Adam and Iv rej etetal ippān doon

Adam im Iv, jān Douglas M. Fryer

Jānwōde 10–16

Jenesis 3–4; Moses 4–5

Wōtļo̧k eo an Adam im Iv

Ilo am̧ ekkatak Jenesis 3–4 im Moses 4–5, ļōmņak kōn ta eo Irooj ej kajjieon̄ in katakin eok. Je m̧ool kein im im̧we ko am̧ ilo jetōb, im kejo̧kļo̧kjeņ kaki ilo aolepān wiik in.

Je En̄jake ko Rej Im̧we Eok

Kar jinoin, bwebwenato in Wōtļo̧k eo an Adam im Iv remaron̄ āinwōt juon jorrāān eļap. Adam im Iv rej em̧m̧akūt jān Jikin Kallip Iden. Rekar kadiwōjļo̧k er n̄an juon laļ ijo rej en̄jake metak, burom̧ōj, im mej (lale Jenesis 3:16–19). Im rekar jepelļo̧k jān Jemeier Ilan̄. Ak kōnke m̧ool ko em̧ōj aer jepļaatok n̄an Rikanaan Josep Smith ilo bok in Moses, jejeļā bwe bwebwenato in Adam im Iv ej lukkuun m̧ool in juon bwebwenato in kōjatdikdik—im ej juon m̧ōttan emenin aikuj n̄an karōk eo an Anij n̄an ro Nejin.

Jikin Kallip in Iden ekar lukkuun aibojooj. Ak Adam im Iv rekar aikuj juon men eļapļo̧k im aibojooj ej jepooļ er. Rekar aikuji—im jekar aolep aikuji—juon iien em̧m̧an n̄an eddōkļo̧k. Em̧m̧akūt jān Jikin Kallib in Iden ekar bun̄tōn eo kein kajuon eaorōk n̄an oktakļo̧k n̄an Anij im āliktata erom̧ āinwōt E. Meļeļein jelm̧ae jum̧ae, kōm̧m̧an bōd, ekkatak n̄an ukweļo̧k, im lōke Rilo̧mo̧o̧r, eo me Pinmuur eo an ej kōm̧m̧an bwe jen eddōkļo̧k im “lan̄lōn̄ kōn lo̧mo̧o̧ren eo ad” (Moses 5:11). Kōn menin, n̄e kwoj riiti wōtļo̧k eo an Adam im Iv, jab mije wōt jorrāān ko reļļap ak men ko me maron̄ kōjatdikdik kaki—kōn paredais eo Adam im Iv rekar luuji ak kōn aibojooj eo kar aer kāālet ekar kōm̧m̧an bwe jen bar bōke.

pija ej bōk jikin ekkatak ippam̧ make

Ļōm̧ņak ko n̄an Ekkatak Jeje Ko Rekwojarjar Ippam̧ Make

Jenesis 3:1–7; Moses 4; 5:4–12

Wōtļo̧k eo an ekar juon mōttan eo emenin aikuj n̄an karōk eo an Anij n̄an lo̧mo̧o̧ren ajri ro Nejin.

Wōtļo̧k eo an Adam im Iv rekar bōktok mej ilo kanniōk im jetōb ilo laļ in. Ekar barāinwōt bōktok en̄taan, burom̧ōj, im jerawiwi. Aolep men kein rej un ko n̄an ajeļo̧ke Wōtļo̧k eo. Ak Wōtļo̧k eo ekar m̧ōttan karōk eo an Jemedwōj Ilan̄ n̄an lo̧mo̧o̧ren im leļo̧k mour eo eutiejtata n̄an ajri ro Nejin kōn “katok eo an eo Nejin Eaar Make Keotak in Jemān” (Moses 5:7). Ilo am̧ ekkatak Jenesis 3:1–7; Moses 4; 5:4–12, ta m̧ool ko me kwoj loe me ejipan̄ eok meļeļe Wōtļo̧k eo im ekōjkan an Pinmuur eo an Kraist kar ellā ioon? Kajjitōk ko āinwōt kein remaron̄ jipan̄:

• Ewi wāween an Wōtlo̧k eo jelōt Adam im Iv? Ekōjkan an jelōt kōj?

• Etke Adam im Iv rekar kōm̧m̧an katok? Ta eo katok ko rekar jutak kaki? Ta eo jemaron̄ ekkatak jān naan ko an enjeļ eo ilo eoon kein?

• Etke Adam im Iv rekar “m̧ōņōņō” ālkin Wōtļo̧k eo aerro? Ta eo ij ekkatak jān bwebwenato in kōn karōk eo an Anij n̄an lo̧mo̧o̧ren eō kōn Jisōs Kraist?

Kōn Bok in Mormon im revelesōn ko ilo raan ko āliktata, ewōr juon kōļmenļo̧kjeņ ejeņoļo̧k kōn Wōtļo̧k eo. N̄an waanjon̄ak, ļōmņak kōn ta eo rikanaan Liai ekar katakin baam̧le eo an kōn Adam im Iv ilo 2 Nipai 2:15–27. Ekōjkan an katak ko an Liai kalikkar ta eo ekar waļo̧k ilo Jikin Kallib in Iden im jipan̄ kōj meļeļe etke ekar aorōk?

Barāinwōt lale 1 Korint 15:20–22; Mosaia 3:19; Alma 12:21–37; Katak im Bujen Ko 29:39–43; Laajrak in Tōmak Ko 1:3; Dallin H. Oaks, “Karōk eo Eļap,” Liaona, Māe 2020, 93–96; Dallin H. Oaks, “Jum̧ae ilo Men Otemjej,” Liaona, Māe 2016, 114–17; Jeffrey R. Holland, “Ijo Jim̧we, Iakwe, im Meanwōd rej Pād,” Liaona, Māe 2015, 104–6.

