Pāpode 28–M̧aaj 6

Jenesis 28–33

“E m̧ool Irooj Ej Pād Ijin”

Ilo am̧ riiti Jenesis 28–33, kejōkļo̧kjeņ kōn ta eo kwoj ekkatak jān waanjon̄ak ko an Jekab im baam̧le eo an. Je en̄jake ko kwoj en̄jaki.

Je En̄jake ko Rej Im̧we Eok

Jepta ko 28 im 32 ilo Jenesis ej kwaļo̧k kōn en̄jake ko ruo ilo jetōb me rikanaan Jekab ekar en̄jaki. Jim̧or men kein rekar waļo̧k ilo āne jem̧aden ak ium̧win jekjek ko reoktak. Ilo en̄jake eo kein kajuon, Jekab ekar etal jān lāmoren eo an jinen n̄an kappukot kōrā eo pāleen, ippānļo̧k, joļo̧k juon bon̄ im petpet ioon dōkā ko. Emaron̄ kar jab kōtmene n̄an kappukot Irooj ilo juon jikin ejjeļo̧k aolep kain ie, ak Anij ekar kwaļo̧k E make n̄an Jekab ilo juon ettōņak eo ekar ukot mour eo an, im Jekab ekar ba, “E m̧ool Irooj Ej Pād Ijin; im iar jaje” (Jenesis 28:16). Iiō ko tokālik, Jekab ekar lo bwe ebar make iaan ilo āne jem̧aden. Iien in, ekar etetal ilo iaļ eo an n̄an roolļo̧k n̄an Canaan, jelm̧ae juon ippān doon eo ekaburom̧ōjm̧ōj ippān brother eo an ellu, Esau. Ak Jekab ekar jeļā bwe n̄e ekar aikuj juon kōjeraam̧m̧an, enkar kappukot Irooj, aeet ilo āne jem̧aden (lale Jenesis 32).

Kwomaron̄ lo eok make ilo āne jem̧aden eo am̧ make ilo am̧ kappukot juon kōjeraam̧m̧an jān Anij. Bōlen āne jem̧aden eo am̧ ej juon jem̧jerā eo epen, āinwōt kar Jekab. Bōlen kwoj en̄jake ettoļo̧k jān Anij ak en̄jake bwe kwoj aikuj juon kōjeraam̧m̧an. Jet iien kōjeraam̧m̧an ej itok ilo jab kōtmene, jet iien em̧ōkaj an itok kōn juon likarōk. Jabdewōt aikuj eo am̧, kwomaron̄ lo bwe men̄e ilo āne jem̧aden eo am̧, “Irooj ej pād ijin.”

Ļōm̧ņak ko n̄an Ekkatak Jeje Ko Rekwojarjar Ippam̧ Make

Jenesis 28; 29:1–18

Em̧ōj kallim̧ur eō kōn kōjeraam̧m̧an ko an Ebream ilo tampeļ.

Ilo iaļ eo an n̄an Heran n̄an kappukot kōrā eo pāleen, Jekar ekar ettōņak juon jikinwe emaron̄ aitokļo̧k ak kaduļo̧k jān laļ n̄an lan̄, ilo an Anij jutak ilōn̄in. Ilo ettōņak eo, Anij ekar kōkāāl ippān Jekab ejja bujen eo wōt ippān Ebream im Aisek (lale Jenesis 28:10–17; barāinwōt lale Jenesis 12:2–3; 26:1–4). Būreejtōn Marion G. Romney ekar kwaļo̧k ļōmņak in kōn ta eo jikinwe eo ej jutak kake: “Jekab ekar kile bwe bujen ko ekar kōm̧m̧an ippān Irooj ijeņ rej kein ijjuur ko ilo jikinwe eo me e make enaaj aikuj tallōn̄e n̄an bōk kōjeraam̧m̧an ko kar kallim̧ur kaki—kōjeraam̧m̧an ko me renaaj kōmālimi n̄an deļon̄e lan̄ im iiaio ippān Irooj. … Tampeļ ko rej n̄an kōj aolep ta eo Bethel ekar kōpooje n̄an Jekab” (“Temples—The Gates to Heaven,” Ensign, Mar. 1971, 16).

Ta naan ko jet im jentōj ko ilo Jenesis 28:10–22 ej kwaļo̧k ļōmņak in n̄an kom̧ kōn juon ekkeijel ikōtaan en̄jake eo an Jekab im kōjeraam̧m̧an ko an tampeļ? Ilo am̧ riiti eoon kein, ļōmņak kōn bujen ko kwar kōm̧m̧ani; ta im̧we ko kwaar en̄jake?

Ilo am̧ riiti Jenesis 29:1–18, kejōkļo̧kjeņ kōn ekōjkan an m̧are eo an Jekab n̄an Rejel kar aorōk n̄an bujen eo Anij ekar kōkāāle ippān Jekab ilo Bethel (“im̧ōn Anij”; lale Jenesis 28:10–19). Keememej en̄jake in ilo am̧ wōnm̧aanļo̧k wōt im riiti kōn mour eo an Jekab ilo Jenesis 29–33. Ekōjkan an m̧weo im̧ōn Irooj kar bōktok kōj epaakeļo̧k Anij?

Barāinwōt lale Yoon Hwan Choi, “Jab Reito-Reitak, Reilōn̄ļo̧k!” Liaona, Māe 2017, 90–92.

Jenesis 29:31–35; 30:1–24

Irooj ej keememej eō ilo melejjion̄ ko aō.

