Jānwōde 3–9

Jenesis 1–2; Moses 2–3; Ebream 4–5

“Ilo Jinoin Anij Ear Kōm̧anm̧an Lan̄ im Laļ”

Men̄e jekdo̧o̧n eļan̄n̄e kwar riiti Kōm̧anm̧an eo m̧okta, aolep iien eļap wōt ijo n̄an ekkatak jān jeje ko rekwojarjar. Jar kōn tōl jān Jetōb Kwojarjar eo n̄an jipan̄ eok elolo meļeļe kāāl.

Je En̄jake ko Rej Im̧we Eok

Kōnke laļ eo ipeļaakid ej kanooj in aiboojoj im em̧m̧an, epen n̄an pijaikļo̧k laļ in ke ekar “ejjeļo̧k wāween, im ejjeļo̧k kobban,” “ejjeļo̧k kobban im ajjimake” (Jenesis 1:2; Ebream 4:2). Juon men bwebwenato in Kōm̧anm̧an eo ej katakin kōj ej bwe Anij emaron̄ kōm̧m̧ane juon men ekabwilōn̄lōn̄ jān juon men eo ejjeļo̧k wāween. Ejipan̄ n̄an keememej āinwōt n̄e mour etarpok. Jemedwōj Ilan̄ im Jisōs Kraist rej Rikōm̧anm̧an ro, im jerbal eo eaiboojoj Aer ippād ejjan̄in dedeļo̧k. Remaron̄ kōm̧m̧an bwe meram en romaak ilo iien ko remarok ilo mour ko ad. Remaron̄ kōm̧m̧an bwe jen lo ineem̧m̧an ilo ioļapļap in lan̄ ko an mour. Remaron̄ jiron̄ men ko (element), im eļan̄n̄e jej pokake Aer naan āinwōt men ko (element) raar, Remaron̄ ukōt kōj n̄an menin kōm̧anm̧an ko raiboojoj jaar ļamļam wōt n̄an erom. Ej m̧ōttan ta eo ej meļeļe in n̄an kar ejaak ilo nememein Anij, ālikin jekjek eo An (lale Jenesis 1:26). Ewōr ippād kōjatdikdik eo n̄an eromļo̧k āinwōt E: armej ro rej mour ilo aiboojoj eo eutiejtata, aiboojoj, indeeo.

Kōn juon etale ekadu kōn bok in Jenesis, lale “Jenesis” ilo Bible Dictionary eo.

Ļōm̧ņak ko n̄an Ekkatak Jeje Ko Rekwojarjar Ippam̧ Make

Jenesis 1:1–25; Moses 2:1–25; Ebream 4:1–25

Ium̧win tōl eo an Jemedwōj Ilan̄, Jisōs Kraist ekar kōm̧anm̧an laļ in.

Elder D. Todd Christofferson ekar ba, “Jabdewōt tipdik in meļeļe ko kōn jekjek eo an kōm̧anm̧an eo, jejeļā bwe ke ekar jab jide ak bwe ekar tōl jān Anij Jemen im kar jerbale jān Jisōs Kraist” (“Etke Jej M̧are, Etke Jej Baam̧le,” Kweilo̧k eo Eļap, Māe 2015, 51). Ilo an ļap wōt ijo jejjab jeļā kōn lukkuun ekōjkan an laļ in kar ejaak, kōļmenļo̧kjeņ kōn ta eo kwoj ekkatak kōn Kōm̧anm̧an eo jān ta eo Anij ekar kwaļo̧ke ilo Jenesis 1:1–25; Moses 2:1–25; im Ebream 4:1–25. Ta eo kwoj kile ilo bwebwenato kein me reier wōt juon? Ta eo kwoj kile bwe ej oktak? Ta ļōmņak ko ewōr ippam̧ kōn Jemedwōj Ilan̄ im Jisōs Kraist ilo am̧ riit kōn Kōm̧anm̧an eo?

Lale barāinwōt Katak im Bujen Ko 101:32–34.

Kōm̧anm̧an eo, jān Joan Hibbert Durtschi

Jenesis 1:27–28; 2:18–25; Moses 3:18, 21–25; Ebream 5:14–19

M̧are eo ikōtaan juon em̧m̧aan im juon kōrā ej ekkapit jān Anij.

“Adam im Iv raar koba ippān doon ilo m̧are n̄an iien im aolep indeeo kōn kajoor [eo] an priesthood indeeo” (Russell M. Nelson, “Lessons from Eve,” Ensign, Nob. 1987, 87). Etke m̧ool in ej aorōk n̄an jeļā? Kejekļo̧kjeņ kōn menin ilo am̧ riiti Jenesis 1:27–28; 2:18–25; Moses 3:18, 21–25; im Ebream 5:14–19. Eļan̄n̄e kwoj kōņaan ekkatak eļapļo̧k kōn m̧are ilo karōk eo an Anij, riiti im kejekļo̧kjeņ kōn kein jipan̄ ko rej ellaajrak itulaļ. Ta eo kein jipan̄ kein rej im̧we eok n̄an kōm̧m̧ane n̄an kōkōm̧anm̧anļo̧k m̧are eo am̧ ak n̄an m̧aanjabpopo n̄an m̧are ilo ilju im jekļaj?

Lale barāinwōt Matu 19:4–6; 1 Korint 11:11; Linda K. Burton, “Jenaaj Wanlōn̄ļo̧k Ippān Doon,” Kweilo̧k eo Eļap, Māe 2015, 29–32; “Baam̧le Eo: Juon Naan in Kean̄ n̄an Laļ in,” ChurchofJesusChrist.org.

