« បងប្អូនគឺជាគ្រូបង្រៀនម្នាក់របស់កុមារ » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២៣ )
« បងប្អូនគឺជាគ្រូបង្រៀនម្នាក់របស់កុមារ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
បងប្អូនគឺជាគ្រូបង្រៀនរបស់កុមារ
បងប្អូនត្រូវបានហៅដោយព្រះ ដើម្បីបង្រៀនបុត្រាបុត្រីរបស់ទ្រង់តាមរបៀបរបស់ព្រះអង្គសង្គ្រោះ ។ បងប្អូនត្រូវបានញែកចេញឲ្យមានការហៅនេះដោយសិទ្ធិអំណាចនៃបព្វជិតភាពដ៏បរិសុទ្ធរបស់ទ្រង់ ។ ទោះបីជាបងប្អូនគ្មានបទពិសោធន៍ជាគ្រូបង្រៀនក៏ដោយ នៅពេលបងប្អូនរស់នៅដោយស័ក្ដិសម អធិស្ឋានជារៀងរាល់ថ្ងៃ ហើយសិក្សាព្រះគម្ពីរ នោះព្រះវរបិតាសួគ៌នឹងប្រទានឥទ្ធិពល និងព្រះចេស្ដានៃព្រះវិញ្ញាណបរិសុទ្ធដើម្បីជួយបងប្អូនឲ្យទទួលបានជោគជ័យ ( សូមមើល នីហ្វៃទី២ ៣៣:១ ) ។
កុមារទាំងឡាយដែលស្ថិតនៅក្នុងការមើលថែរបស់បងប្អូន គឺជាបុត្រាបុត្រីរបស់ព្រះវរបិតាសួគ៌ ហើយទ្រង់ជ្រាបពីអ្វីដែលពួកគេត្រូវការ និងពីរបៀបដ៏ល្អបំផុតដើម្បីជួយដល់ពួកគេ ។ ពេលបងប្អូនអធិស្ឋានស្វែងរកព្រះចេស្ដានៃព្រះវិញ្ញាណបរិសុទ្ធ នោះទ្រង់នឹងណែនាំបងប្អូន នៅពេលបងប្អូនរៀបចំខ្លួនបង្រៀន ហើយខណៈដែលបងប្អូនកំពុងបង្រៀន ។ ទ្រង់នឹងបើកសម្ដែងដល់បងប្អូននូវអ្វីដែលបងប្អូនគួរនិយាយ និងអ្វីដែលបងប្អូនគួរធ្វើ ( សូមមើល នីហ្វៃទី២ ៣២:៥ ) ។
សូមកុំមើលស្រាលពីសមត្ថភាពរបស់កុមារដើម្បីយល់ដឹងពីដំណឹងល្អឡើយ ។ នៅគ្រប់ទិដ្ឋភាពនៃជីវិតរបស់ពួកគេ កុមារជាទីស្រឡាញ់ទាំងនេះនឹងបន្ដស្រូបយកព័ត៌មាន បណ្ដុះ និងសម្រិតសម្រាំងទៅជាគំនិត ហើយធ្វើការស្វែងរក ព្រមទាំងចែកចាយគំហើញទាំងនោះ ។ ការណ៍នេះគឺពិតជាពិសេសចំពោះដំណឹងល្អ ដោយសារកុមារត្រៀមខ្លួនជាស្រេច និងចង់រៀនពីសេចក្ដីពិតដ៏សាមញ្ញនៃដំណឹងល្អ ។ សេចក្ដីជំនឿរបស់ពួកគេក្នុងរឿងខាងវិញ្ញាណមានភាពរឹងមាំ និងបរិសុទ្ធ ហើយគ្រប់វិនាទីទាំងអស់ជាពេលវេលារៀនសូត្រមួយ ។ ពួកគេស្ម័គ្រចិត្តធ្វើតាមអ្វីដែលពួកគេបានរៀនសូត្រ ទោះបីជាការយល់ដឹងរបស់ពួកគេពុំទាន់បានពេញលេញក្ដី ។ នេះគឺជារបៀបដែលពួកយើងទាំងអស់គ្នាគួរតែទទួលបានដំណឹងល្អ ។ ដូចដែលព្រះអង្គសង្គ្រោះបានបង្រៀនថា « អ្នកណាដែលមិនទទួលនគរព្រះ ដូចជាកូនតូចៗ នោះមិនបានចូលទៅក្នុងនគរនោះឡើយ » ( លូកា ១៨:១៧ ) ។
ការហៅឲ្យបង្រៀនកុមារគឺជាទំនុកចិត្តដ៏ពិសិដ្ឋមួយ ហើយពេលខ្លះវាគឺជារឿងធម្មតាទេដែលមាននូវការថប់បារម្ភនោះ ។ ប៉ុន្ដែសូមចងចាំថា ព្រះវរបិតាសួគ៌របស់បងប្អូនបានហៅបងប្អូន ហើយទ្រង់នឹងគាំទ្រដល់បងប្អូន ។ នេះគឺជាកិច្ចការរបស់ព្រះអម្ចាស់ ហើយកាលដែលបងប្អូនបម្រើ « ឲ្យអស់ពីចិត្តអស់ពីពលំ អស់ពីគំនិត ហើយអស់ពីកម្លាំង » ( គោលលទ្ធិ និងសេចក្តីសញ្ញា ៤:២ ) នោះទ្រង់នឹងពង្រីកសមត្ថភាពអំណោយទាន និងទេពកោសល្យរបស់បងប្អូន ហើយការបម្រើរបស់បងប្អូននឹងផ្តល់ពរជ័យដល់ជីវិតរបស់កុមារដែលបងប្អូនបង្រៀន ។