Here i te tahi 4e te tahi, nā Emma Donaldson Taylor

24–30 nō Tēnuare

Mose 7

« E ma’iri ihora te Fatu i te i’oa o tōna ra feiā o Ziona »

E ha’amata i tā ’oe fa’aineinera’a nā roto i te tai’ora’a i te Mose 7.. E nehenehe te Mai, pe’e mai—nō te ta’ata hō’ē ’e te ’utuāfare e tauturu ia ’oe ’ia hāro’aro’a i teie pene, ’e e nehenehe te mau mana’o i raro nei e hōro’a ia ’oe i te mau mana’o e nāhea ’ia ha’api’i i te reira i te mau tamari’i.

Pāpa’i i te mau mana’o e tae mai

Tītau i te mana’o

E rave i te tahi taime nō te vaiiho i te mau tamari’i ’ia hi’o fa’ahou ’e o ’oe i te mau mea tā rātou i ’ite nō ni’a i te peropheta Enoha—tae noa atu i te mau mea tā rātou i ’apo mai i roto i te ha’api’ira’a nō te hepetoma i ma’iri a’e nei. Mai te mea e mea maita’i, ’a fa’a’ite i te hō’ē hōho’a nō roto mai i te arata’i nō teie hepetoma i roto Mai, pe’e mai—nō te ta’ata hō’ē ’e te ’utuāfare.

Ha’api’i i te ha’api’ira’a tumu : Te mau tamari’i ’āpī a’e

Mose 7:18

’Ua hina’aro te Atua ia here tātou i te tahi ’e te tahi.

Tē fa’a’ite nei teie mau ’īrava i te huru o te mau ta’ata nō Ziona. Nāhea ’oe e nehenehe ai e tauturu i te mau tamari’i ’ia ha’amata i te fa’ahotu i teie mau huru ?

Mau ’ohipara’a e nehenehe e rave

• Fa’ati’a i te ’ā’amu o te nūna’a o Enoha i roto « Enoha te perophta » (i roto Te mau ’ā’amu o te Faufa’a Tahito), ’aore rā, e vaiiho i te mau tamari’i ’ia fa’ati’a mai i te ’ā’amu i roto i tā rātou iho mau parau ma te fa’a’ohipa i te hōho’a o Enoha i roto i te arata’i nō teie hepetoma i roto Mai, pe’e mai—nō te ta’ata hō’ē ’e te ’utuāfare. E nehenehe ato’a ’oe e hīmene ’e te mau tamari’i i te ’īrava piti o te « Suis les prophètes » (Chants pour les enfants, 58–59) nō te hi’opo’a fa’ahou i te ’ā’amu.

• Tauturu i te mau tamari’i ’ia feruri i te mau ’ohipa e tū’ati i te pereota « hō’ē ā ’ā’au ’e hō’ē ā mana’o » (Mose 7:18). E fa’ata’a atu ē, te aura’a o teie parau, ’oia ho’i, e mea here ’e e mea maita’i te nūna’a 4o Enoha i te tahi ’e te tahi. E ani ia rātou ’ia fa’a’ohipa i te ’api ’ohipara’a nō teie hepetoma nō te pāpa’i hōho’a i te hō’ē rāve’a e nehenehe ai rātou e fa’a’ite i te here.

• E hīmene i te hō’ē hīmene nō ni’a i te herera’a i te tahi ’e te tahi, mai te « Nō te aroha » (te mau himene, n°179). Hōpoi mai i te mau hōho’a ’o tē fa’ahōho’a i te mau pereota faufa’a mau i roto i te hīmene nō te tauturu i te mau tamari’i ’ia ’apo mai i te mau ta’o. E ani i te mau tamari’i ’ia fa’a’ite mai i te mau rāve’a e nehenehe ai rātou e fa’a’ite i te here i te tahi ’e te tahi i roto i te Paraimere ’e i roto i tō rātou fare. I muri iho e vaiiho ia rātou ’ia ha’uti mai i tō rātou mau mana’o.

E ti’a ia tātou e tūtava ’ia riro ’ei « hō’ē ā ’ā’au ’e hō’ē ā mana’o » (Mose 7:18).

Mose 7:28–33

Tē māna’ona’o nei te Atua i tāna mau tamari’i.

E nehenehe ’oe e tauturu i te mau tamari’i ’ia ha’api’i mai ē, tē māna’ona’o rahi nei te Metua i te Ao ra ’e ’o Iesu Mesia ia tātou ’e i tā tātou mau ’ohipa.

Mau ’ohipara’a e nehenehe e rave

• Tauturu i te mau tamari’i ’ia feruri i te mau mea ’o tē fa’a’oa’oa nei i te Metua i te Ao ra. E tai’o i te Mose 7:28 ’e te mau tamari’i, ’e ’a fa’ata’a ē, ’ua ’oto te Metua i te Ao ra nō te ’ino rahi o te mau ta’ata (hi’o mau ’īrava 32–33).

