“Pāpode 21–27. Jenesis 24–27: Bujen eo Em̧ōj an Kōkāāl,” Itok, Ļoor Eō—N̄an Būraimere: Kallim̧ur M̧okta 2022 (2021)
“Pāpode 21–27. Jenesis 24–27,” Itok, Ļoor Eō—N̄an Būraimere: 2022
Kōmeļeļe eo kōn Rebekah, jān Dilleen Marsh
Pāpode 21–27
Jenesis 24–27
Bujen eo Em̧ōj an Kōkāāl
Ilo am̧ riiti Jenesis 24–27 im kōppopo n̄an katakin, ļōmņak kōn ajri ro ilo kūlaaj eo am̧. Ta eo rej aikuj ekkatak? Ewi wōt iaan m̧akūtkūt kein renaaj ļap tokjeer n̄an er? Pedped ioon aikuj ko aer, kwomaron̄ ukukōt juon iaan m̧akūtkūt ko ekoba ijin ak ko me repād ilo Itok, Ļoor Eō—N̄an Kajjojo Armej im Baam̧le Ko.
Je En̄jake ko Rej Im̧we Eok
Kajjitōk bwe ren Kwaļo̧k
Ium̧win kajjojo jea an ajri ro, likūt juon kajjitōk kōn juon m̧akūtkūt ak pedped in katak ilo Jenesis 24–27. Kajjitōk ippān ajri ro n̄an uwaake kajjitōk ko eļan̄n̄e remaron̄, ak karuwaineneik er n̄an ron̄jake uwaak ko ilo iien katak eo.
Katakin Katak eo: Ajri ro Reddikļo̧k
Imaron̄ jouj n̄an ro jet.
Rikarejaran Ebream ekar bwilōn̄ kōn jouj eo eļap me an Rebeka n̄an e ilo an kar leļo̧k aiboj ejjab wōt n̄an e ak barāinwōt n̄an kamel ko 10 nejin. Waanjon̄ak eo an emaron̄ erom̧ juon kein kakeememej n̄an ajri ro n̄an jouj aolep iien n̄an ro jet.
Juon aibōj laļ ilo Beer-sheba etto, ijo Ebream im Isaac rekar kūb aibōj laļ.
M̧akūtkūt ko Maron̄ Kōm̧m̧ani
-
Kwaļo̧j juon pija in Rebeka ilo peij in m̧akūtkūt eo an wiik in. Kwaļo̧k tipdikin meļeļe ko ilo pija eo ilo am̧ kakaduik bwebwenato eo ilo Jenesis 24:10–21, eo me Rebeka ekar kwaļo̧k an jouj n̄an karejaran Ebream. Jitōn̄ļōk bwe naan ko an im jerbal in jouj rekar juon kōkaļļe bwe Rebekah ekar juon eo me Anij ekar kōņaan bwe en m̧areik ļaddik eo nejin Ebream. Kajjitōk ippān ajri ro n̄an kōtōnn̄e er rikarejar eo ej tōpar tok kōn kidu kamel eo nejin ak Rebekah ej kōm̧m̧an ļo̧k nimōer. Leļo̧k n̄an er naan ko n̄an āliji jān eoon ko, āinwōt “In idaak … jidik jān am̧ kein itōk” (eoon 17) im “Inaaj barāinwōt itōk n̄an kamel ko am̧” (eoon 19). Etke eaorōk n̄an kōj bwe jen jouj n̄an ro jet?
-
Kwaļo̧k juon bwebwenato kōn an Rilo̧mo̧o̧r kar kwaļo̧k juon n̄an bar juon armej. Kajjitōk ippān jet iaan ajri ro n̄an kwaļo̧k en̄jake eo aer make kōn m̧ool in jouj.
-
Kwaļo̧k ļōmņak in jejjo jekjek ko ko me juon ajri emaron̄ kwaļo̧k an jouj, āinwōt ikkure ippān ro m̧ōttan ak kweilo̧k juon armej eo ekāāļ ilo jikin jikuuļ. Kajjitōk ippān ajri ro ta eo remaron̄ kōm̧m̧an bwe ren jouj n̄an ro jet.
