Josep in Ijipt ilo kalbuuj

Kōmeļeļe eo kōn Josep eo ilo Ijipt, jān Jeff Ward

M̧aaj 7–13

Jenesis 37–41

“Irooj Ear Pād ippān Josep”

Ta m̧ool ko jān Jenesis 37–41 ko me ajri ro ilo kūlaaj eo am̧ ej aikuj em̧m̧anļo̧k aer meļeļe? Leļo̧k am̧ n̄an en̄jake ko im im̧we ko kwoj en̄jaki, jekdo̧o̧n eļan̄n̄e rejjab iookwaj ta eo kwoj riiti.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Leļo̧k n̄an ajri ro jejjo iien n̄an jin̄n̄aik juon men rekar ekkatak kōn gospel eo ilo m̧weo ak ilo m̧ōn jar eo. Kajjitōk ippān ajri ro n̄an kwaļo̧k im kōnono kōn jin̄n̄a ko aer.

pija ej bōk jikin katakin

Katakin Katak eo: Ajri ro Reddikļo̧k

Jenesis 37

Imaron̄ jouj n̄an baam̧le eo aō.

Brother ro an Josep rekar ebanbane im nana ear kōm̧m̧an n̄an e. Ekōjkan am̧ maron̄ jipapn̄ ajri ro meļeļe aorōkin jouj n̄an ro jet, eļaptata ro uwaan baam̧le eo?

M̧akūtkūt ko Maron̄ Kōm̧m̧ani

• N̄an kwaļo̧k bwebwenato in Josep im brother or an jān Jenesis 37, kwomaron̄ kōjerbal pija ko ilo Itok, Ļoor Eō—N̄an Kajjojo Armej im Baam̧le Ko ak “Josep eo Ijipt” (ilo Bwebwenato in Kalim̧m̧ur M̧okta). Kōtļo̧k bwe ajri ro ren jipan̄ ilo aer kwaļo̧k tipdikin meļeļe ko rejeļā kōn bwebwenato eo. Kajjitōk ippāer kajjitōk ko āinwōt kein, “Ewi wāween an kar brother ro an Josep nana n̄an E?” Jipan̄ ajri ro ļōmņake men ko me brother ro an remaron̄ kar kōm̧m̧ane n̄an kwaļo̧k iakwe n̄an Josep. Ta eo jej aikuj kōm̧m̧ane n̄e jej en̄jake illu ņae ro uwaan baam̧le ko ad?

• Kwaļo̧k juon pija in juon baam̧le (lale Gospel Art Book, no. 112), ak kajjitōk ippān ajri ro n̄an jin̄n̄aik pija in baam̧le ko aer. Kajjitōk ippāer n̄an kwaļo̧k wāween ko remaron̄ jouj n̄an ro uwaan baam̧le eo.

• Al ippān doon juon al kōn iakwe baam̧le ko ad, āinwōt “A Happy Family” (Al ko Al in Ajri, 198). Ta eo jemaron̄ kōm̧m̧ane n̄an jipan̄ baam̧le ko ad bwe ren m̧ōņōņō?

• Kōtļo̧k bwe ajri ro ren kōļare peij in m̧akūtkūt eo an wiik in im, ilo ijo ejjeļo̧k kobban, jin̄n̄aiki juon pija in ro uwaan baam̧le eo ilo aer jouj.

Jenesis 37:18–28; 39:20–23

Anij emaron̄ jipan̄ eō n̄e men ko renana rej waļo̧k.

Elōn̄ men ko renana rekar waļo̧k n̄an Josep, ak ekar kāālet n̄an kōjparok kien ko an im Irooj ekar pād ippān. Ajri ro reddik remaron̄ ekkatak jān menin bwe Anij ekōņaan jipan̄ er ilo iien ko reppen ilo mour ko aer.

M̧akūtkūt ko Maron̄ Kōm̧m̧ani

• Kōmeļeļeik jet iaan men ko reppen me kar waļo̧k n̄an Josep (lale Jenesis 37:23–28; 39:20; ak “Joseph and His Dreams” im “Joseph in Egypt,” ilo Old Testament Stories). Ālkin am̧ ba n̄an ajri ro kōn iien ko kajjojo reppen me Josep ekar jelm̧ae, kajjitōk ippāer bwe ren āliji, “Irooj Ear Pād ippān Josep” (Jenesis 39:2).

