« 3–9 nō Tēnuare. Genese 1–2 ; Mose 2–3 ; Aberahama 4–5 : ‘Hāmani ihora te Atua i te ra’i ’e te fenua i te mātāmua ra’ », Mai, pe’e mai—nō te Paraimere : Faufa’a Tahito 2022 (2021)
« 3–9 nō Tēnuare. Genese 1–2 ; Mose 2–3 ; Aberahama 4–5 », Mai, pe’e mai—nō te Paraimere : 2022
3–9 nō Tēnuare
Genese 1–2 ; Mose 2–3 ; Aberahama 4–5
« Hāmani ihora te Atua i te ra’i ’e te fenua i te mātāmua ra »
’Atuatāpapa ai ’oe i te Genese 1–2, Mose 2–3, ’e i te Aberahama 4–5, ’a feruri i te mau tamari’i tā ’oe e ha’api’i ra, ’e ’a feruri hōhonu i te mau parau mau tā ’oe e nehenehe e tauturu ia rātou ’ia hāro’aro’a i roto i teie mau pene.
Pāpa’i i te mau mana’o e tae mai
Tītau i te mana’o
E ani i te mau tamari’i ’ia fa’a’ite mai i te hō’ē mea tā te Metua i te Ao ra ’e tā Iesu Mesia i poiete o tā rātou e maruruuru nei. E nehenehe te fa’a’itera’a i te hōho’a nō roto mai i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare e hōro’a ia rātou i te mau mana’o.
Ha’api’i i te ha’api’ira’a tumu : Te mau tamari’i ’āpī a’e
Nā Iesu i poiete i te fenua
E nehenehe te ’itera’a nō ni’a i te Poietera’a e tauturu i te mau tamari’i ’ia fāri’i i te here o te Atua ’e ’ia fa’arahi i tō rātou māuruuru nō te ao nei. Nāhea ’oe e nehenehe ai e fa’ariro i te ’itera’a nō ni’a i te Poietera’a ’ei mea fa’auru ?
Mau ’ohipara’a e nehenehe e rave
-
E fa’a’ite i te mau tamari’i i te mau hōho’a o te mau mea ’o tē fa’ahōho’a nei i terā pu’e tau ’e terā pu’e tau o te Poietera’a (mai tei fa’ata’ahia i roto i te Mose 2 ; hi’o ato’a « Nā Iesu Mesia i hāmani i te fenua », i roto i Te mau ’ā’amu o te Faufa’a Tahito), ’e e tauturu i te mau tamari’i ’ia feruri i te mau ravera’a e tū’ati i te mau hōho’a. ’Ei hi’ora’a, e nehenehe rātou e ha’amenemene i te rima nō te fa’ahōho’a i te fenua marō ’aore rā e tāhirihiri i tō rātou rima mai te are pape te huru (hi’o Mose 2:9–10). ’A fa’a’ite i tō ’outou ’itera’a pāpū ē, ’ua poiete Iesu Mesia i teie mau mea nō te mea ’ua here ’oia ’e te Metua i te Ao ra ia tātou.
-
Hīmene i te hō’ē hīmene nō ni’a i te mau mea tā Iesu Mesia i poiete nō tātou, mai te « Le monde est si beau » (Chants pour les enfants, 123). E ani i te mau tamari’i ’ia pāpa’i hōho’a o te poietera’a tei fa’ata’ahia i roto i te hīmene.
Hōho’apū’ohura’a e fa’a’ite ra i te mau tuha’a ta’a ’ē o te poietera’aPoietera’a, nā Joan Hibbert Durtschi
’Ua hāmanihia vau i te hōho’a o te Atua.
’Ia māramarama ana’e te mau tamari’i ē, ’ua hāmanihia rātou i te hōho’a o te Atua, e nehenehe rātou e fa’atupu i te fa’atura ’e te auraro nō tō rātou iho tino ’e nō tō vetahi ’ē tino.
Mau ’ohipara’a e nehenehe e rave
-
E tauturu i te mau tamari’i ’ia fa’ahiti e rave rahi taime « ’Ua hāmani ihora vau, o te Atua, i te ta’ata i roto i tō’u iho hōho’a » (Mose 2:27,). E fa’ata’a ē, ’ua hāmani te Metua i te Ao ra i tō tātou tino ’ia au i tōna hōho’a. E ani i te mau tamari’i ’ia fa’atoro i te mau tuha’a o tō rātou tino ’a fa’ahiti ai ’oe i te i’oa o te reira, ’aore rā ’ia hīmene i te hō’ē hīmene nō ni’a i tō tātou tino, mai te « La tête, les épaules, les genoux, les pieds » (Chants pour les enfants, 133).
-
E ani i te mau tamari’i ’ia ha’uti mai i te mau mea tā rātou e nehenehe e rave i tō rātou tino, ’a ’imi ai te tahi atu mau tamari’i i te mea tā rātou e ha’uti ra. E ani i te mau tamari’i ’ia fa’a’ite mai nō te aha rātou e māuruuru ai nō tō rātou tino.