-
Al juon al ippān ajri ro kōn jouj, āinwōt “Kindness Begins with Me” ak “I’m Trying to Be like Jesus” (Children’s Songbook, 145, 78–79). Kajjitōk ippān ajri ro n̄an ron̄jake naan eo “jouj” (ak juon naan āinļo̧k wōt) im juta n̄e rej ron̄ naan eo. Ewi wāween ad kwaļo̧k jouj n̄an ro jet? Peij in m̧akūtkūt eo an wiik in emaron̄ jipan̄ kōn ekkōnono in.
Imaron̄ kāālet men ko me relukkuun aorōk.
Kōnke Esau ekar m̧anje ilo baam̧le eo an, ekar aikuj bōk eddo ko rejeņoļo̧k im aorōk im jeraam̧m̧an ko, ņa etan m̧anje. Juon raan ke Esau ekar kwole, ekar wia kake m̧anje eo an n̄an brother eo an, Jekar ekar wōr jet kijen. Bwebwenato in emaron̄ katakin ajri ro bwe jej aikuj kāālet men ko an indeeo ijjeļo̧kin men ko rej kam̧ōņōņōik kōj me an jidik wōt iien.
M̧akūtkūt ko Maron̄ Kōm̧m̧ani
-
Bōktok n̄an kūlaaj eo jet men ko me emaron̄ jipan̄ kwaļo̧k bwebwenato eo kōn Esau ej wia kake m̧anje eo an, āinwōt juon booļ im juon pija juon armej ej bōk kōjeraam̧man an priesthood. Kajjitōk ippān ajri ro n̄an kōjerbal men ko ilo aer ba n̄an eok ta eo rejeļā kake kōn bwebwenato eo.. “Jekab im Esau” (ilo Old Testament Stories) emaron̄ jipan̄. Riit ippān doon Jenesis 25:34, im kōmeļeļeik bwe jabdewōt eo ej m̧anje enaaj bōk jeraam̧m̧an ko rejeņļoļo̧k im eddo ko n̄an kea kōn jabdewōt ro uwaan baam̧le eo.
-
Kwaļo̧k n̄an ajri ro ruo pija ko: juon iaan men ko me eļap tokjeer ilo jetōb (āinwōt juon tampeļ) im juon iaan men ko me ej bōktok m̧ōņōņō eo wōt me an jidik wōt iien (āinwōt juon ikkure, kein ikkure, ak jabdewōt m̧ōn̄ā). Kajjitōk ippāer n̄an kāālet eo wōt men eo enaaj em̧m̧anļo̧k an jipan̄ kōj jepļaakļo̧k n̄an ippān Jemedwōj Ilan̄. Āliji kōn pija ko jet.
-
Al juon al kōn kōm̧m̧ani jokāālet ko rem̧m̧an, āinwōt “Choose the Right Way” (Al ko Al in Ajri, 160–61) ippān ajri ro. Kam̧ool bwe jej jeraam̧m̧an im m̧ōņōņō n̄e jej kāālet jim̧we eo.
Katakin Katak eo: Ajri ro Rerūttoļo̧k
Inaaj jeraam̧m̧an ilo aō jerbal kōn tōmak im kwaļo̧k jouj n̄an ro jet.
Rikarejeran Ebream ekar kwaļo̧k an tōmak ilo an lōke tōl eo an Anij n̄an kappukot kōrā eo pāleen Isaac. Rebekah ekar kwaļo̧k jouj ilo wāween an kōm̧m̧an n̄an karejaran Ebream. Ewi wāween am̧ maron̄ jipan̄ ajri ro kwoj katain er ļoor waanjon̄ak eo an rikarejeran Ebream.
M̧akūtkūt ko Maron̄ Kōm̧m̧ani
-
Riiti Jenesis 24:1–28 ippān doon, im jipan̄ ajri ro pukot waanjon̄ak in tōmak im jouj (lale, n̄an waajon̄ak, eoon ko 12–14 im 17–20). Ewi wāween an kar rikarejeran Ebream im Rebekah jeraam̧m̧an ilo aer kwaļo̧k iakwe im jouj? Je ioon bo̧o̧t eo Jemaron̄ kwaļo̧k tōmak ilo ad … im Jemaron̄ kwaļo̧k jouj ilo ad … , im kajjitōk ippān ajri ro n̄an kwaļo̧k wāween ko n̄an kadedeikļo̧k jentōj kein.
