“Jānwōde 3–9. Jenesis 1–2; Moses 2–3; Ebream 4–5: “Ilo Jinoin Anij ekar Kōm̧anm̧an Lan̄ im Laļ,’” Itok, Ļoor Eō—N̄an Būraimere: Kallim̧ur Ekāāl 2022 (2021)
“Jānwōde 3–9. Jenesis 1–2; Moses 2–3; Ebream 4–5,” Itok, Ļoor Eō—N̄an Būraimere: 2022
Jānwōde 3–9
Jenesis 1–2; Moses 2–3; Ebream 4–5
“Ilo Jinoin Anij ekar Kōm̧anm̧an Lan̄ im Laļ”
Ilo am̧ ekkatak Jenesis 1–2, Moses 2–3, im Ebream 4–5, ļōmņak kōn ajri ro kwoj katakin er, im kejōkļo̧kjeņ kōn m̧ool ko kwomaron̄ jipan̄ er meļeļe kōn jebta kein.
Je En̄jake ko Rej Im̧we Eok
Kajjitōk bwe ren Kwaļo̧k
Kajjitōk ippān ajri ro n̄an kwaļo̧k juon men me Jemedwōj Ilan̄ im Jisōs Kraist rekar kōkm̧anm̧ane me rej kam̧m̧oolol kake. Kwaļo̧k pija ko jān unin tōl eo an wiik in ilo Itok, Ļoor Eō—N̄an Kajjojo Armej im Baam̧le Ko me emaron̄ leļo̧k n̄an er meļeļe ko.
Katakin Katak eo: Ajri ro Reddikļo̧k
Jisōs ekar kōm̧anm̧an laļ.
Jeļā kōn kōm̧anm̧an eo emaron̄ jipan̄ ajri ro en̄jake iakwe eo an Anij im kōļapļo̧k kam̧m̧oolol kōn laļ in. Ekōjkan am̧ maron̄ kōm̧m̧an bwe ekkatak kōn kōm̧anm̧an eo en im̧we?
M̧akūtkūt ko Maron̄ Kōm̧m̧ani
-
Kwaļo̧k n̄an ajri ro pija in men ko me rej bōk jikin iien ko rokkotaktak kōn Kōm̧anm̧an Eo (āinwōt kōmeļeļeiki ilo Moses 2; lale barāinwōt “Jesus Christ Creates the Earth,” ilo Old Testament Stories), im jipan̄ ajri ro ļōmņak kōn jet iaan wāween ko me rej m̧ōttanļo̧k pija ko. N̄an waanjon̄ak, remaron̄ kōm̧m̧an juon dukwaļ n̄an bōk jikin āne emōrā ak kōjaļaaļļe peier āinwōt ņo̧ ko ioon dān (lale Moses 2:9–10). Kwaļo̧k naan in kam̧ool eo am̧ bwe jej aolep ajri ro nejin Anij im bwe E ejeļā im ej iakwe kōj.
-
Al juon al kōn men ko Jisōs Kraist ekar kōm̧anm̧ane n̄an kōj, āinwōt “The World Is So Lovely” (Children’s Songbook, 233). Kajjitōk ippān ajri ro n̄an jin̄aik pija in kōm̧anm̧an ko kar kōmeļeļeik ilo al eo.
PijaBūļan̄kōj quilt ej kwaļo̧k okoktak in iien kōm̧anm̧an eoKōm̧anm̧an Eo, jān Joan Hibbert Durtschi
Kar kōm̧anm̧an eō ilo nemāmein Anij.
N̄e ajri ro rej meļeļe bwe kar kōm̧anm̧an er ilo nemāmein Anij, remaron̄ ejaake juon en̄jake in kea im kautiej kōn ānbwinnier make im ānbwinnin ro jet.
M̧akūtkūt ko Maron̄ Kōm̧m̧ani
-
Jipan̄ ajri ro āliji “N̄a, Anij, Iaar kōm̧anm̧an armej ilo Nemāmeō” jejjo alen (Moses 2:27). Kōmeļeļeik er bwe Jemedwōj Ilan̄ eaar kōm̧anm̧an ānbwinnid bwe en āinwōt Ānbwinnin. Kajjitōk ippān ajri ro n̄an jitōn̄ m̧ōttan ko ilo ānbwinnier ilo am̧ ba etaer, ak al juon al kōn ānbwinnid, āinwōt “Bōra, Aira, Bukiū, Addiin Neeō” (Children’s Songbook, 275).
-
Kajjitōk ippān ajri ro n̄an kōm̧m̧an arin jet men ko me remaron̄ kōm̧m̧ane n̄an ānbwinnier, ilo an ajri ro jet kajidede im ba ta eo rej kōm̧m̧ane. Kajjitōk ippān ajri ro n̄an kwaļo̧k etke rej kam̧m̧oolol kōn ānbwinnier.
