki he fānaú ke nau fevahevaheʻaki ʻiate kinautolu fekauʻaki mo hono ako ʻo e folofolá. Kole ange foki ke nau vahevahe haʻanau ngaahi aʻusia lelei ʻi he folofolá.
-
Tokoniʻi e fānaú ke nau faʻu ha tohi māhina faingofua ʻe lava ke nau fakaʻaongaʻi ke fakaʻilongaʻi e tuʻo lahi ʻo ʻenau lau e folofolá. ʻE lava ke fakamanatu ange ʻe he ʻū tohi māhiná ni ke nau lau e folofolá he ʻaho kotoa pē.
ʻOku ou fie maʻu haʻaku fakamoʻoni pē ʻaʻaku.
ʻE fie maʻu ʻe he fānau ʻokú ke akoʻí haʻanau fakamoʻoni pē ʻanautolu ki he Tamai Hēvaní mo Sīsū Kalaisi. Ko e hā te ke lava ʻo fai ke ueʻi ai kinautolu ke nau ako ʻa e moʻoní maʻanautolu pē?
Ngaahi ʻEkitivitī ʻe Ala Fakahokó
-
Vahevahe ʻa e talanoa ki he kau taupoʻou ʻe toko hongofulú (vakai, Mātiu 25:1–13; vakai foki “Vahe 47: Ko e Kau Taupoʻou ʻe Toko Hongofulú,” ʻi he Ngaahi Talanoa ʻo e Fuakava Foʻoú, 118–20, pe ko e vitiō fakafekauʻaki ʻi he ChurchofJesusChrist.org). ʻEke ki he fānaú ha ngaahi fehuʻi hangē ko ʻení: ʻOku tatau fēfē nai ʻetau ngaahi fakamoʻoní mo e ngaahi māmá? Ko e hā ʻoku mahuʻinga ai ke ʻi ai hatau ngaahi fakamoʻoní?
-
Aleaʻi e ngaahi meʻa te tau ala fakahoko ke fakamālohia ai ʻetau ngaahi fakamoʻoní. Ki ha ngaahi fakakaukau, fakaafeʻi e fānaú ke nau fekumi ʻi he Sione 7:17 mo e Molonai 10:3–5. Fakaafeʻi ke nau vahevahe e ngaahi meʻa ʻoku nau ʻilo ʻoku moʻoní.
-
Kole ki he fānaú ke nau tokoni atu ʻi hono fakahingoa e ʻū kongokonga poloká ʻaki ha ngaahi moʻoni ʻokú ne faʻu ʻetau ngaahi fakamoʻoní (vakai ki he Ngaahi Tefito ʻo e Ongoongoleleí, “Fakamoʻoni,” topics.ChurchofJesusChrist.org). Tuku ki he fānaú ke nau fakaʻaongaʻi ʻa e ʻū kongokonga papá ke langa ʻaki ha faʻunga ʻokú ne fakafofongaʻi ha fakamoʻoni.
Poupouʻi e Ako ʻi ʻApí
Te ke poupouʻi fēfē ʻa e fānaú mo ʻenau mātuʻá ke nau ako mei he Fuakava Foʻoú ʻi ʻapí? Hangē ko ʻení, te ke lava ʻo fakaafeʻi ʻa e fānaú ke nau ako maʻuloto ha taha ʻo e folofola naʻa mou aleaʻi ʻi he kalasí (ʻe ala tokoni ke vahevaheʻi e potufolofolá ki ha fanga kiʻi kupuʻi lea nounou) pea vahevahe ʻa e vēsí mo honau fāmilí.
Fakatupulaki ʻEtau Founga Akoʻí
Liliu ʻa e ngaahi ʻekitivitií ke feʻunga mo e taʻu motuʻa mo e tuʻunga malava ʻa e fānau ʻokú ke akoʻí. ʻOku fie maʻu ʻe he fānau iiki angé ha fakamatala ʻoku fakaikiikí mo ako mei ha ngaahi founga fakafaiako kehekehe. ʻI he matuʻotuʻa ʻa e fānaú, ʻoku lava ke nau kau lahi ange ki he kalasí pea mahalo naʻa lelei ange hano vahevahe ʻenau fakakaukaú. ʻOange ha ngaahi faingamālie ke nau vahevahe, fakamoʻoni, mo kau atu ai. Tokoniʻi kinautolu ʻo ka fie maʻu. (Vakai ki he Ko e Faiako ʻi he Founga ʻa e Fakamoʻuí, 25–26.)