Sara ’e ’o Isaaka, nā Scott Snow

14–20 nō Fepuare

Genese 18–23

« Tē vai atu ra ānei te hō’ē mea e ’ore e ti’a ia lehova ‘ia rave ? »

’A imi ai ’oe ’ia pāhono i te mau hina’aro o te mau tamari’i tā ’oe e ha’api’i ra, ’a feruri i te mau mana’o nō te mau tamari’i pa’ari ’e te mau tamari’i ’āpī i roto i teie arata’i.

Pāpa’i i te mau mana’o e tae mai

Tītau i te mana’o

Nō te tauturu i te mau tamari’i ’ia fa’a’ite mai e aha tā rātou i ’ite a’ena nō ni’a i te Genese 18–23, ’a fa’a’ite i te mau hōho’a o te hō’ē ’aore rā hau atu mau ’ohipa i tupu nō roto mai i teie mau pene, ’e e ani i te mau tamari’i ’ia fa’a’ite mai i te hō’ē mea tā rātou e ha’amana’o ra nō ni’a i te ’ā’amu.

Ha’api’i i te ha’api’ira’a tumu : Te mau tamari’i ’āpī a’e

Genese 18:9–14 ; 21:1–7

E nehenehe au e ti’aturi i te Atua nō te ha’apa’o i tāna mau parau fafau.

Noa atu ē, ’ua fafau mai te Atua e fāri’i ’o Sara ’e ’o Aberahama i te hō’ē tamaiti i roto i tō rāua pa’arira’a, e mea pāpū ’ore ra ē, e tupu mau ānei te reira parau fafau. Nāhea ’oe e nehenehe ai e fa’a’ohipa i teie ’ā’amu nō te tauturu i te mau tamari’i ’ia ti’aturi ē, e tāpe’a te Atua i tāna mau parau fafau i te mau taime ato’a ?

Mau ’ohipara’a e nehenehe e rave

• ’A ha’apoto i te parau fafau a te Atua ia Aberahama ’e ia Sara ē, e fāri’i rāua i te hō’ē tamari’i ’e te tupura’a o teie parau fafau (hi’o Genese 17:15–19 ; 18:9–14 ; 21:1–7). ’Aore rā, e ani i te hō’ē nā ta’ata fa’aipoipo i roto i te pāroita ’ia ’ō’omo i te ’ahu mai ia Aberahama ’e ’o Sara ’e ’a fa’ati’a i tō rāua ’ā’amu. E tauturu i te mau tamari’i ’ia māramarama ē, e mea pa’ari roa ’o Aberahama ’e ’o Sara nō te fāri’i i te tamari’i. E ui ia rātou i te mau uira’a i roto i te Genese 18:14, « Tē vai atu ra ānei te hō’ē mea e ’ore e ti’a ia lehova ‘ia rave ? » ’A fa’a’ite pāpū ē, e nehenehe te Fatu e fa’atupu i tāna mau parau fafau, noa atu ē, e ’ere i te mea pāpū roa ’ia hi’ohia.

• ’A fafau atu i te hō’ē parau fafau i te mau tamari’i ’o tā ’oe e fa’atupu atu i te pae hope’a o te ha’api’ira’a (’ei hi’ora’a, e fa’ati’a ’oe ia rātou ’ia fa’a’ū i te hō’ē hōho’a). I te roara’a o te ha’api’ira’a, ’a fa’aha’amana’o ia rātou i tā ’oe parau fafau, ’e i muri iho ’a fa’atupu i te reira. E fa’ata’a ē, e ha’apa’o te Fatu i tāna mau parau fafau i te mau taime ato’a.

• E ani i te mau tamari’i ’ia fa’a’ite mai i te taime ’ua tītauhia ia rātou ’ia tīa’i i te hō’ē mea tā rātou i hina’aro roa. E hīmene ’e te mau tamari’i i te hō’ē hīmene ’o tē fa’a’ite pāpū nei i te mau parau fafau a te Atua, mai te « Pour trouver la paix » (Chants pour les enfants, 68–69.). Tauturu i te mau tamari’i ’ia ’imi mai i te mau mea tā te Atua i fafau mai ia tātou mai te mea e ha’apa’o maita’i noa tātou.

• ’A fa’a’ite i te hō’ē hōho’a o te hō’ē bāpetizora’a ’aore rā o te ’ōro’a mo’a (hi’o Buka hōho’a o te ’evanelia, n° 103, 104, 107, 108). E tauturu i te mau tamari’i ’ia ha’api’i mai nō ni’a i te mau parau fafau tā tātou e rave ’e i te Atua, ’e e aha tā te Atua e fafau mai, ’ia bāpetizo-ana’e-hia tātou ’e ’ia rave ana’e tātou i te ’ōro’a mo’a. (Hi’o Mau Māite i te Fa’aro’o, 23–25.)

Genese 22:1–14

’Ua ha’apa’o Aberahama i te parau a te Fatu.

