Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak

Ex awa’b’ejil reheb’ li Tzoleb’aal reheb’ li Kok’al ut aj b’eresinel b’ich,

Eb’ li b’ich reheb’ li kok’al numtajenaq xwankileb’ re xtenq’ankileb’ li kok’al chi tzolok chirix lix k’uub’anb’il na’leb’ li qaChoxahil Yuwa’ re sahil ch’oolejil ut chirixeb’ li na’leb’ re lix evangelio li Jesukristo. Naq eb’ li kok’al neke’b’ichan chirixeb’ li na’leb’ re li evangelio, li Santil Musiq’ej naxch’olob’ xyaalalileb’ li na’leb’ a’an. Eb’ li aatin ut li son te’kanaaq sa’ xk’a’uxleb’ ut raameb’ li kok’al chiru chixjunil lix yu’ameb’.

Sik’omaq xtenq’ li Musiq’ej naq nekekawresi eerib’ chixk’utb’al li evangelio rik’in li b’ichank. Wotzomaq lix nawom eech’ool chirixeb’ li yaal nekeb’icha. Tenq’ahomaqeb’ li kok’al chixk’eeb’al reetal chan ru naq li b’ichank naxk’am rib’ rik’in li yookeb’ chixtzolb’al ut chixnumsinkil sa’ rochocheb’ ut sa’ li Tzoleb’aal reheb’ li Kok’al. Eb’ li kok’al ut lix junkab’aleb’ te’osob’tesiiq xb’aan lix yalb’al aaq’e chixtenq’ankileb’ li kok’al chixb’ichankileb’ li loq’laj b’ich.

Nekexqara ut naqab’antioxi eere lee k’anjel nekeb’aanu chi k’eek’o eech’ool re xkawob’resinkileb’ ut xkolb’aleb’ li qachaq’al ru kok’al.

Li Jolomil Awa’b’ejil re li Tzoleb’aal reheb’ li Kok’al

Xch’olob’ankil li hoonal re b’ichank

5 k’asal (awa’b’ejil re li Tzoleb’aal reheb’ li Kok’al): Li tijok sa’ xtiklajik, jun raqal sa’eb’ li loq’laj hu malaj eb’ lix raqalil li paab’aal, ut jun yaab’asinb’il aatin

20 k’asal (aj b’eresinel b’ich): Hoonal re b’ichank

Li awa’b’ejil re li Tzoleb’aal reheb’ li Kok’al ut aj b’eresinel b’ich neke’xsik’eb’ ru li b’ich rajlal po re xka’jultikankileb’ li na’leb’ re li evangelio yookeb’ chixtzolb’aleb’ li kok’al sa’ xtzoleb’aaleb’ ut sa’ rochocheb’. Jun xtusulaleb’ li b’ich li neke’xka’jultikaheb’ li na’leb’ a’in naru neke’tawman sa’ li hu a’in. Eb’ li b’ich a’an neke’tawman ajwi’ sa’eb’ li tusleb’ aatin re Kim, Taaqehin—Choq’ re li Tzoleb’aal reheb’ li Kok’al ut Kim, Taaqehin—Choq’ reheb’ li komon ut li junkab’al.

Naq nakak’uteb’ li b’ich chiruheb’ li kok’al, kanab’eb’ chixwotzb’al li ak xe’xtzol chirixeb’ li seraq’ ut li tzol’leb’ li k’utb’ileb’ sa’eb’ li b’ich. Maare taawaj xtz’ilb’al rixeb’ li tusleb’ aatin re Kim, Taaqehin—Choq’ re li Tzoleb’aal reheb’ li Kok’al yookeb’ chixtzolb’aleb’ li kok’al sa’ xtzoleb’aaleb’. A’in tatxtenq’a chixk’eeb’al reetaleb’ li seraq’ ut li tzol’leb’ yookeb’ chixtzolb’al re naq naru taak’oxla chan ru taatenq’aheb’ chixtzolb’al xkomon xna’leb’eb’ rik’in li b’ichank.

