tamneia itoi i karawa

Ritembwa 27–Tianuare 2

Mote 1; Aberaam 3

“Bon Aio au Mwakuri ao Mimitongiu”

Ngkana ko wareka te bwai ae taekinna te Atua nakon Mote ao Aberaam, iangoa te bwai ae a na kona n taekinna nakoia ataei aika ko rereiniia. Ko na kanga ni buokiia n namakina Ana tangira ibukiia?

Korei Am Namakin

te aikaon ibukin te tibwatibwa

Kaunga te Tibwatibwa

N tabetai e kona te anene ni buokiia ataei n uringa te bwai ae a reiakinna. Katanga ke katangibururua te nooti n “Ngai Natin te Atua” (Aia Boki n Anene Ataei, 2–3), ao tuangiia ataei bwa ana ketina te anene. Buokiia ataei n iangoi kawai ae a tia aia karo ao tabeman ni “kae [tiia], kai [iriia],” ao “buo [kiia] n ukora te kawai.”

te aikaon ibukin te anga reirei

Reirei te Reirei: Ataei aika a Uarereke

Mote 1:1–4, 6

Ngai natin te Atua.

Tera ae ko reiakinna man Mote 1:1–4, 6 ibukin am reitaki ma Tamam are i Karawa? Ko na kanga ni buokiia ataei n reireiniia bwa tera ae nanonaki n te riki bwa natin te Atua?

Waaki ni Kakukurei aika Kona ni Karaoaki

• Warekia nakoia ataei te bwai ae taekinna te Atua nakon Mote: “Bon natiu ngkoe” (Mote 1:4). Kaoa te ataei nako moan te ruu, ao tuangiia ataei bwa ana kaokiokia ma ngkoe, “[Aran te ataei], ngkoe bon natin te Atua.” Kaokioka te kibu n taeka ibukiia ataei nako inanon te kiraati.

• Kaoti tabeua tamneia ataei, ao titirakiniia ataei ngkana ataei aikai bon natin te Atua. Katuruturua n taekinna bwa ngaira ni kabane bon natin te Atua. Kariaia ataei bwa ana ikaruoruo n taraa te tirotaam, ao ni kakoaua bwa ngaiia bon natin te Atua naba.

• Anenea “Ngai Natin te Atua” (Aia Boki n Anene Ataei, 2–3) ma ataei. Tuangiia bwa ana karan iteran baan te waaki ni kakukrei n te wiiki aei, ao kabongana n rinanoi koaua aika e reirei te anene aei.

  Iesu Kristo ibuakoia itoi

  Kristo ao te Karikibwai, iroun Robert T. Barrett

Aberaam 3:22–28

I maeka ma Tamara are i Karawa imwain ae I bungiaki.

Atakin maiura imwain te maiu aei e kona ni kaungaira ni karaoi rinerine aika boboto iaon koaua aika akea tokiia. Ngkana ko kamatebwaia Aberaam 3:22–28, iangoia bwa ko na kanga n reireiniia ataei iaon kinakiia ae akea tokina.

Waaki ni Kakukurei aika Kona ni Karaoaki

• Kabongana “Taekan te O Tetemanti” (inanon Karaki n te O Tetemanti) n reireiniia ataei taekan maiura imwain te maiu aei. Imwiina, kaoia ataei bwa ana karakina te karaki nakoim. Bukin tera Tamara are i Karawa e kanakoira nako ikai nakon te aonaaba? Buokiia ataei bwa ana kakaea te kaeka ngkai ko wareka nakoia Aberaam 3:25.

• Aneneia ma ataei kunan ana babaire te Atua ibukira (n aron “I Will Follow God’s Plan” [Aia Boki n Anene Ataei, 164–65]). Buokiia bwa ana atai koaua aika akea tokiia aika a reiakinaki ni mwanewen te anene.

Mote 1:39

Tamara are i Karawa e tangirai bwa N na manga maeka ma Ngaia.

A kanga koaua n Mote 1:39 ni kakabwaia maium? Tera ae ko kona ni karaoia ni buokiia ataei n atai kakabwaia aikanne naba?

Waaki ni Kakukurei aika Kona ni Karaoaki

• Taekin kiibu inanon “aio au mwakuri” ao “te maiu are akea okina” n Mote 1:39, ao buokiia ataei ni kaokioki taekaia. Tuangiia ataei taekan te mwakuri ae ko karaoi ni katoa bong. Reireiniia bwa ana mwakuri Tamara are i Karawa e na buokiira ni karekea te maiu are akea tokina, are nanona bwa ti na riki n ai Arona ao ni maeka ma Ngaia riki.

• Kaoa te karo bwa e na roko nakon te kiraati ao n taekina aron ana namakin teuanne ke neienne ngke e a okira mwengana natina imwiin nakona (te katooto, ngke e mena n te reirei ke n ana mition), ke tibwauai am namakin aika ko a tia ni karekei inanon waaki aikai. Kabongana te katooto aei n reireiniia ataei bwa e kanga Tamara are i Karawa n tangiriira bwa ti na oki Nakoina.

te aikaon ibukin te anga reirei

Reirei te Reirei: Ataei aika a Ikawai Riki

Mote 1:4, 30, 37–39; Aberaam 3:22–28

Ngai natin te Atua, ao E tangiria ni buokai bwa n na oki Nakoina.

Mote 1:4, 37–39 ao Aberaam 3:22–28 a reirei koaua aika kakawaki n taekan ara reitaki ma te Atua ao Ana kaantaninga ibukin kanakomaiakara nakon te aonaaba. Iangoia bwa ko na kanga ni buokiia ataei n reireiniia taekan koaua aikai.

