Ko Ha Faiako Koe ʻo e Fānaú

Kuo uiuiʻi koe ʻe he ʻOtuá ke ke akoʻi ʻEne fānaú ʻi he founga ʻa e Fakamoʻuí. Naʻe vaheʻi koe ki he uiuiʻi ko ʻení ʻaki e mafai ʻo Hono lakanga fakataulaʻeiki māʻoniʻoní. Neongo kapau ʻoku ʻikai ko ha faiako taukei koe, ka ʻe foaki atu ʻe he Tamai Hēvaní ʻa e ivi tākiekina mo e mālohi ʻo e Laumālie Māʻoniʻoní ʻi hoʻo moʻui taau, lotu maʻu pē, mo hoʻo ako e folofolá ke tokoniʻi koe ke ke lavameʻa (vakai, 2 Nīfai 33:1).

Ko kinautolu kuo fakafalala atu ke mou tokangaʻí, ko ha fānau kinautolu ʻa e Tamai Hēvaní, pea ʻokú Ne ʻafioʻi e meʻa ʻoku nau fie maʻú mo e founga lelei taha ke tokoni ai kiate kinautolú. ʻI hoʻo fekumi ʻi he faʻa lotu ki he ivi tākiekina ʻo e Laumālie Māʻoniʻoní, te Ne tataki koe ʻi hoʻo teuteú mo e lolotonga hoʻo faiakó. Te Ne fakahā kiate koe ʻa e meʻa ʻoku totonu ke ke lea ʻakí mo ia ʻoku totonu ke ke faí (vakai, 2 Nīfai 32:5).

ʻOua naʻá ke teitei fakasiʻia e malava ʻe ha kiʻi tamasiʻi ke mahino kiate ia ʻa e ongoongoleleí. ʻOku maʻu maʻu pē ʻe he fānau pelepelengesi ko ʻení ha fakamatala, faʻu mo fakaleleiʻi ʻenau ngaahi fakakaukaú, pea fakahoko mo vahevahe e ngaahi ʻiló, ʻi he tapa kotoa pē ʻo ʻenau moʻuí. ʻOku tautefito e moʻoni ko ʻení ʻi he ongoongoleleí, koeʻuhi ʻoku mateuteu mo vēkeveke ʻa e fānaú ke ako e ngaahi moʻoni faingofua ʻo e ongoongoleleí. ʻOku mālohi mo haohaoa ʻenau tui ki he ngaahi meʻa fakalaumālié, pea ko e momeniti kotoa pē ko ha faingamālie ke ako. ʻOku nau ngāue loto-fiemālie ʻi he meʻa kuo nau akó, neongo kapau ʻoku kei taʻekakato ʻenau mahinó. Ko e founga ʻeni ʻoku totonu ke tau maʻu ʻaki e ongoongoleleí. Hangē ko hono akoʻi mai ʻe he Fakamoʻuí, “Ko ia ia ʻe ʻikai te ne maʻu ʻa e puleʻanga ʻo e ʻOtuá ʻo hangē ko e tamasiʻi siʻí, ʻe ʻikai ʻaupito hū ia ki ai” (Luke 18:17).

Ko e uiuiʻi ke faiako ki he fānaú ko ha falala toputapu ia, pea ʻoku angamaheni pē ke te ongoʻi lōmekina ʻi ha ngaahi taimi. Kae manatuʻi naʻe uiuiʻi koe ʻe he Tamai Hēvaní, pea te Ne poupouʻi koe. Ko e ngāue ʻeni ʻa e ʻEikí, pea ʻi hoʻomou ngāue “ʻaki homou lotó, iví, ʻatamaí mo e mālohí kotoa” (Tokāteline mo e Ngaahi Fuakava 4:2), te Ne fakalahi e ngaahi meʻa te mou malavá, meʻafoakí, mo e ngaahi talēnití, pea ʻe tāpuekina ʻe hoʻomou ngaahi ngāue tokoní ʻa e moʻui ʻo e fānau ʻoku mou akoʻí.