elōn̄ armej rej iiaio ilo iakwe

Iakwe Doon, jān Emma Donaldson Taylor

Jānwōde 24–30

Moses 7

“Irooj Ņa Etan Armej ro An Zaion”

Jino am̧ kōppopo ilo am̧ riiti Moses 7. Itok, Ļoor Eō—N̄an Kajjojo Armej im Baam̧le Ko emaron̄ jipan̄ eok meļeļe kōn jebta in, im ļōmņak ko ilaļ ej lewaj n̄an eok aitia ko kōn wāween katakin kōn menin n̄an ajri ro.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Bōk jejjo minit n̄an kōtļo̧k bwe ajri ro ren bar kakeememej ippam̧ ta eo rejeļā kōn rikanaan Enoch—ekoba jabdewōt men ko rekar ekkatak ilo katak eo an wiik eo ļo̧k. Eļan̄n̄e elukkuun jipan̄, kwaļo̧k juon pija jān unin tōl eo an wiik in ilo Itok, Ļoor Eō—N̄an Kajjojo Armej im Baam̧le Ko.

pija ej bōk jikin katakin

Katakin Katak eo: Ajri ro Reddikļo̧k

Moses 7:18

Anij ekōņaan bwe jen iakwe doon.

Eoon kein rej kōmeļeļeik m̧wil ko an armej ro ilo Zaion? Ekōjkan am̧ maron̄ jipan̄ ajri ro jino kōļapļo̧k m̧wil kein?

M̧akūtkūt ko Maron̄ Kōm̧m̧ani

• Kwaļo̧k bwebwenatoon armej ro an Enoch jān “Enoch the Prophet” (ilo Old Testament Stories), ak kōtļo̧k bwe ajri ro ren ba bwebwenato ko ilo naan ko aer make ilo aer kōjerbal pija eo an Enoch ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le Ko Kwomaron̄ barāinwōt al ippān ajri ro eoon eo kein karuo ilo “Follow the Prophet” (Children’s Songbook, 110–11) n̄an bar kakeememej bwebwenato eo.

• Jipan̄ ajri ro ļōmņak kōn kōm̧m̧an ko rej iookļo̧k naan eo “juon wōt ilo bōro im juon wōt ilo ļōmņak” (Moses 7:18). Kōmeļeļeik bwe naan in meļeļein bwe armej ro an Enoch rekar iakwe doon im jouj n̄an doon. Kajjitōk ippāer n̄an kōjerbal peij in m̧akūtkūt eo ilo wiik in n̄an jin̄n̄aik juon wāween remaron̄ kwaļo̧k iakwe.

• Al juon al kōn iakwe doon, āinwōt “Love at Home” (Hymns, no. 294). Bōktok pija ko me rej kwaļo̧k naan ko raorōk ilo al eo n̄an jipan̄ ajri ro ekkatak naan ko. Kajjitōk ippān ajri ro n̄an kwaļo̧k wāween ko remaron̄ kwaļo̧k iakwe n̄an ro jet ilo Būraimere im ilo m̧ōko m̧weer. Innem kōtļo̧k bwe ren kōm̧m̧an ekkar n̄an aitia ko aer.

leddik eo ej jeere leen wōjke eo ippān kōrā eo erūtto

Jej aikuj kajjeon̄ erom̧ “juon wōt ilo bōro im juon wōt ilo ļōmņak” (Moses 7:18).

Moses 7:28–33

Anij ej kea kōn ajri ro Nejin.

Kwomaron̄ jipan̄ ajri ro ekkatak bwe Jemedwōj Ilan̄ im Jisōs Kraist rej lukkuun kea kōn kōj im kōm̧m̧an ko ad.

M̧akūtkūt ko Maron̄ Kōm̧m̧ani

• Jipan̄ ajri ro ļōmņak kōn men ko me rej kam̧ōņōņōik Jemedwōj Ilan̄. Riiti Moses 7:28 ippān ajri ro, im kōmeļeļeik bwe Jemedwōj Ilan̄ ekar burom̧ōj kōnke armej ro rekar jerawiwi (lale eoon ko 32–33).

