Noa, tōna ’utuāfare, te mau ’ānimara, te pahī, ’e hō’ē anuanua

Fa’ahōho’ara’a nō Noa e haere ra i rāpae i te pahī, nā Sam Lawlor

31 nō Tēnuare–6 nō Fepuare

Genese 6–11 ; Mose 8

« ’Ua aroha te Fatu ia Noa »

E nehenehe te ha’api’ira’a mai nō ni’a i te mau ’ānimara i roto i te pahī o Noa ’e nō ni’a i te pare o Babela e riro ’ei ’ohipa ’ārearea nō te mau tamari’i. E ha’amana’o rā ē, ’ua fa’ata’ahia teie mau ’ā’amu nō te ha’api’i i te mau parau mau mure ’ore. ’A feruri nā roto i te pure i te mau parau mau tā te Atua e hina’aro ’ia ha’api’i mai te mau tamari’i.

Pāpa’i i te mau mana’o e tae mai

ītona fa’a’itera’a

Tītau i te mana’o

Hou ’a ha’amata ai ’oe i te ha’api’i i te mau ’ā’amu i roto i te Genese 6–11 ’e te Mose 8 i te mau tamari’i, ’a hōro’a ia rātou i te hō’ē rāve’a nō te ha’api’i i te tahi ’e te tahi i te mea tā rātou i ’ite nō ni’a ia Noa ’e te pahī ’aore rā te pare o Babela.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī a’e

Genese 6:14–22 ; 7–8 ; Mose 8:16–30.

E ha’amaita’i te pe’era’a i te peropheta iā’u ’e i tō’u ’utuāfare.

’A ha’api’i mai ai te mau tamari’i i te pe’e i te peropheta, e ha’amaita’ihia rātou, ’e e pāruruhia rātou i te pae vārua, mai ia Noa ’e tōna ’utuāfare i pāruruhia i te tīruvi.

Mau ’ohipara’a e nehenehe e rave

• Nā roto i tā ’oe iho mau parau, ’a fa’ati’a i te ’ā’amu o Noa ’e te pahī (hi’o « Noa ’e tōna ’utuāfare », i roto i Te mau ’ā’amu o te Faufa’a Tahito; hi’o ato’a « Suis les prophètes », Chants pour les enfants, 58–59, ’īrava 3). E tauturu i te mau tamari’i ’ia ha’uti mai i te tahi mau tuha’a o te ’ā’amu—’ei hi’ora’a, ma te fa’ahua i te fa’a’ohipa i te hō’ē mauha’a nō te hāmani i te pahī ’aore rā, te haerera’a mai te mau ’ānimara e tomo ra i roto i te pahī.

• Tai’o i te mau tamari’i i te Mose 8:19–20, ma te ha’apāpū i te mea tā te Fatu i fa’aue ia Noa ’ia rave. E tauturu i te mau tamari’i ’ia māramarama ē, e peropheta ’o Noa ’e ’ua fa’aorahia tōna ’utuāfare i te tīruvi nō te mea ’ua pe’e rātou iāna. E ani i te mau tamari’i ē, ’ua ’ite ānei rātou ’o vai tō tātou peropheta i teie mahana. ’A fa’a’ite i te hō’ē hōho’a nōna, ’e ’a tauturu i te mau tamari’i ’ia fa’ahiti i tōna i’oa.

• E hōpoi mai i roto i te piha ha’api’ira’a i te mau hōho’a ’aore rā i te mau tao’a e fa’ahōho’a i te mau ha’api’ira’a a te peropheta o teie mahana, mai te mau pāpa’ira’a mo’a ’aore rā hō’ē hōho’a o te hiero. E vaiiho i te mau tamari’i, te tahi i muri mai i te tahi, ’ia mā’iti i te hō’ē tao’a ’e ’ia fa’a’ite mai i te mea tā rātou i ’ite nō ni’a i te reira. E fa’ata’a ia rātou i tā te reira tao’a e fa’ahōho’a ra. E fa’aitoito ia rātou ’ia pāpa’i i tō rātou iho hōho’a e ha’apa’o ra i te mea tā te peropheta i ha’api’i. ’A fa’a’ite i tō ’oe ’itera’a pāpū nō ni’a i te mau ha’amaita’ira’a nō te pe’era’a i te peropheta.