E mea fifi roa nō Aberahama ’ia pe’e i te fa’auera’a e fa’atusia i tāna tamaiti. ’A feruri e nāhea ’oe ’ia fa’a’ohipa tano maita’i i teie ’ā’amu nō te fa’aitoito i te mau tamari’i ’ia ha’apa’o i te parau a te Atua noa atu ē, e mea fifi ’aore rā ’aita rātou i ’ite hope roa i te mau tumu nō tāna mau fa’auera’a.

Mau ’ohipara’a e nehenehe e rave

• E fa’a’ite i te hō’ē hōho’a nō Aberahama ’e ’o Isaaka (hi’o te arata’i nō teie hepetoma i roto Mai, pe’e mai—nō te mau ta’ata hō’ē ’e te ’utuāfare), ’e e fa’a’ohipa i te reira nō te fa’ati’a i te ’ā’amu ’o Aberahama ’e ’o Isaaka (hi’o ato’a « Aberahama ’e ’o Isaaka », i roto i Te mau ’ā’amu o te Faufa’a Tahito). E fa’a’ite i te hō’ē hōho’a nō Iesu Mesia, ’e e parau i te mau tamari’i e nāhea te ’ā’amu ’o Aberahama ’e ’o Isaaka e nehenehe ai e fa’aha’amana’o ia tātou i te tusia tā te Metua i te Ao ra ’e tā Iesu Mesia i rave nō tātou.

• E ha’uti i te hō’ē ha’uti ’ōhie ’o tē tītau i te mau tamari’i ’ia pe’e i te mau arata’ira’a. ’Ei hi’ora’a, e nehenehe te mau arata’ira’a e arata’i atu i te hō’ē hōho’a o te Fa’aora tei hunahia i roto i te piha ha’api’ira’a. E aha te tahi mau mea tā te Metua i te Ao ra i ani mai ia tātou ’ia rave ? E tauturu i te mau tamari’i ’ia māramarama ē, e tauturu te ha’apa’ora’a i tāna mau fa’auera’a ia tātou ’ia ho’i fa’ahou e ora i pīha’i iho iāna ’e ia Iesu Mesia.

Ha’api’i i te ha’api’ira’a tumu : Te mau tamari’i pa’ari

Genese 18:9–14 ; 21:1–7.

E fa’atupu te Fatu i tāna mau parau fafau, noa atu e au ra ē, e’ita e tupu ’ia hi’ohia atu.

’Ua parauhia ia Aberahama ’e ia Sara e fāri’i rāua i te hō’ē tamaiti, terā rā e au ra ē, e’ita paha te reira e tupu—100 matahiti tō Aberahama ’e e 90 tō Sara (hi’o Genese 17:17). ’Ua fa’atupu te Atua i tāna parau fafau ’e e nehenehe teie ’ā’amu e tauturu i te mau tamari’i tā ’oe e ha’api’i ra ’ia ha’apūai i tō rātou fa’aro’o i roto i te mau parau fafau a te Atua nō rātou.

Mau ’ohipara’a e nehenehe e rave

• Pāpa’i i te ta’o tāta’itahi nō roto mai i te pereota mātāmua o te Genese 18:14 i ni’a i te hō’ē ’api parau ta’a ’ē, ’e e hōro’a hō’ē i te tamari’i tāta’itahi. I muri iho e ani i te piha ha’api’ira’a ’ia fa’atano i te mau ta’o ma te ti’a. Tai’o i te Genese 18:9–14 ; 21:1–7 ’e te mau tamari’i nō te ’ite mai i te hō’ē hi’ora’a nō roto mai i te orara’a ’o Sara ’e ’o Aberahama i te taime ’a rave ai te Fatu i te hō’ē mea e au ra ē, e’ita e tupu ia hi’ohia atu. E aha tā tātou e nehenehe e ha’api’i mai nā roto mai i te ’ohipa i tupu i ni’a ia Sara ’e ia Aberahama, ’o tē nehenehe e fa’aitoito ia tātou ’ia ti’aturi i te mau parau fafau a te Atua ?

• E fa’a’ite i te mau hōho’a o te mau ’ā’amu nō te pāpa’ira’a mo’a i reira tō te Atua ravera’a i te hō’ē mea e au ra ē, e’ita e tupu, ’aore rā e mea fifi (’ei hi’ora’a, hi’o Buka hōho’a o te ’evanelia, n° 7, 8, 25, 26). E ani i te mau tamari’i ’ia fa’a’ite mai e aha tā rātou i ’ite nō ni’a i te mau ’ohipa i fa’a’itehia i roto i teie mau hōho’a, ’e e tauturu ia rātou ’ia hi’o e mea nāhea te Fatu i te fa’atupu i tāna mau parau fafau i roto i te hi’ora’a tāta’itahi. Fa’a’ite e mea nāhea tō te Fatu ha’apa’ora’a i tāna mau parau fafau i roto i tō ’oe orara’a ’aore rā i roto i te orara’a o te mau ta’ata tā ’oe i matau (nō te tahi mau hi’ora’a o te mau parau fafau a te Fatu, hi’o Malaki 3:10 ; Ioane 14:26–27 ; Te Parau Ha’api’ira’a ’e te mau Parau Fafau 89:18–21). E vaiiho i te mau tamari’i ’ia fa’a’ite mai i te hō’ē ā mau hi’ora’a tā rātou i ’ite.