• Vaiiho i te mau tamari’i ’ia pāpa’i i te hō’ē hōho’a mata ’oa’oa i ni’a i te hō’ē pae o te hō’ē ’api parau ’e hō’ē hōho’a mata ’oto i ni’a i te tahi atu pae o te ’api. E fa’a’ite i te tahi mau ’ohipa maita’i, mai te fa’ahitira’a i te hō’ē pure, ’e te tahi mau ’ohipa ’ino, mai te ha’avarera’a, ’e e ani i te mau tamari’i ’ia ’āfa’i i ni’a te hōho’a mata ’oa’oa ’aore rā te hōho’a mata ’oto nō te fa’a’ite ē, e aha te huru o te Metua i te Ao ra ’e ’o Iesu Mesia nō ni’a i te mā’itira’a tāta’itahi.

• E ani i te mau tamari’i ’ia ha’uti i te hō’ē ha’uti i reira rātou e rave ai i te mau mea tā rātou e nehenehe e rave ’o tē fa’a’oa’oa i te Metua i te Ao ra. E ani i te tahi atu mau tamari’i ’ia ’imi e aha tā rātou e rave ra. ’A fa’a’ite i te mau tamari’i tāta’itahi i te hō’ē mea tā ’oe i ’ite ia rātou i te ravera’a, ’o tē fa’a’oa’oa i te Metua i te Ao ra.

Mose 7:59–67

E ho’i fa’ahou mai Iesu i te fenua nei.

I roto i tāna ’ōrama, ’ua ’ite Enoha i te mau mahana hope’a nei, e tae noa atu i te tae-piti-ra’a mai o te Fa’aora. Nāhea ’outou i te tauturu i te mau tamari’i ’ia tīa’i i te ho’i-piti-ra’a mai o te Fa’aora ?

Mau ’ohipara’a e nehenehe e rave

• E parau i te mau tamari’i ’ia feruri ē, tē haere mai ra te hō’ē manihini e fārerei ia rātou. E aha tā rātou e rave nō te fa’aineine nō taua fārereira’a ra ? ’A fa’a’ite atu i te mau parau a te Fatu ia Enoha i roto i te Mose 7:60: « E ho’i fa’ahou mai au i te mau mahana hope’a ra ». Mea nāhea tātou i te fa’aineine ia tātou nō te ho’i-fa’ahou-ra’a mai ’o Iesu ?

• ’A fa’a’ite i te mau hōho’a nō te mau taime ’a fā mai ai te Fa’aora i te mau ta’ata (hi’o Buka hōho‘a nō te ’Evanelia, n° 60, 82, 83, ’e 84). E aha tā te mau ta’ata e rave ra i roto i te mau hōho’a ? E aha te huru o te mau ta’ata i te taime ’a fārerei ai rātou ia Iesu ? E vaiiho i te mau tamari’i ’ia fa’a’ite mai e aha tā rātou e fāri’i ’ia ’ite atu rātou ia Iesu ’ia ho’i fa’ahou ana’e mai ’oia.

• E hīmene i te hō’ē hīmene nō ni’a i te tae-piti-ra’a mai o te Fa’aora, mai te « Quand Jesus reviendra » (Chants pour les enfants, 46–47), ’e e ani i te mau tamari’i, mai te aha te huru ’ia mana’o rātou, ’ia ho’i fa’ahou mai ana’e Iesu.

Ha’api’i i te ha’api’ira’a tumu : Te mau tamari’i pa’ari

Mose 7:18–21, 62–63, 68–69

E nehenehe e riro ’ei hō’ē mai te mau ta’ata nō Ziona.

’A tai’o ai ’outou nō ni’a ia Ziona, ’a feruri i te mau hi’ora’a nō te hō’ēra’a tā ’oe i ’ite. Nāhea ’oe e nehenehe ai e tauturu i te mau tamari’i ’ia ha’api’i mai ’ia riro ’ei hō’ē mai te mau ta’ata o Enoha ?

Mau ’ohipara’a e nehenehe e rave

• E ani i te mau tamari’i ’ia ’imi mai i te mau ta’o e fa’ata’a ra i te mau ta’ata o Enoha, tei parau-ato’a-hia o Ziona, ’a tai’o ai rātou i te Mose 7:18. Pāpa’i i te reira mau ta’o ’ei mau upo’o parau i te pae ni’a o te tāpura, ’e e ani i te mau tamari’i ’ia pāpa’i, i raro a’e i te upo’o parau tāta’itahi, i te mau mea tā rātou e nehenehe e rave nō te riro hau atu mai te nūna’a o Enoha. I muri a’e i tā rātou fa’a’itera’a mai, e ani i te mau tamari’i e nāhea rātou e nehenehe ai e fa’ariro hau atu i tō rātou fare mai ia Ziona. E nehenehe rātou e ’ite mai i te tahi mau mana’o i roto i te 4 Nephi 1:15–18.

