Noa, baam̧le eo an, menin mour ko, wa eo, im juon iia

Kōmeļeļe eo kōn Noa ej etal jān wa eo, jān Sam Lawlor

Jānwōde 31–Pāpode 6

Jenesis 6–11; Moses 8

“Noa Ear Lo Jouj Im̧aan Mejān Irooj”

Ekkatak kōn menin mour ilo wa eo waan Noa im Tawōr aitoktok ilo Bebel emaron̄ limo n̄an ajri ro. Ak keememej bwe bwebwenato kein rej n̄an katakin m̧ool ko an indeeo. Jar im ļōmņak kōn m̧ool ko Anij ekōņaan bwe ajri ro ren ekkatak.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

M̧okta jān am̧ jino katakin bwebwenato ko ilo Jenesis 6–11 im Moses 8 n̄an ajri ro, leļo̧k n̄an aer juon iien em̧m̧an n̄an katakin doon ta eo rejeļā kōn Noa im wa eo wa eo ak Tawōr Bebel.

pija ej bōk jikin katakin

Katakin Katak eo: Ajri ro Reddikļo̧k

Jenesis 6:14–22; 7–8; Moses 8:16–30

Ļoor rikanaan eo enaaj kōjeraam̧m̧an eō im baam̧le eo aō.

Ilo an ajri ro ekkatak n̄an ļoor rikanaan eo, renaaj jeraam̧m̧an im jokņe ilo jetōb, āinwōt an baam̧le eo an Noa kar jokņe jān Ibwijleplep eo.

M̧akūtkūt ko Maron̄ Kōm̧m̧ani

• Ilo naan ko am̧ make, ba bwebwenato in Noa im wa eo (lale “Noah and His Family,” ilo Bwebwenato ko ilo Kallim̧ur M̧okta; lale barāinwōt “Follow the Prophet,” Al ko Al in Ajri, 110–11, eoon 3). Jipan̄ ajri ro n̄an kōm̧m̧an arin bwebwenato eo—n̄an waanjon̄ak, ilo aer kōtōnn̄e rej kōjerbal juon kein jerbal n̄an kalōk wa eo ak etetal āinwōt menin mour ko rej deļo̧n̄e wa eo.

• Riit ļo̧k n̄an ajri ro Moses 8:19–20, kwaļo̧k ta eo Irooj Ekar kakien Noa n̄an kōm̧m̧ane. Jipan̄ ajri ro meļeļe bwe Noa ekar juon rikanaan im bwe baam̧le eo an ekar bōk lo̧mo̧o̧r jān Ibwijleplep eo kōn rekar ļoor e. Kajjitōk ippān ajri ro eļan̄n̄e rejeļā eo wōn eo ad rikanaan rainin. Kwaļo̧k juon pija in e, im jipan̄ ajri ro āliji etan.

• Bōktok n̄an kūlaaj eo pija ko ak men ko me rej bōk jikin katakin ko an rikanaan eo rainin, āinwōt eoon ko ak juon pija in juon tampeļ. Kōtļo̧k bwe ajri ro ren kajjojo bōk koņaer kāālet juon aitōm̧ im ba ta eo rejeļā kake aitōm̧ eo. Kōmeļeļeik er ta eo aitōm̧ eo ej bōk jikin. Kōketak er n̄an jin̄n̄aik juon pija in er make rej pokake ta eo rikanaan eo ekar katakin. Kwaļo̧k am̧ naan in kam̧ool kōn kōjeraam̧m̧an kein ilo am̧ ļoor rikanaan eo.

Jenesis 9:15–16

Anij enaaj kōjparok kallim̧ur ko An n̄an kōj.

Eaorōk n̄an ajri ro n̄an jeļā bwe Anij ej kōjparok kallim̧ur ko An, eļaptata ilo aer kōppopo n̄an kōm̧m̧ani bujen ko Ippān n̄e rej peptaij.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an jin̄aiki pija in iia ko. Riiti n̄an er ilo Jenesis 9:15–16, im kajjitōk ippāer n̄an ron̄jake naan eo keememej. Kajjitōk ippāer n̄an jibwe iia ko aer n̄e rej ron̄ naan eo. Kōmeļeļeik er bwe iia ko rej kein kakeememej kōn kallim̧ur ko an Anij n̄an kōj.

