Mele mo ʻIlisapeti

2–8 Sānuali

Mātiu 1; Luke 1

“Ke Hoko Mai Kiate Au ʻo hangē ko Hoʻo Leá”

Kamata ʻaki hano lau ʻa e Mātiu 1 mo e Luke 1. ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e ngaahi vahe ko ʻení, pea ʻe lava ke ʻoatu ʻe he fokotuʻutuʻu ko ʻení ha ngaahi fakakaukau ki hono akoʻí. Kapau te ke fie maʻu tokoni ki hono akoʻi ʻo e fānau iiki angé, vakai ki he “Ko Hono Feau e Ngaahi Fiemaʻu ʻa e Fānau Iiki Angé” ʻi he kamataʻanga ʻo e maʻuʻanga tokoni ko ʻení.

fakaʻilonga feʻinasiʻakí

Fakaafeʻi e Feʻinasiʻakí

Kole ki he fānaú ke nau tangutu ʻi ha siakale, pea kole ki ha tokotaha ke ne vahevahe ha meʻa naʻá ne ako kimuí ni mei he folofolá. ʻE lava ke teka atu ʻe he tokotaha ko iá ha foʻi pulu pe tuhu ki ha tokotaha kehe ʻi he siakalé, ke ne hoko atu e vahevahé.

fakaʻilonga akoʻí

Akoʻi e Tokāteliné: Fānau Iiki Angé

Mātiu 1:18–25; Luke 1:26–38

Naʻe fakahā ʻe he kau ʻāngeló ʻa e ʻaloʻi ʻo Sīsuú.

Naʻe ʻaʻahi ha ʻāngelo kia Mele mo Siosefa ʻa ia naʻá ne fakahā ange ʻa e ʻaloʻi ʻo Sīsū Kalaisí. ʻOku lava ke tokoni e ngaahi aʻusia ko ʻení ke vakai ai e fānaú ki hono mahuʻinga ʻo e ʻaloʻi ʻo Kalaisí.

Ngaahi ʻEkitivitī ʻe Ala Fakahokó

• Fakaafeʻi ha mātuʻa ʻo ha tokotaha ke haʻu ki he kalasí ʻokú ne tui e vala hangē ko Mele mo Siosefá. Kole ange ke nau vahevahe e ngaahi aʻusia naʻe lekooti ʻi he Mātiu 1:18–25 mo e Luke 1:26–38.

• Fakamatala ange ʻa e talanoa ki he hā ʻa e kau ʻāngeló kia Mele mo Siosefá, ʻo hangē ko hono lekooti ʻi he ngaahi veesi ko ʻení. (Vakai foki ki he “Vahe 2: Mele mo e ʻĀngeló” mo e “Vahe 4: Siosefa mo e ʻĀngeló,” ʻi he Ngaahi Talanoa ʻo e Fuakava Foʻoú, 8–9, 12, pe ko e ngaahi vitiō fekauʻaki mo iá ʻi he ChurchofJesusChrist.org.) Te ke lava ʻo fakaʻaliʻali ange ʻa e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Fakaafeʻi ʻa e fānaú ke nau toe talanoa atu kiate koe ʻa e talanoá.

• Fakaafeʻi ʻa e fānaú ke nau tā ha ʻū fakatātā ʻo e ngaahi talanoa ʻoku hā ʻi he Mātiu 1:18–25 mo e Luke 1:26–38.

hā ʻa Kepaleli kia Mele

Ko Hono Fakahā ʻo e ʻAloʻí, tā ʻa John Scott

Luke 1:5–25, 57–63

ʻOku tali mai ʻe he Tamai Hēvaní ʻeku ngaahi lotú.

Mahalo ne taʻu lahi hono lotua ʻe Sakalia mo ʻIlisapeti haʻana tamá. Naʻe faifai pea tali ʻe he Tamai Hēvaní ʻena lotú ʻaki ha foha ko Sione Papitaiso. Te ke lava fēfē ʻo fakaʻaongaʻi e talanoa ko ʻení ke akoʻi ki he fānaú, ʻoku tali ʻe he Tamai Hēvaní e ngaahi lotú?

Ngaahi ʻEkitivitī ʻe Ala Fakahokó

• Vahevahe ʻi hoʻo lea pē ʻaʻau, ʻa e talanoa mei he Luke 1:5–25, 57–63. Mahalo naʻa fie maʻu ke ke toutou fai ʻa e talanoá. Vahe ki he fānaú ke nau fakatātaaʻi ʻa Sakalia, ʻIlisapeti, pea mo e ʻāngelo ʻi he talanoá. Fakamamafaʻi ange e ngaahi lea ʻa e ʻāngeló kia Sakaliá: “Kuo tau hoʻo lotú” (Luke 1:13). Vahevahe ha aʻusia ʻa ia ne tali ai ʻe he Tamai Hēvaní hoʻo lotú.