• E ani i te mau tamari’i ’ia tai’o e hia taime te fa’ahitira’ahia te ta’o « Ziona » i roto i te Mose 7:18–21, 62–63, 68–69. I te mau taime ato’a e fāura mai te ta’o, e tauturu i te mau tamari’i ’ia ’ite mai e aha tā te ’īrava e parau nei nō ni’a ia Ziona (hi’o ato’a Guide des écritures, « Sion », scriptures.ChurchofJesusChrist.org). Nāhea tātou ’ia riro rahi atu ā mai te mau ta’ata i fa’ata’ahia i roto i teie mau ’īrava ?

• E fa’a’ohipa i te ’api ’ohipara’a nō teie hepetoma nō te tauturu i te mau tamari’i ’ia feruri i te mau rāve’a e nehenehe ai rātou ’ia riro ē « hō’ē ā ’ā’au ’e hō’ē ā mana’o » (hi’o Mose 7:18).

Mose 7:28–37

’Ua ’oto te Atua nō tāna mau tamari’i.

Nāhea ’oe e nehenehe ai e tauturu i te mau tamari’i ’ia ’ite mai ē, tē mana’ona’o nei te Atua ia tātou ’e i tā tātou mau ’ohipa ?

Mau ’ohipara’a e nehenehe e rave

• E ani i te mau tamari’i e aha te mea e nehenehe e fa’a’oto i te Atua (hi’o Mose 7:28–31). E ani manihini i te mau tamari’i ’ia ’imi Mose 7:32–33, 37 nō te mau pāhonora’a. E aha tā teie mau ’īrava e ha’api’i nei ia tātou nō ni’a i te mau mana’o o te Atua nō ni’a i tāna mau tamari’i ? Nāhea tātou e ’ite ai ē, tē here nei te Atua ia tātou ? ’A fa’a’ite i tō ’oe ’itera’a pāpū nō te here o te Atua ia tātou.

• E taora i te hō’ē pūtē huero pipi ’aore rā i te hō’ē pōpō i te hō’ē tamari’i ra. E ani iāna ’ia fa’aoti i te pereota « E nehenehe au e fa’a’oa’oa i te Atua nā roto… » i muri iho, ’a tāora i te pūtē i te tahi atu tamari’i. ’A nā reira noa e hope roa atu te mau tamari’i.

Mose 7:60–67

E ho’i fa’ahou mai Iesu Mesia i te mau mahana hope’a nei.

’A tai’o ai ’oe nō ni’a i te tae-piti-ra’a mai i roto i te Mose 7:60–67, ’a feruri nāhea ’ia ha’api’i i te reira i te mau tamari’i ma te rāve’a ’oa’oa.

Mau ’ohipara’a e nehenehe e rave

• E tai’o ’āmui Mose 7:60–67, ’e e tauturu i te mau tamari’i ’ia ’ite mai i te mau mea tā te Fatu i parau e tupu i te mau mahana hope’a nei. E ani ia rātou e aha te tahi o te reira mau ’ohipa tā rātou e tīa’i ra ’e nō te aha.

• E ani manihini i te mau tamari’i ’ia paraparau mai nō ni’a i te hō’ē taime ’a tīa’i ai rātou i te hō’ē ta’ata ’ia haere mai e fārerei ia rātou ’aore rā ’ia ho’i mai i te fare. E aha tā te mau tamari’i i fāri’i ? E aha tā rātou i rave nō te fa’aineine ? Nāhea tātou i te fa’aineine ia tātou nō te fārerei fa’ahou ia Iesu ?

• E fa’a’ite i te hō’ē hōho’a nō te tae-piti-ra’a mai o te Fa’aora (’ei hi’ora’a, hi’o Buka Hoho‘a nō te ’evanelia, n° 66). E fa’aue i te mau tamari’i ’ia pāpa’i i tā rātou iho hōho’a nō te tae-piti-ra’a mai, mai te au i tā rātou i tai’o i roto i te Mose 7:60–67.

Fa’aitoito i te ’apora’a mai i te fare

Nāhea ’oe i te fa’aitoito i te mau tamari’i ’e tō rātou ’utuāfare ’ia tāmau noa i te ha’api’i mai, i roto i te Faufa’a Tahito i te fare ? ’Ei hi’ora’a, e nehenehe te mau tamari’i e fa’a’ite mai i te hō’ē mea tā rātou i pāpa’i hōho’a ’aore rā, i fa’a’ū i roto i te Paraimere ’ei tuha’a nō te hō’ē ha’api’ira’a nō te pō ’utuāfare.

Ha’amaita’iraʼa i tā tātou ha’api’ira’a

Tauturu i te mau tamari’i ’ia ha’a. « ’A ha’api’i ai ’oe i te mau tamari’i, e fa’ati’a ia rātou ’ia patu, ’ia pāpa’i hōho’a, ’ia fa’a’ū, ’ia pāpa’i, ’e ’ia hāmani. ’Ua hau atu teie mau mea i te mau ’ohipara’a ’ārearea noa—e mea faufa’a te reira nō te ’apora’a mai » (Ha’api’ira’a mai tā te Fa’aora, 25).