“Pāpode 28–Maaj 6. Jenesis 28–33: ‘Em̧ool Irooj ej Pād Ijin,’” Itok, Ļoor Eō—N̄an Būraimere: Kallim̧ur M̧okta 2022 (2021)
“Pāpode 28–Maaj 6. Jenesis 28–33,” Itok, Ļoor Eō—N̄an Būraimere: 2022
Pāpode 28–M̧aaj 6
Jenesis 28–33
“Em̧ool Irooj ej Pād Ijin”
Ilo am̧ riiti Jenesis 28–33, kejōkļo̧kjeņ kōn wāween an bwebwenato im pedped in katak ko ilo jebta kein maron̄ kōjeraam̧m̧an ajri ro kwoj katakin er.
Je En̄jake ko Rej Im̧we Eok
Kajjitōk bwe ren Kwaļo̧k
Kajjitōk ippān ajri ro n̄an joļo̧k ak karabwilbwili juon bo̧o̧l n̄an doon. N̄e ajri ro rej bauri bo̧o̧l eo, kajjitōk ippāer n̄an kwaļo̧k juon men rej ekkatak jān Kallim̧ur M̧okta, emaron̄ ilo m̧weo ak ilo Būraimere.
Katakin Katak eo: Ajri ro Reddikļo̧k
Bujen ko rej jipan̄ eō jepļaakļo̧k n̄an ippān Jemedwōj Ilan̄.
Ilo juon ettōņak, Jekab ekar lo juon jikinwe ej tōlļo̧k n̄an lan̄. Bun̄tōn ko ilo jikinwe eo emaron̄ bōk jikin bujen ko jej kōm̧m̧ane ippān Anij, kōnke bujen kein rej jipan̄ kōpooj kōj n̄an jepļaakļo̧k n̄an Ippān.
M̧akūtkūt ko Maron̄ Kōm̧m̧ani
-
Riiti ļo̧k Jenesis 28:12–13 n̄an ajri ro. Kōmeļeļe bwe bun̄tōn ko ilo jikinwe emaron̄ bōk jikin bujen ko me ej jipan̄ kōjepļaakļo̧k kōj n̄an Jemedwōj Ilan̄. Kajjitōk ippān ajri ro n̄an kōtōnn̄e rej tallōn̄e jikinwe eo ilo am̧ kōnono kōn iien ko jej kallim̧ur n̄an pokake Anij, āinwōt ilo iien ad peptaij, bōk kwojkwoj eo, ak etal n̄an tampeļ. Jipan̄ ajri ro ļōmņak kōn wāween ko me remaron̄ kōppopo n̄an kōm̧m̧ani bujen ko n̄e rej peptaij.
-
Riiti Jenesis 28:15 n̄an ajri ro, kwaļo̧k aorōk in naan ko “Ij pād ippam̧” im “I jāmin ilo̧k jān eok.” Kōmeļeļeik bwe Anij ekar kallim̧ur bwe enaaj pād ippān aolep iien ilo ad kajjeon̄ kāālet jim̧we. Jipan̄ ajri ro ļōmņake men ko remaron̄ kōm̧m̧ane n̄an epaakeļo̧k Jemedwōj Ilan̄ im Jisōs Kraist.
Ij aikuj kōjparok kallim̧ur ko aō aolep iien.
Jekab ekar errā n̄an jerbal n̄an Leban ium̧win jiljilimjuon iiō bwe en maron̄ mareiki leddik eo nejin Leban etan in Rachel. Jekab ekar kōjparok koņ in, ak Leban ekar jab. Ļōmņak in kōjerbal bwebwenato n̄an katakin ajri ro kōn aorōk in kōjparok kallim̧ur ko ad.
M̧akūtkūt ko Maron̄ Kōm̧m̧ani
-
Riiti Jenesis 29:18, 20 n̄an ajri ro, im kōmeļeļe bwe Jekab ekar kōjparok kallim̧ur ko an n̄an jerbal ium̧win jiljilimjuon iiō n̄an Leban bwe en maron̄ m̧areik Rachel, men̄e menin ekar juon iien eaitok n̄an jerbal (lale barāinwōt “Jacob and His Family,” ilo Old Testament Stories). Jipan̄ ajri ro ļōmņak kōn kallim̧ur ko remaron̄ kōm̧m̧ane n̄an armej ro jet. Etke eaorōk n̄an kōjparok kallim̧ur ko ad? Jipan̄ er meļeļe bwe juon bujen ej juon kallim̧ur ekwojarjar ikōtaan Anij im kōj kajjojo. Kwaļo̧k am̧ naan in kam̧ool bwe Jemedwōj Ilan̄ im Jisōs Kraist rej kōjparok kallim̧ur ko Aer aolep iien.