• Fakaʻaongaʻi ʻa e “Punou Ho ʻUlu” (Tohi Hiva ʻa e Fānaú, 18B) pe ko ha hiva ʻe taha ʻokú ne akoʻi ki he fānaú ʻa e founga ʻo e lotú. Ko e taimi kotoa pē ʻoku hivaʻi ai ʻe he fānaú ʻa e foʻi lea “lotu”, fakaafeʻi ke nau punou honau ʻulú pea ʻapasia honau nimá.

• Kole ki he fānau takitaha ke nau fakatātaaʻi ha meʻa ʻokú ne fakafofongaʻi ha meʻa ʻe lava ke nau lotua. Tuku ki he fānau kehé ke nau mateʻi pe ko e hā ʻoku fakafofongaʻi ʻe he ngaahi meʻa ʻoku nau fakatātaaʻí. Te nau lava ʻo maʻu ha ngaahi fakakaukau ʻi he peesi ʻekitivitī ʻo e uike ní.

Luke 1:30–35

Ko Sīsū Kalaisi ʻa e ʻAlo ʻo e ʻOtuá.

Ko Sīsū Kalaisi ʻa e ʻAlo ʻo e Tamai Hēvaní mo Mele. Ko e hā te ke lava ʻo fai ke tokoni ki he fānaú ke nau ako lahi ange kau kiate Iá?

Ngaahi ʻEkitivitī ʻe Ala Fakahokó

• Talaange ki he fānaú naʻe fakahā ʻe he ʻāngeló kia Mele ʻe ui ʻene pēpeé ko e ʻAlo ʻo e ʻOtuá (vakai, Luke 1:35). Tokoniʻi e fānaú ke nau toutou lau e konga lea “Ko Sīsū Kalaisi ʻa e ʻAlo ʻo e ʻOtuá.” Tokoniʻi e fānaú ke mahino kiate kinautolu ʻa e ongomātuʻa ʻa Sīsuú ʻaki hano fakaafeʻi ke nau tā ha fakatātā ʻo ʻenau ongomātuʻa ʻanautolú. ʻI heʻenau fai ʻení, talaange kiate kinautolu ʻoku ʻi ai e ongomātuʻa ʻa Sīsū—ko Mele mo e Tamai Hēvaní. ʻIkai ngata aí, naʻe kole kia Siosefa ke ne maluʻi mo tokangaʻi ʻa Sīsū lolotonga ʻEne nofo ʻi he māmaní.

• Vahevahe hoʻo fakamoʻoni ʻoku tuʻunga ʻi he hoko ʻa Sīsū ko e ʻAlo ʻo e ʻOtuá, ʻa ʻEne lava ʻo pekia maʻa ʻetau ngaahi angahalá pea toe moʻuí. Fakaʻaliʻali ha fakatātā ʻo e Tutuki mo e Toetuʻu ʻa Sīsuú (vakai, Tohi Fakatātā ʻo e Ongoongoleleí, fika 57, 59).

fakaʻilonga akoʻí

Akoʻi e Tokāteliné: Fānau Lalahi Angé

Mātiu 1:18–25; Luke 1:5–37

ʻOku ʻikai ha meʻa ʻe taʻemalava ki he ʻOtuá.

Naʻe fakafou ʻi he mālohi pē ʻo e ʻOtuá ʻa e malava ko ia ke ʻaloʻi ʻa Sīsū mo fāʻeleʻi ʻa Sione Papitaisó. ʻI hono ako fekauʻaki mo e ngaahi mana ko ʻení, ʻe lava ke fakamālohia ai e tui ʻa e fānaú ʻoku maʻu ʻe he ʻOtuá ʻa e mālohi ke fakahoko ha ngaahi mana ʻi heʻenau moʻuí.

Ngaahi ʻEkitivitī ʻe Ala Fakahokó

• ʻI hoʻo toe vakaiʻi mo e fānaú e Mātiu 1:18–25 mo e Luke 1:5–37, ʻeke ki he fānaú ha ngaahi fehuʻi hangē ko e “Ko e hā ha meʻa te ke lea ʻaki kapau ko Mele koe?” pe “Naʻá ke mei ongoʻi fēfē nai kapau ko Sakalia koe?”

• Fakahoko e talanoa ʻoku fakamatalaʻi ʻi he Mātiu 1:18–25 mo e Luke 1:5–37 ʻi ha ngaahi lea mahinongofua. Kole ki he fānaú ke hiki honau nimá ʻi he taimi ʻoku nau fanongo ai ki ha meʻa ʻoku ngali taʻemalava ka ne taʻeʻoua ʻa e mālohi ʻo e ʻOtuá. Ko e hā ha ngaahi talanoa kehe ʻe lava ke vahevahe ʻe he fānaú, ʻa ia ne fai ai ʻe he ʻOtuá ha meʻa ne ngali taʻemalava?

• Tokoni ki he fānaú ke nau ako maʻuloto ʻa e Luke 1:37. Ke fai ʻeni, te ke lava ʻo hiki ʻa e vēsí ʻi he palakipoé pea fakaafeʻi e fānaú ke nau toutou lau ia. Hili e foʻi lau kotoa pē, tamateʻi ha foʻi lea ʻe taha.

Mātiu 1:21–25; Luke 1:30–35, 46–47

Ko Sīsū Kalaisi ʻa e ʻAlo ʻo e ʻOtuá.

