“Tianuare 24–30. Mote 7: ‘Te Uea e Araniia Ana Aomata bwa Tion,’” Nakomai, Iriirai—Ibukiia Aomata n Tatabemaniia ao Utu: Te O Tetemanti 2022 (2021)
“Tianuare 24–30. Mote 7,” Nakomai, Iriirai—Ibukiia Aomata n Tatabemaniia ao Utu: Te O Tetemanti 2022
Itangitangiri Imarenaia, iroun Emma Donaldson Taylor
Tianuare 24–30
Mote 7
“Te Uea e Araniia Ana Aomata bwa Tion”
Ngkai ko wareka ao n iangoa Mote 7, korea am namakin n tamnei. Man karaoan aei, ko kaotia bwa ko kabongana te kairi mairoun te Uea ao ko tangiria ni karekea Ana kairi ae mwaiti riki.
Korea Am Namakin
Rinanon nako rongorongon ngkoa, aomata a tia ni kataia ni karekea te bwai are karekea Enoka ma ana botanaomata: katea te botanaomata ae akea ae kainnano ibuakoia ke te kakeru. Ngkai ana aomata te Atua, ti ibuokanibwai n te nano aei. Ti aranna bwa katean Tion, ao e raonaki—n aro n tararua ibukiia aika kainnano ao boutokaan te rau—karaoan berita, maeka inanon te raoiroi, ao n nano teuana n tatabemaniia ma Iesu Kristo, “Uean Tion” (Mote 7:53). Ibukina bwa te mwakuri ni katean Tion e reitinako inanon ara bong, e ibuobuoki te titiraki, A kanga Enoka ma ana aomata ni karaoia? A kanga n riki n “ti teuana nanoia ao teuana aia iango” (Mote 7:18) n aki tara te buakaka are e katobibia? Ibuakon kabwarabwara aika a mwaiti Mote 7 e anganiira taekan Tion, teuana ae moan te kakaawaki ibukiia aika Itiaki ni Boong aika Kaitira e kona n riki bwa aio: Tion tiaki tii te kaawa—bon aekan tein te nano ao te tamnei. Tion, n aron are e reireia te Uea, bon “te nano ae itiaki” (Reirei ao Berita aika Tabu 97:21). Ngaia are tao bon te kabanea n tamaroa ni kawai ni waaki mai inanora ao ni mweengara.
Iango ibukin te Kamatebwai i bon Iroum ni Koroboki aika Tabu
Ana mwakuri Enoka bon te baeten ni katean Tion inanon maiura.
Ibukina bwa Mote 7 bon te rekooti n aroia taan iriira te Atua n tokanikai ni katean Tion, e kona ni kairiira ao ni kaungaira n te bong aei ngkai ti kaaia naba ni karaoa ae aron anne. Iangoa kabonganaan te taibora n aron aei ni korei bwaai ake ko reiakinna iaon Tion man Mote 7:16–21, 27, 53, 62–69.
|
Kibu |
Tera ae ko reiakinna n taekan Tion? |
Tera ae e kaotia te iango aei ibukin am kekeiaki ni katea Tion? |
|---|---|---|
Kibu | Tera ae ko reiakinna n taekan Tion? Kain Tion “ti teuana nanoia ao teuana aia iango.” | Tera ae e kaotia te iango aei ibukin am kekeiaki ni katea Tion? Ti riai ni katiteuanaki bwa utu ao n te Ekaretia. |
Kibu | Tera ae ko reiakinna n taekan Tion? “Inanon waakin te tai, [Tion] ea uotakirake nako karawa.” | Tera ae e kaotia te iango aei ibukin am kekeiaki ni katea Tion? Katean Tion e waaki teutana imwiin teutana. |
Kibu | Tera ae ko reiakinna n taekan Tion? | Tera ae e kaotia te iango aei ibukin am kekeiaki ni katea Tion? |
Kibu | Tera ae ko reiakinna n taekan Tion? | Tera ae e kaotia te iango aei ibukin am kekeiaki ni katea Tion? |
Ana aomata te Atua e riai n karekea “te nano teuana ao te iango ae ti teuana.”
Mote 7:18–19 karinanii anuaia aomata aika e arananiia te Uea bwa Tion. Bukin tera ko iangoia bwa anua aikai a tau ni katean Tion? Tera aron Tion, n aron are e kabwarabwaraaki n te mwakoro aei, ni kaokoro man kurubu aika inaomata ke bootaki n te aonaaba? Ngkai ko iangoa te titiraki aei, ko kona n iangoi taekan Iesu Kristo inanon kibu 53: “Boni Ngai te Metia, Uean Tion.” Tera ae e nanonaki ni karika Iesu Kristo bwa ara Uea? E kanga ni buokiira ni karikirakea te anua n Tion?
Taraa naba I-Biribi 2:1–5; 4 Nibwaai 1:15–18; Reirei ao Berita aika Tabu 97:21; 105:5.
Ti riai ni kataia n riki “n teuana nanoia ao teuana aia iango” (Mote 7:18).