Iv ej jibwe leen wōjke eo

Em̧akūt jān Iden, jān Annie Henrie Nader

Jenesis 3:16; Moses 4:22

Ta meļeļein ke Adam ekar “irooj ioon” Iv?

Eoon in ilo jeje ko rekwojarjar jet iien armej remeļeļe kake n̄an meļeļein ke ļeo pālele ewōr am̧ maron̄ n̄an kōm̧m̧ani men ko rejjab jouj n̄an lio pāleen. Ilo raan kein ad, rikanaan ro an Irooj rekar katakin bwe ilo an ļeo pālele aikuj tōl m̧weo ilo jim̧we, ej aikuj kalimjōk kōrā eo pāleen āinwōt juon an paatnōr me erro ej jon̄an wōt juon (lale “Baam̧le Eo: Juon Kean̄ n̄an Laļ in” [ChurchofJesusChrist.org]). Elder Dale G. Renlund im Sister Ruth Lybbert Renlund rekar kōmeļeļeik bwe ļeo pālele eo ej mour jim̧we “enaaj kappukot n̄an jerbal in karejar; enaaj kile bōd im kappukot jeorļo̧k bōd; enaaj m̧ōkaj n̄an leļo̧k nōbar; enaaj ļōmņak kōn kōņaan ko an ro uwaan baam̧le eo; enaaj en̄jake eddo ko reļļap n̄an kakke ‘aikuji ko an mour im kōjparok eo an baam̧le eo an; enaaj ļap an kautiej im kōttāiki n̄an kōrā eo pāleen. … Enaaj kōjeraam̧m̧an baam̧le eo am̧” (The Melchizedek Priesthood: Understanding the Doctrine, Living the Principles [2018], 23).

Moses 5:4–9, 16–26

Anij enaaj kile kijejeto ko aō eļan̄n̄e ij kōm̧m̧ani kōn ikdeleel in bōro im pokake.

Adam im Iv rekar ekkatak bwe katok kōn menin mour rekar kōkaļļe in katok in pinmuur eo an Kraist, im rekar “kwaļo̧k aolep men n̄an m̧aan ro im kōrā ro nejier” (Moses 5:12). Ilo am̧ ekkatak Moses 5:4–9, 16–26, ļōmņak kōn m̧wil ko reoktak an ļaddik ro nejier, Kein im Ebel, n̄an katok kein. Etke Irooj ekar kile katok eo an Ebel im jab Kein?

Ta kain katok ko Irooj ej kajjitōk bwe kwon kōm̧m̧ani? Elōn̄ ke bar ilo Moses 5:4–9, 16–26 me ej ukot wāween am̧ ļōmņak kōn katok ko?

Barāinwōt lale Sam Ko 4:5; 2 Korint 9:7; Omnai 1:26; 3 Nipai 9:19–20; Moronai 7:6–11; Katak im Bujen Ko 97:8; Jeffrey R. Holland, “Lo Ļaam̧ eo an Anij,” Liaona, Māe 2019, 44–46.

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jenesis 3; Moses 4.Ta eo kwomaron̄ kōm̧m̧ane n̄an jipan̄ baam̧le eo am̧ em̧m̧anļo̧k aer meļeļe kōn Wōtļo̧k eo an Adam im Iv? Kwomaron̄ kapeik pija ko jān “Adam and Eve” (ilo Old Testament Stories) im m̧wijiter. Innem kwomaron̄ jerbal ippān doon n̄an likūt pija ko karōki ilo am̧ kōmeļeļeik en̄jake ko an Adam im Iv. Etke Wōtļo̧k eo ekar menin aikuj ilo karōk in lo̧mo̧o̧r eo an Jemedwōj Ilan̄? Alooje pijaan alooj in “The Fall” (ChurchofJesusChrist.org) emaron̄ jipan̄ eok uwaake kajjitōk in.

Moses 4:1–4.Ta eo jekar ekkatak kōn Anij, Jisōs Kraist, im Setan jān eoon kein? Etke anemkwōj elukkuun aorōk n̄an karōk eo an Anij me Setan ekōņaan kakkure?

Moses 5:5–9.Ta eo Anij ekar kakien Adam im Iv n̄an kōm̧m̧ane n̄an jipan̄ er ļōmņak kōn Rilo̧mo̧o̧r? Ta eo Anij ekar letok n̄an kōj n̄an jipan̄ kōj ļōmņak kōn Rilo̧mo̧o̧r?

Moses 5:16–34.Ta meļeļein n̄an erom̧ ad “rikōjparok jatū”? Ekōjkan ad maron̄ em̧m̧anļo̧k ad kea kōn doon āinwōt juon baam̧le?

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Choose the Right Way,” Children’s Songbook, 160–61.

Kōkōm̧anm̧anļo̧k Am̧ Ekkatak Ippam̧ Make

Kōjerbal Jeje Ko Rekwojarjar n̄an Ekkatak Ejipan̄ Ilo am̧ ekkatak jeje ko rekwojarjar, kōjerbal footnot ko, Topical Guide, Bible Dictionary, Guide to the Scriptures, im kein jipan̄ ko jet n̄an ekkatak n̄an bōk eļapļo̧k meļeļe.

enjeļ eo ej loļo̧k Adam im Iv

Jarlepju, jān Walter Rane