-
Jin̄aik juon pija in ānbwin ioon juon peba, im kōm̧m̧an bajōļ ilo am̧ m̧wijit n̄an m̧ōttan ko reddik. Ajije m̧ōttan ko n̄an kūlaaj eo, im kōtļo̧k bwe ajri ro ren jerbal ippān doon n̄an kobaik m̧ōttan ko ippān doon n̄an ejaake juon ānbwin. Kajjitōk ippān ajri ro kwaļo̧k men ko remaron̄ kōm̧m̧ani n̄an kajjojo m̧ōttan ko. Kwaļo̧k am̧ naan in kam̧ool bwe ānbwinnid kar kōm̧anm̧an ilo nemāmein wōt Anij.
Raan in Jabōt Ekwojarjar.
Ajri ro ro rej ejaake juon imminene in kōjparok raan in Jabōt im kokwojarjare n̄e rej dik wōt eļapļo̧k aer nej kōjparok kien in n̄e enej ļapļo̧k aer boub im eļapļo̧k apan̄ ko ilo mour in.
M̧akūtkūt ko Maron̄ Kōm̧m̧ani
-
Riiti Moses 3:2–3, im kajjitōk ippān Ajri ro n̄an ron̄jake ta eo Anij ekar kōm̧m̧ane ilo raan eo kein kajiljilimjuon. Bōktok pija ko (ak kōm̧m̧ani jina ko repidodo) kōn men ko jej kōm̧m̧ani ilo Jabōt n̄an kōm̧m̧an bwe en juon raan ekwojarjar im en ko jej kōm̧m̧ani ilo raan ko jet. Kōtļo̧k bwe ajri ro ren kōjenoļo̧k pija ko n̄an ruo m̧ōttan ko, juon n̄an Jabōt im juon n̄an raan ko jet. Kwaļo̧k kam̧ool kōn etke eaorōk n̄an kōjparok Raan in Jabōt im kokwojarjare.
-
Jejjo raan m̧okta jān kūlaaj, karuwainene juon iaan ajri ro im eo jineer im jemāer bwe ren itok ilo aer pojak n̄an kwaļo̧k men ko me rej kōm̧m̧ani ilo baam̧le ko aer n̄an kōjparok raan in Jabōt im kokwojarjare. Karuwaineneik ajri ro jet n̄an kwaļo̧k ta eo baam̧le ko aer rej kōm̧m̧ani.
Katakin Katak eo: Ajri ro Rerūttoļo̧k
Jisōs Kraist ekar kōm̧anm̧an laļ ium̧win tōl eo an Jemedwōj Ilan̄.
Kwomaron̄ kōjerbal Moses 2 n̄an jipan̄ ajri ro lo bwe laļ in kar ejaake ilo elōn̄ unin āinwōt m̧ōttan karōk eo an Anij. Ilo am̧ riiti jebta kein, ta ļōmņak ko me rej jiktok ilo kōļmenļo̧kjeņ eo am̧ me emaron̄ jipan̄ kōkajoorļo̧k naan in kam̧ool eo an ajri ro kōn Kōm̧anm̧an Eo?
M̧akūtkūt ko Maron̄ Kōm̧m̧ani
-
Jipan̄ ajri ro ļōmņak kōn iien ko ke raar kōm̧m̧ane juon men ilo aer kar ļoor tōl an bar juon armej. N̄an waanjon̄ak, bōlen rekar kōm̧m̧an juon wāween iiek ippān juon jinen ak jemān ajri ro ak eo jein ak jatin im ej lale er. Je Wōn eo ekar kōm̧anm̧an laļ in? ioon bo̧o̧t eo, im kajjitōk ippān ajri ro n̄an kappukot uwaak eo ilo Moses 2:1. Kam̧ool bwe Jisōs Kraist ekar kōm̧anm̧an laļ in ium̧win tōl eo an Jemedwōj Ilan̄.
-
Leļo̧k n̄an kajjojo ajri eoon ko ilo Moses 2 me rej iookļo̧k juon iaan raan in kōm̧anm̧an eo, im kajjitōk ippān ajri eo n̄an jin̄aik juon pija in men ko Jemedwōj Ilan̄ im Jisōs Kraist rekar kōm̧anm̧an ilo raan eo. Kajjitōk ippān ajri ro n̄an jibwe pija ko aer im jutak ilo laajrak eo ejim̧we kōn raan in Kōm̧anm̧an eo, innem kajjitōk ippān kajjojo ajri n̄an katakin aolepān ajri ro ta eo ekar waļo̧k ilo raan ko me kar leļo̧k bwe ren kōmeļeļe kake. Ta eo jej ekkatak kōn Jemedwōj Ilan̄ im Jisōs Kraist jān bwebwenato in Kōm̧anm̧an eo?