-
Al ippān doon im ekkōnono kōn m̧ool, āinwōt “I Believe in Being Honest” ak “Stand for the Right” (Children’s Songbook, 149, 159).
Jemedwōj Ilan̄ im Jisōs Kraist remaron̄ jipan̄ eō iakwe baam̧le eo aō.
Elōn̄ ajri ro rejeļā ta in illu ippān juon jeier ak jatier. Bwebwenato eo kōn wāween an Jekab im Esau kar anjo̧ ioon aer illu ņa doon emaron̄ im̧we er.
Kōmeļeļe eo kōn an Jekab im Esau atbo̧kwoj doon, jān Robert T. Barrett
M̧akūtkūt ko Maron̄ Kōm̧m̧ani
-
Jipan̄ ajri ro keememej etke Esau ekar illu ippān Jekab (lale Jenesis 27:41 ak “Jacob im Esau,” ilo Old Testament Stories). Kajjitōk ippān ajri ro n̄an kwaļo̧k āindeet mejān illu. Kōmeļeļeik er ālkin elōn̄ iiō ko, Jekab ekar mijak in loļo̧k Esau. Kajjitōk ippān ajri ro n̄an kwaļo̧k n̄an eok āindeet mejān mijak. Ta eo jej aikuj kōm̧m̧ane n̄e jej mijak? Kajjitōk ippān ajri ro n̄an kōtōnn̄e rej jar ilo am̧ riiti ta eo Jekab ekar ba ilo jar eo an (lale Jenesis 32:11). Innem riiti ilo Jenesis 33:4 ta eo ekar waļo̧k ke Esau ekar lo Jekab. Kajjitōk ippān ajri ro n̄an kwaļo̧k n̄an eok wāween paaktokin turin mejān Jekab im Esau ke rekar bar ioon doon bar juon alen.
-
Kwaļo̧k juon pijaan Jekab im Esau me ej waļo̧k ilo katak in. Kōtļo̧k bwe ajri ro ren kōmeļeļeik ta eo rej lo ilo pija eo. Ba n̄an er bwe ekar wōr en̄jake ko rejjab em̧m̧an ikōtaan brother rein ruo, ak rekar kāālet n̄an jeorļo̧k an doon bōd. Jipan̄ ajri ro ļōmņake wāween ko remaron̄ kwaļo̧k iakwe n̄an juon armej ilo baam̧le ko aer, āinwōt Jekab im Esau rekar kwaļo̧k an doon iakwe.
Katakin Katak eo: Ajri ro Rerūttoļo̧k
Bujen ko rej jipan̄ eō jepļaakļo̧k n̄an ippān Jemedwōj Ilan̄.
Kwomaron̄ kōjerbal ettōņak eo an Jekab kōn juon jikinwe ļo̧k n̄an lan̄ n̄an katakin ajri ro bwe kōjparok bujen ko ej kōpooj kōj n̄an delo̧n̄e aelōn̄ an Anij.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an riiti Jenesis 28:10–15 innem jin̄aik juon pija in ettōņak eo an Jekab. Kajjitōk ippāer n̄an kwaļo̧k pija ko. Kōmeļeļeik bwe jikinwe eo ej bōk juon iaļ n̄an Jekab n̄an jepļaakļo̧k n̄an ippān Anij. Ta eo Anij ekar letok n̄an jipan̄ kōj jepļaakļo̧k n̄an Ippān? (lale peij in m̧akūtkūt eo an wiik). Kakeememej ajri ro kōn bujen peptaij ko aer. Ekōjkan ilo ad mour kōn bujen in kepaakeļo̧k kōj n̄an Anij?
-
Kwaļo̧k juon pija in juon tampeļ, im je ioon bo̧o̧t eo naan ko raorōk jān Jenesis 28:15–17, āinwōt: “Ij pād ippam̧,” “Irooj ej pād ijin,” “Ijin im̧ōn Anij,” ak “Ijin kōjam̧ in lan̄.” Kajjitōk ippān ajri ro n̄an kappukot naan ko. Ba n̄an ajri ro kōn wāween an tampeļ im bujen ko an tampeļ jipan̄ eok epaakeļo̧k Irooj.
