fānau Palaimeli ʻi ha kalasi

Ko Hono Fakaʻaongaʻi ʻo e Haʻu, ʻo Muimui ʻIate Aú—Maʻá e Palaimelí

Ko e Teuteu ke Faiako ʻi he Palaimelí

ʻOku totonu ke hoko ʻa e ako fakafoʻituitui mo fakafāmili ʻi ʻapí ko e uho ia ʻo e ako ʻo e ongoongoleleí. Ko e meʻa moʻoni ʻeni kiate koe mo e fānau ʻokú ke akoʻí. ʻI hoʻo teuteu ke akoʻí, kamata ʻaki haʻo ngaahi aʻusia pē ʻaʻau ʻi he folofolá. Ko hoʻo teuteu mahuʻinga tahá ʻe hoko ia ʻi hoʻo moʻui ʻaki ʻa e ongoongoleleí, fekumi ʻi he ngaahi folofolá, mo fekumi ki he ueʻi ʻa e Laumālie Māʻoniʻoní.

Ko e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ko ha konga mahuʻinga ia ʻo hoʻo ako fakatāutahá pea mo hoʻo teuteu ke faiakó. ʻE tokoni atu ia ke ke maʻu ai ha mahino lahi ange ki he ngaahi tefitoʻi moʻoni fakatokāteline ʻi he ngaahi folofolá. ʻE ʻoatu ʻe he Haʻu, ʻo Muimui ʻIate Au—Maʻá e Palaimelí ha ngaahi ʻekitivitī ki he ngaahi potufolofola lahi mo ha ngaahi talanoa ʻe fakaafeʻi ai e fānaú ke nau ako ʻi ʻapi lolotonga e uiké.

Lolotonga hoʻo teuteú, te ke maʻu ha ngaahi fakakaukau mo ha ngaahi ongo fekauʻaki mo e fānau ʻokú ke akoʻí. Te ke maʻu ha ngaahi fakakaukau ki he founga ʻe faitāpuekina ai ʻe he ngaahi tefitoʻi moʻoni ʻi he folofolá ʻa ʻenau moʻuí. ʻE tataki koe ke ke ueʻi fakalaumālie kinautolu ke nau ʻiloʻi e ngaahi tefitoʻi moʻoni ko iá, ʻi heʻenau ako mei he folofolá maʻanautolú pea mo honau ngaahi fāmilí.

ko e fefine ʻoku ako folofola

Ngaahi Fakakaukau ki hono Akoʻí

ʻI hoʻo teuteu ke faiakó, ʻe malava ke ke maʻu ha ueʻi fakalaumālie makehe ʻaki hoʻo fekumi ʻi he ngaahi fokotuʻutuʻu fakafaiako ʻi he maʻuʻanga tokoni ko ʻení. ʻOua te ke pehē ko e ngaahi fakakaukau ko ʻení ko ha ngaahi fakahinohino fakahokohoko, ka ko ha ngaahi fokotuʻu ke tokoni ke ke maʻu ha ueʻi fakalaumālie ʻiate koe pē. ʻOkú ke ʻiloʻi ʻa e fānau ko ʻení, pea te ke ʻiloʻi lelei ange ai kinautolu ʻi hoʻo ngāue fakataha mo kinautolu ʻi he kalasí. ʻOku ʻafioʻi foki mo kinautolu ʻe he ʻEikí, pea te Ne ueʻi fakalaumālie koe ʻaki ʻa e ngaahi founga lelei taha ke akoʻi mo tāpuekina ʻaki kinautolú.

ʻOku lahi ha ngaahi maʻuʻanga tokoni kehe ʻoku ʻatā maʻau ke ke fakaʻaongaʻi ʻi hoʻo teuteú, kau ai e ngaahi fakakaukau ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pea mo e ngaahi makasini ʻa e Siasí. Ki ha toe fakamatala lahi ange fekauʻaki mo e ngaahi meʻá ni, vakai, “Ngaahi Maʻuʻanga Tokoni Makehe ki hono Akoʻi ʻo e Fānaú” ʻi he maʻuʻanga tokoni ko ʻení.