• Kajjitōk ippān ajri ro n̄an jin̄n̄aik juon mejān lem̧ōņōņō ilo rājetin pepa eo im juon mejān buromōj ilo rājet eo juon ilo ejja pepa eo wōt. Ba etan jet iaan kōm̧m̧an ko rem̧m̧an, āinwōt jar, im jet men ko renana, āinwōt riab, im kajjitōk ippān ajri ro n̄an kwaļo̧k mejān m̧ōņōņō ak mejān burom̧ōj n̄an kwaļo̧k wāween an Jemedwōj Ilan̄ im Jisōs Kraist naaj en̄jake kōn kajjojo jokāālet ko.

• Kajjitōk ippān ajri ro n̄an ikkure juon ikkure eo me rej kōm̧m̧ane arin men ko rej kōm̧m̧ani n̄an kam̧ōņōņōik Jemedwōj Ilan̄. Kajjitōk ippān ro jet n̄an kajidede ba ta eo rej kōm̧m̧ane. Kwaļo̧k n̄an kajjojo iaan ajri ro juon me em̧ōj am̧ loe aer kōm̧m̧an me ej kam̧ōņōņōik Jemedwōj Ilan̄.

Moses 7:59–67

Jisōs enaaj bar itok n̄an laļ in.

Ilo visōn eo an, Enoch ekar lo raan ko āliktata, ekoba Itok eo Kein Karuo an Rilo̧mo̧o̧r. Elmen am maron̄ jipan̄ ajri ro reim̧aanļo̧k n̄an Itok eo Kein Karuo?

M̧akūtkūt ko Maron̄ Kōm̧m̧ani

• Ba n̄an ajri ro n̄an pijaikļo̧k juon rilotok eo me eaorōk ej itok n̄an lotok er. Ta eo renaaj kōm̧m̧ane n̄an kōppopo n̄an lotok eo An? Kwaļo̧k naan ko an Irooj n̄an Enoch ilo Moses 7:60: “I [naaj] itok ilo raan ko āliktata.” Ta jet iaan wāween ko jemaron̄ kōpooji n̄an bar itok eo an Jisōs?

• Kwaļo̧k pija ko kōn iien ko n̄e Rilo̧mo̧o̧r ekar waļo̧k n̄an armej ro (lale Gospel Art Book, nos. 60, 82, 83, im 84). Ta eo armej ro rej kōm̧m̧ane ilo pija ko? Ekōjkan an armej ro maron̄ kar en̄jake ke rekar ioon Jisōs? Kōtļo̧k bwe ajri ro ren kwaļo̧k aer en̄jake kōn aer nej ioon Jisōs n̄e Ej bar itok juon alen.

• Al juon al kōn Itok eo Kein Karuo an Rilo̧mo̧o̧r, āinwōt “When He Comes Again” (Children’s Songbook, 82–83), and ask the children what they think it will be like when Jesus comes again.

pija ej bōk jikin katakin

Katakin Katak eo: Ajri ro Rerūttoļo̧k

Moses 7:18–21, 62–63, 68–69

Jemaron̄ erom̧ juon wōt āinwōt kar armej ro ilo Zaion.

Ilo am̧ riit kōn Zaion, kejakļo̧kjeņ kōn waanjon̄ak ko kōn bōro kuk me em̧ōj am̧ kar loe. Ekōjkan am̧ maron̄ jipan̄ ajri ro ekkatak n̄an erom̧ juon wōt āinwōt kar armej ro an Enoch?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kappukot naan ko me rej kōmeļeļeik armej ro an Enoch, jebar jeļā kake āinwōt Zaion, ilo aer riiti Moses 7:18. Je naan kein āinwōt taitōļ ko ilōn̄ tata ioon bo̧o̧t eo, im kajjitōk ippān ajri ro n̄an je, ium̧win kajjojo taitōļ, men ko remaron̄ kōm̧m̧ani n̄an erom̧ eļapļo̧k āinwōt armej ro an Enoch. Ālkin aer kwaļo̧k, kajjitōk ippān ajri ro ekōjkan aer maron̄ kōm̧m̧an bwe m̧ōko m̧weer en ļapļo̧k an āinwōt Zaion. Remaron̄ lo jet aitia ko ilo 4 Nipai 1:15–18.

• Kajjitōk ippān ajri ro n̄an bwini elōn̄ kōttan naan eo “Zaion” ej waļo̧k ilo Moses 7:18–21, 62–63, 68–69. Kajjojo iien naan in ej waļo̧k, jipan̄ ajri ro pukot ta eo eoon in ej ba kōn Zaion (lale barāinwōt Unin Tōl eo n̄an Jeje ko Rekwojarjar, “Zion,” scriptures.ChurchofJesusChrist.org). Ekōjkan ad maron̄ erom̧ eļapļo̧k āinwōt armej ro kar kōmeļeļeik er ilo eoon kein?

