Adam im Iv rej etetal ippān doon

Adam im Iv, jān Douglas M. Fryer

Jānwōde 10–16

Jenesis 3–4; Moses 4–5

Wōtlo̧k eo an Adam im Iv

Ļōmņak kōn ajri ro kwoj katakin er ilo am̧ ekkatak Jenesis 3–4 im Moses 4–5. Leļo̧k am̧ n̄an en̄jake ko im im̧we ko kwoj en̄jaki, jekdo̧o̧n eļan̄n̄e rejjab iookwaj ta eo kwoj riiti.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kwaļo̧k juon pija in Itok eo Kein Karuo an Rilo̧mo̧o̧r (lale unin tōl eo an wiik in ilo Itok, Ļoor Eō—N̄an Kajjojo Armej im Baam̧le Ko), im kajjitōk ippān ajri ro n̄an kwaļo̧k ta eo rej en̄jake n̄e rej lo pija eo.

pija ej bōk jikin katakin

Katakin Katak eo: Ajri ro Reddikļo̧k

Jenesis 3; Moses 4

Adam im Iv rekar ļoor karōk eo an Jemedwōj Ilan̄.

Jipan̄ ajri ro meļeļe ta eo ekar waļo̧k ilo Jikin Kallip Iden im wāween an kar jipan̄ kakūrm̧ool karōk in lo̧mo̧o̧r eo an Anij. Ta kōjeraam̧m̧an ko ewōr ippād kōn jokāālet eo Adam im Iv rekar kōm̧m̧ane?

M̧akūtkūt ko Maron̄ Kōm̧m̧ani

• N̄an kakaduikļo̧k bwebwenato eo kōn Wōtlo̧k eo an Adam im Iv, kōjerbal “Adam and Eve” (ilo Bwebwenato ko ilo Kalim̧ur M̧okta). Jipan̄ ajri ro meļeļe bwe jokāālet eo an Adam im Iv n̄an m̧ōn̄ā leen wōjke eo kar m̧ōttan karōk eo an Jemedwōj Ilan̄.

• Leļo̧k n̄an kajjojo ajri juon pija me ej bōk jikin juon men jān bwebwenato eo an Adam im Iv (āinwōt juon wōjke, juon jedpānit, juon jikin kallip, ak Jisōs Kraist). Kajjitōk ippāer n̄an jibwe pija ko aer ilo iien eo ejejjet ilo am̧ ba bwebwenato eo im riiti naan ko jān Moses 4. peij in m̧akūtkūt eo an rainin emaron̄ bar jipan̄.

  Iv ej jibwe leen wōjke eo

  Em̧m̧akūt jān Jikin Kallip Iden, jān Annie Henrie Nader

Moses 4:1–4

Imaron̄ kāālet jim̧we eo.

Ilo Moses 4:3, jej ekkatak bwe Setan ej “kappukot n̄an ko̧kkure anemkwōj in kāālet eo an armej, eo N̄a, Irooj Anij, Iaar leļo̧k n̄an e.” Ewi wāween am̧ maron̄ jipan̄ ajri ro kamm̧oolol kōn maron̄ in kāālet eo ikōtaan bōd im jim̧we?

M̧akūtkūt ko Maron̄ Kōm̧m̧ani

• Kōnono n̄an ajri ro kōn jet iaan jokāālet ko kwaar kōm̧m̧ani rainin, im jipan̄ er ļōmņak kōn jokāālet ko rekar kōm̧m̧ani. Riiti n̄an er jān Moses 4:3: “Anemkwoj in kāālet eo an armej, eo N̄a, Irooj Anij, Iaar leļo̧k n̄an e.” Kōmeļeļeik bwe eoon in ej katakin kōj bwe Anij ekar letok n̄an kōj maron̄ n̄an kōm̧m̧ani jokāālet ko. Kwaļo̧k am̧ kam̧m̧oolol bwe kwojar maron̄ kāālet jim̧we eo, im kwaļo̧k kam̧ool bwe ajri ro remaron̄ bar kāālet n̄an kōm̧m̧ane ta eo ejim̧we.