Genese 9:15-16

E tāpe’a te Atua i tāna mau parau fafau ia tātou.

E mea faufa’a nō te mau tamari’i ’ia ’ite ē, e tāpe’a te Atua i tāna mau parau fafau, i te taime iho ā rā ’a fa’aineine ai rātou i te rave i te mau fafaura’a ’e te Atua i te taime e bāpetizohia ai rātou.

Mau ’ohipara’a e nehenehe e rave

• E ani i te mau tamari’i ’ia pāpa’i hōho’a i te mau ānuanua. E tai’o ia rātou i te Genese 9:15–16, ’e e ani ia rātou ’ia fa’aro’o i te ta’o ra ha’amana’o. ’A ani ia rātou ’ia ’āfa’i i tā rātou ānuanua i ni’a ’ia fa’aro’o ana’e rātou i te ta’o. E fa’ata’a atu ē, ’ua riro te mau ānuanua ’ei fa’aha’amana’ora’a i te mau fafaura’a tā te Atua i rave ’e o tātou.

• E paraparau i te mau tamari’i i te tahi mau fafaura’a a te Atua—’ei hi’ora’a, e nehenehe tātou e ho’i fa’ahou i pīha’i iho i te Metua i te Ao ra mai te mea e pe’e tātou ia Iesu Mesia ’aore rā, e tono mai te Atua i te Vārua Maita’i nō te tāmāhanahana ia tātou. ’A fa’a’ite i tō ’oe ’itera’a pāpū ē, e tāpe’a noa te Atua i tāna mau fafaura’a.

• Fa’a’ohipa i te mau hōho’a nō te parau i te mau tamari’i i te mau fafaura’a tā tātou i rave ’e te Atua, mai te mau hōho’a o te hō’ē tamari’i e bāpetizohia ra, te ’ōro’a mo’a, ’e hō’ē hiero (hi’o Buka hōho’a o te’evanelia, n° 104, 108, 120).

Genese 11:1–9

Te ’ē’a hō’ē roa e tae atu ai i te ra’i, ’o te pe’era’a ïa ia Iesu Mesia.

’Ua mana’o te mau ta’ata nō Babela ē, e tae rātou i te ra’i nā roto i te patura’a i te hō’ē pare ’eiaha rā nā roto i te orara’a i te ’evanelia a Iesu Mesia. Nāhea ’oe e nehenehe ai e tauturu i te mau tamari’i ’ia hāro’aro’a ē, te pe’era’a i te Fa’aora, ’o te ’ē’a hō’ē roa ïa nō te ho’i fa’ahou i pīha’i iho i tō tātou Metua i te Ao ra ?

Mau ’ohipara’a e nehenehe e rave

• E fa’ati’a i te ’ā’amu nō te pare o Babela nā roto i tā ’oe iho mau parau, ’aore rā ’a tai’o i te ’ā’amu e ’itehia i roto i « Te patu o Babela » (i roto i Te mau ’ā’amu o te Faufa’a Tahito). E fa’aitoito i te mau tamari’i ’ia tauturu ia ’oe nā roto i te fa’a’itera’a mai i te mea tā rātou i ’ite nō ni’a i te ’ā’amu.

