Atam ao Ewa, iroun Douglas M. Fryer

Tianuare 10–16

Karikani Bwaai 3–4; Mote 4–5

Bwakan Atam ao Ewa

Iangoia ataei aika ko reireiniia ngkai ko kamatebwaia Karikani Bwaai 3–4 ao Mote 4–5. Kabanea am iango iaon taian wirikiriki ao namakin aika ko karekei; a kona ni kairiko nakon iango n angareirei aika boou.

Korei Am Namakin

Kaunga te Tibwatibwa

Kaota tamnein Atam ao Ewa (taraa te kamataata n te wiiki aei inanon Nakomai Iriirai—ibukiia Aomata n Tatabemaniia ao Utu), ao tuangiia ataei bwa ana teirake ao n tibwaua te bwai ae a noria n te tamnei ke n uringa taekan te karaki.

Reirei te Reirei: Ataei aika a Uarereke

Karikani Bwaai 3; Mote 4

Atam ao Ewa a ira ana babaire Tamara are i Karawa.

Buokiia ataei bwa ana ataa te bwai ae riki n te Onaroka i Eten ao e kanga ni buokia ni kakoroa nanon ana babaire ni kamaiu te Atua. Tera kakabwaia aika ti karekei ibukin ana rinerine Atam ao Ewa aika a karaoi?

Waaki ni Kakukurei aika Kona ni Karaoaki

• Ni kauarerekea te karaki ni Bwakan Atam ao Ewa, kabongana “Atam ao Ewa” (ni Karaki man te O Tetemanti). Buokiia ataei bwa ana ataia ae ana rinerine Atam ao Ewa ni kana uaan te kai bon mwakoron ana babaire Tamara are i Karawa.

• Anganiia ataei n tatabemaniia nako te tamnei are e tei ibukin te bwai teuana man ana karaki Atam ao Ewa (n aron te kai, te naeta, te onaroka, ke Iesu Kristo). Tuangiia bwa ana katea ieta aia tamnei n te tai ae eti ngkai ko karakina te karaki ao ni wareki kibuntaeka man Mote 4. Te iteraniba n te wiiki aei e na kona n ibuobuoki.

  

  Leaving Eden (Kitana Eten), iroun Annie Henrie Nader

Mote 4:1–4

I Kona n Rinea te Eti.

Inanon Mote 4:3, ti reiakinna ae Tatan “e eukeukera kamaunaan inaomatan te aomata, are Ngai, te Uea ae te Atua, I a tia n anganna.” Ko na kanga ni buoka te ataei ni karabwarabwa ibukin te konabwai n rinerine imarenan te eti ao te bure?

Waaki ni Kakukurei aika Kona ni Karaoaki

• Taetae nakoia ataei ibukin tabeua rinerine aika ko karaoi n te bong aei, ao buokiia n iangoi rinerine aika a karaoi. Wareware nakoia man Mote 4:3: “Inaomatan te aomata, are Ngai, te Uea ae te Atua, I a tia n anganna.” Kabwarabwara bwa e reireiniira te kibu aei are e a tia te Atua n anganiira te konabwai ni karaoi rinerine. Kaota am kakaitau bwa ko a kona n rinea te eti, ao kakoaua bwa a kona naba ataei n rineia ni karaoa te eti.

• Tibwauai tabeua katooto aika bebete iroun te ataei ae karaoa te rinerine ae eti ke rinerine ae bure, ao tuangiia ataei bwa ana kaotia ngkana e eti ke e bure te rinerine (a kona n teirake, katei ieta kanikinaa, ke n tabeki baia). Kaota am koaua ae e na buokiira Tamara are i Karawa n rinea te eti, ao kaoia ataei bwa ana tibwauai naba aia namakin.

• Buokiia ataei n iangoi rinerine aika raraoi aika a kona ni karaoi n ira Iesu Kristo. Ikotaki n anenea te kuna iaon karaoakin rinerine aika raraoi, n aron “Rinea te Kawai ae Eti” (Aia Boki n Anene Ataei, 160–61). Tuangiia ataei te tai are ko karaoa iai te rinerine ae raoiroi, ao taekina araon am namakin ibukin am rinerine.

Mote 5:4, 8

I kona n tataro nakon Tamara are i Karawa.

Tera ae a tangiria ni kan ataia ataei aika ko reireiniia n taekan te tataro? Tera ae ko kunea inanon kiibu aikai aika a kona ni buokiko?

Waaki ni Kakukurei aika Kona ni Karaoaki

• Wareka Mote 5:4 nakoia ataei. Buokiia bwa ana ataia ae ngke Atam ao Ewa a kitana te Onaroka are i Eten, aikoa kona ni maeka ma Tamara are i Karawa, ma a kona n tataro Nakoina. Kabwarabwara bwa ti tataro nakon Tamara are i Karawa n aran Natina, Iesu Kristo (taraa Mote 5:8). Tera bwaai tabeua aika ti kona n taekin nakon Tamara are i Karawa n ara tataro?

• Tuangia ataei bwa a na kaoti nakoim mwakuri aika a karaoi ngkana a tataro. Ko kona naba ni kaota tamnein temanna ngke e tataro (taraa Gospel Art Book, nambwa 111–12) n reireiniia ataei bwa kabarakan atuura, rukuman baira, ao kainakin matara a buokiira ni karekea te rau ngkana ti tataro.