• Kōnono ippān ajri ro kōn jet iaan kallim̧ur ko an Anij—n̄an waanjon̄ak, bwe jemaron̄ jepļaakļo̧k n̄an ippān Jemedwōj Ilan̄ eļan̄n̄e jej ļoor Jisōs Kraist ak bwe Anij enaaj jilkintok Jetōb Kwojarjar n̄an kaeņōm̧m̧an kōj. Kwaļo̧k am̧ naan in kam̧ool bwe Anij aolep iien ej kōjparok kallim̧ur ko An.

• Kōjerbal pija ko n̄an ba n̄an ajri ro kōn bujen ko jej kōm̧m̧ani ippān Anij, āinwōt pija ko pijaan juon ajri ej peptaij, kwojkwoj eo, im juon tampeļ (lale Gospel Art Book, nos. 104, 108, 120).

Jenesis 11:1–9

Iaļ eo wōt n̄an tōpar lan̄ ej ilo ad ļoor Jisōs Kraist.

Armej in Bebel rekar ļōmņak remaron̄ tōpar lan̄ ilo er kalōk tawōr ijjeļo̧kin aer mour kōn gospel eo an Jisōs Kraist. Ewi wāween am̧ jipan̄ ajri ro meļeļe bwe ļoor Rilo̧mo̧o̧r ej iaļ eo wōt n̄an bar jepļaak n̄an ippān Jemedwōj Ilan̄?

M̧akūtkūt ko Maron̄ Kōm̧m̧ani

• Ba bwebwenato in tawōr Bebel ilo naan ko am̧ make, ak riit bwebwenato eo ej pād ilo “The Tower of Babel” (ilo Old Testament Stories). Kōketak ajri ro n̄an jipan̄ ilo am̧ kwaļo̧k ta eo rejeļā kōn bwebwenato eo.

  kōmeļeļe eo kōn tawōr Bebel

  Kōmeļeļe kōn Tawōr Bebel, jān David Green

• Kōtļo̧k bwe ajri ro ren kalōk juon tawōr jān birōk ko ak mweik ko jet. Innem kwaļo̧k n̄an ajri ro juon pijaan Rilo̧mo̧o̧r, im kajjitōk ippāer eo wōt iaļ eo n̄an jepļaakļo̧k n̄an ippān Jemedwōj Ilan̄—kalōk juon tawōr ak ļoor Jisōs Kraist? Kajjitōk ippān ajri ro n̄an ba kōn men ko remaron̄ ļoor Rilo̧mo̧o̧r.

pija ej bōk jikin katakin

Katakin Katak eo: Ajri ro Rerūttoļo̧k

Jenesis 6:14–22; 7–8; Moses 8:16–30

Ļoor rikanaan eo enaaj kōjeraam̧m̧an eō im baam̧le eo aō.

Ajri ro rej rūttoļo̧k ilo juon laļ eobrak kōn nana, āinļo̧k jet iaan wāween n̄an laļ in iien ko an Noa. En̄jake eo an Noa emaron̄ leļo̧k n̄an er lōke bwe ren maron̄ pukot inem̧m̧an io aer ļoor rikanaan eo.

M̧akūtkūt ko Maron̄ Kōm̧m̧ani

• Jipan̄ ajri ro kāālet eoon ko jān Jenesis 6:14–22; 7–8 me remaron̄ kwaļo̧k ilo juon jin̄n̄a. Kōjerbal jin̄n̄a ko n̄an katakin er bwebwenato kōn Noa. Kajjitōk ippān ajri ro n̄an kwaļo̧k ta eo rej ekkatak jān bwebwenato in.

• Kwaļo̧k juon pija in Noa (lale Gospel Art Book, nos. 7–8) im rikanaan eo rainin. Jipan̄ ajri ro kappukot ilo Moses 8:16, 19–20, 23–24 n̄an pukot men ko me Noa ekar katakin me ritōl ro an Kabun̄ in rej wōnm̧aanļo̧k wōt im katakin rainin. Elmen ad jeraam̧m̧an n̄e jej pokake katak kein?

