Adam im Iv rej em̧m̧akūt jān Jikin Kallip Iden

Em̧m̧anļo̧k jān Paradise, jān Kendal Ray Johnson

Jānwōde 17–23

Jenesis 5; Moses 6

“Katakin Men Kein n̄an Ro Nejimi”

Ilo am riit im kōļmenļo̧kjeņ kōn Jenesis 5 im Moses 6, je en̄jake in jetōb ko rej im̧we eok. Ta ennaan ko kwoj loi me raorōk n̄an kwe im baam̧le eo am̧?

Je En̄jake ko Rej Im̧we Eok

Enan̄in aolepān Jenesis 5 ej juon laajrak in epepen ko kōtaan Adam im Iv im Noa. Jej riiti elōn̄ āt ko, ak jejjab kanooj ekkatak kaki. Innām jej riit kōn Inōk, jiljino epepen ko jān Adam, eo kar kōmeļeļeik kōn kōttōbalbal in ak eaar jab waļo̧k: “Im Inok ear etetal ippān Anij: im e jako; bwe Anij ear bōk e” (Jenesis 5:24). Em̧ool ewōr juon bwebwenato itulikin. Ak ijelļo̧kin elōn̄ļo̧k kōmeļeļe, laajrak in epepen ko rej ijjino.

Kam̧m̧oolol, Moses 6 ej kwaļo̧k laajrakin bwebwenato eo an Inōk—im ej juon bwebwenato em̧m̧an. Jej ekkatak kōn ettā eo an Inōk, an peran, em̧m̧an eo Anij ej lo ilo e, im jerbal eo ekabwilōn̄lōn̄ eaar kōm̧m̧ane āinwōt rikanaan an Anij. Jej bar bōk juon pija ealikkarļo̧k kōn baam̧le eo an Adam im Iv āinwōt an epepen ko wōnm̧aanļo̧k. Jej riit kōn “ļap in pepe” eo an Setan ak kōn bar ro jinen im jemān ro raar katakin ajri ro “iaļ ko an Anij” im “rikwaļo̧k in wānōk” ro “raar kōnono im kanaan”. (Moses 6:15, 21, 23). Aorōk eo eļaptata ej ta eo jej ekkatak kōn katak kein ro jinen im jemān im rikwaļo̧k ro raar katakin: tōmak, ukweļo̧k, peptaij, im bōk Jetōb Kwojarjar (lale Moses 6:50–52). Katak in, āinwōt priesthood eo ej ekkeijelļo̧k, “ekar pād ilo jinoin [im] enaaj pād ilo jem̧ļo̧k in laļ in barāinwōt” (Moses 6:7).

pija ej bōk jikin ekkatak ippam̧ make

Ļōm̧ņak ko n̄an Ekkatak Jeje Ko Rekwojarjar Ippam̧ Make

Moses 6:26–36

Juon rikanaan ej juon rilolo.

Ilo am ekatak Moses 6:26–36, ta eo kwoj ekkatak kōn māj ko, maroklep, im loe? Ilo tōre eo an Inōk, wōn ro rejjab “lo ettoļo̧k”? Etke armej rein raar jab lo m̧ool eo? Ta eo Inok eaar loe? Ta eo ekar kalōk am tōmak me rikanaan ro raan kein ran rilolo ro? (lale eoon 36; Unin Tōl n̄an Jeje ko Rekwojarjar, “Rilolo,” scriptures.ChurchofJesusChrist.org).

Moses 6:26–47

Anij ej kūr kōj n̄an kōm̧m̧ane jerbal eo An kōjekdo̧o̧n likjab ko ad.

Ejjab aolep iien n̄an en̄jake ilbōk kōn ta eo Irooj eaar kūr kōj n̄an kōm̧m̧ane. Men̄e Inok eaar en̄jake wāween eo an kar Irooj kūr e bwe en juon rikanaan. Ilo am riiti Moses 6:26–36, kappukot ta unin an kar Inok en̄jake m̧ōņōņō im ta eo Irooj eaar ba n̄an leļo̧k n̄an e peran. Ilo eoon 37–47, kappukot wāween ko an kar Irooj jipan̄ Inok im kar kōkajoor e n̄an kōm̧m̧ane jerbal eo An (bar lale Moses 7:13). Komaron̄ keidi en̄jake eo an Inok ippān rikanaan ro jet ro raar en̄jake ebweer, āinwōt Moses (lale Exodus 4:10–16), Jeremaia (lale Jeremaia 1:4–10), Nipai (lale 2 Nipai 33:1–4), im Moronai (lale Ether 12:23–29). Ta eo kwoj en̄jake Anij ekōņaan jān kwe n̄an jeļā jān eoon kein kōn jerbal eo Eaar lewaj bwe kwon kōm̧m̧ane?

Bar lale Jekab 4:6–8.

Moses 6:48–68

Katak eo an Kraist ej unjen karōk in lo̧mo̧o̧r eo an Anij.

