Matapā sioʻata ʻi he Temipale Nāvū ʻIlinoisí, tā ʻa Tom Holdman

23–29 Sānuali

Mātiu 3; Maʻake 1; Luke 3

“Mou Teuteu ʻa e Hala ʻo e ʻEikí”

ʻI hoʻo laukonga fekauʻaki mo Sione Papitaisó pea mo e papitaiso ʻo Sīsū Kalaisí, hiki ha ngaahi ongo fakalaumālie ʻokú ke maʻu. ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino e ngaahi folofola ko ʻení, pea ʻe tokoni ia ke ke poupouʻi e ako ʻoku fakahoko ʻe he fānaú ʻi ʻapí.

Fakaafeʻi e Feʻinasiʻakí

Koeʻuhi ke ʻoange ki he fānaú ha faingamālie ke vahevahe ʻa e meʻa kuo nau ʻosi akó, fakaʻaliʻali ha fakatātā ʻo hono papitaiso ʻo Sīsuú. Kole ange ke nau tala atu ʻa e meʻa ʻoku hoko ʻi he fakatātaá pea mo ʻenau ongo fekauʻaki mo e papitaisó.

Akoʻi e Tokāteliné: Fānau Iiki Angé

Mātiu 3:13–17

ʻE lava ke u papitaiso ʻo hangē ko Sīsuú.

Te ke fakaʻaongaʻi fēfē ʻa e talanoa ʻo hono papitaiso ʻo Sīsuú ke tokoni ki he fānaú ke nau mateuteu ki he papitaisó?

Ngaahi ʻEkitivitī ʻe Ala Fakahokó

• Fakamatala fakaikiiki e talanoa ʻo hono papitaiso ʻo e Fakamoʻuí (vakai ki he Mātiu 3:13–17; vakai foki “Vahe 10: Ko Hono Papitaiso ʻo Sīsuú,” ʻi he Ngaahi Talanoa ʻo e Fuakava Foʻoú, 26–29, pe ko e vitiō fekauʻaki mo iá ʻi he ChurchofJesusChrist.org). Fakamatalaʻi ange ne papitaiso ʻa Sīsū Kalaisi ʻe he tokotaha naʻá ne maʻu e mafai ʻo e lakanga fakataulaʻeikí. Toutou fai e talanoá pea fakaafeʻi ʻa e fānaú ke nau vahevahe ʻa e ngaahi fakaikiiki ʻoku nau manatuʻí.

• Fakaʻaliʻali ange ha fakatātā ʻo hono papitaiso ʻo Sīsuú pea mo e peesi ʻekitivitī ʻo e uike ní. Tuku ki he fānaú ke nau tuhuʻi atu ha ngaahi meʻa ʻoku faitatau ʻi he ongo fakatātaá. (ʻOku ʻi ai ha fakatātā ʻo hono papitaiso ʻo Sīsuú ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.)

• Toe fakamanatu ʻa e ngaahi palōmesi ʻe fakahoko ʻe he fānaú ʻi he taimi te nau papitaiso aí (vakai ki he Mōsaia 18:8–10; Tokāteline mo e Ngaahi Fuakava 20:37; Ngaahi Tefito ʻo e Ongoongoleleí, “Papitaisó,” topics.ChurchofJesusChrist.org). ʻEke ange pe ko e fē ʻi he ngaahi meʻá ni ʻoku nau lolotonga fakahokó.

• Fakaafeʻi ha mēmipa ʻo e kau pīsopelikí ke talanoa ki he fānaú fekauʻaki mo e ʻinitaviu papitaiso te nau fai kimuʻa pea nau papitaisó.

• Hivaʻi fakataha ha foʻi hiva fekauʻaki mo e papitaisó, hangē ko e “Ko Hoku Papitaisó” (Tohi Hiva ʻa e Fānaú, 54). Fakakaukau ke kole ki ha kiʻi tamasiʻi pe taʻahine ke ne tataki e toenga e fānaú lolotonga ʻenau hivá.

ʻE lava ke tau muimui ʻi he sīpinga ʻa Sīsuú ʻaki haʻatau papitaiso.

Mātiu 3:11, 16

ʻOku tokoniʻi au ʻe he Laumālie Māʻoniʻoní.

Makehe mei he teuteu ki he papitaisó, ʻoku teuteu foki ʻa e fānaú ke nau maʻu e meʻafoaki ʻo e Laumālie Māʻoniʻoní. Te ke lava fēfē ʻo tokoniʻi kinautolú?

Ngaahi ʻEkitivitī ʻe Ala Fakahokó

• Fakaʻaongaʻi e Mātiu 3:11, 16 ke akoʻi ki he fānaú, naʻe ʻalu hifo e Laumālie Māʻoniʻoní kia Sīsū ʻi he taimi ne papitaiso ai Iá (ne hā mai ha foʻi lupe ko ha fakaʻilonga ke fakahā mai kuo hoko ʻeni). Fakaʻaliʻali e fakatātā Ko e Meʻafoaki ʻo e Laumālie Māʻoniʻoní (Tohi Fakatātā ʻo e Ongoongoleleí, fika 105), pea fakamatalaʻi ange ʻoku tau maʻu e meʻafoaki ʻo e Laumālie Māʻoniʻoní ʻi he taimi ʻoku hilifakinima ai kitautolú.