• Kwāļo̧k jejjo waanjon̄ak kōn juon ajri eo ej kōm̧m̧an juon jokāālet ejim̧we im juon jokāālet ebōd, im kajjitōk ippān ajri ro n̄an kwaļo̧k eļan̄n̄e jokāālet in ejim̧we ke ebōd (remaron̄ jutak, jibwe jain ko, ak kajutak peier). Kwaļo̧k am̧ naan in kam̧ool bwe Jemedwōj Ilan̄ enaaj jipan̄ kōj kāālet jim̧we eo, im karuwaineneik ajri ro n̄an kwaļo̧k en̄jake ko aer barāinwōt.

• Jipan̄ er ļōmņak kōn jokāālet ko rem̧m̧an me remaron̄ kōm̧m̧ani n̄an ļoor Jisōs Kraist. Al ippān doon juon al kōn kōm̧m̧ani jokāālet ko rejim̧we, āinwōt “Choose the Right Way” (Al ko Al in Ajri, 160–61). Ba n̄an ajri ro kōn juon iien me kwaar kōm̧m̧ane juon jokāālet em̧m̧an, im kōnono kōn ekōjkan am̧ kar en̄jake kōn jokāālet eo am̧.

Moses 5:4, 8

Imaron̄ Jar n̄an Jemedwōj Ilan̄.

Ta eo ajri ro kwoj katakin er rej aikuj jeļā kōn jar? Ta eo kwoj kappukot ilo eoon kein me emaron̄ jipan̄ er?

M̧akūtkūt ko Maron̄ Kōm̧m̧ani

• Riiti Moses 5:4 n̄an ajri ro. Jipan̄ er meļeļe bwe ke Adam im Iv rekar em̧akūt jān Jikin Kallip Iden, rekar jab maron̄ pād ippān Jemedwōj Ilan̄, ak rekar maron̄ jar wōt n̄an E. Kōmeļeļeik bwe jej jar n̄an Jemedwōj Ilan̄ ilo etan Nejin, Jisōs Kraist (lale Moses 5:8). Ta jet iaan men ko jemaron̄ ba n̄an Jemedwōj Ilan̄ ilo jar ko ad?

• Kajjitōk ippān ajri ro n̄an kwaļo̧k n̄an eok ta eo rej kōm̧m̧ane n̄e rej jar. Kwomaron̄ barāinwōt kwaļo̧k juon pija in juon armej ej jar (lale Gospel Art Book, nos. 111–12) n̄an katakin ajri ro bwe badikdik, bo̧k pā, im kilōk mejād ejipan̄ kōj bwe jen kautiej n̄e jej jar.

• Kwaļo̧k juon am̧ make en̄jake kōn jar ak naan in kam̧ool kōn jar. Al ippān ajri ro juon al kōn jar, āinwōt “A Child’s Prayer” (Al ko Al in Ajri, 12–13).

pija ej bōk jikin katakin

Katakin Katak eo: Ajri ro Rerūttoļo̧k

Jenesis 3; Moses 4; 5:10–11

Wōtlo̧k eo an Adam im Iv rekar m̧ōttan wōt karōk eo an Anij.

Eļan̄n̄e Adam im Iv rekar pād wōt ilo Jikin Kallip Iden, eban kar wōr nejier ajri im reban kar eddōkļo̧k n̄an erom̧ āinwōt Jemedwōj Ilan̄. Jej kam̧m̧oolol kōn jokāālet ko aer n̄an m̧ōn̄ā leen wōjke eo kōn jokāālet eo in ekar kōm̧m̧an bwe mour in ad im iien ko ad rem̧m̧an n̄an mour indeeo ren kūrm̧ool.

M̧akūtkūt ko Maron̄ Kōm̧m̧ani

• Karuwaineneik ajri ro n̄an jerbal ippān doon n̄an ba bwebwenato eo kōn Wōtlo̧k eo an Adam im Iv ilo naan ko aer make. Kwaļo̧k eoon ko jān Jenesis 3 n̄an jipan̄ er.

• Jipan̄ ajri ro kappukot ilo Moses 4:22–25, 29; 5:10–11 ajālik ko an Adam im Iv kōn aer kar m̧ōn̄āik leen wōjke eo (lale barāinwōt 2 Nipai 2:19–25). Etke jokāālet eo aer ej juon kōjeraam̧m̧an n̄an kōj? Ekōjkan an Rilo̧mo̧o̧r kar jipan̄ kōj anjo̧ ioon jerawiwi im mej?

Moses 4:1–4

Ewōr aō kajoor n̄an kāālet.

