Fa’ahōho’ara’a nō Aberahama ’e ’o Sara, nā Dilleen Marsh

7–13 nō Fepuare

Genese 12–17 ; Aberahama 1–2

« ’Ia riro ’ei ta’ata pe’e mau i te parauti’a »

E ha’amana’o ē ’aita e tītauhia—’aore rā, e’ita e nehenehe—e tuatāpapa i te mau mea ato’a i roto i teie arata’i. Vaiiho i te Vārua e arata’i ia ’oe i te mau parau tumu ’e i te mau ’ohipara’a e riro ’ei mea faufa’a a’e nō te mau tamari’i tā ’oe e ha’api’i ra.

Pāpa’i i te mau mana’o e tae mai

Tītau i te mana’o

’Ua anihia i te mau ’utuāfare o te mau tamari’i tā ’oe e ha’api’i ra ’ia ha’api’i mai nō ni’a ia Aberahama ’e ’o Sara i teie hepetoma i ma’iri a’e nei. E hōro’a i te mau tamari’i i te rāve’a nō te fa’a’ite mai i te tahi mea tā rātou i ’ite nō ni’a ia Aberahama ’aore rā ia Sara.

Ha’api’i i te ha’api’ira’a tumu : Te mau tamari’i ’āpī a’e

Aberahama 1:18 ; 2:8

E nehenehe Iesu Mesia e arata’i iā’u nā te rima.

’Ua hina’aro o Aberahama ’ia riro ’ei ta’ata parauti’a noa atu ē, e mea ’ino te mau melo o tōna ’utuāfare. ’Ua parau te Fatu iāna, « e arata’i au ia ’oe i tō’u nei rima » (Aberahama 1:18). Mai tā te Atua i fafau e tauturu ia Aberahama, e nehenehe ’oia e arata’i i te mau tamari’i tā ’oe e ha’api’i ra mai te mea e hina’aro rātou e mā’iti i te maita’i.

Mau ’ohipara’a e nehenehe e rave

• Tai’o i te mau tamari’i i te Aberahama 1:18 ’e 2:8, ’e e ani i te mau tamari’i ’ia fa’aro’o i te hō’ē tuha’a o te tino ’o tei fa’ahitihia i roto i nā ’īrava to’opiti. E aha tō tātou huru mai te mea e arata’i Iesu Mesia ia tātou nā te rima ’aore rā e pāruru tōna rima ia tātou ? ’A fa’a’ite pāpū ē, e arata’i Iesu ia tātou nā roto i tōna Vārua.

• E fa’a’ohipa « Aberahama ’e ’o Sara » (i roto Te mau ’ā’amu o te Faufa’a Tahito) nō te tauturu i te mau tamari’i ’ia hāro’aro’a ē, ’ua rave noa te ta’ata ’ati a’e ia Aberahama i te ’ohipa ’ī’ino, ’ua hina’aro rā ’o Aberahama e rave i te ’ohipa ti’a ’e ’ua tauturu te Fatu iāna. Nāhea te Metua i te Ao ra ’e ’o Iesu Mesia i te tauturu ia tātou ’ia tāmata ana’e tātou i te mā’iti i te parauti’a ? E hīmene i te hō’ē hīmene e tū’ati i ni’a iho i teie parau tumu, mai te « Apprends-moi à marcher dans la clarté » (Chants pour les enfants, 70).

• ’A fa’a’ite e rave rahi hōho’a o te Fa’aora (hi’o Buka hōho’a nō te ’evanelia, n° 38, 39, 40, ’e 41), ’e e tauturu i te mau tamari’i ’ia hi’o i te mau mea tāna i rave i tōna nā rima. E aha tā tātou e nehenehe e rave i tō tātou nā rima nō te tauturu ia vetahi ’ē ?

Genese 13:5–12

E nehenehe au e riro ’ei ta’ata fa’atupu hau.

