“M̧aaj 14–20 Jenesis 42–50: ‘Anij eaar Pepe Bwe en Em̧m̧an,’” Itok, Ļoor Eō—N̄an Kajjojo Armej im Baam̧le ko: Kallim̧ur M̧okta 2022 (2021)
“M̧aaj 14–20 Jenesis 42–50,” Itok, Ļoor Eō—N̄an Kajjojo Armej im Baam̧le ko: 2020
Kōmeļeļe kōn Josep in Ijept, jān Robert T. Barrett
M̧aaj 14–20
Jenesis 42–50
“Anij eaar Pepe Bwe en Em̧m̧an”
Riiti jeje ko rekwojarjar ej akjo̧kwetok revelesōn. Ron̄jake im̧we ko An ilo am riiti, men̄e rejjab iokļo̧k ta eo kwoj riiti.
Je En̄jake ko Rej Im̧we Eok
Ennan̄in 22 iiō ko jen iien eo Josep kar wia kake n̄an Ijept jen ļōm̧aro jein. Eaar dipuk elōn̄ en̄taan ko, ekoba riab ņae im kalbuuj. Āliktata ke eaar bar lo ļōm̧aro jein, Josep ekar jeban kien ioon aolepen Ijipt, kein karuo jān Pero. Emaron̄ kar pidodo an ukōt nana n̄an er, im ļōmņake ta eo raar kōm̧m̧an n̄an Josep, emaron̄ in kar alikkar. Im aaet Josep eaar jeo̧rļo̧k an ļōm̧aro jein bōd. Ejjab menin wōt, ak eaar jipan̄ er lo jibadbad eo ekwojarjar kōn en̄taan eo an. “Anij eaar Pepe Bwe en Em̧m̧an” (Genesis 50:20), eaar jiron̄ er, kōnke eaar likūt e ilo juon jikin n̄an lo̧mo̧o̧ren “aolep ro nukun jemān” (Jenesis 47:12) jān n̄ūta.
Ilo elōn̄ wāween ko, mour eo an Josep eaar āinwōt Jisōs Kraist. Men̄e jerawiwi ko ad eaar kōm̧m̧an eļapļo̧k An en̄taan, Rilo̧mo̧o̧r eaar jeo̧rļo̧k bōd ko, kōtļo̧k kōj aolep jān juon n̄ūta eo enana. Men̄e jej aikuj bōk jeo̧rļo̧k bōd ak kōjekdoon e—ilo jet wāween jej aikuj aolep jim̧or kōm̧m̧ane—waanjon̄ak eo an Josep ejipan̄ kōj mije wōt Rilo̧mo̧o̧r, eo ej unjen kōmour eo em̧ool im merek.
Ļōm̧ņak ko n̄an Ekkatak Jeje Ko Rekwojarjar Ippam̧ Make
“Anij eaar jilkintok eō im̧aami bwe in kōjparok mour.”
Ilo am riit kōn Josep, kwoj ke lo oktak ko ikōtaan bwebwenato eo an im pinmuur in mijen eo an Jisōs Kraist? Komaron̄ kōļmenļo̧kjeņ elmen eddo eo an Josep ilo baam̧le eo an āinļo̧k wōt eddo eo an Rilo̧mo̧o̧r ilo baam̧le eo an Anij. Ta āinwōt juon ko kwoj loi ikōtaan en̄jake ko an Josep im mijen eo an Rilo̧mo̧o̧r, eo kar jilkintok “n̄an lo̧mo̧o̧ren [kōj] kōn lo̧mo̧o̧r eļap”? (Jenesis 45:7).
Jeorļo̧k bōd ej bōktok kōmour.
