« 17–23 nō Tēnuare. Genese 5 ; Mose 6 : ‘’Ia ha’api’i atu i teie mau mea i tā ’outou mau tamari’i’ », Mai, pe’e mai—nō te ta’ata hō’ē ’e te ’utuāfare : Faufa’a Tahito 2022 (2021)
« 17–23 nō Tēnuare. Genese 5 ; Mose 6 », Mai, pe’e mai—nō te ta’ata hō’ē ’e te ’utuāfare : 2022
Mea maita’i a’e i te paradaiso, nā Kendal Ray Johnson
17–23 nō Tēnuare
Genese 5 ; Mose 6
« ’Ia ha’api’i atu i teie mau mea i tā ’outou mau tamari’i »
’A tai’o ai ’e ’a feruri ai ’outou i te Genese 5 ’e te Mose 6, a pāpa’i i te mau mana’o pae vārua tā ’outou e fāri’i. E aha te mau poro’i tā ’outou i ’ite e mea faufa’a rahi nō ’outou ’e nō tō ’outou ’utuāfare ?
Pāpa’i i tō ’outou mau mana’o
Te rahira’a o te Genese 5 ’o te hō’ē ïa tāpura o te u’i i rōpū ia Adamu ’e ia Eva ’e ’o Noa. Tē tai’o nei tātou e rave rahi i’oa, ’aita rā tātou e ha’api’i rahi mai nā roto mai i te reira mau i’oa. I muri iho tē tai’o nei tātou nō ni’a ia Enoha, e ono u’i mai ia Adamu mai, tā teie mau parau e fa’ata’a mai nei ma te fifi ri’i, ’aita rā i ha’amāramaramahia : « I au maite ho’i tō Enoha haere’a i te Atua, e ’aita rā ’oia ; ’ua hōpoi-’ē-hia ho’i ’oia e te Atua ra » (Genese 5:24). Pāpū roa, tē vai ra hō’ē ’ā’amu i muri mai i te reira. Terā rā, ma te ’ore te tahi atu ha’amāramaramara’a, ’ua ha’amata fa’ahou taua tāpura u’i ra.
’Aua’e rā, ’ua heheu mai Mose 6 i te mau fa’ata’ara’a nō te ’ā’amu o Enoha—’e e ’ā’amu tā’āto’a. ’Ua ha’api’i mai tātou i te ha’eha’a o Enoha, tōna mau vai pāpū-’ore-ra’a, te pūai tā te Atua i ’ite i roto iāna, ’e te ’ohipa rahi tāna i rave ’ei peropheta nā te Atua. ’Ua fāri’i ato’a tātou i te hō’ē hōho’a pāpū a’e o te ’utuāfare o Adamu ’e o Eva, ’a tupu ai te reira i te rahi i te roara’a o te mau u’i. Tē tai’o nei tātou i te « mana rahi » o Sātane, tō te mau metua ato’a rā tei ha’api’i i tā rātou mau tamari’i « i te mau haere’a ato’a o te Atua » ’e « te mau ta’ata a’o nō te parauti’a » tei « parau ’e tei tohu » (Mose 6:15, 21, 23). E mea faufa’a rahi mau te mau mea tā tātou e ha’api’i mai nō ni’a i te ha’api’ira’a tumu tā teie mau metua ’e teie mau ta’ata a’o i ha’api’i : te fa’aro’o, te tātarahapa, te bāpetizora’a ’e te fāri’ira’a i te Vārua Maita’i (hi’o Mose 6:50–52). Taua ha’api’ira’a tumu ra, mai te autahu’ara’a e ’āpe’e i te reira, « tei vai i te mātāmua ra, e vai ato’a ïa i te hope’a o te ao nei » (Mose 6:7).
Mau mana’o nō te tuatāpapara’a pāpa’ira’a mo’a a te ta’ata hō’ē
Hō’ē peropheta e hō’ē hi’o ïa.
’Ia tuatāpapa ana’e ’oe i te Mose 6:26–36, e aha tā ’oe i ha’api’i mai nō ni’a i te mau mata, te pōiri, ’e te hi’ora’a ? I te ’anotau o Enoha, ’o vai te ’ore « e ’ite [hi’o] i te ātea » ? Nō te aha ’aita i ti’a i teie mau ta’ata ’ia ’ite [hi’o] i te parau mau ? E aha tei ti’a ia Enoha ’ia ’ite [hi’o] ? E aha te mea tei patu i tō ’oe fa’aro’o ē, e mau hi’o te mau peropheta o teie tau ? (Hi’o te ’īrava 36 ; Guide des écritures [Arata’i pāpa’ira’a mo’a], « voyant [hi’o] », scriptures.ChurchofJesusChrist.org).
