pija in iju ko imejatoto

Tijem̧ba 27–Jānwōde 2

Moses 1; Ebream 3

“En̄in Ej Jerbal eo Aō im Aiboojoj eo Aō”

Ilo am̧ riiti ta eo Anij ekar ba n̄an Moses im Ebream, ļōmņak kōn ta eo Ekar ba n̄an ajri ro kwoj katakin er. Ewi wāween am̧ jipan̄ er en̄jake iakwe eo An n̄an er?

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Jet iien juon al emaron̄ jipan̄ ajri ro keememej ta eo rej ekkatak. Al ak kōm̧m̧an ainikien jejjo eoon ko kōn “N̄a Nejin Anij” (Al ko Al in Ajri, 2–3), im kōtļo̧k bwe ajri ro ren kajidede ba al ta eo. Jipan̄ ajri ro ļōmņake wāween ko me jinee rimjinen im jemān ajri ro im ro jet “rej tōl [er], ļoor [er],” im “jipan̄ [er] aolep iien.”

pija ej bōk jikin katakin

Katakin Katak eo: Ajri ro Reddikļo̧k

Moses 1:1–4, 6

N̄a nejin Anij.

Ta eo kwoj ekkatak jān Moses 1:1–4, 6 kōn jem̧jerā eo am̧ ippān Jemedwōj Ilan̄? Elmen am̧ maron̄ jipan̄ ajri ro meļeļe ta meļeļein erom̧ nejin Anij?

M̧akūtkūt ko Maron̄ Kōm̧m̧ani

• Riit ļo̧k n̄an ajri ro ta eo Anij ekar ba n̄an Moses: “Kwe kwoj nejū m̧aan” (Moses 1:4). Kajjitōk ippān juon ajri n̄an m̧aan, im kajjitōkin ajri ro n̄an āliji ta eo ej ba, “[Etan ajri eo], kwe nejin Anij.” Āliji naan eo n̄an kajjojo ajri ilo kūlaaj eo.

• Kwaļo̧k juon pija in ajri ro, im kajjitōk ippān kūlaaj eo eļan̄n̄e ajri ro rej aolep nejin Anij. Kwaļo̧k bwe kajjojo iaer rej nejin Anij. Kōtļo̧k bwe ajri ro ren kajjojo reiļo̧k n̄an juon kilaaj, im kam̧ool bwe rej barāinwōt nejin Anij.

• Al “N̄a nejin Anij” (Children’s Songbook, 2–3) ippān ajri ro. Kōtļo̧k bwe ren kōļare peij in m̧akūtkūt eo an wiik, im kōjerbale n̄an bar kakeememeji m̧ool ko me al eo ej katakin er.

  Jisōs Kraist ej pād ilubwiljin iju ko

  Kraist im Kōm̧anm̧an Eo, jān Robert T. Barrett

Ebream 3:22–28

Iaar mour ippān Jemedwōj Ilan̄ m̧okta jān aō kar ļotak tok.

Jeļā kōn mour eo ad m̧okta emaron̄ im̧we kōj n̄an kōm̧m̧ani jokāālet ko ad pedped wōt ioon m̧ool ko indeeo. Ilo am̧ ekkatak Ebream 3:22–28, ļōmņak kōn wāween am̧ katakin ajri ro kōn kadkadier indeeo.

M̧akūtkūt ko Maron̄ Kōm̧m̧ani

• Kōjerbal “Kōn Kalim̧m̧ur M̧okta” (ilo Bwebwenato ko ilo Kallim̧ur M̧okta) n̄an katakin ajri ro kōn mour eo m̧okta. Ālkin wōt, kajjitōk ippān ajri ro n̄an bar ba bwebwenato eo n̄an kwe. Etke Jemedwōj Ilan̄ ekar jilkintok kōj n̄an laļ in? Jipan̄ ajri ro lo juon uwaak ilo am̧ riit ļo̧k n̄an er Ebream 3:25.

• Al ippān ajri ro juon al kōn karōk eo an Anij n̄an kōj (āinwōt “I Will Follow God’s Plan” [Children’s Songbook, 164–65]). Jipan̄ er meļeļe m̧ool ko an indeeo ilo naan ko ilo al in.

Moses 1:39

Jemedwōj Ilan̄ ekōņaan bwe in bar ro̧o̧l im mour Ippān n̄an indeeo.