Ko Sīsū Kalaisi ʻa e ʻAlo ʻo e Tamai Hēvaní mo Mele. Te ke tokoni fēfē ki he fānaú ke nau ako e moʻoni ko ʻení?

Ngaahi ʻEkitivitī ʻe Ala Fakahokó

• Kole ki he fānaú ke nau lau e Luke 1:30–35, ʻo kumi e ngaahi tali ki he ongo fehuʻi ko ʻení: “Ko hai e faʻē ʻa Sīsuú?” mo e “Ko hai e Tamai ʻa Sīsuú?” Tokoni ke mahino kiate kinautolu ko Sīsū Kalaisi pē naʻe ʻi ai ʻEne faʻē fakamatelie, ko Mele, mo ha Tamai taʻe-faʻa-mate, ko e Tamai Hēvaní (vakai foki ki he 1 Nīfai 11:18–21).

• ʻI hoʻo lau e ngaahi veesi ko ʻení, fakaafeʻi e fānaú ke nau fekumi ki he ngaahi huafa ʻo Sīsū Kalaisí. Ko e hā e ʻuhinga ʻo e ngaahi huafa ko ʻení, pea ko e hā ʻoku nau akoʻi mai fekauʻaki mo Sīsuú?

• Vahevahe hoʻo fakamoʻoni kia Sīsū Kalaisí, pea fakaafeʻi e fānaú ke vahevahe foki mo ʻenau fakamoʻoní.

Luke 1:5–25, 57–66

ʻOku fanongo mai ʻa e Tamai Hēvaní mo tali ʻeku ngaahi lotú.

ʻOku tali ʻe he ʻOtuá ʻetau ngaahi lotú ka ʻoku ʻikai ke tali mai maʻu pē ʻi he ngaahi founga ʻoku tau faʻa ʻamanaki ki aí. Te ke fakaʻaongaʻi fēfē ʻa e talanoa kia Sakalia mo ʻIlisapetí ke akoʻi ʻaki ʻa e moʻoni ko ʻení ki he fānaú?

Ngaahi ʻEkitivitī ʻe Ala Fakahokó

• ʻEke ki he fānaú pe ko e hā te nau lea ʻaki ki ha taha kuó ne lotua ha tāpuaki ka kuo teʻeki ke ne maʻu ia. Fakaafeʻi ke nau fakakaukau ki he fehuʻi ko ʻení ʻi heʻenau lau fakataha ʻa e Luke 1:5–25, 57–66. (Vakai foki ki he “Vahe 1: ʻIlisapeti mo Sakalia” mo e “Vahe 3: Fāʻeleʻi ʻo Sione Papitaisó,” ʻi he Ngaahi Talanoa ʻo e Fuakava Foʻoú, 6–7, 10–11, pe ko e ngaahi vitiō fekauʻaki mo iá ʻi he ChurchofJesusChrist.org.) Ko e hā nai ha meʻa ʻe talaange ʻe Sakalia mo ʻIlisapeti ki ha taha ʻokú ne ongoʻi naʻe ʻikai tali ʻene lotú?

• Tomuʻa fakaafeʻi ha fānau ʻe niʻihi ke nau vahevahe ha aʻusia ʻi he taimi ne tali mai ai ʻe he Tamai Hēvaní ʻenau ngaahi lotú. Vahevahe ha taimi naʻá ke ongoʻi ai naʻe tali hoʻo lotú ʻi ha founga taʻeʻamanekina.

• Fakaafeʻi ʻa e fānaú ke nau tā ha fakatātā ʻo ha taimi ne tali mai ai ʻe he Tamai Hēvaní ha lotu—tautautefito ki ha taha ʻo ʻenau ngaahi lotú. Tuku ke nau vahevahe ʻenau ʻū fakatātaá mo e kalasí.

fakaʻilonga akó

Poupouʻi e Ako ʻi ʻApí

Fakaafeʻi e fānaú ke nau vahevahe mo honau fāmilí ha faʻahinga fakatātā pē ne nau tā lolotonga e kalasí. Poupouʻi ke nau fehuʻi ki he kau mēmipa honau fāmilí, kau ki ha ngaahi taimi naʻe tali ai ʻe he ʻOtuá ʻenau lotú.

Fakatupulaki ʻEtau Founga Akoʻí

Tokoniʻi e fānau īkí ke nau ako mei he folofolá. Ke tokoni ki he fānaú ke nau ako mei he folofolá, tokanga taha ki ha veesi pē ʻe taha ʻo e folofolá pe ko ha kupuʻi lea mahuʻinga. Te ke lava ʻo fakaafeʻi ʻa e fānaú ke nau tuʻu ki ʻolunga pe hiki honau nimá ʻi he taimi ʻoku nau fanongo ai ki he foʻi lea pe kupuʻi lea ko iá. (Vakai ki he Ko e Faiako ʻi he Founga ʻa e Fakamoʻuí, 21.)

peesi ʻekitivitií: ʻOku tali ʻe he Tamai Hēvaní ʻeku ngaahi lotú