“Tianuare 10–16. Karikani Bwaai 3–4; Mote 4–5: Bwakan Atam ao Nei Ewa,” Nakomai, Iriirai–Ibukiia Aomata n Tatabemaniia ao Utu: Te Tetemanti 2022 (2021)
“Tianuare 10–16. Karikani Bwaai 3–4; Mote 4–5,” Nakomai, Iriirai–Ibukiia Aomata n Tatabemaniia ao Utu: 2022
Atam ao Ewa, iroun Douglas M. Fryer
Tianuare10–16
Karikani Bwaai 3–4; Mote 4–5
Bwakan Atam ao Nei Ewa
Ngkai ko kamatebwaia Karikani Bwaai 3–4 ao Mote 4–5, iangoia bwa tera ae e kataia n reireiniko te Uea. Korei mwiin koaua aikai ao am namakin n tamnei, ao kaururingi rinanon nako te wiiki.
Korea Am Namakin
N te moan, te rongorongo ni Bwakan Atam ao Ewa e kona n taraa ni kangaanga. Atam ao Ewa a kakioaki nako man te Onaroka ae tamaroa i Eten. A karina ni kaitara ma ngaia n akea aia katauraoi n te aonaaba are e reke iai te maraki, nanokawaki ao te mate (taraa Karikani Bwaai 3:16–19). Ao a kamaenakoaki mairoun Tamara are i Karawa. Ma ibukin te koaua are e kaokaki rinanon te Burabeti Iotebwa Timiti n ana boki Mote, ti ataia bwa rongorongon Atam ao Ewa bon teuana te kantaninga—ao bon mwakoron ana baire te Atua ibukiia Natina.
Te Onaroka are i Eten e bon rangi n tamaroa. Ma Atam ao Ewa a kainnanoi riki bwaai nakon bwaai aika a tamaroa ake a katobibiaki iai. A kainnanoia—ao ti bane ni kainnanoia—te tibwanga n rikirake. Kiitanakin te Onaroka are i Eten bon te bwai ae riai n te moan mwaneka nakon okiran te Atua ao n riki n ai Arona n tokin te tai. Anne nanon kaitarakin te kakaitara, karaoan te kairua, reiakinan te rairannano, ao onimakinan te Tia Kamaiu, are ana mwakuri ni Kamaiu ngaia are e karekea te rikirake ao te “kimwareirei ni kaboakira” (Mote 5:11). Ngaia are ngkana ko wareka taekan Bwakan Atam ao Nei Ewa, tai kabotoa am iango iaon te bwai ae taraa ni kangaanga ma iaon bwaai aika a kona n reke—tiaki iaon te bwaretaiti are a kabua Atam ao Nei Ewa ma te mimitong are n aia rinerine a kona ni karekea nakoira.
Iango ibukin te Kamatebwai i bon Iroum ni Koroboki aika Tabu
Karikani Bwaai 3:1–7; Mote 4; 5:4–12
Te Bwaka bon mwakoron te bwai ae riai ni mwakoron ana baire te Atua ni kamaiuaia Natina.
Bwakan Atam ao Nei Ewa e uota te mate n rabwata ao n tamnei nakon te aonaaba. E uota naba te kakaitara, te nanokawaki, ao te bure. Aikai ake a taraa n riki bwa bukin te nanokaawaki n reken te Bwaka. Ma te Bwaka bon mwakoron ana babaire Tamara are i Karawa ni kamaiuia ao ni karietataia Natina rinanon “ana karea ana Rikitemanna te Tama” (Mote 5:7). Ngkai ko kamatebwaia Karikani Bwaai 3:1–7; Mote 4; 5:4–12, baikara koaua aika ko kunei ake a buokiko n ota n te Bwaka ao aron ana Mwakuri ni Kamaiu Kristo n tokanikai iaona? Titiraki n aron aikai a kona n ibuobuoki:
-
E kanga te Bwaka n rootaki iai Atam ao Nei Ewa? E kanga n rootai?
-
Bukin tera Atam ao Ewa a anga karea? Tera ae a tei ibukina kanikina n te angakarea? Tera ae I kona n reiakinna man aia taeka anera inanon kiibu aikai?
-
Bukin tera Atam ao Nei Ewa a “kukurei” imwiin Bwakaia? Tera ae ti reiakinna man te rongorongo aei iaon ana baire te Atua ni kaboai rinanon Iesu Kristo?
Ibukin ana Boki Moomon ao kaotioti ake tabeua ni boong aika kaitira, iai ara taratara ae onoti iaon te Bwaka. Te katoto, iangoa te bwai are e reireiniia ana utu te burabeti are Riaai ibukin Atam ao Ewa inanon 2 Nibwaai 2:15–27. E na kanga ana reirei Riaai ni kamatata te bwai are e riki n te Onaroka are i Eten ao ni buokiira ni kaotaira bwa bukin tera e kakaawaki?
