Mea maita’i a’e i te paradaiso, nā Kendal Ray Johnson

17–23 nō Tēnuare

Genese 5 ; Mose 6

« Ha’api’i atu i teie mau mea i tā ’outou mau tamari’i ma te tapeʻapeʻa ’ore »

E ha’amata tā ’oe fa’aineinera’a nō te ha’api’i ’a tuatāpapa ai ’oe i te Genese 5 ’e te Mose 6. ’A rave ai ’oe i te reira, ’a fa’aro’o i te mau mana’o nō ’ō mai i te Vārua Maita’i, nō ni’a e aha te ti’a i te mau tamari’i ’ia ’apo mai.

Pāpa’i i te mau mana’o e tae mai

Tītau i te mana’o

E pāpa’i ni’a i te tahi mau tuha’a ’api parau i te tahi mau ta’o tumu ’o tē nehenehe e tauturu i te mau tamari’i ’ia ha’amana’o i te tahi mea tā rātou i ha’api’i mai i te fare i teie hepetoma, ’aore rā i roto i te hō’ē ha’api’ira’a Paraimere tahito. Vaiiho i te mau tamari’i, te tahi i muri mai i te rahi, ’ia mā’iti i te hō’ē ta’o. ’Ia oti te hō’ē ta’o i te mā’itihia, e ani i te hō’ē o te mau tamari’i ’ia fa’a’ite mai i te hō’ē ’ohipa tāna i ha’api’i mai nō ni’a i taua ta’o ra.

Ha’api’i i te ha’api’ira’a tumu : Te mau tamari’i ’āpī a’e

Mose 6:27, 31–34

E nehenehe te Atua e tauturu iā’u ’ia rave i te mau ’ohipa ’eta’eta.

’A pi’ihia ai Enoha ’ia poro i te ’evanelia, ’ua ha’ape’ape’a ’oia ’o tē ’ore ’oia e manuia. Terā rā, ’ua tauturu te Atua iāna ’ia rave i te mau ’ohipa rarahi.

Mau ’ohipara’a e nehenehe e rave

• E ani i te mau tamari’i ’ia fa’a’ite mai i te hō’ē taime ’a anihia ai rātou ’ia rave i te hō’ē ’ohipa fifi ’aore rā, hō’ē ’ohipa ri’ari’a nō rātou. ’A fa’ati’a i te ’ā’amu nō te pi’ira’a ’o Enoha ’ia riro ’ei peropheta, e ’itehia i roto i te Mose 6:27, 31–34 (hi’o ato’a « Enoha te peropheta », i roto Te mau ’ā’amu o te Faufa’a Tahito). E ha’apāpū ē, noa atu ’ua feruri ’o Enoha ē, ’aita ’oia i ineine ’ia riro ’ei peropheta, ’ua fafau te Atua e tauturu iāna. E tauturu i te mau tamari’i ’ia māramarama i te tahi mau rāve’a e tauturu ai te Atua ia tātou ’a anihia ai tātou ’ia rave i te tahi mau ’ohipa fifi.

• E fa’a’ite i te tahi mau hi’ora’a nō te mau pāpa’ira’a mo’a, ’a tauturu ai te Atua i te ta’ata ’ia rave i te mau ’ohipa fifi—’ei hi’ora’a, ’o Noa i te hāmanira’a i te pahī, ’o Davida i te arora’a ia Toria, ’o Amona i te pārurura’a i te mau nana a te ari’i, ’aore rā ’o Samuela te ’āti Lamana i te porora’a. (Nō te mau hōho’a ’e te mau fa’ahorora’a pāpa’ira’a mo’a, ’a hi’o Buka hoho’a ’evanelia, n°. 7, 19, 78, 81.) ’A fa’a’ite i te hō’ē ’itera’a ’a tauturu ai te Fatu ia ’oe ’ia rave i te hō’ē ’ohipa fifi.

Mose 6:52

Tē ha’api’i nei te ’evanelia iā’u nāhea ’ia ho’i fa’ahou i te Metua i te Ao ra.