  fa’ahōho’ara’a i te pare o Babela

  Fa’ahōho’ara’a i te pare o Babela, nā David Habben

• E vaiiho i te mau tamari’i ’ia hāmani i te hō’ē pare ma te fa’a’ohipa i te mau ’ōfa’i ’aore rā, te tahi atu mau tao’a. I muri iho, e fa’a’ite i te mau tamari’i i te hō’ē hōho’a o te Fa’aora, ’e e ani ia rātou e aha te ’ē’a nō te ho’i i te Metua i te Ao ra ra—te patura’a ānei i te hō’ē pare ’aore rā te pe’era’a ia Iesu Mesia ? E ani i te mau tamari’i ’ia parau mai i te mau mea tā rātou e rave nō te pe’e i te Fa’aora.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Genese 6:14–22 ; 7–8 ; Mose 8:16–30

E ha’amaita’i te pe’era’a i te peropheta iā’u ’e tō’u ’utuāfare.

Tē pa’ari nei te mau tamari’i i roto i te hō’ē ao ’ino, fātata roa i te fāito ri’i i te ao i te ’anotau o Noa. E nehenehe te ’itera’a o Noa e hōro’a ia rātou i te ti’aturira’a ē, e nehenehe e ’itehia ia rātou te pārurura’a pae vārua mai te mea e pe’e rātou i te peropheta.

Mau ’ohipara’a e nehenehe e rave

• Tauturu i te mau tamari’i ’ia mā’iti i te mau ’īrava i roto i te Genese 6:14–22 ; 7–8 ’o tā rātou e nehenehe e fa’ahōho’a i roto i te hō’ē hōho’a pāpa’i. ’A fa’a’ohipa i tā rātou mau hōho’a nō te ha’api’i ia rātou i te ’ā’amu o Noa. E ani i te mau tamari’i ’ia fa’a’ite mai e aha tā rātou i ha’api’i mai i roto i te ’ā’amu.

• ’A fa’a’ite i te hō’ē hōho’a nō Noa (hi’o Buka hōho’a o te ’evanelia, n° 7–8) ’e te peropheta i teie mahana. Tauturu i te mau tamari’i ’ia ’imi i te Mose 8:16, 19–20, 23–24 nō te ’ite mai i te mau mea tā Noa i ha’api’i, ’o tā tō tātou feiā fa’atere o te ’Ēkālesia e ha’api’i noa nei ā i teie mahana. Nāhea tātou i te ha’amaita’ihia ’ia ha’apa’o ana’e tātou i teie mau ha’api’ira’a ?

• Fa’a’ite i te hō’ē mea tā te peropheta nō teie mahana i ha’api’i ’aita i maoro a’enei. E ani i te mau tamari’i ’ia pāpa’i i te hō’ē mea tā te peropheta i ha’api’i i ni’a i te mau ’api parau, ’e e tauturu ia rātou ’ia fa’anaho i te mau ’api parau mai te au i te hōho’a o te hō’ē pahī. E mea nāhea teie mau ha’api’ira’a i te riro mai te pahī tā Noa i hāmani ?

Genese 9:15–17

’Ua tītauhia ia tātou ’ia ha’amana’o i tā tātou mau fafaura’a.

’Ia pāpetitohia tātou, e fafau tātou i te Atua ’ia ha’apa’o i tāna mau fa’auera’a. I roto i te Genese 9:15–17, e ’itehia te ānuanua ’ei ha’amana’ora’a i te fafaura’a a te Atua. E nehenehe teie mau ’īrava e fa’auru i te mau tamari’i ’ia ’imi i te mau rāve’a nō te ha’amana’o i tā rātou mau fafaura’a ’e te Atua.

Mau ’ohipara’a e nehenehe e rave

• E fa’a’ite i te mau tamari’i i te hō’ē mea tā ’oe e vai ra ’o tē fa’aha’amana’o ia ’oe i te hō’ē mea faufa’a roa i roto i tō ’oe orara’a, mai te hō’ē tāpe’a rima fa’aipoipora’a, hō’ē hōho’a, ’aore rā, hō’ē buka ’ā’amu. E ani i te mau tamari’i ’ia fa’a’ite mai i tō rātou iho mau hi’ora’a. E taio ’āmui i te Genese 9:15–17 (hi’o ato’a ’Īritira’a a Iosepha Semita, Genese 9:21–25 [i roto i te Bible appendix]). E aha tā te Metua i te Ao ra e hina’aro ’ia feruri tātou, ’ia ’ite ana’e tātou i te hō’ē ānuanua ?