Adam im Iv kar kōm̧anm̧an er ilo nememein wōt Anij.
Laļ in enaaj leļo̧k n̄an ajri ro elōn̄ ennaan ko reriab kōn ānbwinnier. Katak eo ilo Moses 2:26–27 ej juon im̧we ekajoor n̄an kautiej im kea kōn ānbwinnid.
M̧akūtkūt ko Maron̄ Kōm̧m̧ani
-
Riit ippān doon Moses 2:26–27. Ta eo eoon kein rej katakin kōj kōn ānbwinnid? Kwaļo̧k pija in alooj eo “God’s Greatest Creation” (ChurchofJesusChrist.org), ak ikkure juon ikkure “Your Body Is a Temple” (Friend, Aug. 2019, 24–25). Kwomaron̄ barāinwōt riit ippān doon kout ko me rej iookļo̧k jān ennaan eo an Būreejtōn Russell M. Nelson “Your Body: A Magnificent Gift to Cherish” (New Era, Aug. 2019, 2–7) me enaaj jipan̄ ajri ro en̄jake kam̧m̧oolol n̄an Jemedwōj Ilan̄ im ānbwinnier.
-
Jina juon jekjek in ānbwin ioon bo̧o̧t eo, im kajjitōk ippān ajri ro n̄an kāālet juon m̧ōttan ānbwin im je turin ļo̧k etke jej kam̧m̧oolol kake. Kwaļo̧k kam̧m̧oolol kōn ānbwinnūm̧, im kwaļo̧k am̧ kam̧ool bwe kar kōm̧anm̧an kōj ilo nememein wōt Anij.
Raan in Jabōt ekwojarjar.
Ajri ro remaron̄ kar kōmeļeļeik n̄an ro m̧ōttaer etke eoktak aer kōm̧m̧an n̄an Raan in Jabōt jān raan ko jet. Jenesis 2:2–3 ej katakin etke raan in Jabōt ej juon raan ekwojarjar. Ta eo kwomaron̄ kōm̧m̧ane n̄an jipan̄ ajri ro jet meļeļe im mour kōn katak in?
M̧akūtkūt ko Maron̄ Kōm̧m̧ani
-
Ekōjkan ilo ad kokwojajar raan in Jabōt kwaļo̧k ad iakwe im kautiej n̄an Jemedwōj Ilan̄ im Jisōs Kraist? Jipan̄ ajri ro kōm̧m̧an tieta kōn jekjek ko ilo aer kōmeļeļeik n̄an juon m̧ōttaer etke rej kāālet n̄an kōm̧m̧an men ko ilo Jabōt me ej kautiej Jemedwōj Ilan̄ im Jisōs. Leļo̧k ļōmņak n̄an kōjerbal Jenesis 2:2–3 ilo kōmeļeļe ko aer.
-
Leļo̧k n̄an ajri ro juon minit n̄an je juon laajrak in jon̄an lōn̄in men ko remaron̄ ļōmņak kaki me remaron̄ kōm̧m̧ani n̄an kōm̧m̧an bwe raan in Jabōt en juon raan ekwojarjar. Kajjitōk ippān ajri ro n̄an kwaļo̧k laajrak ko aer, im kōketak er n̄an kobaik laajrak ko āinwōt an ro jet ļōmņak ko jet me ekar jab jiktok ilo kōļmenļo̧kjeņ eo aer. Leļo̧k ļōmņak in bwe ajri ro n̄an bōk kōlaajrak eo im bar lali n̄e rej aikuj aitia ko kōn men ko rem̧m̧an remaron̄ kōm̧m̧ani ilo raan in Jabōt.
Kōketak Ekkatak ilo M̧weo
Jipan̄ ajri ro ļōmņake men ko remaron̄ kōm̧m̧ani ippān baam̧le ko aer āinwōt ļo̧kn̄an jipan̄ kōkajoorļo̧k tōmak eo aer ilo Jisōs Kraist eddōk. Ikōņaan jipan̄ er; ejjan̄in lōn̄ aō iien.
Kōkōm̧anm̧anļo̧k Ad Katakin
Kōm̧m̧an bwe ajri ro ren kōm̧m̧ani jekjek ko aer rejej uwaer. Ajri ro remaron̄ ekkal, jin̄n̄a, ak kōļare men eo ej iookļo̧k bwebwenato eo ak pedped in katak eo rej ekkatak, emakijkij an em̧m̧anļo̧k aer ekkatak. Kōketak er n̄an kōjerbal aer make kōl ak kōm̧m̧an n̄an katakin baam̧le ko aer. (Lale Teaching in the Savior’s Way, 25.)