’A mārō ai te mau tīa’i māmoe a Aberahama ’e te mau tīa’i māmoe a Lota nō ni’a i tā rātou mau fenua fa’a’āmura’a ’ānimara, ’ua tu’u atu ’o Aberahama i te hō’ē rāve’a tei fa’atupu i te hau. E nehenehe ’oe e fa’a’ohipa i teie hi’ora’a nō te fa’auru i te mau tamari’i ’ia riro ’ei mau ta’ata fa’atupu hau.

Mau ’ohipara’a e nehenehe e rave

• E fa’a’ite i te mau tamari’i i te ’ā’amu nō roto mai i te Genese 13:5–12, ’e e ani ia rātou ’ia ha’uti mai i te reira. E vaiiho i te mau tamari’i i te fa’ahua ē, ’o Aberahama, tāna tamaiti fēti’i ’o Lota, ’e te mau tīa’i māmoe, rātou. E hōro’a ia rātou i te mau rāve’a nō te pe’e i te hi’ora’a o Aberahama i te rirora’a ’ei ta’ata fa’atupu hau, ma te ha’utira’a ’e te hō’ē hoa, te tahi i muri i te tahi, i te hō’ē tao’a ha’uti. E ani ia rātou ’ia ha’uti mai i teie mau hi’ora’a.

• ’A tai’o i te Mataio 5:9, ’e ’a fa’ata’a atu ē, tē hina’aro nei Iesu ’ia riro tātou ’ei mau ta’ata fa’atupu hau. Tauturu i te mau tamari’i ’ia feruri i te mea tā rātou e nehenehe e rave nō te riro ’ei mau ta’ata fa’atupu hau i te fare ’aore rā ’e te mau hoa. E ani ia rātou e pāpa’i i tō rātou iho hōho’a ’ei ta’ata fa’atupu hau. ’A ani i te mau tamari’i ’ia fa’a’ite mai e aha tō rātou huru ’ia riro ana’e rātou ’ei mau ta’ata fa’atupu hau mai ia Iesu Mesia.

Genese 15:1–6 ; 17:1–8 ; Aberahama 2:9–11

E mea faufa’a ’ia tāpe’a i tā’u mau parau fafau.

E nehenehe te ’itera’a i te fafaura’a tā te Atua i rave ’e ’o Aberahama ’e ’o Sara, e tauturu i te mau tamari’i ’ia hāro’aro’a i te aura’a nō te tāpe’ara’a i te mau parau fafau. E nehenehe ato’a te reira e tauturu ia rātou ’ia fa’aineine nō te rave ’e nō te ha’apa’o i te mau fafaura’a.

Mau ’ohipara’a e nehenehe e rave

• E ani i te mau tamari’i, ’ua ’ite ānei rātou e aha te hō’ē parau fafau ’aore rā te hō’ē fafaura’a. E ani ia rātou ’ia fa’a’ite mai i te mau ’itera’a ’a rave ai rātou i te hō’ē parau fafau ’aore rā ’a rave ai te hō’ē ta’ata i te hō’ē parau fafau ia rātou. Mai te mea e tauturu te reira, ’a fa’a’ite i te tahi mau hi’ora’a nō ’oe iho. Tauturu i te mau tamari’i ’ia hāro’aro’a ē, ’ua fafau ’o Aberahama ’e ’o Sara ’ia ha’apa’o i te parau a te Atua. Mā’iti i te tahi mau pereota i roto i te Genese 15:1–6 ; 17:1–8 ; Aberahama 2:9–11 nō te fa’a’ite mai i te tahi o te mau ha’amaita’ira’a tā te Atua i fafau ia rāua. Teie te tahi « ’eiaha e mata’u, e Aberama : ’o vau tō ’oe pāruru », « E riro ’oe ’ei metua nō te mau fenua e rave rahi », ’aore rā « ’ei ia ’oe e maita’i ai te mau fēti’i ato’a o te ao nei ».