• E fa’aha’amana’o i te mau tamari’i i te mau fafaura’a tā rātou i rave i te taime ’a bāpetizohia ai rātou ’e ’o tā rātou e fa’a’āpī i te mau taime ato’a ’ia rave rātou i te ’ōro’a mo’a (hi’o Mosia 18:8–10 ; Te Parau Ha’api’ira’a ’e te mau Parau Fafau 20: 77, 79). E vaiiho i te mau tamari’i ’ia pāpa’i hōho’a ’aore rā ’ia hāmani i te hō’ē mea nō te fa’aha’amana’o ia rātou i tā rātou mau fafaura’a.

Genese 11:1–9

Te ’ē’a hō’ē roa e tae atu ai i te ra’i, e mea nā roto ïa i te pe’era’a ia Iesu Mesia.

’Aita te ta’ata e tāmata nei i te hāmani i te hō’ē pare i teie mahana nō te tae atu i te ra’i, e rave rahi rā ’o tē ’imi nei i te hau ’e te ’oa’oa nā roto i te pe’era’a i te mau ’ē’a ta’a ’ē atu i tā Iesu Mesia i ha’amau. Nāhea ’oe e nehenehe ai e fa’a’ohipa i te ’ā’amu nō te patu o Babela nō te ha’api’i i teie parau tumu ?

Mau ’ohipara’a e nehenehe e rave

• E ani i te mau tamari’i ’ia fa’a’ite mai i te mea tā rātou i ’ite nō ni’a i te ’ā’amu nō te patu o Babela (hi’o Genese 11:1–9). ’Ia au i te Helamana 6:28, nō te aha te mau ta’ata nō Babela i patu ai i te hō’ē patu ? Nō te aha te patura’a i teie pare i riro ai ’ei rāve’a ti’a ’ore e tae ai i te ra’i ? E aha te a’ora’a tā tātou e hōro’a i te mau ta’ata nō Babela ?

• E ani i te mau tamari’i ’ia ’imi i roto i te 2 Nephi 31: 20–21 ’e Helamana 3:28 i te rāve’a ti’a e tae ai i te ra’i. ’A fa’a’ite i tō ’oe ’itera’a pāpū nō te Fa’aora ’o Iesu Mesia.

ītona ’apora’a mai

Fa’aitoito i te ’apora’a mai i te fare

E ani i te mau tamari’i ’ia feruri i te mau rāve’a e ha’api’i ai rātou i tō rātou ’utuāfare i te mau ’ā’amu tā rātou i ha’api’i mai i roto i te Paraimere. ’Ei hi’ora’a, e nehenehe rātou e fa’a’ohipa i te mau hōho’a tā rātou i pāpa’i ’aore rā i te ’api ’ohipara’a o teie hepetoma.

Haʼamaitaʼiraʼa i tā tātou haʼapiʼiraʼa

’A ’imi i te hāro’aro’a i te mau tamari’i tā ’oe e ha’api’i ra. ’A ha’api’i ai ’oe i te mau tamari’i, ’a ha’apa’o ta’a ’ē i tā rātou mau uira’a, i tō rātou mau mana’o, ’e i te mau ’ā’amu ’aore rā i te mau parau tumu ’o tē riro ’ei mea faufa’a ta’a ’ē nō rātou. E tauturu te ’itera’a i teie mau mea ia ’oe ’ia fa’atumu i ni’a i tō rātou mau hina’aro.

’api ’ohipara’a : e ha’amaita’i te pe’era’a i te peropheta iā’u ’e i tō’u ’utuāfare