Ij tōmak ilo m̧ool.
Jekab ekar kōjparok kallim̧ur eo an n̄an jerbal Leban n̄an ium̧win jiljilimjuon iiō, ak Leban ekar aujiidi. Ekōjkan am̧ kōjerbal bwebwenato in n̄an jipan̄ ajri ro meļeļe aorōkin ad m̧ool men̄e ro jet rejjab m̧ool?
M̧akūtkūt ko Maron̄ Kōm̧m̧ani
-
Riiti ippān doo Jenesis 29:16–30, im jipan̄ ajri ro kōkaduuik m̧akūtkūt eo ej waļo̧k ilo eoon kein. Ekōjkan en̄jake eo an Jekab ilo aer kar aujiidi? Ta eo jemaron̄ ekkatak jān bwebwenato in?
-
Ioon bo̧o̧t eo je Ta eo ej waļo̧k n̄e jejjab m̧ool? im Ta eo ej waļo̧k n̄e jej m̧ool? Kajjitōk ippān ajri ro n̄an kappukot uwaak ko ilo aer riiti “Honesty and Integrity” (ilo N̄an Kōkajoorļo̧k Jodikdik ro [2011], 19).
Jemedwōj Ilan̄ im Jisōs Kraist remaron̄ jipan̄ eō iakwe baam̧le eo aō.
Esau ekar illu ippān Jekab, im Jekab ekar mijak in lo Esau bar juon alen, men̄e ālkin 20 iiō ko in aer jepelļo̧k. Ak Jekab ekar jar im kajjitōk jipan̄, im Esau ekar maron̄ anjo̧ ioon an illu. Ekōjkan am̧ maron̄ kōjerbal bwebwenato in n̄an katakin ajri ro aorōkin iake baam̧le ko ad?
M̧akūtkūt ko Maron̄ Kōm̧m̧ani
-
Kajjitōk ippān ajri ro ta eo rej keememej kōn jem̧jerā eo ikōtaan Jekab im Esau (lale Jenesis 27:41 ak “Jekab im Esau,” ilo Old Testament Stories). Kōmeļeļeik bwe ālkin aer kar jako ium̧win tarrin 20 iiō, Jekab ekar tin etal im ioon Esau bar juon alen Riit ippān doon Jenesis 32:6–11. Ekōjkan an kar Jekab en̄jake? Ta eo ekar kōm̧m̧ane n̄an bōk jipan̄? Kam̧ool bwe jemaron̄ kajjitōk ippān Jemedwōj Ilan̄ n̄an jipan̄ n̄e jem̧jerā ko ad ilo baam̧le ko ad repen. Riit ippān doon Jenesis 33:1–4 n̄an lo wāween an Irooj kar uwaake jar eo an Jekab.
-
Kwaļo̧k juo aer make en̄jake ak juon bwebwenato jān māākjiin an Kabun̄ in kōn wāween n̄an kwaļo̧k eļapļo̧k iakwe ilo baam̧le ko ad. Kajjitōk ippāer n̄an kwaļo̧k en̄jake ko im naan in kam̧ool ko aer. Ta eo jemaron̄ kōm̧m̧ane n̄e juon uwaan baam̧le eo ej illu ņae kōj? N̄an ekkatak kōn ta eo Rilo̧mo̧o̧r ekar katakin kōj n̄an kōm̧m̧ane, lale Matu 5:43–45.
Kōketak Ekkatak ilo M̧weo
Kajjitōk ippān ajri ro n̄an kwaļo̧k peij in m̧akūtkūt an wiik in ippān baam̧le ko aer n̄an jipan̄ er ekkatak jān im keememej ettōņak eo an Jekab.
Kōkm̧anm̧anļo̧k Ad Katakin
Kōjerbal pija ko n̄an jipan̄ ajri ro meļeļe bwebwenato ko ilo jeje ko rekwojarjar. Ajri ro ekkā an em̧m̧an aer ekkatak n̄e remaron̄ lali pijaan bwebwenato ko an jeje ko rekwojarjar ak katak ko. N̄an waanjon̄ok, kwomaron̄ kwaļo̧k juon pija jān unin tōl eo an wiik in ilo Itok, Ļoor Eō—N̄an Kajjojo Armej im Baam̧le Ko.