Kōnke ewōr ippād bok in Moses, jej jeļā bwe Anij eaar katakin ro Nejin kilen jeo̧rļo̧k bōd im pinmuur jān kar jinoin. Ilo jeje ko rekwojarjar, katak kein raar jet iien kar ņaetaer katak an Kraist (lale 2 Nipai 31: 13–21). Ilo am̧ ekkatak Mose 6: 48–68, lale ta jej aikuj jeļā im kōm̧m̧ane n̄an lo̧mo̧o̧r. Komaron̄ lo eļapļo̧k jipan̄ n̄an je am̧ make kōmeļeļe kōn ta eo Inok eaar katakin. Etke eaorōk n̄an jeļā bwe m̧ool kein kar kwaļo̧ki jān kar raan ko an Adam im Iv? Ta eo kwoj en̄jake im ej im̧we eok n̄an kōm̧m̧ane āinwōt juon tōprak in ekkatak katak kein?

Moses 6:51–62

“Katakin Men Kein n̄an Ro Nejimi”

Adam im Iv rekar ekkatak kōn m̧ool kein an gospel eo an Jisōs Kraist. Ak ilo naan ko an Irooj ilo Moses 6:27–28 ealikkar bwe ilo epepen ko m̧okta jān Inok, elōn̄ armej raar jab mour kake m̧ool kein. Irooj ekar kōņaan Inok n̄an kōjepļaaktok m̧ool ko me raar jako—ippān tok kien eo jinoin kar leļo̧k n̄an Adam: “Katakin Men Kein n̄an Ro Nejimi” (Moses 6:8). Ilo am riiti Moses 6:51–62, ta eo kwoj ekkatak kōn Jisōs Kraist? Ta eo kwoj loe me emaron̄ in lukkuun aorōk n̄an diktak in epepen in? Ta eo komaron̄ kōm̧m̧ane n̄an jipan̄ leto letak m̧ool kein n̄an epepen eo tokālik?

baam̧le eo ej ekkatak jeje ko rekwojarjar

Jinen im jemān ajri ro rej aikuj katakin ajri ro nejier gospel in.

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jenesis 5; Moses 6:5–25, 46.Riit kōn “bok in keememej” me baam̧le eo an Adam im Iv raar kōjparok me emaron̄ im̧we baam̧le eo am n̄an kōm̧m̧an am̧ make bok in keememej. Ekōnono āinwōt juon baam̧le ta eo kwoj kōņaan kobaiki. Bōlen ewōr am̧ pija, bwebwenato, ak peba ko jān menmenbwij eo am̧. Komaron̄ kālet n̄an kobaik men ko me rej waļo̧k ilo baam̧le eo am̧ kiiō. Ta eo epepen eo ilju im jekļaj renaaj lo aorōkin? Komaron̄ bar ekōnono elmen an naan eo “jān jitōbōn” (Moses 6:5) im “jon̄ok eo kar letok in addiin Anij” (Moses 6:46) emaron̄ tōl kijejeto ko am̧. Ļōmņak in kōjparok meļeļe ko jān bok in keememej eo am̧ ilo FamilySearch.org.

Moses 6:53–62.Elmen ad uwaake kajjitōk eo an Adam ilo Moses 6:53? Ta uwaak ko jej loi ilo eoon 57–62?

Moses 6:59.Ta meļeļein n̄an “bar lo̧tak ilo aelōn̄ in lan̄”? Ta eo jemaron̄ kōm̧m̧ane n̄an wōnm̧aanļo̧k wōt im bar ļotak ilo mour ko ad? N̄an jipan̄ lale Alma 5:7–14, 26; Unin Tōl n̄an Jeje ko Rekwojarjar, “Bar Ļotak, Ļotak n̄an Anij” scriptures.ChurchofJesusChrist.org; David A. Bednar, “Always Retain a Remission of Your Sins” (Liahona, May 2016, 59–62).

Moses 6:61.Ta eo jej ekkatak kōn Jetōb Kwojarjar jān eoon kein?

Moses 6:63.Ta jet iaan men ko me rej “kam̧ool kōn [Kraist]” (bar lale 2 Nipai 11:4). Ļōmņak in karuwaineneiktok ro uwaan baam̧le ko n̄an kwaļo̧k men ko raar loi “ilo men ko an lan̄” ak “ioon laļ” me ejipan̄ er jeļā kōn Jisōs Kraist. N̄an waanjon̄ak, elmen an wōjke, dōkā, ak aļ kakeememej kōj kōn Rilo̧mo̧o̧r? Ta taitōļ eo “dānnin mour” im “bread in mour” ej katakin kōn E? (Jon 4:10–14; 6:35).

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Emaron̄ Jab Ion Tol Eutiej,” Al, no. 270.

Kōkōm̧anm̧anļo̧k Am̧ Ekkatak Ippam̧ Make

Pukot kōkaļļe ko. Ilo jeje ko rekwojarjar, kein ekkatak ak men ko ekkā aer bōk jikin ak kōkaļļein m̧ool ko ilo jetōb. Kōkkaļļe kein remaron̄ kōļapļo̧k meļeļe eo am̧ kōn katak in. N̄an waanjon̄ak, ta eo kwoj ekkatak jān kōkkaļļe ko kōn māj im kle ilo Moses 6:35?

Adam im Ive ippān ajri ro

Adam im Iv rej Katakin Ajri ro, jān Delp Parson