Jenesis 2:2–3; Moses 3:2–3; Ebream 5:2–3

Anij ekar kōjeraam̧m̧an im kōkwojarjar raan in Jabōt.

Anij ekar kōm̧m̧an bwe raan in Jabōt en ekwojarjar, im E ej kajjitōk ippād n̄an kōkwojarjarje. Elder David A. Bednar ekar katakin, “Jabōt ej iien eo an Anij, juon iien ekwojarjar kōjeno̧lo̧ke eļaptata n̄an kabun̄-jar n̄an E im n̄an bōk im keememej kallim̧ur ko An reļļap im aorōk” (“Kallim̧ur ko Reļļaptata im Aorōk,” Liaona, Nob. 2017, 92). Ekōjkan am̧ maron̄ kōjerbal ennaan in im Jenesis 2:2–3; Moses 3:2–3; ak Ebream 5:2–3 n̄an kōmeļeļeik juon armej etke kwoj kāālet n̄an kauteij raan in Jabōt? Ekōjkan an Irooj kar kōjeraam̧m̧an eok kōn kōjparok raan eo An ekwojarjar?

Lale barāinwōt Aiseia 58:13–14; Katak im Bujen Ko 59:9–13; “The Sabbath Is a Delight” (video), ChurchofJesusChrist.org.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jenesis 1:1–25; Moses 2:1–25; Ebream 4:1–25.Ekōjkan am̧ maron̄ kōm̧m̧an bwe ekkatak kōn Kōm̧anm̧an eo en kam̧ōņōņō n̄an baam̧le eo am̧? Komaron̄ bōk baam̧le eo am̧ n̄an juon iien kappok ilo nam̧ōj n̄an ajri ro kōn kain men ko me kar kōm̧m̧ani ilo kajjojo iien ko an bwebwenato eo an Kōm̧anm̧an eo, ko āinwōt iju ko, wōjke ko, ak menin mour ko. Komaron̄ barāinwōt kwaļo̧k pija ko kōn men ko kar kōm̧anm̧ani ilo kajjojo iien ko im kajjijtōk ippān ro uwaan baam̧le eo n̄an likūt pija ko ilo ellaajrak eo ālkin riiti juon iaan bwebwenato ko an Kōm̧anm̧an eo ippān doon. Ta eo kōm̧anm̧an kein rej katakin kōj kōn Jemedwōj Ilan̄ im Jisōs Kraist?

Jenesis 1; Moses 2; Ebream 4.Juon wāween n̄an kepaak bwebwenato eo an Kōm̧anm̧an eo ej n̄an kajjitōk ippān baam̧le eo am̧ n̄an kappukōt ewōr jete alen ilo Jenesis 1 ak Moses 2 Anij ekar ba kōn men ko me ekar kōm̧m̧ani “em̧m̧an.” Ta eo elmakot in kōn ekōjkan ad aikuj in kōm̧m̧an n̄an menin kōm̧anm̧an ko an Anij—ekoba kōj make? Ta eo jej ekkatak jān wāween eo iien kein raar likūt ilo naan ilo Ebream 4?

Jenesis 1:26–27; Moses 2:26–27; Ebream 4:26–27.Etke ej aorōk n̄an jeļā bwe jaar kōm̧anm̧an ilo nememe eo an Anij? Ekōjkan an jelet wāween eo jej en̄jake kōj make, ro jet, im Anij?

Eļan̄n̄e ewōr nejūm̧ ajri ro reddik, komaron̄ kōņaan riiti ippān doon Moses 2:27 im ikkure juon ikkure epidodo: Kwaļo̧k juon pija me ej kwaļo̧k kōn Jemedwōj Ilan̄ im Jisōs Kraist pija 90 ilo Bok In Gospel Pija (2009), im kajjitōk ippān ro uwaan baam̧le eo n̄an bōk koņaer jitōn̄ļo̧k juon m̧ōttan ānbwinin Jemedwōj Ilan̄ im Jisōs Kraist. Innām ro jet uwaan baam̧le eo remaron̄ jitōn̄ļo̧k ejja m̧ōtta eo wōt ilo ānbwin ko aer.

Jenesis 1:28; Moses 2:28; Ebream 4:28.“kien eo an Anij ej bwe ajri ro Nejin ren timo̧o̧n im wōrļok ioon laļ ejjan̄in oktak” (“Baam̧le Eo Juon Naan in Kean̄ n̄an Laļ in,” ChurchofJesusChrist.org). Ro uwaan baam̧le eo remaron̄ juon ikkure in waanjon̄ak kōn ekōjkan kōmeļeļeik tōmak ko ad ilo tukadu in kōn kien in n̄an ro me rejjab jeļā m̧ool in ak ro eoktak aer tōmak.

Jenesis 1:28; Moses 2:28; Ebream 4:28.Ta meļeļe in n̄an “irooj ioon … aolep menin mour me rej em̧akūtkūt ioon laļ”? (lale barāinwōt Katak im Bujen Ko 59:16–21). Ekōjkan an baam̧le eo ad kakūrm̧ool eddo eo ad n̄an kōjparok laļ in?

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote “My Heavenly Father Loves Me,” Children’s Songbook, 228–29.

Kōkōm̧anm̧anļo̧k Ad Katakin

Kōjerbal jeje ko rekwojarjar n̄an mour ko ad. Ālkin riiti juon eoon in jeje ko rekwojarjar, kajjitōk ippān ro uwaan baam̧le eo n̄an kōjerbale n̄an mour ko aer. N̄an waanjon̄ak, ekōjkan an Moses 3:1–3 jerbal n̄an ad kōjparok Jabōt kajjojo wiik? (Lale Teaching in the Savior’s Way, 21.)

Kōm̧anm̧an Eo, jān Annie Henrie Nader