Ajri ro kwoj katakin er rej ke kile menin letok in eaorōk n̄an maron̄ kāālet ikōtaan jim̧we im bōd? Ekōjkan an bwebwenato eo an Adam im Iv maron̄ jipan̄ er kam̧m̧oolol kōn menin letok in?

M̧akūtkūt ko Maron̄ Kōm̧m̧ani

• Ļōmņak kōn juon object lesson eo epidodo āinwōt ļoor kōmeļeļe in aorōkin kōm̧m̧ani jokāālet ko aer make: Kajjitōk ippān ajri ro n̄an kōļare peij in m̧akūtkūt eo an wiik in ak leļo̧k n̄an er juon kōļar n̄an kōjerbale. Etke enaaj kar em̧m̧anļo̧k n̄an wōr ad jokāālet ilo jekjek in? Riit ippān doon Moses 4:1–4 n̄an kōnono kōn etke jokāālet ko reaorōk ilo karōk eo an Anij.

• Kajjitōk ippān ajri ro n̄an kwaļo̧k juon er make en̄jake ke rekar kāālet ikōtaan jim̧we im bōd. Kōtļo̧k bwe ren ekkōnono kōn ajāllik ko rekkar kōn kajjojo jokāālet.

Moses 5:4–15

Kōn Jisōs Kraist, Jemaron̄ ukweļo̧k im bar mour ippān Anij.

Jemedwōj Ilan̄ ekar jilkintok Jisōs Kraist n̄an lo̧mo̧o̧ren kōj jān ajāllik ko an Wōtlo̧k eo. Kōn pinmuur eo An, Jisōs ekar kōm̧m̧an bwe jen bar jekakpeje ālkin ad mej im jeorļo̧k ad bōd n̄e jej ukweļo̧k.

M̧akūtkūt ko Maron̄ Kōm̧m̧ani

• Je ruo taitōļ ioon bo̧o̧t eo: Kōn Adam im Iv im Kōn Jisōs Kraist. Jipan̄ ajri ro kakilen waļo̧k ko an Wōtlo̧k eo ilo am̧ riiti ippān doon Moses 4:25; 6:48; Rom 5:12; 2 Nipai 2:22–23. Kōtļo̧k bwe ren je ta eo rej ekkatak ium̧win taitōļ eo jinoin. Jipan̄ er kakilen wāween an kar Jisōs Kraist anjo̧ ioon jerawiwi im mej ilo ami riiti ippān doon Moses 5:8–11, 14–15; 6:59; Alma 11:42. Kōtļo̧k bwe ren je ta eo rej ekkatak ium̧win taitōļ eo kein karuo. Etke jej kam̧moolol kōn Jisōs Kraist?

• Kwaļo̧k juon pija in alooj kōn Pinmuur eo an Rilo̧mo̧o̧r, āinwōt “Because of Him” (ChurchofJesusChrist.org). Kajjitōk ippān ajri ro n̄an kwaļo̧k ta en̄jake eo aer kōn Jisōs Kraist.

• Jejjo raan m̧oktaļo̧k, kajjitōk ippān jejjo ajri n̄an kāālet juon eooj ak al kōn Pinmuur eo an Rilo̧mo̧o̧r n̄an jeere ilo kūlaaj eo. Kōketak er n̄an kōnono kōn etke rekōņaan. Al juon ak elōn̄ļo̧k al ko ippān doon.

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an kōjerbal peij in m̧akūtkūt eo n̄an kwaļo̧k ippān baam̧le ko aer ak ro m̧ōttaer kōn ekōjkan an kōjeraam̧m̧an ko repād ippād kōn Wōtlo̧k eo an Adam im Iv.

Kōkm̧anm̧anļo̧k Ad Katakin

Kappukot im̧we eo am̧ make. Jab lale laajrak kein āinwōt kōmeļeļe ko kwoj aikuj ļoor ilo am̧ katakin. Ijoke, kōjerbali āinwōt juon kein jipan̄ n̄an aitia ko n̄an kōļapļo̧k im̧we ko am̧ make ilo am̧ kejakļo̧kjeņ kōn aikuj ko an ajri ro kwoj katakin. (Lale Teaching in the Savior’s Way, 7.)

peij in m̧akūtkūt: Wōtlo̧k eo an Adam im Iv kar m̧ōttan karōk eo an Anij.