Sa’ li hoonal re b’ichank, naru ajwi’ taawoksiheb’ li b’ich ak xe’xtzol li kok’al ut eb’ li b’ich neke’wulak chiruheb’. Naq yookat chixtz’ilb’al rix jun b’ich, kanab’eb’ li kok’al chixwotzb’al b’ayaq li neke’xk’oxla ut neke’reek’a chirixeb’ li na’leb’ sa’eb’ li b’ich.

Li B’ichleb’aal choq’ reheb’ li Kok’al a’an li tz’aqal k’anjeleb’aal choq’ re li b’ichank sa’ li Tzoleb’aal reheb’ li Kok’al. Us ajwi’ roksinkileb’ li b’ich sa’ xb’ichleb’aaleb’ li ninq ut sa’ li hu Amigos malaj li Liahona. Wan naq, eb’ li kok’al maare neke’raj xb’ichankileb’ li b’ich re li tenamit wankex wi’ malaj li b’ich re li Ralankil malaj Paswa li us xb’ichankileb’ sa’ domingo ut choq’ reheb’ li kok’al. Yalaq paay chik chi b’ich li taa’oksimanq sa’ li Tzoleb’aal reheb’ li Kok’al, tento naq k’ulub’anb’il xb’aan li obispil (chi’ilmanq Manual General: Servir en La Iglesia de Jesucristo de los Santos de los Últimos Días, 12.3.4, ChurchofJesusChrist.org).

Chan ru taawanq li Tzoleb’aal reheb’ li Kok’al

Rajlal xamaan, nab’aanuman a’in sa’ li Tzoleb’aal reheb’ li Kok’al:

Hoonal re b’ichank:25 k’asal

Xjalb’al li k’anjel:5 k’asal

Eb’ li tzoleb’aal:20 k’asal

Eb’ li neke’jolomink re jun li Tzoleb’aal reheb’ li Kok’al wankeb’ wi’ naab’al li kok’al neke’ru chixk’eeb’aleb’ li kok’al sa’ wiib’ ch’uut re naq jun ch’uut yooqeb’ chi tzolok ut li ch’uut jun chik wanq sa’ li hoonal re b’ichank. Chirix a’an, li wiib’ ch’uut neke’xjal xna’ajeb’. Wi nab’aanuman a’an, eb’ laj jolominel maare tento te’xjal b’ayaq xhoonalil li junjunq chi k’anjel tz’iib’anb’il arin a’ yaal li na’ajman ru choq’ reheb’.