’Ua pi’i te Atua ia tātou ’ia rave i tāna ’ohipa noa atu tō tātou mau paruparu.
E’ita e māerehia ’ia teimaha tātou i te mau mea tā te Fatu i pi’i ia tātou ’ia rave. ’Ua tupu ato’a te reira mana’o i roto ia Enoha i te taime ’a pi’i ai te Fatu iāna ’ia riro ’ei peropheta. ’Ia tai’o ana’e ’oe i te Mose 6:26–36, ’a ’imi nō te aha i tupu ai te mana’o teimaha i roto ia Enoha, ’e e aha tā te Fatu i parau nō te fa’aitoito iāna. I roto i te mau ’īrava 37–47, ’a ’imi i te mau rāve’a ’a pāturu ai te Fatu ia Enoha ’e ’a hōro’a ai i te pūai i roto iāna nō te rave i tāna ’ohipa (hi’o ato’a Mose 7:13). E nehenehe ’oe e fa’aau i te ’itera’a o Enoha ’e tō te tahi atu mau peropheta tei paruparu te mana’o, mai ia Mose (hi’o Exodo 4:10–16), Ieremia (hi’o Ieremia 1:4–10), Nephi (hi’o 2 Nephi 33 :1–4), ’e ’o Moroni (hi’o Etera 12:23–29). I tō ’oe mana’o e aha tā te Atua e hina’aro ’ia ’apo mai ’oe nā roto mai i teie mau ’īrava nō ni’a i te ’ohipa tāna i hōro’a ia ’oe ’ia rave ?
Hi’o ato’a Iakoba 4:6–8.
’Ua riro te ha’api’ira’a tumu a te Mesia ’ei pū nō te fa’anahonahora’a nō te fa’aorara’a a te Atua.
Nō te mea tei ia tātou te Buka a Mose, ’ua ’ite tātou ē, ’ua ha’api’i te Atua i tāna mau tamari’i nāhea ’ia ’ite mai i te fa’a’orera’a hara ’e te fa’aorara’a mai te ha’amatara’a mai ā. I roto i te mau pāpa’ira’a mo’a, i te tahi taime, tē parauhia nei teie mau ha’api’ira’a, te ha’api’ira’a tumu a te Mesia (hi’o 2 Nephi 31:13–21). ’Ia tuatāpapa ana’e ’oe i te Mose 6:48–68, e ’imi e aha te ti’a ia tātou ’ia ’ite ’e ’ia rave ’ia fa’aorahia tātou. E ’ite mai ’oe ē, e mea faufa’a ’ia pāpa’i i tā ’oe iho ha’apotora’a nō te mea tā Enoha i ha’api’i. Nō te aha e mea faufa’a ’ia ’ite ē, ’ua ha’api’ihia teie mau parau mau mai te ’anotau mai ā o Adamu ’e o Eva ? E aha tē muhumuhuhia mai ia ’oe ’ia rave i muri a’e i tō ’oe tuatāpapara’a i teie mau ha’api’ira’a ?
« ’Ia ha’api’i atu i teie mau mea i tā ’outou mau tamari’i »
’Ua ha’api’ihia ia Adamu ’e ia Eva i te mau parau mau faufa’a rahi o te ’evanelia a Iesu Mesia. Terā rā, ’ua pāpū maita’i te mau parau a te Fatu i roto i te Mose 6:27–28 ē, i roto i te mau u’i nā mua atu ia Enoha, e rave rahi ta’ata ’aita i ora fa’ahou i taua mau parau mau ra. ’Ua hina’aro te Fatu ’ia fa’aho’i fa’ahou mai Enoha i te mau parau mau tei mo’e—e tae noa atu i te fa’auera’a tumu i hōro’ahia ia Adamu : « ’Ia ha’api’i atu i teie mau mea i tā ’outou mau tamari’i » (Mose 6:58). ’Ia tai’o ana’e ’oe i te Mose 6:51–62, e aha tā ’oe i ha’api’i mai nō ni’a ia Iesu Mesia ? E aha tā ’oe i ’ite mai ’o tē riro ’ei mea faufa’a ta’a ’ē nō te u’i e ti’a mai nei ? E aha tā ’oe e nehenehe e rave nō te tauturu i te fa’ataera’a atu i teie mau parau mau i te mau u’i nō ananahi ?