Genese 19:15–26

E nehenehe au e horo ’ē atu i te ’ino.

E nehenehe te ’ā’amu o Lota ’e tōna ’utuāfare i te horo-’ē-ra’a i te hō’ē ’oire ’ino, e fa’auru i te mau tamari’i tā ’oe e ha’api’i ra, ’ia horo ’ē atu i te mau fa’aurura’a ’ino i roto i tō rātou orara’a.

Te horo-’ē-ra’a ia Sodoma ’e Gomora, nā Julius Schnorr von Carolsfeld

Mau ’ohipara’a e nehenehe e rave

• E ha’apoto i te Genese 19:15–26 ma te fa’ata’a ē, ’ua ora te ’utuāfare o Lota i roto i te hō’ē ’oire ’ino roa, ’e ’ua fa’aara te mau melahi ia rātou ’ia fa’aru’e. Tai’o ’āmui te mau ’īrava 15–17, 26, ’e e tauturu i te mau tamari’i ’ia feruri e aha te aura’a nō rātou i teie mahana ’ia « horo ’ē » i te ’ino ’e « ’eiaha e hi’o i muri » (’īrava 17).

• ’A fa’a’ite i te hō’ē hōho’a o te Fa’aora, ’e e ani i te mau tamari’i ’ia tu’u hō’ē ta’ahira’a ’āva’e i mua ’a fa’a’ite mai ai rātou i te hō’ē mea e nehenehe rātou e rave nō te horo ’ē i te ’ino, ’e ’ia ha’afātata atu i te Mesia.

• E ’āparau i te mau huru tupura’a i reira te hō’ē hoa e ani ai i te mau tamari’i ’ia rave i te hō’ē mea tā rātou i ’ite e ’ere i te mea tano. Nāhea tātou i te « horo ’ē » i teie mau huru tupura’a ? E aha tā tātou e parau i tō tātou hoa ?

Genese 22:1–14

’Ua tono mai te Metua i te Ao ra i tāna tamaiti, ’o tei fa’atusia iāna iho nō tātou.

’A ha’api’i ai ’oe nō ni’a i te hina’aro ’o Aberahama e fa’atusia ia Isaaka, ’a ha’apa’o maita’i i te mau huru mana’o o te mau tamari’i. E fa’a’ohipa i teie ’ā’amu nō te tauturu i te mau tamari’i ’ia ha’apūai i tō rātou here ’e te māuruuru nō te tusia a te Fa’aora.

Mau ’ohipara’a e nehenehe e rave

• Nō te tauturu i te mau tamari’i ’ia ha’api’i mai i te ’ā’amu i roto i te Genese 22:1–14, e tai’o i te mau ’īrava ia rātou, ’e e ani ia rātou ’ia pāpa’i hōho’a i te mau mea tā ’oe e tai’o ra. Nō te aha te fa’auera’a a te Fatu ’ia fa’atusia ia Isaaka i riro ai ’ei mea pa’ari nō Aberahama ’ia ha’apa’o ? E aha tā tātou e ha’api’i mai nō ni’a ia Aberahama i roto i teie ’ā’amu ?

• E fa’a’ohipa i te mau hōho’a nō Aberahama ’e nō Isaaka ’e nō te fa’asātaurora’a (hi’o Buka hōho’a o te ’evanelia, n° 9, 57) nō te fa’aau i te ’ā’amu i roto i te Genese 22 ’e te tusia o te Fa’aora (hi’o Mataio 27:26–37). E aha tā tātou e ha’api’i mai nō ni’a i te Metua i te Ao ra ’e ia Iesu Mesia nā roto mai i te mau ’ā’amu ’o Aberahama ’e ’o Isaaka, ’e nō te fa’asātaurora’a ?

• E fa’a’ite i te video « For God So Loved the World [’Ua here te Atua i tō te ao nei] » (ChurchofJesusChrist.org), ’aore rā, e hīmene ’āmui i te hō’ē hīmene nō ni’a i te tusia a te Fa’aora, mai te « Il envoya son Fils aimé » (Chants pour les enfants, 20-21). E ani i te mau tamari’i ’ia paraparau mai e mea nāhea te tusia o Iesu e fa’a’ite nei i te here o te Metua i te Ao ra nō tātou.

Fa’aitoito i te ’apora’a mai i te fare

E ani i te mau tamari’i ’ia fa’a’ite i tō rātou ’utuāfare i te hō’ē taime ’a ha’amaita’i ai te Atua ia rātou nō te ha’apa’ora’a rātou i te hō’ē o tāna mau fa’auera’a.

Ha’amaita’iraʼa i tā tātou ha’api’ira’a

Fa’aitoito i te fa’aturara’a. Mai tei hina’arohia i roto i te piha ha’api’ira’a, e nehenehe ’oe e fa’aha’amana’o i te mau tamari’i ’ia fa’a’ite i te fa’atura. E nehenehe ’oe e rave i te reira nā roto i te hīmenera’a ma te marū ’aore rā ma te hamu i te hō’ē hīmene ’aore rā nā roto i te fa’a’itera’a i te hō’ē hōho’a nō Iesu.