• Tibwaua am taneiai ma te tataro ke am koaua n te tataro. Bootaki n anenea te kuna iaon taekan te tataro, n aron “A Child’s Prayer” (Aia Boki n Anene Ataei, 12–13).

Reirei te Reirei: Ataei aika a Ikawai Riki

Karikani Bwaai 3; Mote 4; 5:10–11

Bwakan Atam ao Ewa bon mwakoron ana babaire te Atua.

Ngke arona bwa a tia Atam ao Ewa n tiku n te Onaroka are i Eten, ana bon aki kona ni karikiia natiia ao n aki kona ni waaki n riki n aron Tamara are i Karawa. Ti kakaitau ibukin aia rinerine bwa ana kana uaan te kai bukina bwa te rinerine aei are e a karika maiura ae mamate ao ara tai ibukin te maiu are akea tokina.

Waaki ni Kakukurei aika Kona ni Karaoaki

• Kaoia ataei bwa ana uaia ni mwakuri ni karakina bwakan Atam ao Ewa n oin aia taeka. Tibwauai kiibu man Karikani Bwaai 3 ni buokiia.

• Buokiia ataei ni kakaea inanon Mote 4:22–25, 29; 5:10–11 mwiin aia mwakuri Atam ao Ewa ngke a kana uaan te kai (taraa naba 2 Nibwaai 2:19–25). Bukin tera aia rinerine bon te kakabwaia nakoira? E kanga te Ti Kamaiu ni buokiira n tokanikai iaon te bure ao te mate?

Mote 4:1–4

Iai mwakau n rinerine.

Ataei ake ko reireiniia a ataia bwa tera te bwaintangira ae kakawaki ni kona n rinea te rinerine imarenan te eti ao te bure? E na kanga te karaki ibukin Atam ao Ewa ni buokiia ni butimwaea te bwaintangira aei?

Waaki ni Kakukurei aika Kona ni Karaoaki

• Iangoia ni kabongana te bwai teuana ae na buoka reiakinan aron kakawakin karaoan oin ara rinerine n aron aikai: Kaoia ataei bwa ana karana te iteraniba ibukin waaki ni kakukurei n te wiiki aei, ma anganiia ti teuana te kara bwa ana kabongana. Bukin tera e raoiroi riki karekean rinerine n te kangaanga aei? Bootaki ni wareka Mote 4:1–4 ni maroroakinna bwa bukin tera a kakawaki rinerine n ana babaire te Atua.

• Kaoa te ataei bwa e na tibwaua ana atatai ngkana ana karaoa aia rinerine imarenan te bwai ae eti ao e bure. Kariaia bwa ana maroroakin mwiin aia rinerine n tatabeua nako.

Mote 5:4–15

Ibukin Iesu Kristo, I kona n rairanou ao ni manga maeka ma te Atua.

Tamara are i Karawa e kanakoa Iesu Kristo bwa e na kamaiuira man mwiin te Bwaka. Rinanon Ana angakarea ni kamaiu, Iesu e karaoa ae ti na kona ni mangauti imwiin matera ao ni kabwarakin ara bure ngkana ti rairannano.

Waaki ni Kakukurei aika Kona ni Karaoaki

• Koroi uoua taeka iaon te burakibooti: ibukin Atam ao Ewa ao Ibukin Iesu Kristo. Buokiia ataei bwa ana atai kaangaanga man te Bwaka ngkana kam botaki ni wareki Mote 4:25; 6:48; I-Rom 5:12; 2 Nibwaai 2:22–23. Kariaia bwa ana korea te bwai ae a reiakinna man te moan taeka. Ngkanne buokiia n ataia bwa e kanga Iesu Kristo n tokanikai iaon te bure ao te mate ngkana kam botaki ni wareka Mote 5:8–11, 14–15; 6:59; Aramwa 11:42. Kariaia bwa ana korea te bwai ae a reiakinna iaan te kauoua n taeka. Bukin tera ti kakaitau ibukin Iesu Kristo?

• Kaota te witeo iaon ana Mwakuri ni Kamaiu te Tia Kamaiu, n aron “Because of Him” (ChurchofJesusChrist.org). Kaoiia ataei bwa a na tibwaua te bwai ae a namakinna ibukin Iesu Kristo.

• Tabeua te bong imwain taina, tuangiia ataei n tatabemaniia bwa ana rinea te kibu ke te anene n taekan ana Mwakuri ni Kamaiu te Tia Kamaiu n tain te kiraati. Kaungaia bwa ana taetae iaon bukina ngkai a tangiria. Botaki n anenea teuana ke e raka riki taian anene.

Kaungaa te Kamatebwai n te Mweenga

Kaoia ataei bwa ana tibwaua kanoan te iteraniba ibukin waaki ni kakukurei ma aia utu ao taetae iaon kakabwaia aika iai iroura ibukin Bwakan Atam ao Ewa.

Kanakoraoan Ara Anga reirei

Ukoukora oin am kaotioti. Tai tarai kamataata n taian reirei aikai bwa kanga kaetieti aika ko riai ni irii ngkana ko anga reirei. Ma, kabonganai bwa bwaai ni kareke iango ni kona ni kaungaa kairakim n iangoi kainnanoia ataei ake ko reireiniia. (Taraa Reirei n Ana Kawai te Tia Kamaiu, 7.)