’Ua ha’api’i te Atua ia Adamu e aha te tītauhia ia tātou ’ia rave nō te ho’i fa’ahou iāna ra—’ia roa’a te fa’aro’o, ’ia tātarahapa, ’ia bāpetizohia, ’e ’ia fāri’i i te hōro’a o te Vārua Maita’i. Nāhea ’oe i te tauturu i te mau tamari’i ’ia ha’api’i rahi mai nō ni’a i teie mau mea ?

Mau ’ohipara’a e nehenehe e rave

• ’A ’imi ’aore rā e pāpa’i i te mau hōho’a nō te fa’ahōho’a i te fa’aro’o, te tātarahapa, te bāpetizora’a, ’e te hōro’ara’a i te Vārua Maita’i (hi’o te ’api ’ohipara’a nō teie hepetoma). E tu’u i te mau hōho’a i roto i te hō’ē ’āna’ira’a e fa’atoro ra i ni’a i te hō’ē hōho’a ’o Iesu Mesia. Tai’o i te Mose 6:52 i te mau tamari’i, ’e e ani ia rātou ’ia ti’a i pīha’i iho i te hōho’a tano ’a fa’aro’o ai rātou i te mau ta’o e fa’ahōho’a ra i te hōho’a (i roto i teie ’īrava, ’ua fa’a’ohipahia te ta’o « ti’aturi » nō te « fa’aro’o »).

• E hīmene i te mau hīmene e ha’api’i nei i te mau parau tumu i roto i te Mose 6:52, mai te « Fa’aro’o », « Aide-moi, Pere » (’īrava 2), « Le jour de mon baptême », ’e « Le Saint-Esprit » (Chants pour les enfants, 50–51, 52, 53, 56). E tauturu i te mau tamari’i ’ia māramarama ē, te ravera’a i te mau mea tei ha’api’ihia i roto i te mau hīmene, e tauturu te reira ia tātou ’ia ho’i fa’ahou i te Metua i te Ao ra ra.

Mose 6:58

Tē hina’aro nei te Metua i te Ao ra ’ia ha’api’i te mau metua i tā rātou mau tamari’i.

Mai te ’anotau ’o Adamu ’e ’o Eva, ’ua fa’auehia te mau metua ’ia ha’api’i i te ’evanelia i tā rātou mau tamari’i. Nāhea e nehenehe ai ia ’oe ’ia fa’aitoito i te mau tamari’i ’ia fa’aro’o ’e ’ia pe’e i te mau ha’api’ira’a parauti’a a tō rātou mau metua ?

Mau ’ohipara’a e nehenehe e rave

• E tai’o i te Mose 6:58 i te mau tamari’i, ’e ’a fa’a’ite i te hōho’a o te ’utuāfare ’o Adamu ’e ’o Eva i roto i te arata’i nō teie hepetoma i roto Mai, pe’e mai—nō te ta’ata hō’ē ’e te ’utuāfare. Tauturu i te mau tamari’i ’ia fa’ahiti fa’ahou i te pereota « ha’api’i atu i teie mau mea i tā ’outou mau tamari’i ma te tāpe’ape’a ’ore ». E fa’ata’a atu ē, tē hina’aro nei te Atua ’ia pe’e te mau metua ato’a i te hi’ora’a ’o Adamu ’e ’o Eva nā roto i te ha’api’ira’a i tā rātou mau tamari’i nō ni’a ia Iesu Mesia ’e tāna ’evanelia. E ani i te mau tamari’i e aha tā rātou e nehenehe e rave ’ia ha’api’i ana’e mai tō rātou mau metua ’aore rā vetahi ’ē ia rātou i te ’evanelia.