• Kwaļo̧k pija in Rilo̧mo̧o̧r ilo an jipan̄ armej ro rekar jelm̧ae apan̄ ko (lale Gospel Art Book, nos. 40–43). Kajjitōk ajri ro n̄an kwaļo̧k ekōjkan an Rilo̧mo̧o̧r kar jipan̄ armej ro. Kwaļo̧k am̧ naan in kam̧ool bwe Irooj emaron̄ jipan̄ kōj n̄e men ko renana rej waļo̧k n̄an kōj.

• Al juon al kōn iakwe im kea eo an Rilo̧mo̧o̧r n̄an kōj, āinwōt “Jesus Is Our Loving Friend” (Children’s Songbook, 58). Kwaļo̧k en̄jake eo kwar en̄jake kōn iakwe eo an Anij ilo iien ko reppen. Kwaļo̧k juon pija in Jisōs, im kajjitōk ippān ajri ro n̄an kwaļo̧k ta en̄jake eo aer kōn E.

Jenesis 41:15–36, 47–57

Anij emaron̄ kakkōl kōn jorrāān ko.

Anij ekar jipan̄ Josep meļeļe bwe ettōņak ko an Pero rekar juon kakkōl n̄an kōppopo n̄an iien ko reppen rej itok ilju im jekļaj. Jipan̄ ajri ro meļeļe bwe Anij emaron̄ kakkōl kōn kauwōtata ko, ekoba kauwōtata ilo jetōb.

Josep ilo jikin kalbuuj ej ukot ettōņak ko

Josep ej Ukot Ettōņak ok an Butler im Baker, jān François Gérard

M̧akūtkūt ko Maron̄ Kōm̧m̧ani

• Pija ko rejepelōklōk ko in m̧ōn̄ā ko ilowaan ruum eo, im kajjitōk bwe ajri ro ren aiin doon im “kakon” er ilo juon kantāinōr. Kōjerbal m̧akūtkūt in n̄an ba n̄an Ajri ro kōn wāween an Anij kakkōl Pero n̄an kōppopo n̄an juon iien n̄e enaaj ejjeļo̧k m̧ōn̄ā (lale Jenesis 41:15–36, 47–57). Kajjitōk ippān ajri ro n̄an jin̄aik juon men me raar katak rainin im kōjerbal pija eo aer n̄an katakin baam̧le ko aer.

• Kwaļo̧k juon pija in rikanaan eo kiiō. Ba n̄an ajri ro kōn katak ok ak kakkōl ko me ekar letok n̄an kōj kōn e. Kōmeļeļeik bwe jenaaj jeraam̧m̧an im en̄jake kōjparok ilo ad ļoor rikanaan eo. Kajjitōk ippān ajri ro n̄an kōm̧m̧an arin men ko remaron̄ kōm̧m̧ani n̄an ļoor kapilōk eo an rikanaan eo.

pija ej bōk jikin katakin

Katakin Katak eo: Ajri ro Rerūttoļo̧k

Jenesis 39:1–3, 20–23; 41:38

Eļan̄n̄e ij tiljek, Anij enaaj jipan̄ eō ilo iien ko reppen.

Men̄e Josep ekar lōn̄`mellijon̄ ko reppen ekar jelm̧ae, ekar pād wōt ilo tiljek im “Irooj ear pād ippān” (Jenesis 39:3). En̄jake eo an emaron̄ jipan̄ ajri ro en̄jake lōke bwe Anij enaaj jipan̄ er ilo iien mellijon̄ ko.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kappukot naan ko ilo Jenesis 39:1–3, 20–23; 41:38 me ej kwaļo̧k bwe Anij ekar pād ippān Josep ilo iien ko an reppen. N̄e ekkar, kajjitōk ippān ajri ro n̄an kōm̧m̧an juon kōkaļļe jidikdik ej kwaļo̧k juon iaan aan ko rej loi. Kōketak er n̄an bōk kōkaļļe ko n̄an m̧ōko n̄an kakeememej er bwe Irooj enaaj pād ippāer ilo iien mellijon̄ ko aer.

• Kajjitōk ippān ajri ro n̄an kwaļo̧k ta eo rej ļōmņak kake kōn nan ko “Irooj ear pād ippān Josep” meļeļein (Jenesis 39:2). Kajjitōk ippāer n̄an kwaļo̧k en̄jake ko ke rekar en̄jake an Irooj pād ippāer ak baam̧le ko aer ilo juon iien epen. Kwaļo̧k en̄jake ko rej āinwōt juon jān mour eo am̧.

