Tijem̧ba 27–Jānwōde 2

Moses 1; Ebream 3

“En̄in Ej Jerbal Eo Aō im Aiboojoj Eo Aō”

Ilo am̧ riiti ta eo Anij ekar ba n̄an Moses im n̄an Ebream, kejōkļo̧jeņ kōn ta eo E emaron̄ barāinwōt ba n̄an kwe.

Je En̄jake ko Rej Im̧we Eok

Baibōļ eo ej ijjino kōn naan ko “ilo jinoin Anij ear kōṃanṃan lan̄ im laḷ” (Jenesis 1:1). Bōtaab ta eo ekar pād m̧okta ilo “jinoin”? Im etke Anij ekar kōm̧anm̧an aolep men kein? Kōn Rikanaan Josep Smith, Irooj ekar kalikkar kajjitōk kein.

N̄an waanjon̄ak, E ekar letok n̄an kōj ļo̧o̧k eo kōn juon visōn me Ebream ekar lo kōj āinwōt jetōb ko “m̧okta jān kar laļ” (lale Ebream 3:22–28). Irooj ekar barāinwōt letok n̄an kōj juon ukook eo eim̧we ak bar juon ukook in jebta ko jiljino im̧aan an Jenesis, kar ņae etan bok eo an Moses—eo ejjab ijjino kōn “ilo jinoin.” Ijjello̧kin, ej ijjino kōn juon en̄jake Moses ekar bōke me ej letok jet m̧ōttan ko n̄an juon bwebwenato in Kōm̧anm̧an eo jeļā kake. Koba ippān, jeje ko rekwojarjar an raan-ko āliktata rej juon jikin em̧m̧an n̄an jino ekkatak eo ad kōn Kallim̧ur M̧okta kōnke rej ekōnono kōn jet kajjitōk ko raorōk me remaron̄ letok jet m̧ōttan ko n̄an riit eo ad: Wōn Anij? Wōn kōj? Ta jerbal eo an Anij, im ta jikid ilo jerbal eo? Jepta ko rej jino Jenesis maron̄ loi āinwōt uwaak eo an Irooj n̄an kajjitōk eo an Moses: “Kwōn tūriam̧o kake karejeram̧, O Anij, im ba n̄an eō kōn laļ in, im ro rej pād ie, im barāinwōt lan̄ ko” (Moses 1:36).

Ļōm̧ņak ko n̄an Ekkatak Jeje Ko Rekwojarjar Ippam̧ Make

Moses 1

Āinwōt juon ajri nejin Anij, ewōr juon aō mejānkajjik ekwojarjar.

Būreejtōn Dieter F. Uchtdorf eaar katakin, “Eļap wōt ļōkapokpok eo jej en̄jake ilo mour in ej itok jān jab meļeļe wōn kōj” (“The Reflection in the Water” [Church Educational System fireside for young adults, Nov. 1, 2009], ChurchofJesusChrist.org). Jemedwōj Ilan̄ ejeļā menin, im barāinwōt Setan. Ennaan eo m̧oktata an Anij n̄an Moses ekar koba m̧ool ko “kwōj nejū m̧aan” im “kwōj ilo jekjekin Nejū Iaar Make Keotake” (Moses 1:4, 6). Ilo jum̧ae, Setan ekar an̄inn̄in Moses āinwōt juon “nejin armej” (Moses 1:12). Ekōjkan naaj kar mour eo am̧ im jokāālet ko ren kar oktak eļan̄n̄e kwar ļōmņak kōn kwe āinwōt an Setan kōņaan bwe kwon, āinwōt juon “ļaddik [ak leddik ] nejin armej”? Ekōjkan an jeļā im keememej bwe kwoj juon nejin Anij ej kōjeraam̧m̧an mour eo am̧?

Ta eoon ko ak ennaan ko ilo Moses 1 rej lewaj n̄an eok juon en̄jake kōn tokjān eo ekwojarjar am̧?

Kraist im Kōm̧anm̧an eo, jān Robert T. Barrett

Moses 1:12–26

Imaron̄ jumae kareel eo an Setan.

Āinwōt an Moses 1 alikkar an kwaļo̧k, en̄jake ko ilo jetōb rekajoor rejjab bōbrae kōj jān kapo. Ilo m̧ool, juon iaan aujiid ko an Setan ej n̄an kapo kōj n̄an pere en̄jake ko ak ta eo jaar ekkatak jāni. Ilo am̧ riit kōn uwaak eo an Moses n̄an Setan ilo eoon 12–26, ta eo kwoj ekkatak me emaron̄ jipan̄ eok m̧ool wōt n̄an naan in kam̧ool eo kwaar bōke? Ta eo ejipan̄ eok jum̧ae kapo ko jet an Setan? (lale, n̄an waanjon̄ak, eoon 15 im 18).

Pedped ioon ta eo kwoj ekktatak, komaron̄ kōm̧m̧ane juon karōk n̄an jum̧ae kapo. N̄an waanjon̄ak, komaron̄ kadedeļo̧k ennaan in “N̄e ij jelm̧ae kapo n̄an , Inaaj .”

Lale barāinwōt Matu 4:1–11; Hilamōn 5:12; Gary E. Stevenson, “Jab M̧oņe Eō,” Liaona, Nob. 2019, 93–96; “I Am a Son of God” (pija in alooj), ChurchofJesusChrist.org.

