“Ritembwa 27–Tianuare 2. Mote 1; Aberaam 3: ‘Aio Au Mwakuri ao Mimitongiu,’” Nakomai, Iriirai—Ibukiia Aomata n Tatabemaniia ao Utu: O Tetemanti 2022 (2021)
“Ritembwa 27–Tianuare 2. Mote 1; Aberaam 3,” Nakomai, Iriirai—Ibukiia Aomata n Tatabemaniia ao Utu: 2022
Ritembwa 27–Tianuare 2
Mote 1; Aberaam 3
“Aio Au Mwakuri ao Mimitongiu”
Ngkai ko wareka are taekinna te Atua nakon Mote ao Aberaam, iangoia bwa tera ae E taekinna naba nakoim.
Korea Am Namakin
E moanaki te Baibara ma taeka “ngke a tuai ni karikaki bwai, ao E karika karawa ma aonaba te Atua.” (Karikani Bwai 1:1). Bwa tera ae iai imwain ae a “karikaki bwai”? Ao bukin tera te Atua e kariki bwai aikai? Rinanon te Burabeti, Iotebwa Timiti, te Uea e anga te kamatata i aon titiraki aikai.
N aron ae, E anga rekootin te mii ni burabeti ike Aberaam e noorira ngke tamnei ngaira “imwain karikan te aonaba” (taraa Aberaam 3:22–28). Te Uea e anganira naba te rairairi ae tabu ke manga kaetan onoua moan mwakoron te boki are Karikani Bwai, are aranaki bwa ana boki Mote—are e aki moanaki mangke “a tuai ni karikaki bwai.” Ma, e moanaki n te bwai are riki nakon Mote are anga oin iango i aon te karaki are kinaaki bwa te Karikibwai. Ni bootaki, koroboki aika tabu aikai ni bong aika kaitira bon te tabo ae tamaroa ibukin waakinan ara kamatebwai n te O Tetemanti ibukina bwa a taekini tabeua titiraki aika kakawaki are a kona ni kabobonga ara wareware: Antai te Atua? Antai ngaira? Tera ana mwakuri te Atua, ao tera tabera i nanona? Moan mwakoron te boki ae Karikani Bwai e kona n noraki iai ana kaeka te Uea nakon ana bubuti Mote: “Nanoanga am toro, O te Atua, ao tuangai taekan te aonaba aei, ao kaaina, ao karawa naba” (Mote 1:36).
Iango ibukin te Kamatebwai i bon Iroum ni Koroboki aika Tabu
Ngkai ngai natin te Atua, iai bukin rokou ikai.
E reirei Beretitenti Dieter F. Uchtdorf, “Angiin te mangaongao are ti rinanona n te maiu aei e roko man ara aki atatai bwa antai raoi ngaira” (“The Reflection in the Water” [Church Educational System fireside for young adults, No. 1, 2009], ChurchofJesusChrist.org). E ata aei Tamara are i Karawa, ao ai uana naba ma Tatan. Ana moan taeka te Atua nakon Mote e kaoti koaua n aron “ngkoe natiu te mwaane” ao “ko karikaki ni katootongan natiu ae au Rikitemanna” (Mote 1:4, 6). N iterana are teuana, Tatan e taetae nakon Mote bwa “natin te aomata” (Mote 1:12). E na kanga n okoro maium ao am rinerine ngkana ko taraiko bwa ngkoe are taku Tatan, bwa “natin te aomata ae te mwaane [ke te aine]”? E na kanga ataakin ao uringana bwa ngkoe natin te Atua ni kakabwaiaa maium?
Tera kiibu ao mwakoron n taeka i nanon Mote 1 are e na anganiko te namakin ae iai kakaawakim ae tabu?
Christ and the Creation (Kristo ao te Karikibwaii), iroun Robert T. Barrett
I kona n tokanikai i aon ana kariiri Tatan.
N aron are kaotia Mote 1 karekean atatai aika tabu a aki kamanoira man te kariiriaki. Ni kouana, teuana ana kawai Tatan ni kariirira bon kakewean baike ti a tia n namakin ke baike ti a tia n reiakin. Ngkai ko wareka ana kaeka Mote nakon Tatan i nanon kiibu 12–26, tera ae ko reiakinna are e na kona ni buokiko n tei ni koaua nakon te koaua are ko a tia ni karekea? Tera ae buokiko n tokanikai i aon ana kariiri Tatan ake tabeua? (taraa, te katooto n, kiibu 15 ao 18).
N te bwai are ko reiakinna, ko kona ni karaoa te baire ibukin te tokanikai i aon te kariiri. N aron te katooto, kam kona ni kabwanina te kibuntaeka ae “Ngkana I kaririaki , N na .”