Ekōjkan an m̧ool ko ilo Moses 1:39 kōjeraam̧m̧an mour eo am̧? Ta eo kwomaron̄ kōm̧m̧ane n̄an jipan̄ ajri ro bar en̄jake kōjeraam̧m̧an ko jet?

M̧akūtkūt ko Maron̄ Kōm̧m̧ani

• Jitōn̄ļo̧k naan ko “en̄in ej jerbal eo aō” im “mour indeeo” ilo Moses 1:39, im jipan̄ ajri ro āliji naan ko. Ba n̄an ajri ro kōn jerbal eo kwoj kōm̧m̧ane kajjojo raan. Katakin er bwe jerbal eo an Jemedwōj Ilan̄ ej n̄an jipan̄ kōj bōk mour indeeo, meļeļein n̄an erom̧ āinwōt E im bar mour Ippān bar juon alen.

• Kajjitōk ippān juon jinen im jemān ajri n̄an itok n̄an kūlaaj eo im kōnono kōn wāween an en̄jake n̄e juon ajri ej bar jepļaak n̄an m̧weo ālkin an to an kar jako (n̄an waanjon̄ak, ilo jikin jikuuļ ak ilo juon mijen), ak kwaļo̧k en̄jake ko kwaar en̄jaki ilo iien tōre ko. Kōjerbal waanjon̄ak in n̄an katakin ajri ro ewi jon̄an an Jemedwōj Ilan̄ kōņaan bwe jen jepļaak n̄an E.

pija ej bōk jikin katakin

Katakin Katak eo: Ajri ro Rerūttoļo̧k

Moses 1:4, 30, 37–39; Ebream 3:22–28

N̄a nejin Anij, im E kōņaan bwe en jipan̄ eō jepļaak ļo̧k n̄an Ippān.

Moses 1:4, 37–39 im Ebream 3:22–28 ej katakin m̧ool ko raorōk kōn jem̧jerā ko ad ippān Anij im un ko An n̄an jilkintok kōj n̄an laļ in. Kejakļo̧kjeņ kōn ekōjkan am̧ naaj jipan̄ ajri ro ekkatak m̧ool kein.

M̧akūtkūt ko Maron̄ Kōm̧m̧ani

• Riit ippān ajri ro Moses 1:4, 37–39 im Ebream 3:24–25. Leļo̧k n̄an er iien ko rem̧m̧an n̄an kajjitōk kajjitōk ko im kwaļo̧k naan ko rem̧m̧an tata ippam̧ jān eoon kein Ta eo jej ekkatak jān eoon kein kōn Jemedwōj Ilan̄? kōn kōj make?

• Kwaļo̧k n̄an ajri ro jet iaan pija ko an elōn̄ menin kōm̧anm̧an ko an Jemedwōj Ilan̄. Riiti Moses 1:30, im kōmeļeļeik ta eo Moses ekar kajjitōk ippān Anij kōn un in kōm̧anm̧an kein. Jipan̄ ajri ro kappukot ilo eoon 39 n̄an kappukot uwaak eo an Anij. Kam̧ool bwe un eo an Anij ej n̄an jipan̄ kajjojo ajri ro bōk mour indeeo.

• Jipan̄ ajri ro ļōmņak kōn jekjek ko me rej aikuj kar kāālet n̄e ak jaab “kōm̧m̧ani aolep men ko jabdewōt Irooj aer Anij enaaj jiron̄ er” (Ebream 3:25). Kōtļo̧k bwe ren kaminene ak ekkōnono kōn wāween ko rekkar jelm̧ae jekjek rōt kaņ. Ekōjkan an Rilo̧mo̧o̧r jipan̄ kōj n̄e jej kōm̧m̧ane juon jokāālet ebōd?

Moses 1:12–26

Imaron̄ anjo̧ ioon kapo ko an Setan.

Ilo am̧ ekkatak Moses 1:12–26, kappukot men ko Moses ekar kōm̧m̧ani n̄an anjo̧ ioon Setan. Ekōjkan an waanjon̄ak eo an Moses jipan̄ ajri ro n̄e rej jelm̧ae kapo ko?