Riit kōn an Josep jeo̧rļo̧k an ļōm̧aro jein bōd kōn men eo enana raar kōm̧m̧ane n̄an e emaron̄ im̧we eok n̄an ļōmņake juon eo epen am jeo̧rļo̧k an bōd. Ak bōlen juon mālijjon̄ eo epen n̄an jeo̧rļo̧k bōd me enaaj waļo̧k jeklaj. Ilo wāween in, emaron̄ jipan̄ eok kōļmenļo̧kjeņ etke Josep ekar maron̄ jeo̧rļo̧k bōd. Ta tokjen m̧wiļ im paoktok eo kwoj loe kōn Josep ilo Jenesis 45; 50:15–21? Elmen an kar en̄jake eo an im̧we e n̄an kōļapļo̧k jeo̧rļo̧k bōd? Ta waanjon̄ak eo an Josep ekōm̧m̧an bwe kwon maron̄ kōļapļo̧k jeo̧rļo̧k bōd kōn jipan̄ eo an Rilo̧mo̧o̧r?
Bar keememej kōn kōjeraam̧m̧an ko me raar waļo̧k n̄an baam̧le eo an Josep kōn an jeo̧rļo̧k bōd. Ta kōjeraam̧m̧an ko kwaar loi jān jeo̧rļo̧k bōd? Kwaar ke en̄jake im̧we n̄an jibadōkļo̧k juon eo ekar bōd ņae eok?
Bar lale Jenesis 33:1–4; Katak im Bujen Ko 64:9–11; Larry J. Echo Hawk, “Āinwōt Kraist eaar Jeorļo̧k Ami bōd, En Āindein Barāinwōt Ami Kōm̧m̧an,” Kweilo̧k eo Eļap, Eprōļ 2018.
Ta meļeļein kakōļļe in kōjeraam̧m̧an ko an Jekab?
Kōjeraam̧m̧an ko an Jekab n̄an ineen epād ie kōjeraam̧m̧an ko, ak jet ririit emamaron̄ pen aer lo n̄an meļeļe. Kam̧m̧oolol, kōn gospel eo em̧ōj an jepļaaktok bwe eletok n̄an kōj jet kakobaba in meļeļe. N̄e kwoj riit kōn kōjeraam̧m̧an ko an Josep ilo Jenesis 49:22–26, bar riiti eoon kein, im lale ta ļōmņak ko rej litok: 1 Nipai 15:12; 2 Nipai 3:4–5; Jekab 2:25; Katak im Bujen Ko 50:44.
Ilo am riit kōn kōjeraam̧m̧an ko an Juda ilo Jenesis 49:8–12, keememej bwe jim̧or Kiin̄ David im Jisōs Kraist rej bwijjin Juda. Ta naan ak ennaan ko ilo eoon kein rej kakeememej eok kōn Rilo̧mo̧o̧r? N̄e kwoj ekkatak kōn kōjeraam̧m̧an ko an Juda, emaron̄ jipan̄ n̄an bar riiti Revelesōn 5:5–6, 9; 1 Nipai 15:14–15; Katak im Bujen Ko 45:59; 133:46–50.
Eļan̄n̄e kwoj kōņaan katak eļapļo̧k kōn ļōm̧aro nejin Jekab im bwij ko an Israel ro rej itok jen ia, ewōr juon ļo̧o̧k in kajjojo ilo Unin Tōl eo n̄an Jeje ko Rekwojarjar (scriptures.ChurchofJesusChrist.org).
Jenesis 50:24–25; Ukook eo an Josep Smith, Jenesis 50:24–38 (ilo Bible appendix)
“Juon Rilolo Irooj Anij enaaj kūr.”
