hōho’a o te fenua nei ’e o te ’āva’e

3–9 nō Tēnuare

Genese 1–2 ; Mose 2–3 ; Aberahama 4–5.

« Hāmani ihora te Atua i te ra’i ’e te fenua i te mātāmua ra »

Noa atu ē, ’ua tai’o na ’outou nō ni’a i te poietera’a nā mua a’e nei, e vai noa ā te tahi atu mau mea nō tē ha’api’i mai i roto i te mau pāpa’ira’a mo’a. ’A pure nō te arata’ira’a a te Vārua maita’i nō te tauturu ia ’outou ’ia ’ite i te mau māramarama ’āpī.

Pāpa’i i te mau mana’o e tae mai

Nō te nehenehe ’e te hanahana ’o te ao ’ati a’e ia tātou, e mea fifi ’ia feruri i te fenua « tē vai ano noa ra te fenua , ’aore e faufa’a », « e mea ano ïa ’e te faufa’a ’ore » (Genese 1:2 ; Aberahama 4:2). Hō’ē mea tā te ’ā’amu nō te poietera’a e ha’api’i nei ia tātou ’oia ho’i, e nehenehe te Atua e hāmani i te hō’ē mea nehenehe nā roto mai i te hō’ē mea fa’anaho-’ore-hia. E mea faufa’a ’ia ha’amana’o i te reira, nō te taime e fifi ai te orara’a. E nā ta’ata rahu te Metua i te ao ra ’e o Iesu Mesia, ’e ’aita tā rāua ’ohipa rahura’a i pīha’i iho ia tātou i hope. E nehenehe rāua e fa’a’ana’ana i te māramarama i roto i te mau taime pōiri i roto i tō tātou orara’a. E nehenehe rāua e hāmani i te repo pa’ari i rōpū i te mau miti ’ārepurepu o te orara’a. E nehenehe rāua e fa’aue i te mau mea o te nātura, e mai te mea e ha’apa’o tātou i tā rāua parau mai te mau mea o te nātura, e nehenehe rāua e taui ia tātou ’ei mau hāmanira’a nehenehe i ’ōpuahia nō tātou. E tuha’a te reira nō te aura’a o te parau ra ē, ’ia hāmanihia mai te au i te hōho’a o te Atua, mai te au i tōna huru (hi’o Genese 1:26). E mana tō tātou nō te riro mai mai iāna te huru : fa’ateiteihia, fa’ahanahanahia, e ’ia riro ’ei mea tīrētiēra.

Nō te hō’ē hi’ora’a poto nō te Buka a Genese, hi’o « Genese » i roto i te Fa’atoro parau o te Bibilia.

’ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Genese 1:1–25 ; Mose 2:1–25 ; Aberahama 4:1–25

I raro a’e i te arata’ira’a a te Metua i te ao ra, ’ua hāmani Iesu Mesia i te fenua.

’Ua parau ’o Elder D. Todd Christofferson ē, « noa atu te huru o te ’ohipa hāmanira’a, ’ua ’ite tātou ē, e ’ere te reira i te mea hape noa, nā te Atua te Metua rā te reira i arata’i ’e nā Iesu Mesia i fa’a’ohipa » (« Nō te aha te fa’aipoipora’a, nō te aha te ’utuāfare », Liahona, Mē 2015, 51). Noa atu ē, ’aita tātou i ’ite mau e rave rahi mau mea nō ni’a i te hāmanira’ahia te ao nei, ’a feruri na e aha tā ’oe i ha’api’i mai nō ni’a i te poietera’a nā roto mai i te mau mea tā te Atua i heheu mai i roto i te Genese 1:1–25 ; Mose 2:1–25 ; ’e Aberahama 4:1–25. E aha tā ’oe e ’ite ra i roto i teie mau ’ā’amu tei ’aifāito ? E aha tā ’oe e ’ite ra e mea ta’a’ ē ? E aha tō ’oe mau mana’o nō ni’a i te Metua i te ao ra ’e ia Iesu Mesia ’a tai’o ai ’oe nō ni’a i te poietera’a ?

Hi’o ato’a Te Parau Ha’api’ira’a ’e te mau Parau Fafau 101:32–34.

pu’ohu ma te fa’a’ite i te mau tuha’a ta’a ’ē o te poietera’a

Poietera’a, nā Joan Hibbert Durtschi

Genese 1:27–28 ; 2:18–25 ; Mose 3 :18, 21–25 ; Aberahama 5:14–19.

