“Tianuare 17–23. Karikani Bwai 5; Mote 6: ‘Reirei Bwai Aikai n Akea Boona nakoia Natimi,’” Nakomai, Iriirai—Ibukiia Aomata n Tatabemaniia ao Utu: O Tetemanti 2022 (2021)
“Tianuare 17–23. Karikani Bwai 5; Mote 6,” Nakomai, Iriirai—Ibukiia Aomata n Tatabemaniia ao Utu: 2022
Tamaroa riki nakon Baretaiti, iroun Kendal Ray Johnson
Tianuare 17–23
Karikani Bwaai 5; Mote 6
“Reirei Bwai Aikai n Aki Tianna Nakoia Natimi”
Ngkai kam wareka man iangoa Karikani Bwaai 5 ao Mote 6, korei namakin ake kam karekei. Tera taeka aika kam kunei ake a kakawaaki nakoim ao nakon ami utu?
Korea Am Namakin
Angina kanoan Karikani Bwaai 5 bon te kanoa are imarenan Atam ao Ewa ao Noa. Ti wareki aara aika a bati, ma e aki bati ara atatai i aoia. Ngkanne ti wareka rongorongon Enoka, onoua te roro imwin Atam, are kabwarabwaraki ma te kibuntaeka ae kakaongora: “Ao e nakonako Enoka ma te Atua: ao akea ngaia; bwa E anaia te Atua” (Karikani Bwaai 5:24). E koaua bwa bon iai riki kanoan te karaki anne. Ma akea riki te bwai ae taekinaki ibukina, e reitinako te kateiriki.
Ti kakaitau bwa, Mote 6 kaota bwaninin rongorongon Enoka—ao bon te karaki ae abwabwaki. Ti nora ana nanorinaon Enoka, ana raraoma, te konabwai are noria te Atua irouna, ao te mwakuri are karaoia ngkai ngaia ana burabeti te Atua. Ti nora naba te kamataata riki n ana utu Atam ao Ewa ngkai e waaki nako n te roro teuana ma teuana. Ao ti wareka “korakoran mwaakan” Tatan ma taekaia naba kaaro ake a reireia natiia “ana kawai te Atua” ao “taan tataekina te raoiroi” are “a taetae ao a taetae ni barabeti” (Mote 6:15, 21, 23). Ae moan te kakaawaki bon baike ti reiakin man aia reirei kaaro ao taan reirei: te onimaki, rairannano, bwabetito, ao karekean te Tamnei ae Raoiroi (taraa Mote 6:50–52). Te reirei ae tabu anne, n aron te nakoanibonga are bon raona, “bon iai n te moantai [ao] e na bon iai naba n tokin te aonaba” (Mote 6:7).
Iango ibukin te Kamatebwai i bon Iroum ni Koroboki aika Tabu
Te burabeti bon te tia mamata.
Ngkai kam kamatebwaia Mote 6:26–36, tera ae kam reiakinna i aon te mata, te rotongitong, ao te noraba? N ana tai Enoka, antai ae aki kona n “nora ae raroa”? Bukin tera aomata aikai a aki kona n nora te koaua? Bukin tera e kona n noraba Enoka? Tera ae e a tia ni kamatoaa am onimaki bwa burabeti ni bong aikai bon taan mamata? (taraa kibu 36; Kairi nakon Koroboki aika Tabu, “Tia Mamata,” scriptures.ChurchofJesusChrist.org).
E weteira te Atua bwa ti na karaoa Ana mwakuri e ngae ngke iai kabwakara.
Tiaki te bwai ae boou namakinan te rawawata ni baike e weteira te Atua bwa ti na karaoi. Enoka naba e namakina te kabwaka ngke e weteiaki iroun te Uea bwa te burabeti. Ngkai kam wareka Mote 6:26–36, kakaei bukina ngke e namakinna Enoka bwa e aki kona uotana ao tera are e taekinna te Uea n anganna te unga n nano. I nanon kiibu 37–47, tarai kawai are te Uea e boutoka Enoka ao e kakorakora ni karaoa Ana mwakuri (taraa naba Mote 7:13). Ko kona ni kabotaua are e rinanona Enoka ma burabeti ake tabeman are a namakina te aki tau, n aron Mote (taraa Te Otinako 4:10–16), Ieremia (taraa Ieremia 1:4–10), Nibwaai (taraa 2 Nibwaai 33:1–4), ao Moronaai (taraa Ita 12:23–29). Tera ae ko namakinna bwa e tangiria te Uea bwa ko na reiakinna man kiibu aikai ibukin te mwakuri are E a tia n anganiko bwa ko na karaoia?
Taraa naba Iakobwa 4:6–8.
Ana reirei Kristo e bon kakaawaki nakon ana babaire ni kamaiu te Atua.