-
Ioon m̧ōttan pepa ko, je men ko rikarejeran Ebream ekar ba ak kōm̧m̧an im men ko Rebekah ekar ba ak kōm̧m̧ane ilo Jenesis 24:1–28. Kajjitōk ippān ajri ro n̄an kāālet kajjojo m̧ōttan pepa ko im jerbal ippān doon n̄an kajidede im ba ak kōm̧m̧an men kein (remaron̄ lale eoon ko n̄e rej aikuj jipan̄). Ta eo bwebwenato in ej katakin kōj kōn jouj? Ta eo ej katakin kōj kōn tōmak? Jet waanjon̄ak kōn jouj im tōmak rej pād ilo Jenesis 24:29–33, 58–61.
-
Kajjitōk ippān ajri ro n̄an ļōmņak kōn juon jerbal in jouj me em̧ōj aer loe. Kajjitōk ippāer n̄an je ioon bo̧o̧t eo im kwaļo̧k n̄an kūlaaj eo ak baam̧le ko aer ilo m̧ōko. Ekōjkan ad en̄jake n̄e juon armej ej jouj n̄an kōj?
Inaaj kaorōk men ko an mour indeeo ijjeļo̧k men ko an jidik wōt iien.
Esau ekar kāālet n̄an wia kake juon men eo eļap aorōk, m̧anje eo an, n̄an juon men eo me ejjeļo̧k tokjen, jet bilawe im juon booļ in juup. Ilo am̧ riiti eoon kein, kejakļo̧kjeņ kōn wāween am̧ maron̄ jipan̄ ajri ro kaorōk m̧oktata men ko me raorōk n̄an indeeo.
M̧akūtkūt ko Maron̄ Kōm̧m̧ani
-
Riit ippān doon bwebwenato in Jekab im Esau ilo Jenesis 25:21–34. Ilo am̧ riiti, kajjitōk ippān kajjojo ajri n̄an kāālet juon men n̄an jin̄n̄aik jān bwebwenato eo. Innem kajjitōk ippāer n̄an kōjerbal pija ko aer n̄an ba bwebwenato eo ilo naan ko aer make. Eļan̄n̄e rej aikuj jipan̄ meļeļe ta in m̧anje, kōketak er n̄an riiti “Birthright” ilo Unin Tōl eo n̄an Jeje ko Rekwojarjar (ChurchofJesusChrist.org). Kajjitōk ippān ajri ro n̄an pijaikļo̧k an Esau kar kajjitōk kōn kapilōk eo ad n̄an wiakake m̧anje eo an n̄an m̧ōn̄ā, ta eo jenaaj kar ba n̄an e?
-
Ba kōn juo iien eo n̄e kwoj aikuj kaarmejete juon men em̧m̧an n̄an bōk juon men eļapļo̧k an aorōk. Ak kwaļo̧k juon pijaan alooj “Continue in Patience” (ChurchofJesusChrist.org). Ewi wāween an bwebwenato eo am̧ ak bwebwenato eo ilo pijaan alooj eo iookļo̧k jokāālet eo Esau ekar kōm̧m̧ane ilo Jenesis 25:29–34? Jipan̄ ajri ro ļōmņak kōn kōjeraam̧m̧an ko Jemedwōj Ilan̄ ekōņaan bwe en leļo̧k n̄an er (āinwōt juon naan in kam̧ool ekajoor, kōjeraam̧m̧an ko an tampeļ, ak mour indeeo Ippān). Kōketak er n̄an ļōmņak kōn men ko renaaj kōņaan kaamejeti bwe ren maron̄ bōk kōjeraam̧m̧an ko eļap tokjeer.
Kōketak Ekkatak ilo M̧weo
Kajjitōk ippān ajri ro n̄an ļōmņak kōn juon kōttōbar remaron̄ kōm̧m̧ane n̄an er make kōn juon pedped in katak eo me rekar ekkatak ilo būraimere rainin. N̄an waanjon̄ak, remaron̄ kōm̧m̧an juon kōttōbar n̄an jouj n̄an ro jet ilo m̧ōko.
Kōkm̧anm̧anļo̧k Ad Katakin
Ajri ro rekōņaan kwaļo̧k ta eo rej ekkatak. Men̄e reiddik, ajri ro remaron̄ kōkajoorļo̧k ro uwaan baam̧le ko aer. Kōketak er n̄an kwaļo̧k ippān baam̧le ko aer men ko rekar ekkatak ilo Būraimere. (Lale Teaching in the Savior’s Way, 30.)