• E tauturu i te mau tamari’i ’ia fa’atū’ati i tō rātou iho mau hōho’a i tō rātou mau metua, ’aore rā te mau hōho’a o te mau fanau’a ’ānimara i te mau ’ānimara pa’ari. Nāhea te mau metua i te tauturu i tā rātou mau tamari’i ? E aha tā rātou e ha’api’i ia rātou ? E ani i te mau tamari’i ’ia pāpa’i i te mau hōho’a nō tō rātou ’utuāfare i te mau taime ’a ha’api’i ai te mau metua i te mau tamari’i, mai te tai’o ’āmuira’a i te mau pāpa’ira’a mo’a, te pure ’āmuira’a, ’aore rā te tāmā’a-’āmui-ra’a.

  

  E ha’api’i te mau metua i te ’evanelia i tā rātou mau tamari’i.

Ha’api’i i te ha’api’ira’a tumu : Te mau tamari’i pa’ari

Mose 6:26–34

E nehenehe te Metua i te Ao ra e tauturu iā’u ’ia rave i te mau ’ohipa ’eta’eta.

Noa atu ē, ’ua mana’o ’o Enoha e’ita e ti’a iāna, ’ua tauturu te Atua iāna ’ia fa’aoti i tōna pi’ira’a ’ei peropheta. E nehenehe ato’a te Atua e tauturu i te mau tamari’i tā ’oe e ha’api’i ra ’ia rave i te mau ’ohipa fifi.

Mau ’ohipara’a e nehenehe e rave

• E tai’o i te Mose 6:26–34 ’e te mau tamari’i. Nō te aha Enoha i mana’o ai ē, e’ita e ti’a iāna ’ia poro i te ’evanelia ? (hi’o Mose 6:31). Nāhea tō te Atua tauturura’a ia Enoha ? (hi’o Mose 6:32–34 ; 7:13).

• E ani i te mau tamari’i ’ia fa’a’ite mai i te tahi mau ’ohipa fifi tā te mau tamari’i o tō rātou matahiti e rave i te tahi taime (mai te fa’aotira’a i te hō’ē ohipa nō te fare ha’api’ira’a, te fa’a’itera’a i te maita’i i ni’a i te hō’ē ta’ata ’ino, ’aore rā te fa’a’itera’a i te parau mau ’ia hape ana’e rātou). E tauturu i te mau tamari’i ’ia ’ite mai i te mau pereota i roto i te Mose 6:32–34 ’o tē nehenehe e tauturu ia rātou. E ani i te mau tamari’i ’ia fa’a’ite mai i te hō’ē taime ’a tauturu ai te Atua ia rātou ’ia rave i te hō’ē ’ohipa fifi. ’A fa’a’ite ato’a i te ’ohipa tei tupu nō ’oe iho.

Mose 6:50–62

E tauturu te fa’aro’o, te tātarahapa, te bāpetizora’a ’e te fāri’ira’a i te Vārua Maita’i iā’u ’ia ho’i fa’ahou i te Atua ra.

’Ua ha’api’i ’o Adamu ’e ’o Enoha i tō rāua mau ta’ata i te mau parau tumu mātāmua ’e te mau ’ōro’a o te ’evanelia : te fa’aro’o, te tātarahapa, te bāpetizora’a, ’e te fāri’ira’a i te Vārua Maita’i (hi’o ato’a Te mau Hīro’a Fa’aro’o 1:4). E aha te ti’a ia ’oe ’ia rave nō te tauturu i te mau tamari’i ’ia māramarama i te faufa’a o teie mau parau tumu ’e mau ’ōro’a i roto i tō rātou orara’a ?

Mau ’ohipara’a e nehenehe e rave

• E ani i te mau tamari’i ’ia tai’o i te Mose 6:52, 57 nō te ’ite mai i te mau parau tumu ’e te mau ’ōro’a o te ’evanelia tei fa’ahitihia i roto i te hīro’a fa’aro’o maha.