-
E pāpa’i i te hōho’a o te hō’ē tino i ni’a i te ’api parau, ’e e hāmani i te hō’ē puzzle ma te tāpūpū i te reira. E ’ōpere i te mau tuha’a, ’e e vaiiho i te mau tamari’i ’ia ’ohipa ’āmui nō te fa’atano i te mau tuha’a nō te hāmani i te hō’ē tino. E ani i te mau tamari’i ’ia fa’a’ite mai i te mau mea tā rātou e nehenehe e rave e te mau tuha’a tāta’itahi. ’A fa’a’ite i tō ’oe ’itera’a pāpū ē, ’ua hāmanihia tō tātou tino i te hōho’a o te Atua.
E mea mo’a te mahana sābati.
Te mau tamari’i tei ha’amātauhia i te peu ha’amo’ara’a i te mahana sābati i tō rātou ’āpīra’a, e mea pāpū ē, e ha’apa’o rātou i teie fa’auera’a i te mau taime teimaha ’e te fifi o te orara’a.
Mau ’ohipara’a e nehenehe e rave
-
E tai’o i te Mose 3:2–3, ’e e ani i te mau tamari’i ’ia fa’aro’o i te mea tā te Atua i rave i te hitu o te mahana. ’A hōpoi mai i te mau hōho’a (’aore rā e pāpa’i i te mau hōho’a ’ōhie) nō te mau mea tā tātou e rave i te sābati nō te fa’ariro ’ei mahana mo’a, ’e i te mau ’ohipa tā tātou e rave i te tahi atu mau mahana. E vaiiho i te mau tamari’i ’ia fa’ata’a i te mau hōho’a nā roto e piti ’āpapara’a, hō’ē nō te sābati ’e hō’ē nō te tahi atu mau mahana. ’A fa’a’ite pāpū ē, nō te aha e mea faufa’a ’ia ha’amo’a i te mahana sābati.
-
Tau mahana nā mua a’e i te ha’api’ira’a, e ani i te hō’ē o te mau tamari’i ’e i tōna nā metua ’ia haere mai ma te ineine nō tē fa’a’ite mai i te mau mea tā rātou e rave nei i roto i tō rātou ’utuāfare nō te ha’amo’a i te mahana sābati. E ani i te tahi atu mau tamari’i ’ia fa’a’ite mai i te ’ohipa tā tō rātou ’utuāfare e rave nei.
Ha’api’i i te ha’api’ira’a tumu : Te mau tamari’i pa’ari
’Ua hāmani Iesu Mesia i te ao nei i raro a’e i te fa’aterera’a a te Metua i te Ao ra.
E nehenehe ’oe e fa’a’ohipa i te Mose 2 nō te tauturu i te mau tamari’i ’ia hi’o ē, e tumu i hāmanihia ai te fenua ’ei tuha’a nō te fa’anahora’a a te Atua. ’Ia tai’o ’oe i teie mau pene, e aha te mau mana’o e tupu mai i roto i te ferurira’a ’o tē nehenehe e tauturu i te ha’apūai i te ’itera’a pāpū o te mau tamari’i nō te poietera’a ?
Mau ’ohipara’a e nehenehe e rave
-
Tauturu i te mau tamari’i ’ia feruri i te mau taime ’a hāmani ai rātou i te hō’ē ’ohipa nā roto i te pe’era’a i te mau arata’ira’a a te tahi atu ta’ata. ’Ei hi’ora’a, penei a’e ’ua hāmani rātou i te hō’ē mā’a ma te arata’ihia e te hō’ē metua ’aore rā hō’ē tua’ana. E pāpa’i Nā vai i poiete i te fenua ? i ni’a i te tāpura ’ere’ere, ’e e ani i te mau tamari’i ’ia ’imi i te pāhonora’a i roto i te Mose 2:1. E fa’a’ite pāpū ē, ’ua poiete Iesu Mesia i te fenua i raro a’e i te arata’ira’a a te Metua i te Ao ra.
-
’A hōro’a i te tamari’i tāta’itahi i te mau ’īrava i roto i te Mose 2 e fa’ahiti ra i te hō’ē o te mau mahana o te poietera’a, ’e e ani iāna ’ia pāpa’i i te hō’ē hōho’a nō te mau mea tā te Metua i te Ao ra ’e tā Iesu i hāmani i taua mahana ra. E ani i te mau tamari’i ’ia tāpe’a i tā rātou hōho’a ’e ’ia ti’a ’ia au i te ’āna’ira’a o te mau mahana o te poietera’a, ’e i muri iho, e ani i te tamari’i tāta’itahi ’ia ha’api’i i te toe’a o te mau tamari’i i te mea tei tupu i te mahana tei fa’ata’ahia nā rātou. E aha tā tātou i ha’api’i mai nō ni’a i te Metua i te Ao ra ’e ’o Iesu Mesia nā roto mai i te ’ā’amu o te poietera’a ?
’Ua hāmanihia ’o Adamu ’e ’o Eva i te hōho’a o te Atua.