Eb’ li b’ich choq’ re li hoonal re b’ichank

Enero

• “Kim taaqehin,” Eb’ li B’ich, 66

• “Natijok jun ch’ina al,” B’ichleb’aal choq’ reheb’ li Kok’al, 6–7

• “Jo’ ch’ina al li Jesus kiwan,” B’ichleb’aal choq’ reheb’ li Kok’al, 34

Febrero

• “Li kub’iha’,” B’ichleb’aal choq’ reheb’ li Kok’al, 54–55

• “Tintaaqe li kixk’uub’ choq’ we,” B’ichleb’aal choq’ reheb’ li Kok’al, 86–87

• “Kixtaqla li Ralal,” B’ichleb’aal choq’ reheb’ li Kok’al, 20–21

Marzo

• “Chinwanq raj jo’ li Jesus,” B’ichleb’aal choq’ reheb’ li Kok’al, 40–41

• “Ma tijok xayal?,” Eb’ li B’ich, 81

• “Ye we resil li Jesus,” B’ichleb’aal choq’ reheb’ li Kok’al, 36

Abril

• “Li paab’aal,” B’ichleb’aal choq’ reheb’ li Kok’al, 50–51

• “Ninnaw naq raab’ilin,” B’ichleb’aal choq’ reheb’ li Kok’al, 42–43

• “Xwakli Jesus,” B’ichleb’aal choq’ reheb’ li Kok’al, 44

Mayo

• “Paab’eb’ li taqlahom,” B’ichleb’aal choq’ reheb’ li Kok’al, 68–69

• “Taruuq toowanq aran sa’ choxa,” B’ichleb’aal choq’ reheb’ li Kok’al, 98

• “Laa’in jun ralal li Dios,” B’ichleb’aal choq’ reheb’ li Kok’al, 2–3

Junio

• “Li rahok cherib’il eerib’,” B’ichleb’aal choq’ reheb’ li Kok’al, 74

• “Kikam li nimla Kolonel,” Eb’ li B’ich, 116

• “Ma yaal naq li Jesus xwakli?,” B’ichleb’aal choq’ reheb’ li Kok’al, 45

Julio

• “Saqaq aawu,” B’ichleb’aal choq’ reheb’ li Kok’al, 81

• “Aawik’in tinb’eeq laa’in,” B’ichleb’aal choq’ reheb’ li Kok’al, 78–79

• “Yo’yo lin Dios, ninnaw,” B’ichleb’aal choq’ reheb’ li Kok’al, 8

Agosto

• “Naq nakub’e lin ha’,” B’ichleb’aal choq’ reheb’ li Kok’al, 53

• “Li Santil Musiq’ej,” B’ichleb’aal choq’ reheb’ li Kok’al, 56

• “Jun santil ochoch k’eeb’il we,” B’ichleb’aal choq’ reheb’ li Kok’al, 73

Septiembre

• “Naq yooko chi tenq’ank,” B’ichleb’aal choq’ reheb’ li Kok’al, 108

• “Natijok jun ch’ina al,” B’ichleb’aal choq’ reheb’ li Kok’al, 6–7

• “Ninnaw naq yoʼyo inKolonel,” Eb’ li B’ich, 77

Octubre

• “Naq taak’ulunq li Kolonel,” B’ichleb’aal choq’ reheb’ li Kok’al, 46–47

• “Lix iglees li Jesukristo,” B’ichleb’aal choq’ reheb’ li Kok’al, 48

• “Sa’ li santil ochoch,” B’ichleb’aal choq’ reheb’ li Kok’al, 99

Noviembre

• “Tintzol, tink’oxla, tintijoq,” B’ichleb’aal choq’ reheb’ li Kok’al, 66

• “At inYuwa’, taak’ut taxaq chiwu,” B’ichleb’aal choq’ reheb’ li Kok’al, 75

• “Wik’in laa’in natikla li chaab’ilal,” B’ichleb’aal choq’ reheb’ li Kok’al, 83

Diciembre

• “Raab’ilin xb’aan li Dios sa’ choxa,” B’ichleb’aal choq’ reheb’ li Kok’al, 16–17

• “Tinsik’ ru li us,” B’ichleb’aal choq’ reheb’ li Kok’al, 82–83

• “Naq nakub’e lin ha’,” B’ichleb’aal choq’ reheb’ li Kok’al, 53

Roksinkileb’ li b’ich re xk’utb’al li tzol’leb’

Li rajom li hoonal re b’ichank a’an xtenq’ankileb’ li kok’al chireek’ankil li Santil Musiq’ej naq yooqeb’ chixtzolb’al li evangelio. Eb’ li na’leb’ a’in neke’ru chi tenq’ank.

Xnujob’resinkil li yamyo. Tz’iib’a raatinul jun raqal re li b’ich chiru li pizarron chi ink’a’ taatz’iib’a junjunq reheb’ li aatin mas aajeleb’ ru sa’ li b’ich a’an. Chirix a’an, patz’ reheb’ li kok’al naq te’xb’icha li b’ich, ut naq te’rab’iheb’ li aatin li neke’xnujob’resiheb’ li yamyo. Naq neke’xnujob’resi li junjunq yamyo, patz’ reheb’ li kok’al naq te’xwotz li na’leb’ re li evangelio neke’xtzol rik’ineb’ li aatin li yookeb’ chixnujob’resinkil.

Roksinkil li raatineb’ laj jolominel re li Iglees. Patz’ reheb’ li kok’al naq te’rab’i li raatin jun aj jolominel re li Iglees li naxk’ut li na’leb’ re li evangelio li juntaq’eet rik’in li na’leb’ k’utb’il sa’ li b’ich. Patz’ reheb’ naq te’xtaqsiheb’ li ruq’ naq neke’rab’i li na’leb’ li naxtenq’aheb’ chixtawb’al ru li na’leb’ yookeb’ chixb’ichankil. Patz’ reheb’ naq te’xwotz k’a’ru xe’rab’i.

