Ko ha Sīpinga ki hono Akoʻí

ʻI he maʻuʻanga tokoni ko ʻení, te ke maʻu ai ha sīpinga sitepu ʻe tolu ʻoku toutou hoko ʻi he lēsoni takitaha: fakaafeʻi e vahevahé, akoʻi e tokāteliné, mo poupouʻi e ako ʻi ʻapí. ʻI he ngaahi meʻa lahi, ʻe ala fehulunaki pe hoko ʻa e ngaahi ʻelemēniti ʻo e sīpinga ko ʻení ʻi ha founga kehekehe lolotonga hoʻo faiakó. Hangē ko ʻení, fakakaukau ko e vahevahé ko ha faingamālie ke akoʻi e tokāteliné, pea ʻoku totonu ke kau ʻi hono akoʻi ʻo e tokāteliné ha ngaahi fakaafe ke vahevahe. Ko e meʻa tatau pē, ʻe lava ke poupouʻi ʻa e ako ʻi ʻapí ʻi ha fealēleaʻaki fakakalasi. Tuku e liliu ko ʻení ke hoko fakanatula pē, ʻaki e muimui ki he ngaahi ueʻi ʻa e Laumālié ke feau e ngaahi fiemaʻu ʻa e fānau ʻokú ke akoʻí.

Fakaafeʻi e Feʻinasiʻakí

Fakaafeʻi e fānaú ke nau vahevahe ʻenau ngaahi ongó, fakakaukaú, mo e ngaahi aʻusia fekauʻaki mo e ngaahi tefitoʻi moʻoni ʻokú ke akoʻí, ko ha konga ʻo e kalasi kotoa pē, ʻE ala kau ʻi heʻenau ngaahi fakamatalá ha ngaahi aʻusia kuo nau maʻu ʻi heʻenau ako ʻi ʻapí. Te ke lava foki ʻo toe vakaiʻi ʻa e meʻa ne nau ako ʻi he uike kuo ʻosí pea ʻeke ange pe kuó ne tākiekina fēfē ʻenau moʻuí.

Akoʻi ʻa e Tokāteliné

ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino lelei ange e tokāteline te ke akoʻi ki he fānaú. Fakakaukau pe ko e hā e ngaahi veesi folofola, kupuʻi lea, aʻusia, fehuʻi, mo e ngaahi maʻuʻanga tokoni kehe te ke lava ʻo vahevahe ke tokoni ke mahino mo fakahoko ai ʻe he fānaú ʻa e ngaahi tefitoʻi moʻoni ʻo e ongoongoleleí ʻoku nau akó. Tokoni ke nau fakatokangaʻi ʻa e ivi tākiekina ʻo e Laumālie Māʻoniʻoní ʻi Heʻene fakamoʻoniʻi ʻa e moʻoní. Fekumi ki ha ngaahi founga mohu fakakaukau mo ueʻi fakalaumālie ke tokoniʻi ai kinautolu ke nau loto-vēkeveke fekauʻaki mo e ngaahi meʻa ʻoku nau akó.

Ki ha ngaahi fakakaukau fekauʻaki mo e founga hono ngāue ʻaki ʻo e mūsiká ke akoʻi ʻaki ʻa e tokāteliné, vakai ki he konga “Ko Hono Fakaʻaongaʻi ʻo e Hivá ke Akoʻi ʻa e Tokāteliné” mo e “Ko Hono Tokoniʻi e Fānaú ke Ako mo Manatuʻi ʻa e Ngaahi Hiva Palaimelí mo e Ngaahi Himí” ʻi he fakamatala fakalahi ʻo e tohi lēsoni ko ʻení.

Poupouʻi e Ako ʻi ʻApí

Koeʻuhí ko ʻapi ko e uho ia ʻo hono ako ʻo e ongoongoleleí, ko ha taha ʻo hoʻo ngaahi kaveinga ngāue ʻi hoʻo hoko ko e faiako Palaimelí ke poupouʻi e ako ʻi ʻapí. Te ke tokoniʻi fēfē e fānaú ke vahevahe mo honau ngaahi fāmilí e meʻa ne nau ako he kalasí? Te ke poupouʻi fēfē nai e fānaú mo honau ngaahi fāmilí ke hokohoko atu ʻenau ako mei he Fuakava Foʻoú ʻi ʻapí?