’Ua ha’apa’ohia e te Atua te fa’aipoipora’a i rotopū i te tāne ’e te vahine.

« ’Ua tāhō’ēhia ’o Adamu ’e ’o Eva i roto i te fa’aipoipora’a nō te tau ’e nō te tau a muri noa atu nā roto i te mana o [te] autahu’ara’a mure ’ore » (Russell M. Nelson, « Lessons from Eve », Ensign, Novema 1987, 87). Nō te aha e mea faufa’a ’ia ’ite i teie parau mau ? ’A feruri i te reira ’a tai’o ai ’oe i te Genese 1:27–28 ; 2:18–25 ; Mose 3 :18, 21–25 ; ’e Aberahama 5:14–19.. Mai te mea e hina’aro ’oe ’ia ha’api’i mai ā nō ni’a i te fa’aipoipora’a i roto i te fa’anahora’a a te Atua, ’a tai’o ’e ’a feruri i te mau rāve’a i tāpurahia i raro nei. E aha tā teie mau rāve’a e fa’auru nei ia ’oe ’ia rave nō te ha’amaita’i i tō ’oe fa’aipoipora’a ’aore rā nō te fa’aineine nō te fa’aipoipora’a a muri a’e ?

Hi’o ato’a Mataio 19:4–6 ; 1 Korinetia 11:11 ; Linda K. Burton, « E tā’uma ’āmui tātou », Liahona, Mē 2015, 29–32 ; « Te ’Utuāfare : E Poro’i i tō te Ao nei », ChurchofJesusChrist.org.

Genese 2:2–3 ; Mose 3 :2–3 ; Aberahama 5:2–3

’Ua ha’amaita’i ’e ’ua ha’amo’a te Atua i te mahana sābati.

’Ua fa’ariro te Atua i te mahana sābati ’ei mahana mo’a, ’e tē ani nei ’oia ia tātou ’ia ha’amo’a i te reira. ’Ua ha’api’i Elder David A. Bednar ē, « te sābati ’o te taime ïa a te Atua, e taime mo’a fa’ata’a-ta’a-’e-hia nō te ha’amori iāna ’e nō te fāri’i ’e nō te ha’amana’o i tāna mau parau fafau rahi ’e te faufa’a » (« Te fa’ahaura’a i te mau parau fafau rahi ’e te faufa’a », Liahona, Novema 2017, 92). Nāhea e ti’a ai ia ’oe ’ia fa’a’ohipa i teie fa’ahitira’a ’e te Genese 2:2–3 ; Mose 3 :2–3 ; ’aore rā Aberahama 5:2–3 nō te fa’ata’a i te hō’ē ta’ata ē, nō te aha ’oe i mā’iti ai ’ia fa’atura i te mahana sābati ? E mea nāhea tō te Fatu ha’amaita’ira’a ia ’oe nō te ha’amo’ara’a i tōna mahana ?

Hi’o ato’a Isaia 58:13–14 ; Te Parau Ha’api’ira’a ’e te mau Parau Fafau 59:9–13 ; « The Sabbath Is a Delight [E mea hina’arohia te sābati] » (video), ChurchofJesusChrist.org.

family study icon

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Genese 1:1–25 ; Mose 2:1–25 ; Aberahama 4:1–25.Nāhea ’outou ’ia fa’ariro i te ha’api’ira’a mai nō ni’a i te poietera’a ’ei ’ohipa ’ārearea nō tō ’outou ’utuāfare ? E nehenehe ’outou e hōpoi i tō ’outou ’utuāfare i rāpae nō te ’imi mai i te mau mea tei hāmanihia i te mau tuha’a tāta’itahi o te poietera’a, mai te mau feti’a, te mau tumu rā’au ’aore rā te mau ’ānimara. E nehenehe ato’a ’outou e fa’a’ite i te mau hōho’a o te mau mea i hāmanihia i roto i te pu’e tau tāta’itahi, ’e e ani i te mau melo o te ’utuāfare ’ia fa’anaho i te mau hōho’a i roto i te ana’ira’a i muri a’e i te tai’o-’āmui-ra’a i te hō’ē o te mau tuha’a ’ā’amu o te poietera’a. E aha tā teie mau hāmanira’a e ha’api’i nei ia tātou nō ni’a i te Metua i te ao ra ’e ia Iesu Mesia ?