• Kwaļo̧k juon men eo me rikanaan eo rainin ej katakin kōj raan kein. Kajjitōk ippān ajri ro n̄an je juon men rikanaan eo ekar katakin ilo m̧ōttan pepa, im jipan̄ ajri er karōki m̧ōttan pepa ko ilo jekjekin wa eo. Ekōjkan an katak kein āinwōt wa eo me Noa ekar kalōke?

Jenesis 9:15–17

Jej aikuj keememej bujen ko ad.

N̄e jej peptaij, jej kōm̧m̧ani bujen ko ippān Anij n̄an pokake kien ko An. Ilo Jenesis 9:15–17, iia eo ej kwaļo̧k āinwōt juon kakeememej kōn bujen eo an Anij. Eoon kein remaron̄ im̧we ajri ro n̄an kappukot wāween ko n̄an kakeememej bujen ko aer ippān Anij.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro juon men ewōr ippam̧ me ej kakeememej eok kōn juon men eo eaorōk ilo mour eo am̧, āinwōt juon riin̄ in m̧are, juon pija, ak juon jōnōļ. Kajjitōk ippāer n̄an kwaļo̧k waanjon̄ak ko aer make. Riit ippān doon Jenesis 9:15–17 (lale barāinwōt Ukok eo an Josep Smith, Jenesis 9:21–25 [in the Bible appendix]). Ta eo Jemedwōj Ilan̄ ekōņaan jen ļōmņak kake n̄e jej lo juon iia?

• Kakeememej ajri ro kōn bujen ko rekar kōm̧m̧ani ke rekar peptaij im bwe rej kōkāāl kajjojo iien n̄e rej bōk kwojkwoj eo (lale Mosaia 18:8–10; Katak im Bujen Ko 20:77, 79). Kōtļo̧k bwe ajri ro ren jin̄n̄aik ak ejaake juon men n̄an kakeememej er kōn bujen ko aer.

Jenesis 11:1–9

Iaļ eo wōt n̄an tōpar lan̄ ej ilo ad ļoor Jisōs Kraist.

Ilo an armej ro raan kein maron̄ jab kajjeon̄ kalōk tawōr ko bwe ren maron̄ tōpar lan̄, elōn̄ rej kajjeon̄ kappukot aeņōm̧m̧an im m̧ōņōņō ilo aer ļoor iaļ ko ijjeļo̧kin pedped eo me Jisōs Kraist ekar ejaake. Ekōjkan am̧ maron̄ kōjerbal bwebwenato in Tawōr in Bebel n̄an katakin pedped in katak in?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k ta eo rejeļā kōn bwebwenato in Tawōr in Bebel (lale Jenesis 11:1–9). Ekkar n̄an Hilamōn 6:28, etke armej in Bebel rej kalōk tawōr eo? Etke ekkal tawōr ekar wāween eo ebōd n̄an tōpar lan̄? Ta kapilōk eo jenaaj leļo̧k n̄an armej in Bebel?

• Kajjitōk ippān ajri ro n̄an kappukot 2 Nipai 31:20–21 im Hilamōn 3:28 n̄an kappukot wāween eo ejim̧we n̄an tōpar lan̄. sKwaļo̧k naan in kam̧ool eo am̧ kōn Rilo̧mo̧o̧r Jisōs Kraist.

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an ļōmņak kōn wāween ko renaaj katakin baam̧le ko aer kōn bwebbwenato ko rekar ekkatak ilo būraimere. N̄an waanjon̄ak, remaron̄ kōjerbal pija ko rej jin̄n̄aiki ak peij in m̧akūtkūt eo an wiik in.

Kōkm̧anm̧anļo̧k Ad Katakin

Kappukot n̄an meļeļe kōn ajri ro kwoj katakin. Ilo am̧ katakin ajri ro, lukkuun ron̄jake kajjitōk ko, naan in kakobaba ko aer, im bwebwenato in pedped in katak ko me ilo lale eļap tokjeer n̄an er. Ilo am̧ jeļā men kein enaaj jipan̄ eok mije wōt aikuj ko an baam̧le eo am̧.

peij m̧akūtkūt eo: ļoor rikanaan eo enaaj kōjeraam̧m̧an eō im baam̧le eo aō