• ʻOmi ha puha ʻoku faʻo ai ha ngaahi meʻa hangē ko ha fakatātā ʻo Sīsū, ko ha sipi kafu māfana, mo ha kāpasa pe mape. Fakaafeʻi e fānaú ke nau fili ha meʻa, pea tuku ke nau vahevahe e founga ʻoku fakafofongaʻi ai ʻe he meʻa takitaha ʻa e founga ʻoku lava ai e Laumālie Māʻoniʻoní ke tokoniʻi kitautolú—ʻokú Ne fakamoʻoni kia Sīsū, (vakai ki he Sione 15:26), fakafiemālieʻi kitautolu (vakai ki he Sione 14:26), mo fakahā mai ʻa e hala totonú (vakai ki he 2 Nīfai 32:5).

• Vahevahe hoʻo ngaahi aʻusia pē ʻaʻau ʻi hoʻo maʻu ha tokoni mei he Laumālie Māʻoniʻoní.

• Fakaafeʻi e fānaú ke nau fakafanongo ki ha ngaahi founga ʻoku tokoniʻi ai kitautolu ʻe he Laumālie Māʻoniʻoní, lolotonga ʻenau hivaʻi ha hiva fekauʻaki mo Ia, hangē ko e “Ko e Laumālie Māʻoniʻoní” (Tohi Hiva ʻa e Fānaú, 56).

Akoʻi e Tokāteliné: Fānau Lalahi Angé

Mātiu 3

ʻOku tāpuekina au ʻe he ngaahi ouau ʻo e Lakanga Taulaʻeiki Faka-ʻĒloné.

Naʻe maʻu ʻe Sione Papitaiso ʻa e Lakanga Taulaʻeiki Faka-ʻĒloné, ko ia ai, ko ha faingamālie lelei ʻa e laukonga fekauʻaki mo ia ʻi he Mātiu 3 ke akoʻi ki he fānaú ʻa e Lakanga Taulaʻeiki Faka-ʻĒloné. Tokoniʻi ke nau fakatokangaʻi ʻa e ngaahi tāpuaki mo e mālohi ʻoku ʻomi kiate kitautolu ʻo fakafou ʻi he lakanga fakataulaʻeiki ko ʻení.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau faʻu ha lisi ʻo e ngaahi fatongia ʻo e Lakanga Taulaʻeiki Faka-ʻĒloné, ʻo ngāue ʻaki e Tokāteline mo e Ngaahi Fuakava 20:46, 58–60; 84:111. Kole ki he fānaú ke nau kumi ʻi he Mātiu 3 ha ngaahi sīpinga ʻo hono fakakakato ʻe Sione ha niʻihi ʻo e ngaahi fatongia ko ʻení. Te tau lava fēfē ʻo fakaafeʻi e niʻihi kehé ke haʻu kia Kalaisi, ʻo hangē ko ia naʻe fai ʻe Sione?

• Fakaʻaliʻali ha fakatātā ʻe niʻihi ʻo e kau maʻu Lakanga Taulaʻeiki Faka-ʻĒlone ʻoku nau fakahoko e ongo ouau ʻo e papitaisó mo e sākalamēnití (vakai, Tohi Fakatātā ʻo e Ongoongoleleí, fika 103–4, 107–8). Aleaʻi e founga ʻoku teuteuʻi ai kitautolu ʻe he ngaahi ouau ko ʻení ke tau tali ʻa Sīsū Kalaisi mo e ngaahi tāpuaki ʻo ʻEne Fakaleleí.

• Lau fakataha ʻa e Tokāteline mo e Ngaahi Fuakava 13:1, pea fakamoʻoni naʻe fakafoki mai ʻe Sione Papitaiso ʻa e Lakanga Taulaʻeiki Faka-ʻĒloné kia Siosefa Sāmita. ʻEke ki he fānaú pe kuo tāpuekina fēfē nai kinautolu koeʻuhí ko hono fakafoki mai e Lakanga Taulaʻeiki Faka-ʻĒloné.

Mātiu 3:13–17; Maʻake 1:1–11; Luke 3:2–18

Te u lava ʻo tauhi ʻeku ngaahi fuakava ʻi he papitaisó.

ʻOku ʻomi ʻe hono ako e talanoa ʻo e papitaiso ʻo Sīsuú, ha faingamālie lelei ke tokoniʻi ai e fānaú ke nau toe vakaiʻi ʻenau ngaahi fuakava ʻi he papitaisó pea toe tukupā ke tauhi ia.

