“Tianuare 3–9. Karikani Bwaai 1–2; Mote 2–3; Aberaam 4–5: ‘Ngke a Tuai ni Karikaki Bwaai, ao E Karika Karawa ma Aonaaba te Atua,’” Nakomai, Iriirai—Ibukin te Moanrinan: Te O Tetemanti 2022 (2021)
“Tianuare 3–9. Karikani Bwaai 1–2; Mote 2–3; Aberaam 4–5,” Nakomai, Iriirai—Ibukin te Moanrinan: 2022
Tianuare 3–9
Karikani Bwaai 1–2; Mote 2–3; Aberaam 4–5
“Ngke a Tuai ni Karikaki Bwaai, ao E Karika Karawa ma Aonaaba te Atua”
Ngkana ko kamatebwaia Karikani Bwaai 1–2, Mote 2–3, ao Aberaam 4–5, iangoia ataei aika ko reireiniia, ao iangoi koaua aika ko kona ni buokiia ni kaotaia man mwakoro aikai.
Korei Am Namakin
Kaunga te Tibwatibwa
Kaoa te ataei bwa e na tibwaua te bwai teuana are e a tia ni karikia Tamara are i Karawa ao Iesu Kristo are a kakaitau ibukina. Kaotan tamnei man te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu e kona n anganiia iango.
Reirei te Reirei: Ataei aika a Uarereke
E karika te aonaaba Iesu.
Ataakin taekan te Karikibwai e kona ni buokiia ataei n namakina ana tangira te Atua ao ni karikirakea aia kakaitau ibukin te aonaaba. Ko na kanga ni karika reiakinan te Karikibwa bwa te bwai ae kaunganano?
Waaki ni Kakukurei aika Kona ni Karaoaki
-
Kaotia nakoia ataei tamnein bwaai aika a tei ibukin taai ni Karikibwai aika kaokoro (n aron are e kabwarabwaraaki n Mote 2; taraa naba “Iesu Kristo E Karika te Aonabba,” ni Karaki man te O Tetemnati), ao buokiia ataei n iangoi mwakuri aika a na nakoraoi ma tamnei. N aron te katooto, a kona ni katea aia timoi bwa e na tei ibukin aaba aika mau takaka ke n ioioi baia kaanga aron naao n ran (taraa Mote 2:9–10). Tibwaua am koaua bwa Iesu Kristo e karaoi bwaai aikai bukina bwa Ngaia ao Tamara are i Karawa a tangiriira.
-
Anenea te anene iaon bwaai aika e karaoi Irsu Kristo ibukira, n aron “The World Is So Lovely” (Aia Boki n Anene Ataei, 233). Tuangiia ataei bwa a na korea tamnein te karikibwai are e kabwarabwaraaki n te anene.
Tamneite katamaroa e kariki aekan te karikibwai aika kakaokoroCreation (Te Karikibwai), iroun Joan Hibbert Durtschi
I karikaki ni katotongan te Atua.
Ngke ataei a ataia ae karikaki ni katotongan te Atua, a kona ni karikirakea te nano ni karinerine ao ni mutiakiniia ibukin oin rabwataia ao tabeman.
Waaki ni Kakukurei aika Kona ni Karaoaki
-
Buokiia ataei ni manga taekina “Ao Ngai, te Atua I karika te aomata ni katootongau” n taai aika mwaiti (Mote 2:27). Kabwarabwara bwa Tamara are i Karawa e kariki rabwatara bwa ti na taraaki n ai Arona. Kaoia ataei bwa ana kotei bwain rabwataia ngkai ko aran, ke anenea te anene ibukin rabwatara, n aron “Atuu, Angau, Bubuab waeu, ao Waeu” (Aia Boki n Anene Ataei, 275).
-
Kaoia ataei bwa ana katei kain bwaai aika a kona ni karaoi ma rabwataia, ngkai ataei ake tabeman a ketinna bwa tera ae a karaoia. Kaoia ataei bwa a na tibwauaia bwa bukin tera a karabwarabwa ibukin rabwataia.
-
Korea tamnein te kamataata n te rabwata iaon te beeba, ao karaoa te kamwaninga man koreana nakon mwakorokoro. Bwaatin mwakorokoro nako tinaniku, ao kariaia ataei bwa ana ikotaki ni katei ni katea te rabwata. Tuangiia ataei bwa ana tibwaua bwaai aika a kona ni karaoi ma mwakorokoro ni kabane. Tibwaua am koaua bwa rabwatara aikai a karikaki ni katotongan te Atua.
Te bong ae te Tabati e bon tabu.
Ataei ake a karikirakea te katei ni kawakina tabun te bong ae te Tabati ngkai a uarereke a na kantaningaaki bwa ana kawakina te tua aei ngkana a moanna n tabetabe ao n rangin ni kainnanoaki.
Waaki ni Kakukurei aika Kona ni Karaoaki
-
Wareka Mote 3:2–3, ao tuangiia ataei bwa ana kakauongo nakon te bwai ae karaoia te Atua n te kaitiua ni bong. Uoti tamnein (ke karaoi korotamnei aika bebete) bwaai aika ti karaoi n te Tabati ni karaoia bwa te bong ae tabu ao bwaai aika ti karaoi ni boong ake tabeua. Kariaia ataei bwa ana barongai tamnei ake tabeua nakon uoua te bwarikoriko, teuana ibukin te Tabati ao teuana ibukin boong ake tabeua. Kakoaua bwa bukin tera bwa e kakawaki bwa ti na kawakina te bong ae te Tabati bwa e na tabu.
-
Tabeua boong imwain te kiraati, kaoa temanna te ataei ao ana karo teuanne ke neienne bwa ana roko n tibwauai bwaai aika a karaoi n aia utu ni kawakina tabun te bong ae te Tabati. Kaoia ataei ake tabeman bwa ana tibwaua te bwai ae a karaoia aia utu.