Jenesis 37:3–28

Imaron̄ in m̧ōņōņō n̄e men ko rem̧m̧an rej waļo̧k n̄an ro jet.

Ebanban ekar tōl brother ro an Josep n̄an kōm̧m̧ani jokāālet ko renana. Jokāālet kein rebōd rekar kōmetak im rube buruōn ro jemāer. Bwebwenato in emaron̄ jipan̄ ajri ro kāālet bwe ren em̧ōņōņō n̄e ro jet rej jeraam̧m̧an jān Irooj.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an bar kakeememej Jenesis 37:3–11 im jin̄n̄aik pijaan kobe eo an Josep im coat eo an. Ta en̄jake ko an brother ro an Josep kōn Josep? Ekōjkan aer nej kar oktak aer n̄an jān doon? Ekkōnono etke eaorōk bwe jen m̧ōņōņō n̄e men ko rem̧m̧an rej waļo̧k n̄an ro jet.

• Kajjitōk ippān ajri ro n̄an kwaļo̧k jekjek ko me juon armej emaron̄ ebanbane bar juon armej. Al ippān doon juon al kōn kwaļo̧k iakwe n̄an ro jet, āinwōt “Love One Another” (Children’s Songbook, 136–37). Kwaļo̧k bwe Jemedwōj Ilan̄ emaron̄ jipan̄ kōj penej jenkwon en̄jake in ebanban ko n̄an en̄jake in iakwe.

Jenesis 39:7–12

Kōn jipan̄ eo an Irooj, imaron̄ ko jān kapo.

Ilo an ajri ro kwoj katakin jelm̧ae kapo ko kōn mour ko aer, remaron̄ bōk kajoor jān waanjon̄ak eo an Josep ke ekar ko jān kapo.

M̧akūtkūt ko Maron̄ Kōm̧m̧ani

• Kwaļo̧k juon pija in Josep im kōrā eo pāleen Potipar (lale Gospel Art Book, no. 11), im kwaļo̧k bwebwenato eo ilo Jenesis 39:7–12. Ekōjkan an kar Josep anjo̧ ioon kapoi? Jipan̄ ajri ro kappukot naan ko ilo Jenesis 39:7–12 me ej uwaake kajjitōk in—n̄an waanjon̄ak, Josep ekar jeļā bwe pād ippān kōrā eo pāleen Potipar enaaj erom̧ juon “jero̧wiwi n̄an Anij” (eoon 9).

• Kajjitōk ippān ajri ro n̄an ļōmņak kōn jekjek ko me ajri ro me ded jab kan remaron̄ po n̄an kōm̧m̧an jokāālet ko rebōd. Kajjitōk ippān n̄an kwaļo̧k kilen ak kōm̧m̧an arin wāween aer ļoor waanjon̄ak eo an Josep ilo jekjek kein—n̄an waanjon̄ak, ta wāween ko jet jemaron̄ keememej Anij n̄e jej pād ilo kapo?

• Kwaļo̧k ruo jitūūl, rej bōk jikin Anij im Setan, im juon m̧weik aen jidikdik āinwōt kein dāpij pepa eo, ej bōk jikin kōj. Kōjerbal jiitūūl ko n̄an kōmeļeļeik bwe ad epaakeļo̧k Anij, An im̧we enaaj kajoorļo̧k iood, im ejja āinwōt in em̧ool n̄e jej epaakeļo̧k Setan. Ta eo jemaron̄ kōm̧m̧ane n̄an epaakeļo̧k Anij? Ekōjkan an Jetōb Kwojarjar eo maron̄ jipan̄ kōj?

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an kwaļo̧k wāween ko n̄an kadedeikļo̧k jentōj in ej ellaajrak: “Imaron̄ erom̧ āinwōt Josep jān .” Kōketak er n̄an kwaļo̧k ippān baam̧le ko aer men ko rej kadedeikļo̧k ilo Būraimere eo.

Kōkm̧anm̧anļo̧k Ad Katakin

Kajjitōk n̄an Kwaļo̧k Kajjitōk ippān ajri ro kōn ļōmņak ko aer, en̄jake, im imminene ko. Kwonaaj kappukot bwe eļap jeļā eo ippāer

peij in m̧akūtkūt: Imaron̄ jouj n̄an baam̧le eo aō