Kōn ettōņak eo an Josep (lale Jenesis 37:5–11) im ukook eo an kōn ettōņak ko jet’ (lale Jenesis 40–41), Irooj eaar kwaļo̧k men ko me enaaj waļo̧k raan ko ak iiō ko ilo ilju im jeklaj. Ak Irooj eaar bar kwaļo̧k n̄an Josep ta eo enaaj waļo̧k ilo iiō ko rej itok. Ilo m̧ool, eaar jeļā kōn kanaan in mijen eo an Moses im Josep Smith. Ilo am riiti naan ko an Josep ilo Jenesis 50:24–25 im ilo Ukook eo an Josep Smith, Genesis 50:24–38 (ilo Bible appendix), kajjitōkin eok make elmen jeļā men kein maron̄ kar kōjeraam̧m̧an Josep im ro nejin Israel. Etke kwoj ļōmņak ekar aorōk bwe Irooj en kōjepļaaktok kanaan in kōn Josep Smith? ( bar lale 2 Nipai 3).
Elmen an kar Josep Smith kakūrm̧ool kanaan ko ilo Josep Smith Ukook, Jenesis 50: 27–28, 30–33? (lale Katak im Bujen Ko 1:17–23; 20:7–12; 39:11; 135:3).
Kōmeļeļe kōn Josep in Ijipt, jen Paul Mann
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Jenesis 42–46.Baam̧le eo am maron̄ m̧ōņōņōik bwebwenato in an Josep bar ioon ļōm̧aro jein. (“Josep im N̄ūta eo,” ilo Bwebwenato ko ilo Kallim̧ur M̧okta emaron̄ jipan̄.) Bōk limo kake—kōjerbal kajtuum̧ im jabdewōt eļan̄n̄e kwoj kōņaan. Rōjan̄ ro uwaan baam̧le eo n̄an kajjieon̄ meļeļe en̄jake ko im m̧wiļ ko. Komaron̄ mije eļapļaptata en̄jake ko an Josep n̄an ļōm̧aro jein im elmen aer kar en̄jake ke eaar jeo̧rļo̧k aer bōd. Menin emaron̄ tōlļo̧k n̄an juon ekōnono kōn wāween an jeo̧rļo̧k bōd maron̄ kōjeraam̧m̧an baam̧le eo am.
Ke Josep eaar ioon ļōm̧aro jein ālkin elōn̄ iiō ko, elmen aer kwaļo̧k ke em̧ōj aer kar oktak jen tōre eo eaar lo er? Ta eo jemaron̄ ekkatak kōn ukweļo̧k jān en̄jake ko aer?
-
Jenesis 45:3–11; 50:19–21.Josep eaar kile bwe men̄e en̄jake eo an ilo Ijipt eaar pen, “Anij eaar Pepe Bwe en Em̧m̧an” (Jenesis 50:20). Baam̧le eo am raar ke en̄jake jabdewōt apan̄ ko me Anij eaar ukōti n̄an kōjeraam̧m̧an ko?
Juon al kōn em̧m̧an eo an Anij ilo iien ko rapan̄ (āinwōt “Bedbed E eo Ebin,” Hymns” [Al, no. 5]) emaron̄ kōkōm̧anm̧anļo̧k ekōnono in. Ta kōmeļeļe ko jān en̄jake in waanjon̄ak eo an Josep ta eo al eo ej kwaļo̧k kake?
-
Jenesis 49:9–11, 24–25.Ta eo kwoj loe ilo eoon kein me rej katakin kōj kōn eddo ko im mijen eo an Jisōs Kraist? (N̄an jipan̄ meļeļe ennaan ko ilo eoon kein, lale kein katak eo kōn Jenesis 49 ilo “Ļōmņak ko n̄an Ekkatak Jeje Ko Rekwojarjar Ippam̧ Make.”)
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Ļōmņak in al: “Bedbed Eo E Bin,” Al, no. 5.
Kōkōm̧anm̧an Ad Katakin
Kōjerbal al. Jipan̄ ro uwaan baam̧le eo n̄an pukot m̧ool ko an gospel ilo al ko im al ko an Būraimere. Pukot wāween ko n̄an kōm̧m̧an bwe al ko rekwojarjar rej m̧ōttan gospel ekkatak ko am.
Jekab kōjeraam̧m̧an ļōm̧aro nejin, jen Harry Anderson