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau taufetongi ʻi hono lau e ngaahi veesi mei he Maʻake 1:1–11. ʻOku finangalo ʻa ʻetau Tamai Hēvaní ke tau papitaiso. Ko e hā naʻe papitaiso ai ʻa Sīsuú, neongo naʻe ʻikai fie maʻu ke fakamaʻa Ia mei he angahalá? Tokoniʻi e fānaú ke nau kumi e ngaahi tali ki he fehuʻi ko ʻení ʻi he Mātiu 3:13–15 mo e 2 Nīfai 31:6–7.

• Toe vakaiʻi e ngaahi fuakava ne fakahoko ʻe he fānaú ʻi he papitaisó, ʻa ia ʻoku maʻu ʻi he Mōsaia 18:8–10 mo e Tokāteline mo e Ngaahi Fuakava 20:37. Fakaafeʻi e fānaú ke nau hiki e ngaahi fakamoʻoni fakafolofola ko ʻení ʻi he peesi ʻekitivitī ʻo e uike ní.

• Teuteu ha ʻū kaati tauhoa mo ha ngaahi kupuʻi lea pe ʻū fakatātā ʻoku tauhoa, ʻa ia ʻoku nau fakafofongaʻi ʻetau ngaahi fuakava ʻi he papitaisó. Fakafoʻohifoʻi e ʻū kātí. Fakaafeʻi ʻa e fānaú ke nau taufetongi hono fulihi ha kaati ʻe ua he taimi ʻe taha, ke kumi e ngaahi meʻa ʻoku tauhoá. ʻI hano maʻu pē ha hoá, fakaafeʻi e fānaú ke nau vahevahe ha ngaahi founga kuo nau tauhi ai e fuakava ko iá.

• Vahevahe e ngaahi founga kuo faitāpuekina ai koe ʻi hono tauhi hoʻo ngaahi fuakava ʻi he papitaisó.

Mātiu 3:11, 16

ʻE lava ʻe he Laumālie Māʻoniʻoní ʻo fakahinohinoʻi au.

ʻOku ako ʻe he fānaú e founga ke ʻiloʻi mo muimui ai ki he fakahinohino ʻa e Laumālie Māʻoniʻoní. Tokoni ke mahino kiate kinautolu ʻe tokoni ʻa hono tauhi ʻenau ngaahi fuakava ʻi he papitaisó ke nau taau ai ke maʻu ʻEne fakahinohinó.

Ngaahi ʻEkitivitī ʻe Ala Fakahokó

• Kole ki he tokotaha takitaha ke ne lau ha taha ʻo e ngaahi potufolofola ko ʻení pea fakamatalaʻi e founga ʻoku lea mai ai e Laumālie Māʻoniʻoní kiate kitautolú: Hilamani 5:30; Tokāteline mo e Ngaahi Fuakava 6:23; 8:2–3; 11:12–13.

• Kole ki ha kiʻi tamasiʻi pe taʻahine ke ne lau e Mātiu 3:11. Ko e hā e founga ʻoku hangē ai e Laumālie Māʻoniʻoní ko e afí? Hangē ko ʻení, ʻoku fakafiemālie e afí, pea ʻokú ne ʻomi e maama ke tataki kitautolu (vakai, Sione 15:26; 2 Nīfai 32:5).

• Fakaafeʻi ʻa e fānaú ke kuikui honau matá pea puke hake honau nimá ʻi muʻa. Pea tohoʻi fakamaʻamaʻa ha fulufuluʻi manu pe maea ʻi honau laʻinimá. Fakaafeʻi ke nau tala atu e taimi te nau ongoʻi ai iá. Ko e hā ʻoku akoʻi ʻe he ʻekitivitī ko ʻení fekauʻaki mo hono ʻiloʻi e ngaahi ongo ʻo e Laumālie Māʻoniʻoní?

• Fakaafeʻi e fānaú ke nau vahevahe e ngaahi aʻusia kuo nau maʻu mo e Laumālie Māʻoniʻoní. Ko e hā ʻoku hoko ai hono tauhi ʻetau ngaahi fuakavá ke tokoniʻi kitautolu ke tau maʻu e tataki ʻo e Laumālie Māʻoniʻoní?

Poupouʻi e Ako ʻi ʻApí

Poupouʻi ʻa e fānau takitaha ke fehuʻi ki heʻenau mātuʻá, kau mēmipa kehe ʻo e fāmilí, pe ngaahi kaungāmeʻá fekauʻaki mo honau papitaisó.

Fakatupulaki ʻEtau Founga Akoʻí

Fekumi ki ha ueʻi fakalaumālie pē ʻaʻau. ʻOua te ke vakai ki he ngaahi lēsoni ko ʻení ko ha ngaahi fakahinohino kuo pau ke ke muimui ki ai ʻi hoʻo faiakó. Ka ke fakaʻaongaʻi ia ko ha ngaahi fakakaukau ke ne langaki ha ueʻi fakalaumālie pē ʻaʻau ʻi hoʻo fakalaulaulotoa e ngaahi fiemaʻu ʻa e fānau ʻokú ke akoʻí. (Vakai, Ko e Faiako ʻi he Founga ʻa e Fakamoʻuí, 7.)