• E pāpa’i i te hīro’a fa’aro’o maha i ni’a i te tāpura ’ere’ere, ’e e ani i te mau tamari’i ’ia tai’o i te reira. I muri iho e tūmā i te hō’ē ’aore rā e piti ta’o, ’e e ani ia rātou ’ia tai’o fa’ahou, ma te fa’a’ī i te mau ta’o i ma’iri. ’A tāpiti fa’ahou i teie ’ohipa e tae roa atu ’ua mau ’ā’au i te mau tamari’i te hīro’a fa’aro’o.

• E ani i te mau tamari’i ’ia pāpa’i i te hō’ē a’ora’a poto nō ni’a i te fa’aro’o, te tātarahapa, te bāpetitora’a, ’aore rā te fāri’ira’a i te Vārua Maita’i—hō’ē mea e nehenehe tā rātou e fa’a’ite i tō rātou ’utuāfare. E nehenehe e fa’ahiti i roto i te a’ora’a i te hō’ē ’īrava, hō’ē ’ohipa tei tupu, ’e hō’ē ’itera’a pāpū. E nehenehe ato’a te a’ora’a e fa’ata’a e mea nāhea te parau tumu i te tauturu ia tātou ’ia ho’i fa’ahou i te Metua i te Ao ra.

Mose 6:57–58

E hōpoi’a nā te mau metua ’ia ha’api’i i tā rātou mau tamari’i.

Tē ti’aturi nei te Atua i te mau metua ’ia riro ’ei mau ’orometua ha’api’i ’evanelia mātāmua i roto i tō rātou ’utuāfare. Nāhea ’oe e nehenehe ai e fa’aitoito i te mau tamari’i ’ia pāturu i tō rātou mau metua i roto i teie ti’ara’a ?

Mau ’ohipara’a e nehenehe e rave

• E ani i te hō’ē tamari’i ’ia tai’o i te Mose 6:58. E aha te fa’auera’a tā te Metua i te Ao ra i hōro’a i te mau metua i roto i teie ’īrava ? ’A fa’a’ite i te hō’ē hōho’a nō Adamu ’e ’o Eva e ha’api’i ra i tā rāua mau tamari’i (hi’o i te arata’i nō teie hepetoma i roto Mai, pe’e mai—nō te ta’ata hō’ē ’e te ’utuāfare), ’e e ani i te mau tamari’i ’ia fa’a’ite mai e aha tā rātou i ’ite ra i roto i te hōho’a. E fa’aitoito ia rātou ’ia ’āparau i te faufa’a o te mau parau mau o te ’evanelia tā rātou i ha’api’i mai nā roto mai i tō rātou ’utuāfare.

• E tauturu i te mau tamari’i ’ia pāpa’i i te mau nota ha’amāuruuru i tō rātou mau metua ’aore rā e fa’anaho i te tahi atu mau rāve’a ’ōhie nō te fa’a’ite i tō rātou māuruuru i tō rātou mau metua. E hīmene i te hō’ē hīmene nō ni’a i te ’utuāfare, mai te « Ces mots d’amour » (Chants pour les enfants, 102–03). Nāhea tātou e nehenehe ai e tauturu i tō tātou mau metua ’ia fa’atupu i te hō’ē huru maita’i i roto i tō tātou ’utuāfare ?

Fa’aitoito i te ’apora’a mai i te fare

Nāhea ’oe e nehenehe ai e tauturu i te mau tamari’i ’ia tāmau noa i te ha’api’i mai i rāpae i te piha ha’api’ira’a ? E nehenehe ’oe e fa’aitoito ia rātou ’ia ha’amana’o i te ’ā’amu ’o Enoha, ’ia fārerei ana’e rātou i te hō’ē mea fifi i teie hepetoma.

Ha’amaita’iraʼa i tā tātou ha’api’ira’a

Fa’a’ohipa i te mau ’api ’ohipara’a. ’A fa’a’ū noa ai te mau tamari’i i te mau ’api ’ohipara’a, ’a hi’ohi’o fa’ahou i te mau parau tumu o te ha’api’ira’a. E tai’o i te mau parau i ni’a i te ’api i te mau tamari’i mai te mea e tītauhia.