Taraa naba 1 I-Korinto 15:20–22; Motiaea 3:19; Aramwa 12:21–37; Reirei ao Berita aika Tabu 29:39–43; Taekan te Onimaki 1:3; Dallin H. Oaks, “Te Baire ae Korakora,” Liahona, Meei 2020, 93–96; Dallin H. Oaks, “Kaitara ni Bwaai ni Kabane,” Riaona, Meei 2016, 114–17; Jeffrey R. Holland, “Where Justice, Love, and Mercy Meet,” Riaona, Meei 2015, 104–6.
Kitanan Eten, iroun Annie Henrie Nader
Karikani Bwaai 3:16; Mote 4:22
Tera ae e nanonaki bwa Atam e na “taua aron” Ewa?
Te kibuntaeka aei n tabetai e kona ni kairuaki ni kananona bwa te buumwaane e na tautaeka ni karaoa te ribuaka nakon buuna. N ara bong, ana burabeti te Uea e a tia n reirei bwa ngkai te buumwaane e riai n tararua n te mweenga inanon te raoiroi, e riai n tara buuna bwa toana ae titebo arona ma ngaia (taraa “Te Utu: Te Katanoata nakon te Aonaaba” [ChurchofJesusChrist.org]). Uninmwaane Dale G. Renlund ao Titita Ruth Lybbert Renlund a kabwarabwara bwa te buu te mwaane ae tamaroa “e na ukoukora aron te mwakuri n ibuobuoki, e na kaoti ana kairua ao n ukoukora kabwaraan ana bure: e na waekoa n anga te kamoamoa; e na rang tararuai kainnanoia ana utu; e na namakina te uota ae korakora n tibwangana ni karekei bwaai ibukin kainnanoia n te aro n rabwata ao n tamnei ibukiia ana utu; e na karinea buuna te aine ma te karinerine ae rianako ao ni mataiakinaki. … E na kakabwaia ana utu” (The Melchizedek Priesthood: Understanding the Doctrine, Living the Principles [2018], 23).
Te Atua e na butimwaea au anganano ngkana I anga ma te nano ae tauraoi ao n ongotaeka.
Atam ao Ewa a reiakinna bwa te angakarea irouia maan bon te kanikina n ana karea ni kamaiu Kristo, ao a karaoa aio “ao a kaotii bwaai ni kabane nakoia natiia mwaane ao aine.” (Mote 5:12). Ngkai ko kamatebwaia Mote 5:4–9, 16–26, iangoa kaokoron aia iango natiia mwaane ake uoman, Kain ao Abera, ni kaineti ma angakarea aikai. Bukin tera te Uea e butimwaea ana anga karea Abera ao e aki Kain?
Aekakira te angakarea ae e kantaningaia mai iroum? Iai inanon Mote 5:4–9, 16–26 ae bita aron am iango iaon angakarea akanne?
Taraa naba Taian Areru 4:5; 2 I-Korinto 9:7; Ominaai 1:26; 3 Nibwaai 9:19–20; Moronaai 7:6–11; Reirei ao Berita aika Tabu 97:8; Jeffrey R. Holland, “Nora ana Tibutetei te Atua,” Riaona, Meei 2019, 44–46.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Karikani Bwaai 3; Mote 4.Tera ae ko kona ni karaoia ni buokiia am utu bwa a na matata riki ni Bwakan Atam ao Nei Ewa? Ko kona ni katotonga tamneia “Adam and Eve” (man Karaki man te O Tetemanti) ao korei. Imwina ko kona ni ikotaki ni mwakuri ni karinanii tamnei ngkai ko maroroakina te bwai are e riki nakoia Atam ao Ewa. Bukin tera e rangi ni kakaawaki ana baire Tamara are i Karawa ni kamaiu? Matakuakinan te Witeo “The Fall” (ChurchofJesusChrist.org) e kona ni kaeakaa te titiraki aei.
-
Mote 4:1–4.Tera ae ti reiakinna n taekan te Atua, Iesu Kristo, ao Tatan man kiibu aikai? Bukin tera e kakaawaki ana baire te Atua bwa Tatan e tangiria ni kamauna?
-
Mote 5:5–9.Tera ae e tuanga Atam ao Ewa te Atua bwa a na karaoia ni buokiia n iangoa taekan te Tia Kamaiu? Tera ae e a tia n anganiira te Atua bwa e na buokiia n iangoa te Tia Kamaiu?
-
Mote 5:16–34.Tera ae e nanonaki bwa kona riki bwa “te tia kawakina tariu”? Tina kanga n tararua riki imarenara n te utu?
Ibukin riki iango ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Te kuna are e rineaki: “Choose the Right Way,” Aia Boki n Anene Ataei, 160–61.
Kanakoraoan Am Kamatebwai I Bon Iroum
Kabonganai bwaai ni ibuobuoki ni kamatebwaian koroboki aika tabu. Ngkai ko kamatebwaia koroboki aika a tabu, kabonganai bwaai aika a na taraaki, Topical Guide, Bible Dictionary, Guide to the Scriptures, ao kamatebwai tabeua ake a buokiko ni karekei rakan iango.
Katotongana, iroun Walter Rane