“Tianuare 17–23. Karikani Bwaai 5; Mote 6: ‘Reirei Bwaai Aikai n Aki Tiatianna Nakoia Natimi,’” Nakomai, Iriirai—Ibukin te Moanrinan: Te O Tetemanti 2022 (2021)
“Tianuare 17–23. Karikani Bwaai 5; Mote 6,” Nakomai, Iriirai—Ibukin te Moanrinan: 2022
Better than Paradise (E Raoiroi riki Nakon Bwaretaiti), iroun Kendal Ray Johnson
Tianuare 17–23
Karikani Bwaai 5; Mote 6
“Reirei Bwaai Aikai n Aki Tiatianna Nakoia Natimi”
Am katauraoi nakon te anga reirei e moanaki ngkana ko kamatebwaia Karikani Bwaai 5 ao Mote 6. Ngkana ko karaoia, kakauongo ibukin namakin mairoun te Tamnei ae Raoiroi iaon te bwai ae a kainnanoia ataei bwa ana reiakinna.
Korei Am Namakin
Kaunga te Tibwatibwa
Korei iaon mwakorokoro ni beeba, tabeua taeka aika kakawaki ae a kona ni buoka te ataei n uringa te bwai ae a tia n reiakinna ni mwengaia n te wiiki aei ke n te reirei n te Moanrinan are imwaina. Kariaia ataei bwa ana karekei aia tai n rinea te taeka ane e reke moa. Imwiin rinean te taeka, kaoa te ataei temanna bwa e na tibwaua te bwai ae e a tia n reiakinna ae kaineti nakon te taeka anne.
Reirei te Reirei: Ataei aika a Uarereke
E kona te Atua ni buokai ni karaoi bwaai aika a kaangaanga.
Ngke e weteaki Enoka bwa e na tataekina te euangkerio, e raraoma bwa e taku bwa e na aki kona. Ma te Atua e buokia ni karaoi bwaai aika matoatoa.
Waaki ni Kakukurei aika Kona ni Karaoaki
-
Tuangiia ataei bwa ana tibwaua te tai ngke a tuangaki bwa ana karaoa te bwai ae matoatoa ke e kakamaaku ibukiia. Tibwaua ana karaki Enoka ni weteakina bwa te burabeti, ae kuneaki inanon Mote 6:27, 31–34 (taraa naba “Enoka te Burabeti,” ni Karaki ma n te O Tetemanti). Kamatata bwa e ngae ngke e tuai n tauraoi nanon Enoka bwa e na riki bwa te burabeti, e berita te Atua bwa e na buokia. Buoka te ataei ni kaotai tabeua kawai aika e kona te Atua ni buokiira ngkana ti tuangaki bwa ti na karaoi bwaai aika matoatoa.
-
Tibwauai tabeua katooto ni koroboki aika tabu ngke e buokiia aomata te Atua ni bwaai aika kaangaanga—te katooto, Noa ngke e kabaa te aake, Tawita ngke e kaitaraa Koria, Amon e kamaiuia ana nanai te uea, ke Tamuera te Reimwanaite ngke e kabwarabwara. (Ibukin tamnei ao kiibu man booki aika tabu, taraa Gospel Art Book, nambwa. 7, 19, 78, 81.) Tibwaua am taneiai ngke e buokiko te Uea ni karaoa te bwai ae kaangaanga.
E reireinai arou te euangkerio n oki nakon Tamara are i Karawa.
Te Atua e reireina Atam te bwai ae ti kainnanoia ni karaoia bwa ti aonga n oki Nakoina—karekea ara onimaki, rairannano, bwabetitoaki, ao ni karekea ana bwaintintituaraoi te Tamnei ae Raoiroi. Ko na kanga ni buokiia ataei bwa a na reiakin riki aron bwaai aikai?
Waaki ni Kakukurei aika Kona ni Karaoaki
-
Kakaaei ke korei tamnei n tei ibukin te onimaki, te rairannano, ao ana bwaintituaraoi te Tamnei ae Raoiroi (tarai iteraniba ibukin waaki ni kakukurei n te wiiki aei). Katikui tamnei iaon te rain are e kaineti nakon tamnein Iesu Kristo. Wareka Mote 6:52 nakoia ataei, ao tuangiia bwa ana tei irarikin te tamnei ae eti ngkana a ongo taeka ake a tei ibukin te tamnei (n te kibu aei, te taeka “kakoauaa” e kabonganaki ibukin te “onimaki”).
-
Anenei anene ae a reirei reirei inanon Mote 6:52, n aron “Onimaki,” “Help Me, Dear Father” (te kibu 2), “When I Am Baptized,” ao “The Holy Ghost” (Aia Boki n Anene Ataei, 96–97, 99, 103, 105). Buokiia ataei n ataia bwa karaoan bwaai ake a taekinaki n taian anene ana buokiira n oki nakon Tamara are i Karawa.
E tangiriia kaaro Tamara are i Karawa bwa ana reireiniia aia ataei.
Man aia tai Atam ao Ewa, a tuangaki kaaro bwa ana reireiniia aia ataei taekan te euangkerio. Ko na kanga ni kaungaia ataei bwa ana kakauongo nakon ao n irii aia reirei aika karo aika raraoi?
Waaki ni Kakukurei aika Kona ni Karaoaki
-
Wareka Mote 6:58 nakoia ataei, ao kaota tamnein ana utu Atam ao Ewa inanon te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu. Buokiia ataei ni kaokioka te kibu n taeka aei “reirei bwaai aikai n aki tiatianna nakoia natimi.” Kabwarabwara bwa e tangiriia kaaro te Atua bwa ana ira ana katooto Atam ao Ewa man reiakinaia aia ataei taekan Iesu Kristo ao Ana euangkerio. Titirakiniia ataei te bwai ae a kona ni karaoia ngke aia karo ke tabeman a reireiniia taekan te euangkerio.