• E aha te tahi mau parau fafau ’ōhie e nehenehe te mau tamari’i e rave ’e e tāpe’a mai i te roara’a o te piha ha’api’ira’a ? ’Ei hi’ora’a, e ani ia rātou ’ia fafau mai e pārahi i ni’a i tō rātou pārahira’a nō te tahi tau minuti ’aore rā e fa’anaho i tō rātou pārahira’a ’ia fa’aoti te piha ha’api’ira’a. E fa’a’ite ia rātou i te hō’ē taime ’a rave ai ’oe i te hō’ē parau fafau ’e ’ua tāpe’a i te reira, ’e e ani ia rātou ’ia fa’a’ite mai i te mau ’ohipa i tupu nō rātou. Tauturu ia rātou ’ia hāro’aro’a ē, e rave rātou i te mau parau fafau ’e te Metua i te Ao ra i te taime e bāpetizohia ai rātou ’e i te taime e haere ai rātou i te hiero.

Ha’api’i i te ha’api’ira’a tumu : Te mau tamari’i pa’ari

Aberahama 1:12–17

Tē fa’aro’o nei ’e tē pāhono nei te Metua i te Ao ra i tā’u mau pure.

I te taime i fifi ai te ora o Aberahama, ’ua ti’aoro ’oia i te Atua ’e ’ua fa’aorahia ’oia. Tē vai ra paha te mau ’itera’a o te mau tamari’i tā ’oe e ha’api’i ra nō ni’a i te pure, ’o tā rātou e nehenehe e fa’a’ite mai.

Mau ’ohipara’a e nehenehe e rave

• E fa’a’ite i te hōho’a Hō’ē melahi e fa’aora ra ia Aberahama (ChurchofJesusChrist.org), ’e e ani i te mau tamari’i ’ia fa’a’ite mai e aha tā rātou i ’ite nō ni’a i te ’ā’amu tā te hōho’a e fa’a’ite nei, e ’itehia i roto i te Aberahama 1:12, 15–17. E ani i te mau tamari’i ’ia tai’o i teie mau ’īrava ’e ’ia fa’a’ite mai i te mau mea tā rātou i ha’api’i mai nō ni’a i te pure.

• E ani i te mau tamari’i ’ia fa’a’ite mai i te mau ’itera’a ’a pāhono ai te Metua i te Ao ra i tā rātou pure, ’e ’a fa’a’ite i te hō’ē o tō ’oe iho mau ’itera’a.

Genese 13:5–12

E nehenehe au e riro ’ei ta’ata fa’atupu hau.

Tē fa’aruru nei tātou pā’āto’a i te mau huru ’ohipa ’o te fa’atupu ia tātou i te riri ’e i te fa’a’ino. ’A feruri e nāhea te ’ā’amu o Aberahama ’e ’o Lota e nehenehe ai e tauturu i te mau tamari’i ’ia riro ’ei mau ta’ata fa’atupu hau i roto i taua mau huru ’ohipa ra.

Mau ’ohipara’a e nehenehe e rave

• Pāpa’i Mau huru mau, Fa’anahora’a, Fifi, ’e Rāve’a i ni’a i te tāpura ’ere’ere. E ani i te mau tamari’i ’ia tai’o i te Genese 13:5–12 ’e e ’imi mai i te mau tuha’a o te ’ā’amu i tāpurahia i ni’a i te tāpura ’ere’ere. Tauturu i te mau tamari’i ’ia feruri i te mau taime e nehenehe ai rātou e riro ’ei mau ta’ata fa’atupu hau, ’ei hi’ora’a ’ia mārō ana’e te hō’ē ta’ata ’aore rā ’ia tāmata te hō’ē ta’ata i te ’aro atu. I muri iho, e ani ia rātou ’ia ha’uti mai e mea nāhea rātou e ti’a ai ’ia riro ’ei mau ta’ata fa’atupu hau i roto i taua mau ’ohipa e tupu ra.