• Kōjerbal peij in m̧akūtkūt in ilo wiik in n̄an jipan̄ ļōmņak kōn wāween ko remaron̄ erom̧ “juon wōt ilo bōro im juon wōt ilo ļōmņak” (lale Moses 7:18).

Moses 7:28–37

Anij ej dānin kōmjaļaaļ kōn ajri ro Nejin.

Ekōjkan am̧ maron̄ jipan̄ ajri ro lo bwe Anij ej kea kōn kōj im kōn kōm̧m̧an ko ad?

M̧akūtkūt ko Maron̄ Kōm̧m̧ani

• Kajjitōk ippān ajri ro ta eo emaron̄ kōm̧m̧an bwe Anij en dān in kōmjaļaaļ (lale Moses 7:28–31). Kajjitōk ippān ajri ro n̄an kappukot ilo Moses 7:32–33, 37 uwaak ko. Ta eo eoon kein rej katakin kōj kōn wāween an Anij en̄jake kōn ajri ro Nejin? Ekōjkan ad jeļā bwe Anij ej iakwe kōj? Kwaļo̧k naan in kam̧ool eo am̧ kōn iakwe eo an Anij n̄an kōj.

• Joļo̧k juon pāāk in biin ak juon bo̧o̧l n̄an juon ajri. Kajjitōk ippān n̄an kadedeikļo̧k naan in “Imaron̄ kam̧ōņōņōik Anij ilo aō …” innem joļo̧k pāāk in biin eo ak bo̧o̧l eo n̄an bar juon arji. Āliji m̧ae kajjojo ajri rej bōk koņaer.

Moses 7:60–67

Jisōs Kraist enaaj bar itok ilo raan ko āliktata.

Ilo am̧ riiti kōn Itok eo Kein Karuo ilo Moses 7:60–67, ļōmņak kōn wāween n̄an katakin ajri ro kake ilo juon wāween eo ekam̧ōņōņō.

M̧akūtkūt ko Maron̄ Kōm̧m̧ani

• Riiti ippān doon Moses 7:60–67, im jipan̄ ajri ro n̄an pukot men ko Irooj ej ba enaaj waļo̧k ilo raan ko āliktata. Kajjitōk ippāer ewi wōt m̧akūtkūt ko rej erreim̧aanļo̧k n̄ani im etke.

• Kajjitōk ippān ajri ro n̄an kōnono kōn juon iien ke rekar kōttar juon armej n̄an loļo̧k ak jepļaak n̄an kapijuknen. Ekōjkan an kar ajri ro en̄jake? Ta eo jekar kōm̧m̧an n̄an kōppopo? Ekōjkan ad maron̄ kōppopo n̄an ioon Jisōs bar juon alen?

• Kwaļo̧k juon pija in Itok eo Kein Karuo an Rilo̧mo̧o̧r (n̄an waanjon̄ak, lale Gospel Art Book, no. 66). Kōtļo̧k bwe ajri ro ren jin̄n̄aik pija ko aer make kōn Itok eo Kein Karuo, pedped wōt ioon ta eo rej riiti ilo Moses 7:60–67.

pija ej bōk jikin ekkatak

Kōketak Ekkatak ilo M̧weo

Ewi wāween am̧ kōketak ajri ro im ro jineer im jemeer n̄an ekkatak wōt jān Kallim̧ur M̧okta ilo m̧ōko? N̄an waanjon̄ak, ajri ro remaron̄ kwaļo̧k juon men rekar jin̄n̄aiki ak kōļare ilo Būraimere āinwōt m̧ōttanļo̧k juon katak in nokon in jota.

Kōkm̧anm̧anļo̧k Ad Katakin

Jipan̄ Ajri ro bwe ren Bōk Koņaer. “Ilo am̧ katakin ajri ro, kōtļo̧k bwe ren ekkal, jin̄a, kōļar, jeje, im ejaak. Men kein reļļapļo̧k jān makūtkūt in kam̧ōņōņō ko—raorōk n̄an ekkatak” (Teaching in the Savior’s Way,25).

peij im m̧akūtkūt eo: Irooj ekōņaan bwe jen iakwe doon