-
Buokiia ataei bwa ana kabotaua tamneia nakoia aia karo ke tamneia maan aika uarereke nakoia maan aika a ikawai. A kanga kaaro ni buokiia aia ataei? Tera te bwai ae a reireiniia? Tuangiia ataei bwa ana korea tamneia aia utu n taai ngke kaaro a reireiniia natiia, n aron te bootaki ni wareware man booki aika tabu, bootaki n tataro, ke ni bootaki n amwarake.
Tamneikamatebwai ni koroboki aika tabu n te utuA riai kaaro n reireiniia aia ataei te euangkerio.
Reirei te Reirei: Ataei aika a Ikawai Riki
Tamara are i Karawa E kona ni buokai ni karaoi bwaai aika a kaangaanga.
E ngae ngke e aki namakina ae tau Enoka, te Atua e buokia ni kakoroa nanon Ana wewete bwa te burabeti. E kona naba te Atua ni buokiia ataei aika ko reireiniia ni karaoi bwaai aika a kaangaanga.
Waaki ni Kakukurei aika Kona ni Karaoaki
-
Wareka Mote 6:26–34 ma ataei. Bukin tera e namakinna Enoka bwa e aki kona n tataekina te euangkerio? (taraa Mote 6:31). E kanga te Atua ni buoka Enoka? (taraa Mote 6:32–34; 7:13).
-
Kaoia ataei bwa ana aran tabeua bwaai aika a kaangaanga ae n tabetai a karaoia ataei aika aia roro (n aron katiaan aia bwai ibukin te reirei, n akoi nakon temanna ae aki akoi, ke n taekina te koaua ngkana a tia ni karaoa te bure). Buokiia ataei ni kakaei kibuntaeka n Mote 6:32–34 ae a kona ni buokiia. Tuangiia ataei bwa ana tibwaua te tai are e buokiia iai te Atua ni karaoa te bwai ae kaangaanga. Tibwauai oin am atatai naba.
Te onimaki, rairannano, bwabetito, ao karekean te Tamnei ae Raoiroi e katauraoai n okira te Atua.
Atam ao Enoka a reireiniia aia aomata moan tua ao otenanti n te euangkero: onimaki, rairannano, bwabetito, ao karekean ana bwaintituaraoi te Tamnei ae Raoiroi (taraa naba Taekan te Onimaki 1:4). Tera ae ko kona ni karaoia ni buokiia ataei bwa ana ataa kakawakin reirei ao otenanti aikai ni maiuia?
Waaki ni Kakukurei aika Kona ni Karaoaki
-
Tuangiia ataei bwa ana wareka Mote 6:52, 57 ni kakaei reirei ao otenanti n te euangkerio ake a taekinaki n te kaaua n taekan te onimaki.
-
Korea taekan te kaaua n taekan te onimaki iaon te burakibooti, ao kaoia ataei bwa ana warekia. Imwiina kamauna teuana te taeka ke uoua, ao tuangiia bwa ana warekia riki, ni karin taeka aika bua man am ururing. Kaoka te kawai aei ni karokoa ae a tia ataei n reiakina taekan te onimaki.
-
Tuangiia ataei bwa a na korea te taetae ae uarereke iaon te onimaki, rairannnao, bwabetito, ke karekean ana bwaintituaraoi te Tamnei ae Raoiroi—te bwai ae a kona n tibwauaia ma aia utu. A kona taetae aikai n iai inanona te kibu, te taneiai, ao te koaua. E kona naba te taetae ni kabwarabwara bwa e kanga te reirei ni buokiira n oki nakon Tamara are i Karawa.
A katabeaki kaaro bwa a na reireiniia natiia.
E onimakiniia kaaro te Atua bwa a na riki bwa taan reirei n te euangkerio n te moan rinan n aia utu. Ko na kanga ni kaungaia ataei bwa a na boutokaia aia karo n tabeia aei?
Waaki ni Kakukurei aika Kona ni Karaoaki
-
Tuangiia ataei bwa ana wareka Mote 6:58. Tera te tua ae anga Tamara are i Karawa nakoia kaaro n te kibu aei? Kaota tamnein Atam ao Ewa n reireiniia aia ataei (taraa te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu), ao tuangiia ataei bwa ana kabwarabwara te bwai ae a noria inanon te tamnei. Kaungaia bwa ana kabwarabwarai koaua n te euangkerio aika a kakawaki ae a tia n reiakin mairouia aia utu.
-
Buokiia ataei bwa ana korei taeka ni kaitau nakoia aia karo ke bairei kawai tabeua aika bebete ni kaota aia kakaitau ibukiia aia karo. Anenea te anene ibukiia utu, n aron “Love Is Spoken Here” (Aia Boki n Anene Ataei, 190–91). Ti na kanga ni buokiia ara karo ni karika mwengara bwa te tabo ae iai te tangira iai?
Kaungaa te Kamatebwai n te Mweenga
Ko na kanga ni buokiia ataei ni kateimatoa te kamatebwai imwiin banen aia kiraati? Ko kona ni kaungaia bwa ana uringa ana karaki Enoka ngke a kaitara ma te bwai ae kaangaanga n te wiiki aei.
Kanakoraoan Ara Anga reirei
Kabonganai taian iteraniba ibukin te waaki ni kakukurei. Ngkai a karan iteraniba n te waaki ni kakukurei ataei, rinanoi reirei man te reirei. Wareki taeka iaon te iteranibai nakoia ataei ngkana e riai.