Tera ae e riki nakon ana kaawa Enoka?
Kibuntaeka aika “uotaki rake” (Mote 7:21, 23), “tabekaki rake,” (Mote 7:24), “tabekaki rake” (Mote 7:27), a “birinako” (Mote 7:69) e kaineti nakon Tion ao ana aomata Enoka ngke a bitaki ao a uotakirake nako karawa. Aomata ake a onikaki “a bitaki bwa aonga n aki rinanon te maraki ke te mate” n aroia aomata (Guide to the Scriptures, “Translated Beings,” “Zion,” scriptures.ChurchofJesusChrist.org; Taraa naba 3 Nibwaai 28:4–9, 15–18, 39–40).
Te Atua e tang ibukiia Natina.
Tabeman aomata a tara te Atua bwa te aomata ae raroa are akea ana namakin ae rootaki iai n te bwai ae riki nakoira. Ma Enoka e noora te mii are e tang iai te Atua ibukiia Natina. Ngkai ko wareka Mote 7:28–40, taratarai bukina ae e tang iai te Atua. Inanon te kauring ni miin Enoka, are e kabwarabwaraaki n Mote 7:41–69, tera te kakoaua are ko kunea bwa te Atua e “nanoanga ao e akoi n aki toki”? (Mote 7:30; taraa kibu 43, 47, ao 62 Ibukin te katoto).
N te kabanea ni bong te Atua e na ikotiia naake E rineia.
Kibu 62 e kabwarabwarai bwaai aika a riki n te kabanea ni bong. Iangoia bwa tera te kibu n aron aikai ae e kona n nanonna: “Ao te raoiraoi N na karuo mai karawa,” “te koaua N na kaotinakoa man te aonaba,” “N na karaoa te raoiroi ao te koaua bwa a na taonaanako te aonaba n aron te ieka.” Tera ae e reireiniko kiibu aikai n taekan ana mwakuri te Atua ni boong aika kaitira?
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Mote 7:18–19.Ni buokiia kain te utu n iangoia bwa tera ae e nanonaki n riki bwa “nano ae ti teuana,” tao ko kona ni karaoa te beeba ae te ati ao ko koreia ni mwakorokoro bwa te kamwaninga, n ae tau ibukiia kain te utu n tatabemaniia bwa e na reke teuana te mwakoro. Kain te utu a kona ni korei araia iaon te mwakoro ni beeba ao imwina a uaia ni mwakuri imarenaia ni katea rabwatan te aati. Ngkai a kabanea ai bwai ni kamwaninga ko kona ni maroroakin bwaai tabeua ae ko tatangiria irouia kain te utu n tatabemaniia.
-
Mote 7:28–31, 35.Tera ae ko reiakinna ibukin te Atua man kiibu aikai?
-
Mote 7:32.Bukin tera te Atua e anganiira te inaomata? Tera ae ti kona n taekinna nakon temanna are e namakinna bwa ana tua te Atua e tiana inaomatara? Waekan 2 Nibwaai 2:25–27 e kona n reita te maroro aei.
-
Mote 7:59–67.Ngkai am utu a wareka Mote 7:59–67, kataia ni mwaakenna ke ni korei bwaai ake te Uea e tuanga Enoka ibukin te kabanea ni bong—te katoto, te Atua e na “botiia ake [E] rineia” (kibu 62) ao e na karekea te “karawawata aika korakora i buakoia ake a buakaka” (kibu 66). Tina kanga ni karekea te onimaki ao te kantaninga n aki tara te buakaka n te kabanea ni bong? Ni mwakoron te maroro aei, iangoa warekan taeka aikai mairoun Unimwaane Ronald A. Rasband: “Taua inanomi, tariu ao mwaneu. Eng, ti maeka n taai aika a kakamaaku, ma ngkai ti tiku iaon kawain te berita, ti riai n aki maaku. I kakabwaiako bwa kona karaoia, kona bon aki tabeiaianga n te taina ngkai kam maiu ke te kangaanga are kona kaaitarai. I kakabwaiako bwa kona rineia n tei n taabo aika a tabu ao n aki kamwaingaki. I kakabwaiako bwa kona kakoaua n ana berita Iesu Kristo, bwa E maiu, E tarataraira, tabeakiniira ao e tei irarikira” (“Be Not Troubled,” Riaona, Nob. 2018, 21).
Ibukin riki iango ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Kuna are e rineaki: “Tangira Mweengara,” Anene n Taromauri, nambwa 294.
Katamaroan Ara Anga Reirei
Taratara raoi. Ngkana ko kaatua am taratara nakon baike a riki n maiuia natim, kona kunei taai n anga reirei aika tamaroa. Aia taeka ao aia titiraki am ataei rinanon te bong e kona ni anga te kanikina iaon te tai n reirei ae kona n reke. (Taraa Reirei n Ana Kawai te Tia Kamaiu, 16.)
Waeraken te Kaawa are Tion, iroun Del Parson