Xwotzb’al jun xnawom ch’oolej. Wotz sa’ junpaat lix nawom aach’ool chiruheb’ li kok’al chirixeb’ li na’leb’ re li evangelio li neke’tawman sa’ li b’ich. Tenq’aheb’ li kok’al chixtawb’al ru naq rik’in li b’ichank, naru neke’xwotz lix nawom xch’ooleb’ ut neke’reek’a li Musiq’ej.

Roksinkileb’ li jalam-uuch. Patz’ reheb’ li kok’al naq tate’xtenq’a chixtawb’al malaj chixyiib’ankileb’ jalam-uuch li neke’xk’ul rib’ rik’in li aajel ruhil aatin malaj ch’ol aatin sa’ li b’ich. Patz’ reheb’ naq te’xwotz chan ru naq eb’ li jalam-uuch neke’xk’ul rib’ rik’in li b’ich ut li k’a’ru k’utb’il sa’ li b’ich. Wi yookat chixk’utb’al li b’ich “Tintaaqe li kixk’uub’ choq’ we” (B’ichleb’aal choq’ reheb’ li Kok’al, 86–87), maare taak’eheb’ li jalam-uuch sa’ li tzoleb’aal li neke’xk’ut li aajel ruhil aatin sa’ li b’ich (maare maatan, choxa, ut ruchich’och’). Patz’ reheb’ li kok’al naq te’xxokeb’ li jalam-uuch ut te’xtaqsiheb’ sa’ iq’ sa’ tz’aqal xtusulaleb’ ru naq neke’xb’icha li b’ich sa’ komonil.

Roksinkil junaq ch’ina k’a’aq re ru. Naru taawoksi jun k’a’aq re ru naxk’am rib’ rik’in li b’ich. Li b’ich “Li paab’aal” (B’ichleb’aal choq’ reheb’ li Kok’al, 50–51) na’aatinak chirix jun ch’ina iyaj. Naru taak’ut jun li iyaj chiruheb’ li kok’al li tixtenq’aheb’ chixtawb’al ru naq li paab’aal jwal ka’ch’in chirix li Jesukristo naru nak’iik rik’in hoonal.

Xjuntaq’eetankil li b’ich rik’in lee yu’am. Tenq’aheb’ li kok’al chixk’eeb’al reetal chan ru naq laq’lookeb’ li na’leb’ k’utb’il sa’ li b’ich rik’in li neke’xnumsi rik’ineb’ li na’leb’ a’an sa’ xyu’ameb’. Rub’elaj naq teeb’icha “Sa’ li santil ochoch” (B’ichleb’aal choq’ reheb’ li Kok’al, 99) naru taakanab’eb’ li kok’al chixtaqsinkileb’ li ruq’ wi jun sutaq rilomeb’ jun li santil ochoch. B’oqeb’ chi k’oxlak chirix li neke’reek’a naq neke’ril jun li santil ochoch naq yookeb’ chi b’ichank.

Roksinkileb’ li patz’om. Wan naab’al paay chi patz’om naru taawoksi naq yookex chi b’ichank. Naru taapatz’ reheb’ li kok’al k’a’ru xe’xtzol sa’ li junjunq raqal re li b’ich. Naru ajwi’ taapatz’ reheb’ naq te’xk’oxlaheb’ li patz’om li neke’sumeek xb’aan li b’ich.

Rab’inkil lix sumenkileb’ li patz’om. Patz’ reheb’ li kok’al naq te’ab’inq re xtawb’al xsumenkileb’ li patz’om jo’ “ani?” “k’a’ru?” “b’ar?” “jo’q’e?” malaj “k’a’ut?” Sa’ li b’ich “Li kub’iha’ ” (B’ichleb’aal choq’ reheb’ li Kok’al, 54–55), te’ruuq chi ab’ink re xtawb’al ani kikub’sink re xha’ li Jesus ut b’ar, jo’q’e, chan ru, ut k’a’ut naq kikub’e xha’. Naru ajwi’ taapatz’ reheb’ li kok’al naq te’rab’iheb’ li aajel ruhil aatin malaj te’rajla rik’in ru’uj ruq’eb’ jarub’ sut xe’rab’i junaq aatin.