M̧akūtkūt ko Maron̄ Kōm̧m̧ani

• Kakaduikļo̧k en̄jake eo an Moses ilo Moses 1:12–26 ilo naan ko am̧ make, ak kajjitōk ippān juon iaan ajri ro nejin n̄an kōm̧m̧an āindein (lale barāinwōt bitio eo “N̄a Nejin Anij” [ChurchofJesusChrist.org]). Kajjitōk ippān ajri ro n̄an kappukot eoon kein n̄an ekkatak ekōjkan an Moses kar maron̄ anjo̧ ioon Setan. (Eļan̄n̄e rej aikuj jipan̄, kwaļo̧k n̄an er eoon ko 13, 15, 18, 20–22, 26.)

• Bōktok juon bo̧o̧k in kein jerbal (ak pija in kein jerbal ko), im lābōļe kajjojo kein jerbal kōn juon wāween jemaron̄ eļļā ioon kapo (āinwōt jar, al juon al, riiti jeje ko rekwojarjar, ak jipan̄ ro jet). Kajjitōk bwe kajjojo ajri ren bōk juon kein jerbal im ba kōn juon jekjek n̄e wāween eo kar je ioon kein jerbal eo emaron̄ jipan̄ anjo̧ ioon kapo. Riiti ippān doon eoon ko 25–26, im kam̧ool bwe Anij enaaj jipan̄ kōj n̄e jej jelm̧ae kapo ko.

Ebream 3:22–28

Iaar mour ippān Jemed Ilan̄ m̧okta jān aō kar ļotak tok.

Eoon kein rej kōmeļeļeik visōn eo an Ebream kōn mour eo m̧okta emaron̄ jipan̄ ajri ro uwaak kajjitōk ko “Jej itok jān ia?” im “Etke ij pād Ijin ak ilo Laļ in?” Ewi wāween am̧ naaj jipan̄ er kappukot uwaak ko?

M̧akūtkūt ko Maron̄ Kōm̧m̧ani

• Ioon bo̧o̧t eo, je kajjitōk ko rej iookļo̧k Ebream 3:22–28, āinwōt Ta eo ekar waļo̧k ilo mour eo m̧okta jān ad kar ļotak tok? Wōn ro rekar pād ijeņ? Etke laļ in ekarkōm̧anm̧an ? Karuwaineneik ajri ro n̄an riiti eoon kein n̄an kappukot uwaak ko.

• Eļan̄n̄e ewōr juon nin̄nin̄ ej kab ļotak ilo ward eo, kajjitōk ippān pāāren ro n̄an bōktok nin̄nin̄ eo n̄an kūlaaj eo im kwaļo̧k en̄jake ko aer kōn aer karuwaineneik tok ajri in n̄an laļ in. (Kwomaron̄ bar kwaļo̧k juon pija in juon nin̄nin̄ ej kab ļotak.) Kōnono ippān ajri ro kōn ia eo jetōb in ajri in ej itok jāne m̧okta jān an kar itok n̄an laļ in. Etke eaorōk n̄an kōj nin̄nin̄ in n̄an ekkatak bwe e ej nejin Anij?

• Al al ko kōn karōk eo an Anij n̄an kōj, āinwōt “I Know My Father Lives” ak “I Will Follow God’s Plan” (Al ko Al in Ajri, 5, 164–65). Kajjitōk ippān ajri ro n̄an jin̄aik pija ko me re m̧ōttanļo̧k naan ko. Kōtļo̧k bwe ren kōjerbal pija ko n̄an katakin doon m̧ool ko jān al ko.

pija ej bōk jikin ekkatak

Kōketak Ekkatak ilo M̧weo

Ļōmņak kōn wāween ko me ekkatak ko me rej bōk jikier ilo kūlaaj eo an Būrāimere emaron̄ kōketak, jipan̄, ak kōkajoorļo̧k ekkatak ko me rej bōk jikier ilo m̧ōko m̧ōn ajri ro. N̄an waanjon̄ok, kwomaron̄ karuwaineneik ajri ro n̄an jeere peij in m̧akūtkūt eo an wiik in ippān baam̧le ko aer.

Kōkm̧anm̧anļo̧k Ad Katakin

Ajri ro rej ekkatak ilo elōn̄ kain wāween ko. Ajri ro rej m̧ōņōņō ilo aer ekkatak jān en̄jake ko reokkotaktak. Kōjerbal makūtkūt ko me rej kōm̧m̧an bwe en itok limoer, kōjerbal aolep en̄jake ko, im kajjeon̄i men ko rekāāl. (Lale Teaching in the Savior’s Way, 25–26.)

activity page: I am a child of God