E ha’api’i te mau metua i te eevanelia i tā rātou mau tamari’i.
Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare
-
Genese 5 ; Mose 6:5–25, 46.E nehenehe te tai’ora’a i te « buka ha’amana’ora’a » tā Adamu ’e tā Eva i hāmani, e fa’auru i tō ’outou ’utuāfare ’ia hāmani i tō ’outou iho buka ha’amana’ora’a. E ’āparau ’ei ’utuāfare i te mau mea tā ’outou e tu’u i roto. Tē vai ra paha tā ’outou mau hōho’a, te mau ’ā’amu, ’aore rā te mau parau nō roto mai i te ’ā’amu o tō ’outou ’utuāfare. E nehenehe ’outou e mā’iti e tu’u i roto, i te mau mea e tupu nei i roto i tō ’outou ’utuāfare i teienei. E aha tā te mau u’i nō ananahi e ’ite mai e mea faufa’a ? E nehenehe ato’a ’outou e tāu’aparau nāhea te mau pereota « nā roto i te vārua fa’aurura’a » (Mose 6:5) ’e « mai te au i te hōho’a i hōro’ahia mai e te rima o te Atua » (Mose 6:46) e nehenehe ai e arata’i i tā ’outou mau tauto’ora’a. ’A feruri ’ia tu’u i te mau ha’amāramaramara’a nō roto mai i tā ’outou buka ha’amana’ora’a i ni’a i te FamilySearch.org.
-
Mose 6:53–62.Nāhea tātou i te pāhono i te uira’a a Adamu e ’itehia i roto i te Mose 6:53 ? E aha te mau pāhonora’a i ’itehia mai ia tātou i roto i te mau ’īrava 57–62 ?
-
Mose 6:59.E aha te aura’a nō te parau « ’ia fānau-fa’ahou-hia ’oe i roto i te bāsileia o te ao ra » ? E aha tā tātou e nehenehe e rave nō te tāmau noa i te fānau-fa’ahou-hia i te roara’a o tō tātou orara’a ? Nō te tauturu, hi’o Alama 5:7–14, 26 ; Guide des écritures [Arata’i pāpa’ira’a mo’a], « Né de nouveau, né de Dieu [fānau-fa’ahou-hia, fānauhia i te Atua] » scriptures.ChurchofJesusChrist.org ; David A. Bednar, « Vai matara noa tā ’outou mau hara » (Liahona, Mē 2016, 59–62).
-
Mose 6:61.E aha tā tātou e ha’api’i mai nō ni’a i te Vārua Maita’i i roto i teie ’īrava ?
-
Mose 6:63.E aha te tahi mau mea ’o tē « fa’a’ite i te parau nō [te Mesia] » ? (hi’o ato’a 2 Nephi 11:4). E nehenehe e ani i te mau melo o te ’utuāfare ’ia fa’a’ite mai i te tahi mea ’o tā rātou e ’ite nei « i roto i te mau ra’i i ni’a a’e » ’aore rā « i ni’a i te fenua nei » o tē tauturu ia rātou ’ia ha’api’i mai nō ni’a ia Iesu Mesia. ’Ei hi’ora’a, nāhea te mau tumu rā’au, te mau ’ōfa’i, ’aore rā te mahana ’ia fa’aha’amana’o mai ia tātou i te Fa’aora ? E aha tā te mau upo’o parau « pape ora » ’e « pane ora » e ha’api’i nei ia tātou nō ni’a iāna ?(Ioane 4:10–14 ; 6:35).
Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere
Hīmene tei mana’ohia : « E pe’e au ia ’oe », Te mau Hīmene, no. 165.
Ha’amaita’i i tā ’oe iho tuatāpapara’a pāpa’ira’a mo’a
E ’imi i te mau taipe. I roto i te mau pāpa’ira’a mo’a, e nehenehe te mau tao’a ’aore rā te mau ’ohipa i tupu, e fa’ahōho’a pinepine ’aore rā e fa’ataipe i te mau parau mau pae vārua. E nehenehe teie mau taipe e fa’arahi i tō ’oe māramaramara’a i te ha’api’ira’a tumu. ’Ei hi’ora’a, e aha tā ’oe i ha’api’i mai i roto i te mau taipe o te mata ’e te ’araea i roto i te Mose 6:35 ?
Adamu ’e ’o Eva e ha’api’i ra i tā rāua mau tamari’i nā Del Parson.