• E tauturu i te mau tamari’i ’ia ’imi mai i te mau tumu parau « Hau » ’e « Ta’ata fa’atupu hau » i roto i te Guide des écritures (scriptures.ChurchofJesusChrist.org). E ani i te tamari’i tāta’itahi ’ia mā’iti i te hō’ē pāpa’ira’a mo’a nō ni’a i te hau ’e ’ia fa’a’ite mai i te piha ha’api’ira’a e aha tāna i ha’api’i mai. Tauturu ia rātou ’ia feruri i te tahi mau hi’ora’a nō te Fa’aora i te rirora’a ’ei ta’ata fa’atupu hau, mai teie i roto i te Luka 22:50–51. Nāhea e ti’a ai ia tātou ’ia pe’e i tōna hi’ora’a ?

  

  Te mā’itira’a a Lota © Providence Collection/licensed nō roto mai i te goodsalt.com

Genese 17:1–8 ; Aberahama 2:8–11

E nehenehe au e ha’apa’o i te mau fafaura’a tā’u i rave i mua i te Metua i te Ao ra.

E nehenehe te ha’api’ira’a i te mau tamari’i nō ni’a i te fafaura’a tā te Atua i rave ’e ’o Aberahama ’e ’o Sara, e tauturu ia rātou ’ia feruri nō ni’a i tā rātou iho mau fafaura’a.

Mau ’ohipara’a e nehenehe e rave

• E ani i te mau tamari’i ’ia tai’o i te Genese 17:1–8 ’e Aberahama 2:8–1 ’e e hāmani e piti tāpura : e aha tā Aberahama i ani e rave ’e e aha tā te Fatu i fafau mai iāna. E aha tā tātou e ha’api’i mai nō ni’a i te Fatu nā roto mai i teie mau ’īrava ?

• E fa’a’ite i te hō’ē hōho’a nō te hō’ē ta’ata e bāpetizohia ra (hi’o Buka hōho’a o te ’evanelia, n° 103, 104). E ani i te mau tamari’i ’ia tāpura i te mau parau fafau tā te hō’ē ta’ata e rave i te bāpetizora’a ’e te mau parau fafau tā te Atua e fafau mai. E parau i te mau tamari’i ’ia hi’o i roto i te Mosia 18:10 ; Te Parau Ha’api’ira’a ’e te mau Parau Fafau 20:37, 77, 79. nō te tauturu. E aha tā tātou e nehenehe e rave nō te ha’apa’o i te mau fafaura’a tā tātou i rave i te bāpetizora’a ?

Fa’aitoito i te ’apora’a mai i te fare

E hāpono i te hō’ē nota i te fare ’e te mau tamari’i nō te fa’aitoito i te mau melo o tō rātou ’utuāfare ’ia tāpa’o i te taime e riro ai te mau tamari’i ei mau ta’ata fa’atupu hau, e ha’apa’o i te mau parau fafau, ’aore rā e rave i te tahi atu ’ohipa tā ’outou i ’āparau i roto i te piha ha’api’ira’a.

Ha’amaita’iraʼa i tā tātou ha’api’ira’a

E mea ha’uti te mau tamari’i. I te tahi taime, nō tō rātou huru ha’uti, e au ra ē tē nevaneva ra te mau tamari’i i roto i te ha’api’ira’a mai, terā rā, e nehenehe ’oe e fa’a’ohipa i tō rātou huru ha’uti ’ei tuha’a nō tā rātou ’apora’a mai. E ani ia rātou ’ia ha’uti mai i te hō’ē ’ā’amu ’aore rā, ’ia rave i te mau ’ohipa e tū’ati i ni’a i te mau ta’o i roto i te hō’ē hīmene ’aore rā te hō’ē pāpa’ira’a mo’a. (Hi’o Ha’api’ira’a mai tā te Fa’aora, 25–26.)