Moses 1:27–39; Ebream 3

Jerbal eo im aiboojoj eo an Anij ej n̄an jipan̄ eō bōk mour indeeo.

Ālkin lo visōn eo kōn kōm̧anm̧an ko an Anij, Moses ekar kōm̧m̧ane juon kajjitōk n̄an Irooj: “Ba n̄an eō … etke men kein rej āindein” (Moses 1:30). Ta eo ej im̧we eok kōn uwaak eo an Irooj ilo Moses 1:31–39?

Ebream eaar barāinwōt wōr juon an en̄jake ilo visōn, kar ļo̧o̧ke ilo Ebream 3. Ta eo kwoj loi ilo eoon 22–26 me emaron̄ jipan̄ uwaak kajjitōk eo an Moses?

Ļōmņak in kōllaajrak m̧ool ko jet me Moses im Ebream raar ekkatak ilo visōn ko aer: m̧ool ko kōn Anij, kōn erro make, im kōn jibadbad ko an kōm̧anm̧an ko an Anij. Ekōjkan an m̧ool kein jelet wāween am̧ kalimjōk eok make im laļ eo ipeļaakūm̧?

Lale barāinwōt Dieter F. Uchtdorf, “You Matter to Him,” Liahona, Nob. 2011, 19–22; Gospel Topics, “Premortality,” topics.ChurchofJesusChrist.org.

Ebream, 3:22–23

Ekar ke bar wōr ijjello̧kin Ebream “kar kāālet [er] m̧okta jān [aer] kar ļotak”?

“Ilo laļ eo an jetōb ilo mour eo m̧okta, Anij ekar kappeik jet jetōb ko n̄an kakūrm̧ool mijen ko rejenolo̧k ilo tōre in mour ko aer ilo mour in. Menin kar ņae etan ekkapit m̧okta. … Katak eo kōn ekkapit m̧okta ej jerbal n̄an aolep membōr ro an Kabun̄ in, ejjab wōt n̄an Rilo̧mo̧o̧r eo im rikanaan ro An” (Gospel Topics, “Foreordination,” topics.ChurchofJesusChrist.org).

Ekōjkan ad kar bōk bok ko an Moses im Ebream?

Bok in Moses ej m̧ōttan eo im̧aan tata in ukook eo eim̧we an Josep Smith kōn Baibōļ eo. Bok in Ebream kar kwaļo̧ke n̄an Josep Smith ilo tōre in jerbal eo an ippān Egyptian papyri eo. Bok kein, loi rainin ilo Bōōr eo Eļap Wōņāān, ej letok eļap meļeļe kōn Moses, Ebream, im rikanaan ro jet me jab loi ilo Kallim̧ur M̧okta. N̄an ekkatak eļapļo̧k kōn ekōjkan ad bōk bok kein, lale “Joseph Smith Translation of the Bible” (Church History Topics, ChurchofJesusChrist.org/study/history/topics) im “Translation and Historicity of the Book of Abraham” (Gospel Topics, topics.ChurchofJesusChrist.org).

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Moses 1:2–6; Ebream 3:11–12.Komaron̄ kajjitōk ippān ro uwaan baam̧le n̄an kappukōt naan ko ilo al eo “N̄a Nejin Anij” (Al Ko Al In Ajri, 2–3) me rej iookļo̧k m̧ool ko kar katakin ilo eoon kein.

Moses 1:4, 30–39.Baam̧le eo am̧ enaaj ke lem̧ōņōņō ilo lale jet iaan “eļtan pā ko pein [Anij]”? (eoon 4). Bōlen komaron̄ riiti eoon kein ilo juon baak ak ium̧win iju ko ilo bon̄. Innām komaron̄ kōnono kōn etke Anij ekar kōm̧anm̧an laļ im kōn ekōjkan ad bōk koņaad ilo “jerbal im [An] aiboobjoj” (eoon 39).

Moses 1:18.Ta kapilōk eo jemaron̄ kwaļo̧ke n̄an jipan̄ ro jet “ekajet ikōtaan” Anij im Setan? (Lale barāinwōt Moronai 7:12–18; Katak im Bujen Ko 50:23–24.)

Ebream 3:24–26.Komaron̄ leļo̧k n̄an ro uwaan baam̧le eo juon jerbal ekam̧ōņōņō bōtaab epen me ej kōm̧m̧an bwe ren kam̧ool remaron̄ ļoor naan in kōmeļeļe ko, ko āinwōt nukuj juon baļuun peba ak ļoor juon iiōk. Ekōjkan an m̧akūtkūt in āinļo̧k wōt jibadbad eo an mour wabanban in ad āinwōt kar kōmeļeļeik ilo eoon kein?

N̄an ļōmņak ko rellōn̄ļo̧k kōn katakin ajri, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote “N̄a Nejin Anij,” Al Ko Al In Ajri, 2–3.

Kōkōm̧anm̧anļo̧k Am̧ Ekkatak Ippam̧ Make

Kappukot m̧ool ko an gospel eo. Ilo jeje ko rekwojarjar, jet iien m̧ool ko an gospel eo rej kajju aer kwaļo̧k; jet iien ejjab kajju ilo aer kōjerbal juon waanjon̄ak ak bwebwenato. Kajjitikin eok make, “Ta m̧ool eo indeeo ej katakin ilo eoon kein?”

Moses ej Anjo̧ Ioon Setan, jān Joseph Brickey