Xtenq’ankileb’ li kok’al chixtzolb’aleb’ ut chixjultikankileb’ li b’ich re li Tzoleb’aal reheb’ li Kok’al ut sa’ Eb’ li B’ich

Eb’ li kok’al neke’xtzol jun b’ich naq neke’rab’i ut neke’xb’icha k’iila sut. Rajlal sut naq eb’ li kok’al te’xtzol jun ak’ b’ich, b’ichaheb’ li raatinul li b’ich choq’ reheb’—ink’a’ yal taawileb’ ru malaj taayaab’asiheb’. A’in naxtenq’aheb’ li kok’al chixtzolb’al lix yaab’ li b’ich chi junajinb’il rik’in li raatinul. Chirix naq ak xtzolman jun li b’ich, b’icha wi’chik k’iila sut chiru li chihab’. Tz’iib’anb’il arin junjunq na’leb’ re xtenq’ankileb’ li kok’al chixtzolb’al ut chixtz’ilb’al rixeb’ li b’ich.

Xyiib’ankileb’ li ninqi hu. K’utb’esi li ninqi hu tz’iib’anb’ileb’ wi’ li raatinul li junjunq raqal re li b’ich malaj wankeb’ wi’ li jalam-uuch li neke’reetaliheb’ li aatin. Naq yookeb’ chi b’ichank li kok’al, muq junjunq reheb’ li aatin malaj jalam-uuch toj reetal naq neke’ru chixb’ichankil chixjunil li b’ich chi maak’a’ xtenq’eb’ li ninqi hu. Naru ajwi’ taakanab’eb’ li kok’al chatenq’ankil sa’ xyiib’ankileb’ li ninqi hu.

Xk’utb’al chan ru nab’ichaman li b’ich. Re xtenq’ankileb’ li kok’al chixtzolb’al xja’ajil li b’ich, ye’ laa wuq’ chawu, ut naq yookex chi b’ichank, taqsi laa wuq’ malaj kub’si laa wuq’ a’ yaal jo’ chanru xja’ajil li b’ich.

Xka’sutinkileb’ li aatin. B’oqeb’ li kok’al chixka’sutinkileb’ li aatin yookat chixb’ichankil laa’at. B’icha jun ch’ol aatin malaj jun tzol re li b’ich choq’ reheb’ li kok’al, ut b’oqeb’ chixka’sutinkileb’ li aatin a’an chi b’ichanb’il.

Xjalb’al chan ru nab’ichaman li b’ich. B’ichaheb’ li b’ich chi k’iila paay ru, jo’ chi hasb’anb’il, chi tz’uyinb’il, xpoq’poq’inkil sa’ aawuq’ li b’ich, xjalb’al ma junpaat ma timil naq yookat chi b’ichank, malaj b’ichank chi chunchu malaj chi xaxqo.

B’ichank sa’ kok’ ch’uut. K’e re li junjunq ch’uut malaj kok’al jun ch’ol aatin re xb’ichankil chi xaxqo, toja’ naq te’xjal li ch’ol aatin rik’ineb’ lix komon toj reetal naq li junjunq ch’uut malaj kok’al xwan xhoonal chixb’ichankil li junjunq ch’ol aatin.

Roksinkileb’ li uq’ej. Patz’ reheb’ li kok’al naq te’xk’oxla chan ru naru te’reek’asi li ruq’ re xtenq’ankileb’ chixjultikankil li raatinul jun li b’ich. Naq teeb’icha “Tuqtuuko, ch’anch’ooko” (B’ichleb’aal choq’ reheb’ li Kok’al, 11), naru taapatz’ reheb’ li kok’al naq te’xq’aluheb’ li ruq’, te’xxulub’eb’ lix jolom, ut te’xch’e’ lix ch’ooleb’ naq yookeb’ chi b’ichank.