Men̄e Rejel im Lia rekar mour ilo juon tōre im m̧anit eoktak jān kōj, jemaron̄ meļeļe jet iaan en̄jake ko rekar en̄jaki. Ilo am̧ riiti Jenesis 29:31–35 im 30:1–24, kappukot naan ko im jentōj ko me rej kōmeļeļeiki tūriam̧o eo an Anij n̄an Rejel im Lia. Kejōkļo̧kjeņ kōn ekōjkan an Anij kar “lo en̄taan eo [am̧]” im “keememej” eok (Jenesis 29:32; 30:22).

Ebarāinwōt aorōk n̄an keememej bwe men̄e Anij ej ron̄ ainikied, ilo māletlet eo An Ejjab aolep iien ej letok n̄an kōj ta eo jej kajjitōk kake. Ļōmņak in ekkatak ennaan eo an Elder Brook P. Hales “Uwaak ko n̄an Jar” (Liaona, Māe 2019, 11–14) n̄an ekkatak kōn wāween ko reoktak Jemedwōj Ilan̄ ej uwaake kōj.

N̄an meļeļe ko reļļapļo̧k ikkijeen manit eo ilo bwebwenato in, lale Bok in Ekkatak eo an Rijikuuļ ilo Kallim̧ur M̧okta: Jenesis–2 Samuel (2003), 86–88.

Kōmeļeļe eo an Jekab im Esau rej atbo̧kwōj doon, jān Robert T. Barrett

Jenesis 32–33

Rilo̧mo̧o̧r emaron̄ jipan̄ kōj eļļā jān jab errā ko ad n̄an doon ilo baam̧le ko ad.

Ke Jekab ekar bar jepļaak n̄an Canaan, ekar “kanooj mijak im lōļn̄o̧n̄” kōn ekōjkan an Esau naaj wōnm̧aeik e (Jenesis 32:7). Ilo am̧ riiti Jenesis 32–33 kōn an Jekab kar jelm̧ae Esau im en̄jake ko an ke ekar epaakeļo̧k Esau, kwomaron̄ kejōkļo̧kjeņ kōn jem̧jerā ko an baam̧le eo am̧ make—bōlen juon men eo ej aikuj kōmour. Bōlen bwebwenato in emaron̄ im̧we eok n̄an jipan̄ bar juon armej. Kajjitōk ko rej āinnwōt kein remaron̄ jipan̄ tōl eok ilo riitiin̄ ko am̧:

• Ekōjkan an Jekab kar ioon Esau?

• Ta eo ej jiktok n̄an kwe kōn jar eo an Jekab me ej pād ilo Jenesis 32:9–12?

• Ta eo kwoj ekkatak kōn jeorļo̧k bōd jān waanjon̄ak eo an Esau?

• Ekōjkan an Rilo̧mo̧o̧r jipan̄ kōj kōmour jem̧jerā ko an baam̧le eo?

Barāinwōt lale Luk 15:11–32; Jeffrey R. Holland, “Jerbal in Karejar in Kajim̧we,” Liaona, Nob. 2018, 77–79.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jenesis 28–33.Kōjerbal “Jacob and His Family” (ilo Old Testament Stories) n̄an jipan̄ ajri ro meļeļe m̧akūtkūt ko jān jepta kein. Bōlen ro uwaan baam̧le eo am̧ remaron̄ bōjrak jidik ilo kajjojo pija im kakilen ta eo ej katakin, āinwōt aorōkin m̧are, bujen ko, jerbal, im jeorļo̧k bōd.

Jenesis 28:10–22.Kwomaron̄ kōjerbal juon jikinwe (ak juon pijaan jikinwe) n̄an kōnono kōn ekōjkan an bujen ko āinwōt juon jikinwe. Ta bujen ko jekar kōm̧m̧ani, im ekōjkan aer kepaake kōj n̄an Anij? Ro uwaan baam̧le eo remaron̄ m̧ōņōņō ilo aer epaakeļo̧k ettōņak eo an Jekab, kar kōmeļeļeik ilo Jenesis 28:10–22.

Al eo “Nearer, My God, to Thee” (Hymns, no. 100) kar im̧we jān ettōņak eo an Jekab. Baam̧le eo am̧ emaron̄ al al in im kōmeļeļeik ta eo kajjojo eoon ej katakin.

Jenesis 32:24–32.Kwomaron̄ leļo̧k n̄an ro uwaan baam̧le eo ro rekōņaan likarōk. Etke “likarōk” ej juon wāween em̧m̧an n̄an kōmeļeļe wāween kappukot kōjeraam̧m̧an ko jān Irooj? Ta eo Inōs 1:1–5; Alma 8:9–10 ej leļo̧k ļōmņak kōn ta meļeļein n̄an “likarōk … im̧aan Anij”?

Jenesis 33:1–12.Ālkin elōn̄ iiō in en̄jake ko reppen, Jekar im Esau rekar bar ippān doon. Eļan̄n̄e Jekab im Esau remaron̄ kar kōnono n̄an kōj rainin, ta eo remaron̄ kar ba n̄an jipan̄ kōj n̄e ej lōn̄ aitwerōk ilo baam̧le ko ad?

N̄an meļeļe ko reļlapļo̧k n̄an katakin ajri ro, lale laajrak in katak eo an wiik in ilo Itok, Ļoor Eō—N̄an Būraimere.

Ļōmņak ko kar elmakoti: “Dearest Children, God Is Near You,” Hymns, no. 96.

Kōkm̧anm̧anļo̧k Am̧ Ekkatak Ippam̧ Make

Kappukōt Jisōs Kraist. Kallim̧ur M̧okta ej kam̧ool kōn Jisōs Kraist kōn bwebwenato ko ie im kōkkaļe ko. Ļōmņak in jet ak kakōļļeik eoon ko me rej kōnono kōn Rilo̧mo̧o̧r im eļap meļeļein n̄an kwe.

Ettōņak eo an Jekab ilo Bethel, jān J. Ken Spencer