Ko Ha Ngaahi Meʻa ke Manatuʻí

• ʻI he taimi kotoa pē ʻokú ke feohi ai mo e fānaú, fakakaukau ki ha ngaahi founga te ke lava ai ʻo tokoniʻi kinautolu ke nau ongoʻi ʻa e ʻofa ʻa e Tamai Hēvaní mo Sīsū Kalaisí pea mo fakatokangaʻi ʻa e ivi tākiekina ʻo e Laumālie Māʻoniʻoní.

• ʻOku maʻu ʻe he mātuʻá ʻa e tefitoʻi fatongia ke akoʻi ʻenau fānaú. ʻI hoʻo hoko ko ha faiakó, ʻokú ke maʻu ha fatongia mahuʻinga ke poupouʻi, fakalotolahi, mo langaki hono ako ʻo e ongoongoleleí ʻi ʻapí. Ongoʻingofua e fānau ʻoku ʻikai akoʻi ʻe heʻenau ngaahi mātuʻá ʻa e ongoongoleleí ʻi honau ʻapí. Fakakau e fānau kotoa pē ʻi he fealēleaʻaki ʻi he ongoongoleleí neongo honau ngaahi tūkunga ʻi ʻapí.

• ʻOku lelei hono toutou fakahoko ha meʻá. ʻOku ola lelei ange hono ako ʻe he fānaú ʻa e ngaahi moʻoni ʻo e ongoongoleleí ʻi he taimi ʻoku toutou akoʻi ai e ngaahi moʻoni ko ʻení, ʻi ha ngaahi ʻekitivitī kehekehe. Kapau te ke ʻiloʻi ʻoku ola lelei ʻa e ngaahi ʻekitivitī akó ki he fānaú, fakakaukau ke toutou fakahoko ia, tautautefito kapau ʻokú ke akoʻi ha fānau iiki ange. Te ke lava foki ʻo toe vakaiʻi ha ʻekitivitī mei ha lēsoni kimuʻa.

• ʻOku finangalo ʻa e Tamai Hēvaní ke ke lavameʻa ʻi hoʻo hoko ko ha faiakó. Kuó Ne ʻomi ha ngaahi maʻuʻanga tokoni lahi ke tokoniʻi koe, kau ai e ngaahi fakataha alēlea fakafaiakó. ʻI he ngaahi fakataha ko ʻení, ʻoku lava ke ke fealeaʻaki mo e kau faiako kehé fekauʻaki mo ha faʻahinga faingataʻa ʻokú ke fehangahangai mo ia. Te mou lava foki ke aleaʻi mo akoako fakahoko ʻa e ngaahi tefitoʻi moʻoni ʻo e faiako anga faka-Kalaisí.

• Kapau ʻokú ke akoʻi e fānau iiki angé pea fie maʻu ha tokoni makehe, vakai, “Ko Hono Feau e Ngaahi Fiemaʻu ʻa e Fānau Iiki Angé” ʻi he maʻuʻanga tokoni ko ʻení.

ʻOku kau ʻi he maʻuʻanga tokoni ko ʻení ʻa e ngaahi fokotuʻutuʻu fakafaiako ki he uike kotoa pē ʻo e taʻú. ʻI he ʻaho Sāpate ʻoku ʻikai fakahoko ai e Palaimelí koeʻuhi ko e konifelenisi lahí, konifelenisi fakasiteikí, pe ko ha faʻahinga ʻuhinga kehe, ʻoku poupouʻi atu ʻa e ngaahi fāmilí ke nau hokohoko atu hono lau ʻo e Fuakava Foʻoú ʻi ʻapi ʻo fakatatau mo e fokotuʻutuʻu fakalēsoni kuo fakataimitēpileʻi ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. ʻOua naʻá ke hohaʻa koeʻuhí ko e ngaahi lēsoni ne ʻikai te ke akoʻí; akoʻi pē ʻa e ngaahi lēsoni kuo fokotuʻutuʻu fakauiké.