Neke’b’ichan li xqa’al, neke’b’ichan li teelom. Yiib’ xjalam-uuch jun al teelom ut xjalam-uuch jun xqa’al, ut latz malaj oksi li cinta re xk’eeb’aleb’ li jalam-uuch sa’ kok’ che’. Naq nekeb’icha jun li b’ich, taqsi jun reheb’ li jalam-uuch re xk’utb’esinkil ani te’b’ichanq.

Xjuntaq’eetankil li jalam-uuch rik’in li ch’ol aatin. Tz’iib’a li junjunq tzol re jun li b’ich sa’ kok’ hu, ut taweb’ li jalam-uuch li neke’reetali li junjunq tzol. K’eheb’ li jalam-uuch sa’ jun xpak’al li tzoleb’aal ut li kok’ hu sa’ li junpak’al chik. B’ichahomaq li b’ich, ut kanab’eb’ li kok’al chixjuntaq’eetankileb’ li jalam-uuch rik’ineb’ li aatin.

Li tenq’anel na’leb’ chirix li k’anjel reheb’ li kok’al sa’ li ch’utam re li loq’laj wa’ak

Rub’el xb’eresihom li obiisp, li k’anjel reheb’ li kok’al sa’ li ch’utam re li loq’laj wa’ak nak’ulman chi kok’ aj xsa’ sa’ jun reheb’ li po sa’ xraqik li chihab’. Jo’ awa’b’ejil re li Tzoleb’aal reheb’ li Kok’al ut aj b’eresinel b’ich, ch’utub’omaq eerib’ sa’ xtiklajik li chihab’ rik’in lix tenq’ aj k’ehol na’leb’ li obiisp li naxjolomi li Tzoleb’aal reheb’ li Kok’al re k’uub’ank na’leb’ chirix li taab’aanumanq sa’ li k’anjel. Naq ak xek’uub’ eena’leb’, sik’omaq eeliceens re xb’aanunkil.

Tento naq li k’anjel tixk’e xhoonaleb’ li kok’al chixyeeb’al resil li k’a’ru xe’xtzol a’an ut lix junkab’aleb’ sa’ ochoch ut sa’ li Tzoleb’aal reheb’ li Kok’al chirix li Ak’ Chaq’rab’, jo’eb’ ajwi’ li b’ich li xe’xb’icha chiru li chihab’. K’oxlahomaq rik’in tijok b’ar wan reheb’ li na’leb’ re li evangelio ut li b’ich li neke’xch’olob’ xyaalal li k’a’ru xe’xtzol. Chiru li chihab’, tz’iib’ahomaq junjunqeb’ li raatin ut lix numsihomeb’ li kok’al re naq maare naru te’roksi sa’ li k’anjel. B’oqeb’ li kok’al chixwotzb’aleb’ raqal sa’eb’ li loq’laj hu, li seraq’, ut lix nawomeb’ xch’ool sa’ li k’anjel. Naq nekek’uub’ li k’anjel a’in, k’oxlahomaq chan ru tixtenq’aheb’ li komon chixjayalinkileb’ rib’ rik’in li qaChoxahil Yuwa’, rik’in li Kolonel, ut rik’ineb’ lix k’utum.

Wi ka’ajwi’ junjunqeb’ li kok’al wan sa’ li teep malaj uq’ej, k’oxlahomaq chan ru naq lix junkab’aleb’ te’ruuq chi tz’aqonk sa’ li k’anjel rochb’eeneb’ lix kok’al. Jun komon sa’ li obispil naru taa’aatinaq re xraqb’al li ch’utam.

Naq nekek’uub’ li k’anjel, chijultiko’q eere li na’leb’ a’in:

• Ink’a’ us xb’aanunkil li practica choq’ re li k’anjel li tixmaq’ raj naab’al hoonal reheb’ li tzoleb’aal sa’ li Tzoleb’aal reheb’ li Kok’al malaj li junkab’al.

• Ink’a’ us roksinkileb’ li jalam-uuch, li disfraz, ut li video sa’ li ch’utam re li loq’laj wa’ak.

Chi’ilmanq Manual General: Servir en La Iglesia de Jesucristo de los Santos de los Últimos Días, 12.2.1.2, ChurchofJesusChrist.org.