Ibukina bwa iai iroura ana boki Mote, ti ataia bwa e a tia te Atua n reireiniia Natina bwa a na kanga ni karekea kabwaraan aia bure ao te kamaiuaki man moan te tai. I nanon koroboki aika tabu, reirei aikai a aranaki n tabetai bwa ana reirei Kristo (taraa 2 Nibwaai 31:13–21). Ngkai kam kamatebwai Mote 6:48–68, kakaea bwa tera ae ti riai n ataia ao ni karaoia bwa ti aonga ni kamaiuaki. Tao e na ibuobuoki korean kakimototoan are e reireia Enoka. Bukin tera e kakaawaki ataakina bwa koaua aikai a kaman reireiaki mani aia bong Atam ao Ewa? Tera ae ko namakinna bwa ko na karaoia i mwin kamatebwaian reirei aikai?
“Reirei bwai aikai n aki tiatianna nakoia natimi.”
Atam ao Ewa a reireiaki koaua aika kakaawaki n ana euangkerio Iesu Kristo. Ma ana taeka te Uea i nanon Mote 6:27–28 e kamataata bwa n roro ake imwain Enoka, e mwaiti aomata ake a aikoa maiuakini koaua akanne. E tangiria te Uea bwa Enoka e na kaoki koaua ake a tia ni bua—n raonaki ma te tua are e moan anganaki Atam: “Reirei bwai aikai n aki tiatianna nakoia natimi” (Mote 6:58). Ngkai kam wareka Mote 6:51–62, Tera ae kam reiakinna ibukin Iesu Kristo? Tera ae kam kunea are e rangi ni kakaawaki nakoia te roro ae tabe n rikirake? Tera ae kam kona ni karaoia n anga koaua aikai nakoia roro aika a na roko?
A riai kaaro n reireiniia natiia te euangkerio.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Karikani Bwaai 5; Mote 6:5–25, 46.Warekan rongorongon te “boki ni kauring” are a kawakinna ana utu Atam ao Ewa e kona ni kaunga am utu bwa a na karaoa oin aia boki ni kauring. Marooroakinna n te utu bwa tera ae na karinaki i nanona. Tao iai ami tamnei, karaki, ke beba man rongorongon ami utu. Ko kona ni baireia bwa kam na karinii baike a riki n ami utu ngkai. Tera ae na kakaawaki ibukiia roro aika a na roko? Kam kona ni maroroakinna bwa e kanga “ana kairiiri te tamnei” (Mote 6:5) ao “te banna are e anga n tabonibaina te Atua” (Mote 6:46) ni kona ni kaira ami waaki. Iangoa kawakinan rongorongo man ami boki ni kauring i aon FamilySearch.org.
-
Mote 6:53–62.Ti na kanga ni kaeka ana titiraki Atam are e kuneaki n Mote 6:53? Tera kaeka ake ti kunei i nanon kiibu 57–62?
-
Mote 6:59.Tera ae nanonaki n te “manga bungiaki nakon abanuean karawa”? Tera ae ti kona ni karaoia ni kateimatoa te manga bungiaki i nanon maiura? Ibukin te ibuobuoki, taraa Aramwa 5:7–14, 26; Kairi nakon Koroboki aika Tabu, “Born Again, Born of God” scriptures.ChurchofJesusChrist.org; David A. Bednar, “Always Retain a Remission of Your Sins” (Riaona, Meei 2016, 59–62).
-
Mote 6:61.Tera ae ti reiakinna ibukin te Tamnei ae Raoiroi man te kibu aei?
-
Mote 6:63.Tera tabeua bwai are a “kaota koauan [Kristo]”? (taraa naba 2 Nibwaai 11:4). Bairea kaoakiia kaain te utu bwa a na tibwaa te bwai are a noria “i eta i karawa” ke “i aon te aba” are e buokiia n reiakina taekan Iesu Kristo. N aron te katooto, a kanga aroka, atibu, ke taai n kauringiia te Tia Kamaiu? Tera ae a reireiniia aara n aron “te ran ni kamaiu” ao “bwerena ni kamaiu” i bukina? (Ioane 4:10–14; 6:35).
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “Tao Tiaki Iaon Te Maunga,” Anene n Taromauri, nambwa 42.
Kanakoraoan Am Kamatebwai
Taratarai kanikina. I nanon koroboki aika tabu, kanikina ke rongorongo angin te tai a kaoti ke a tei ibukin koaua aika tabu. Kanikina aikai a kona ni karabaaba ootam n te reirei ae tabu. N aron te katooto, tera ae kam reiakinna man kanikina aika te mata ao te bokaboka i nanon Mote 6:35?
Atam ao Ewa a Reireiniia Natiia, iroun Del Parson