Genese 1 ; Mose 2 ; Aberahama 4.Hō’ē rāve’a nō te tai’o i te ’ā’amu o te poietera’a, ’o te anira’a ïa i tō ’outou ’utuāfare ’ia ’imi mai e hia taime i roto i te Genese 1 ’aore rā te Mose 2 i parau ai te Atua i te mau mea tāna i hāmani « e mea maita’i ». E aha tā te reira e parau nei nō ni’a i tō tātou huru i ni’a i te mau mea tei hāmanihia e te Atua—tae noa atu ia tātou iho ? E aha tā tātou e ha’api’i mai nō ni’a i te huru o te fa’ahitira’ahia teie mau ’ohipa i tupu i roto i te Aberahama 4 ?

Genese 1:26–27 ; Mose 2:26–27 ; Aberahama 4:26–27.Nō te aha e mea faufa’a ’ia ’ite ē, ’ua hāmanihia tātou ’ia au i te hōho’a o te Atua ? E aha te mana’o tā te reira e fa’atupu mai i roto ia tātou nō ni’a ia tātou iho, ia vetahi ’ē, ’e nō ni’a i te Atua ?

Mai te mea e mau tamari’i na’ina’i tā ’outou, e nehenehe ’outou e tai’o ’āmui i te Mose 2:27 ’e e ha’uti i te hō’ē ha’uti ’ōhie : ’a fa’a’ite i te hō’ē hōho’a ’o tē fa’a’ite ra i te Metua i te ao ra ’e ia Iesu Mesia, mai te hōho’a 90 i roto i te Buka hōho’a o te ’evanelia (2009), ’e e ani i te mau melo o te ’utuāfare, te tahi i muri mai i te tahi, ’ia fa’atoro i ni’a i te hō’ē tuha’a o te tino o te Metua i te ao ra ’aore rā o Iesu. I muri iho e nehenehe te tahi atu mau melo o te ’utuāfare e fa’atoro i te reira tuha’a i ni’a i tō rātou tino.

Genese 1:28 ; Mose 2:28 ; Aberahama 4:28.« Tē vai pāpū noa nei ā te fa’auera’a a te Atua i tāna mau tamari’i ’ia fānau fa’arahi ’e ’ia fa’a’ī i te fenua » (Te ’Utuāfare : E Poro’i i tō te Ao nei », ChurchofJesusChrist.org). E nehenehe te mau melo o te ’utuāfare e ha’uti nō te fa’ata’a i tō tātou mau ti’aturira’a nō ni’a i teie fa’auera’a ia rātou tei ’ore i ’ite i teie parau mau ’aore rā ’o tē ti’aturi ta’a ’ē nei.

Genese 1:28 ; Mose 2:28 ; Aberahama 4:28.E aha te aura’a « fa’atere… i ni’a i te mau mea ato’a e ne’e haere i ni’a i te fenua nei » ? (hi’o ato’a Te Parau Ha’api’ira’a ’e te mau Parau Fafau 59:16–21). Nāhea e nehenehe ai i tō tātou ’utuāfare ’ia fa’aoti i tā tātou hōpoi’a ’ia aupuru i te fenua nei ?

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto i te Mai, pe’e mai—nō te Paraimere

Hīmene tei mana’ohia : « Mon Père céleste m’aime », Chants pour les enfants, 16–17

Ha’amaita’i i tā tātou ha’api’ira’a

Fa’a’ohipa i te mau pāpa’ira’a mo’a i roto i tō tātou orara’a. I muri a’e i te tai’ora’a i te hō’ē tuha’a pāpa’ira’a mo’a, e ani i te mau melo o te ’utuāfare ’ia fa’a’ohipa i te reira i roto i tō rātou orara’a. ’Ei hi’ora’a, nāhea te Mose 3 :1–3 e tano ai i tā tātou ha’apa’ora’a i te mahana sābati i te hepetoma tāta’itahi ? (Hi’o Ha’api’ira’a mai tā te Fa’aora,21.)

Iesu Mesia e ti’a nei i rotopū i te mau ata

Te poietera’a, nā Annie Henrie Nader