Reirei te Reirei: Ataei aika a Ikawai Riki
Iesu Kristo e karika te aonaaba iaan ana kairiri Tamara are i Karawa.
Ko kona ni kabongana Mote 2 ni buokiia ataei bwa ana ataia ae e karikaki te aonaba bwa bon mwakoron ana babaire te Atua. Ngkana ko wareki mwakoro aikai, tera iango aika a roko n am iango aika a kona ni buokia ni kakorakorai aia koaua ataei iaon te Karikibwai?
Waaki ni Kakukurei aika Kona ni Karaoaki
-
Buokiia ataei n iango taai ngke a karaoa te bwai teuana man irakin ana kaetieti te aomata temanna. Te katooto, tao a tia ni karaoa te kaetieti ibukin karaoana ma te karo ke e kairaki irouia tarina ma mwanena. Korea Antai ae karika te aonaaba? iaon te burakibooti, ao kaoia ataei bwa ana kakaea te reke n Mote 2:1. Kakoaua bwa Iesu Kristo e karika te aonaaba iaan ana kairiri Tamara are i Karawa.
-
Anganiia ataei n tatabemaniia nako aia kibu inanon Mote 2 ae irekereke ma kanoan teuana boong ni karikibwai, ao tuanga teuanne ke neienne bwa e na korea tamnein bwaai aika e karaoi Tamara are i Karawa ao Iesu kristo n te bong anne. Tuanga te ataei bwa a na taui aia tamnei ao n teirake nakon bairean bonng ni Karikibwai, ao imwiina kaoia ataei n tatabemaniia nako bwa ana reireiniia nikiraia ataei n te bwai ae riki n te bong are anganaki iai. Tera ae ti reiakinna ibukin Tamara are i Karawa ao Iesu Kristo man te karaki iaon te Karikibwai?
Atam ao Ewa a karikaki ni katotongan te Atua.
Te aonaaba e na anga rongorongo aika mwaiti aika kewe iaon taekan rabwataia. Te reirei inanon Mote 2:26–27 bon te anainano ae mwaaka ni karinea ao n tabeakin rabwatara.
Waaki ni Kakukurei aika Kona ni Karaoaki
-
Bootaki ni wareka Mote 2:26–27. Teraa ae a reireiniira kiibu aikai ibukin rabwatara? Kaota te witeo “God’s Greatest Creation” (ChurchofJesusChrist.org), ke takakarona te takakaro “Your Body Is a Temple” (Friend, Aokati. 2019, 24–25). Kam kona naba ni botaki ni wareki taeka aika irekreke ma ana raongorongo Beretitenti Russell M. Nelson “Your Body: A Magnificent Gift to Cherish” (New Era, Aokati. 2019, 2–7) are e na buokiia ataei n namakina te kakaitau nakon Tamara are i Karawa ibukin rabwataia.
-
Korea tamnein te rabwata iaon te burakibooti, ao kaoia ataei bwa ana rinea mwakoron te rabwata ao koroia irarikina bukin tera a rangin ni kakaitau ibukina. Kabwarabwara am kakaitau ibukin rabwatam, ao kaota am koaua ae ti karikaki ni katotongan te Atua.
Te bong ae te Tabati e bon tabu.
Ataei ana bae ni kabwarabwaraa nakoia raoraoia bwa bukin tera a karika te Tabati bwa e na kaokoro ibuakon boong ake tabeua. Karikani Bwaai 2:2–3 e reirei bwa bukin tera te Tabati te bong ae tabu. Tera ae ko kona ni karaoia ni buokiia ataei ni kaotaia ao ni kabwarabwara te reirei aei?
Waaki ni Kakukurei aika Kona ni Karaoaki
-
E kanga kawakinan te bong ae te Tabati bwa te bong ae tabu ni kaota ara tangira ao ara karinerine ibukin Tamara are i Karawa ao Iesu Kristo? Buokiia ataei ni katea kain te tamnei n te kaotioti are a kabwarabwara nakon raoraoia bwa bukin tera a rineia bwa ana karaoi bwaai n te Tabati are e karinea Tamara are i Karawa ao Iesu. Tuangiia bwa ana kabongana Karikani Bwaai 2:2–3 n aia kabwarabwara.
-
Anganiia ataei tabeua te miniti bwa ana koroi bwaai aika mwaiti aika kona n iangoi ae a kona ni karaoi ni karika te Tabati bwa te bong ae tabu. Kaoia ataei bwa ana tibwauai bwaai ake a tia ni koroi, ao kaungaia bwa ana karin nakon bwaai ake a tia ni koroi n aron are a tia n tibwauaia tabeman bubuti aika aki kaantaningai. Bubutiia bwa ana uoti aia beeba anne ataei nakon mweengaia ma ngaia ao n okiria ngkana a kainnanoi iagoan bwaai aika raoiroi karaoakiia n te Tabati.
Kaungaa te Kamatebwai n te Mweenga
Buokiia ataei n iangoia bwa ana kanga ni karaoa te waaki ni kakukurei ma aia utu ae titebo ma are ko karaoia n am kiraati. Ko na bae n tangiria ni buokiia ni korea te taeka ae na kona ni kauringiia.
Kanakoraoan Ara Anga reirei
Buokiia ataei bwa a na kaoti bwaai ake a karaoi man aia kakauiango. Ngkana a kateitei ataei, korotamnei, ke ni karana te bwai teuana are e irekereke ma te karaki ke te reirei are a reiakinna, a na ururingnga riki n angin te tai. Kauringiia bwa ana kabongana aia karikibwai n reireiniia aia utu. (Taraa Reirei n ana Kawai te Tia Kamaiu, 25.)