Waaki ni Kakukurei aika Kona ni Karaoaki

• Warekia ma ataei Mote 1:4, 37–39 ao Aberaam 3:24–25. Anganiia aia tai bwa ana titiraki ao n tibwauai taeka aika mamaten nanoia ke taeka man kiibu aikai. Tera ae ti reiakinna man kiibu aikai ibukin Tamara are i Karawa? ao ibukira?

• Kaotia nakoia ataei tabeua ana karikibwai Tamara are i Karawa aika mwaiti. Wareka Mote 1:30, ao kabwarabwara bwa Mote e titirakina te Atua ibukin karikibwai aikai. Buokiia ataei bwa a na ukeuke inanon te kibu 39 ni kakaea ana kaeka te Atua. Kakoaua bwa ana kantaninga te Atua bon buokaia ataei n tatabemaniia bwa ana karekea te maiu are akea tokina.

• Buokiia ataei bwa ana iangoi kaangaanga are ana rineia bwa ana ke ana aki “karaoi bwaai ni kabane are e na tuangiia te Uea ae Atuaia” (Aberaam 3:25). Tuangiia bwa ana kataneiaia ke ni maroroakin kaeka nakon kaangaanga aikanne. E na kanga ni kona te Uea ni buokiira ngkana ti karaoi rinerine aika bure?

Mote 1:12–26

N na kanga n totokoi ana kariiri Tatan.

Ngkana ko kamatebwaia Mote 1:12–26, tarai bwaai aika e karaoi Mote n totokoa Tatan. E na kanga ana katooto Mote ni buokiia ataei ngkana a kaitara ma taian kariiri?

Waaki ni Kakukurei aika Kona ni Karaoaki

• Koroia ni kakimototoa ana taneiai Mote n Mote 1:12–26 n oin am taeka, ke tuanga temanna mai ibuakoia ataei bwa e na karaoia (taraa naba te witeo “I Am a Son of God” [ChurchofJesusChrist.org]). Kaoia ataei bwa ana ukorii kiibu aikai n reireia bwa e kanga Mote ni kona n tokanikai iaon Tatan. (Ngkana a kainnanoa te ibuobuoki, kotoia nakoia kiibu 13, 15, 18, 20–22, 26.)

• Uota te bwaoki ni bwai ni mwakuri (ke tamnein bwaai ni mwakuri), ao koroi aran bwai ni mwakuri n tatabeua nako n te kawai are ti na kona n totokoa te kariiri (n aron te tataro, anenea te anene, wareware ni booki aika tabu, ke buokaia tabeman). Kariaia ataei bwa ana anaa te bwai ni mwakuri ao taetae iaon te kaangaanga ngkana te mwakuri are e koreaki iaon te bwai ni mwakuri anne e kona ni buokiira ni kaaitara te kariiri. Bootaki ni wareki kiibu 25–26, ao kakoaua bwa e na buokiira te Atua ngkana ti kaitara ma te kariiri.

Aberaam 3:22–28

I maeka ma Tamara are i Karawa imwain ae I bungiaki.

Kiibu aikai aika a kabwarabwarai miin Aberaam ni maiura imwain te maiu aei a kona ni buokiia ataei ni kaekai titiraki “I nako mai ia?” ao “Bukin tera I roko ikai?” Ko na kanga ni buokiia ni karekei kaekaaia?

Waaki ni Kakukurei aika Kona ni Karaoaki

• Iaon te burakibooti, koroi titiraki aika a irekreke ma Aberaam 3:22–28, n aron Tera ae riki ni maiura imwain bungiakira? Antai ae mena ikekei? Bukin tera e karikaki te aonaaba? Kaoia ataei bwa a na wareki kiibu aikai ni kakaei kaekaaia.

• Ngkana iai te ataei ae boou n te uoote, kaoia kaaro bwa ana uota teteinimwaane ke teteinnaine anne nakon te kiraati ao n tibwaua aia namakin iaon butimwaeakin te ataei aei nakon te aonaaba. (Ko kona naba ni kaota tamnein te ataei ae tibwa bungiaki.) Kabwarabwara nakoia ataei te tabo are e mena iai tamnein te ataei aei imwain ae roko te teei anne nakon te aonaaba. Bukin tera e kakawaki ibukin te ataei aei bwa e na ataia ae teuanne ke neienne bon natin te Atua?

• Anenei anene iaon ana babaire te Atua ibukira, n aron “I Know My Father Lives” ke “I Will Follow God’s Plan” (Aia Boki n Anene Ataei, 5, 164–65). Kaoia ataei bwa ana korei tamnei ake a nako ma taekaia. Kariaia bwa ana kabonganai aia tamnei bwa a na reirei imarenaia koaua man taian anene aikanne.

te aikaon ibukin te kamatebwai

Kaungaa te Kamatebwai n te Mweenga

Iangoi kawai ake a riki n am kiraati n te Moanrinan a kona ni kaunga, boutoka, ke ni manga kakorakora te reirei are e karaoaki ni mwengaia ataei. Te katooto, ko kona ni kaoia ataei bwa ana tibwaua te iteraniba ibukin te waaki ni kakukurei n te wiiki aei ma aia utu.

Kanakoraoan Ara Anga reirei

A reiakinii bwaai ataei n aanga aika mwaiti. Ataei a kukurei n reireinaki ni kawai aika boou man kakaokoro. Kabonganai mwakuri ni kauring ake e na anganiia te kona ni mwainging, ni kabonganai aia namakin, ao ni katai baika a boou. (Taraa Anga reirei n Ana Kawai te Tia Kamaiu, 25–26.)

activity page: I am a child of God