Tē hōro’a nei te ao nei i te mau tamari’i e rave rahi mau poro’i hape nō ni’a i tō rātou tino. Te ha’api’ira’a tumu i roto i te Mose 2:26–27, ’o te hō’ē ïa tūra’ira’a pūai nō te fa’atura ’e nō te ’atu’atu i tō tātou tino.
Mau ’ohipara’a e nehenehe e rave
-
E tai’o ’āmui i te Mose 2:26–27. E aha tā teie mau ’īrava e haʼapiʼi nei ia tātou nō niʼa i tō tātou tino ? E fa’a’ite i te video « God’s Greatest Creation » (ChurchofJesusChrist.org), ’aore rā e ha’uti i te ha’uti « Your Body Is a Temple » (Friend, ’Ātete 2019, 24–25). E nehenehe ato’a ’outou e tai’o ’āmui i te mau fa’ahitira’a parau nā roto mai i te parau poro’i a te peresideni Russell M. Nelson « Your Body : ’A Magnificent Gift to Cherish » (New Era, ’Ātete 2019, 2–7) ’o tē tauturu i te mau tamari’i ’ia ’ite i te māuruuru i te Metua i te Ao ra nō tō rātou tino.
-
E pāpa’i hōho’a i te hō’ē huru tino i ni’a i te tāpura ’ere’ere, ’e e ani i te mau tamari’i ’ia mā’iti i te hō’ē tuha’a o te tino, ’e e pāpa’i i pīha’i iho i te reira i te tumu rātou i māuruuru ai nō te reira. Fa’a’ite i tō ’outou māuruuru nō tō ’outou tino, ’e e fa’a’ite pāpū ē, ’ua hāmanihia tātou ia au i te hōho’a o te Atua.
E mea mo’a te mahana sābati.
E nehenehe te mau tamari’i e fa’ata’a i tō rātou mau hoa nō te aha rātou e fa’ariro ai i te sābati ’ei mahana ta’a ’ē i te tahi atu mau mahana. Tē ha’api’i nei te Genese 2:2–3 nō te aha te mahana sābati e riro ai ’ei mahana mo’a. E aha tā ’oe e nehenehe e rave nō te tauturu i te mau tamari’i ’ia hāro’aro’a maita’i a’e ’e ’ia fa’ata’a i teie ha’api’ira’a tumu ?
Mau ’ohipara’a e nehenehe e rave
-
Nāhea te ha’amo’ara’a i te mahana sābati, e fa’a’itera’a te reira i tō tātou here ’e tō tātou fa’atura i Metua i te Ao ra ’e ia Iesu Mesia ? E tauturu i te mau tamari’i ’ia ha’uti teata ta’ata ora i te mau hōho’a i reira ho’i rātou e fa’ata’a ai i te hō’ē hoa nō te aha rātou i mā’iti ai e rave i te mau ’ohipa i te sābati ’o tē fa’ahanahana i te Metua i te Ao ra ’e ia Iesu. ’A ani ia rātou ’ia fa’a’ohipa i te Genese 2:2–3 i roto i tā rātou mau tātarara’a.
-
Hōro’a i te tahi tau minuti i te mau tamari’i, nō te pāpa’i i te hō’ē tāpura nō te mau mea e rave rahi tā rātou i mana’o, e nehenehe rātou e rave nō te ha’amo’a i te mahana sābati. E ani i te mau tamari’i ’ia fa’a’ite mai i tā rātou tāpura, ’e e fa’aitoito ia rātou ’ia tu’u atu i roto i tā rātou tāpura i te mau mana’o tei hōro’ahia mai e vetahi ’ē, ’aita ra rātou i feruri. E parau i te mau tamari’i ’ia hōpoi i tā rātou tāpura i te fare ’e ’ia hi’o i te reira i te mau taime e hina’aro ai rātou i te mau mana’o nō te mau ’ohipa maita’i e rave i te sābati.
Fa’aitoito i te ’apora’a mai i te fare
E tauturu i te mau tamari’i ’ia feruri, e nāhea rātou e nehenehe ai e rave i te hō’ē ’ohipara’a ’e tō rātou ’utuāfare mai tā ’outou i rave i roto i te piha ha’api’ira’a. E hina’aro paha ’oe e tauturu ia rātou ’ia pāpa’i i te hō’ē nota nō te fa’aha’amana’o ia rātou iho.
Ha’amaita’ira’a i tā tātou ha’api’ira’a
Tauturu i te mau tamari’i ’ia fa’a’ite’ite mai i tā rātou mau hāmanira’a. ’Ia hamani ana’e te mau tamari’i, ’ia pāpa’i hōho’a, ’aore rā ’ia fa’a’ū i te hō’ē mea e tū’ati i te ’ā’amu ’aore rā, i te hō’ē parau tumu tā rātou i ha’api’i mai, e pinepine rātou i te ha’amana’o maita’i atu ā i te reira. E fa’aitoito ia rātou ’ia fa’a’ohipa i tā rātou mau hāmanira’a nō te ha’api’i i tō rātou ’utuāfare. (Hi’o Te Ha’api’ira’a mai tā te Fa’aora, 25.)