Taraa naba Mataio 4:1–11; Ereman 5:12; Gary E. Stevenson, “Deceive Me Not,” Liahona, Nov. 2019, 93–96; “I Am a Son of God” (video), ChurchofJesusChrist.org.
Ana mwakuri ao mimitongin te Atua bon buokakiu ni karekea te maiu ae akea tokina.
Imwin noran te mii ni burabeti i aon karikani bwai, Mote e tabeka ana bubuti nakon te Atua: “Tuangai … a kanga n riki bwaai aikai” (Mote 1:30). Tera ae anaaki iai nanom n ana kaeka te Uea i nanon Mote 1:31–39?
Aberaam e karekea naba te mii ni burabeti, are koreaki i nanon Aberaam 3. Tera ae ko kunea i nanon kiibu 22–26 are e kona n ibuobuoki ni kaekaa ana bubuti Mote?
Iangoia ni karinani koaua ake tabeua are a reiakinna Mote ma Aberaam i nanon miia ni burabeti: koaua ibukin te Atua, bon ibukiia, ao bukin ana karikibwai te Atua. A kanga koaua aikai ni bita aron taraakim i bon iroum ao te aonaba are ko mena?
Taraa naba Dieter F. Uchtdorf, “Ko Kakawaki Irouna,” Riaona, Nobembwa 2011, 19–22; Gospel Topics, “Premortality,” topics.ChurchofJesusChrist.org.
Iai riki irarikin Aberaam are a “rineaki i mwain [ae a] bungiaki”?
“N te aonaba i mwain te maiu aei, te Atua e rinei tabeua koraki n tamnei ake a na karaoi tibwanga aika onoti i nanon maiuia n te maiu aei. E aranaki aei bwa te katabu. … Te reirei ae tabu i aon te katabuaki e kaineti nakoia ni kabane kaain te Ekaretia, tiaki tii te Tia Kamaiu ao Ana burabeti” (Gospel Topics, “Foreordination,” topics.ChurchofJesusChrist.org).
Ti kanga ni karekei ana boki Mote ao Aberaam?
Ana boki Mote bon te moan mwakoro n ana rairairi Iotebwa Timiti are tabu i aon te Baibara. Ana boki Abeeram e kaotaki nakon Iotebwa Timiti i nanon ana mwakuri ma niniira mai Aikubita ake n rimoarimoa. Booki aikai, are a kuneaki n Bwaeao ae Bati Boona, a anga te rongorongo ae bati ibukin Mote, Aberaam, ao burabeti ake tabeman ake aki taekinaki n te O Tetemanti. N reiakina riki ae bati bwa ti kanga ni karekei boki aikai, taraa “Joseph Smith Translation of the Bible” (Church History Topics, ChurchofJesusChrist.org/study/history/topics) ao “Translation and Historicity of the Book of Aberaam” (Gospel Topics, topics.ChurchofJesusChrist.org).
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Mote 1:2–6; Aberaam 3:11–12.Ko kona ni kaoia kaain te utu bwa a na kakaei mwakoro n taeka i nanon te anene ae “Ngai Natin te Atua” (Aia Boki n Anene Ataei, 2–3) are e irekereke ma koaua aika kaotaki ni koroboki aika tabu aikai.
-
Mote 1:4, 30–39.A na tangiria kaain am utu n matakuakinii tabeua “ana mwakuri n tabonibaina te [Atua] ”? (kibu 4). Tao ko kona ni wareki tabeua kiibu aikai n te tabo ni kamangngang ke n tain taraan itoi n te tairiki. Ngkanne kam kona ni marooroakinna bwa bukin tera te Atua e karika te aonaba ao tibwangara i nanon Ana “mwakuri ao [Ana] mimitong” (kibu 39).
-
Mote 1:18.Tera te reirei ae ti kona n tibwauaia n ibuobuoki i marenara n “taraa okoron” te Atua ao Tatan? (Taraa naba Moronaai 7:12–18; Reirei ao Berita aika Tabu 50:23–24.)
-
Aberaam 3:24–26.Ko kona n anganiia kaain te utu te mwakuri ae kaunga ma e matoa are e na buokiia ni kona ni irii kaetieti, n aron karaoan te wannikiba man te beba ke iran te retibi. E kanga mwakuri aikai n titebo ma te kantaninga ibukin maiura aio are e kabwarabwaraki ni kiibu aikai?
Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Anene aika katauaki: “Ngai Natin te Atua,” Aia Boki n Anene Ataei, 2–3.
Kanakoraoan Am Kamatebwai
Tarai koauan te euangkerio. Ni koroboki aika tabu, n tabetai ao a bon kaotaki naba koaua n te euangkerio; n tabetai a kaotaki rinanon te katooto ke te karaki. Bon titirakiniko, “Tera te koaua ae akea tokina are e reiakinaki ni kiibu aikai?”
E Tokanikai Mote i aon Tatan, iroun Joseph Brickey