“M̧aaj 28–Eprōļ 3. Exodus 7–13: ‘Kom̧win Keememej Raan In, Raan eo Kom̧ Ar Diwōjtok jān Ijipt,’” Itok, Ļoor Eō—N̄an Būraimere: Kallim̧ur M̧okta 2022 (2021)
“M̧aaj 28–Eprōļ 3. Exodus 7–13,” Itok, Ļoor Eō—N̄an Būraimere: 2022
Kōmeļeļe eo an Moses im Aaron im̧aan mejān Pero, jān Robert T. Barrett
M̧aaj 28–Eprōļ 3
Exodus 7–13
“Kom̧win Keememej Raan In, Raan eo Kom̧ Ar Diwōjtok jān Ijipt”
Ilo am̧ riiti Exodus 7–13, ļōmņak kōn ekōjkan an m̧ool ko ilo jebta kein kōkajoorļo̧k tōmak eo am̧ ilo Jisōs Kraist. Ekōjkan am̧ maron̄ jipan̄ ajri ro kwoj katakin er bōk juon en̄jake āinwōt juon?
Je En̄jake ko Rej Im̧we Eok
Kajjitōk bwe ren Kwaļo̧k
Likūt jejjo pija ko me rej bōk jikin men ko ilo Exodus 7–13 (āinwōt frog, ļon̄, im juon tōma) ium̧win juon nuknuk ioon tebōļ eo. Kajjitōk ippān jejjo ajri n̄an bōk juon iaan pija ko jān ium̧win nuknuk eo, im kajjitōk ippān kūlaaj eo n̄an kwaļo̧k ta eo rekar ekkatak kōn pija in ilo m̧ōko wiik in.
Katakin Katak eo: Ajri ro Reddikļo̧k
Irooj ewōr an kajoor ioon men otemjeļo̧k.
Ri Israel ro rekar pād ilo kamakoko im rekar jab kanemkwoj er make, ak Irooj ekar kwaļo̧k An kajoor im kanemkwoj er. Ekōjkan am̧ maron̄ kōjerbal bwebwenato in n̄an jipan̄ ajri ro lōke Irooj im kajoor eo An?
M̧akūtkūt ko Maron̄ Kōm̧m̧ani
-
Riiti eoon ko kar kāāleti jān Exodus 7–11 n̄an katakin ajri ro kōn nan̄inmej ko jon̄oul me Irooj ekar jilkinļo̧k ioon riIjipt ro (lale barāinwōt “Moses the Prophet,” ilo Bwebwenato ko ilo Kalim̧m̧ur M̧okta). Kajjitōk ippān ajri ro n̄an jin̄n̄aik pija ko me rej kwaļo̧k jet iaan nan̄inmej ko. Kajjitōk ippān ajri ro n̄an dāpij pija ko aer ilo am̧ bar kakeememej er kōn nan̄inmej ko. Riit naan ko jān Exodus 7:5 im 9:14 n̄an kōmeļeļeik etke Irooj ekar jilkinļo̧k nan̄inmej ko n̄an Ijipt.
-
Kwaļo̧k n̄an ajri ro ekōjkan an Irooj kar kwaļo̧k n̄an eok “bwe ejjeļo̧k juon āinwōt [E], ilo aolepen laļ” (Exodus 9:14). Kōtļo̧k bwe ajri ro ren kwaļo̧k wāween aer jeļā bwe Irooj ekajoor.
Kwojkwoj eo emaron̄ jipan̄ eō keememej Jisōs.
Kwojkwoj in kijoone eo ekar katakin ri Israel ro kōn Rilo̧mo̧o̧r im katok eo me juon raan Enaaj kōm̧m̧ane n̄an kōj. Rainin, jej bōk kwojkwoj eo n̄an keememej katok eo an Jisōs.
Kwojkwoj eo ej jipan̄ kōj keememej Jisōs Kraist.
M̧akūtkūt ko Maron̄ Kōm̧m̧ani
-
Kōjerbal Exodus 12:1–13, ba n̄an ajri ro ta eo Irooj ekar ba n̄an ri Israel ro n̄an kōm̧m̧ane bwe ren maron̄ lo̧mo̧o̧r jān nan̄inmej eo āliktata (lale barāinwōt “The Passover,” ilo Old Testament Stories). Kwaļo̧k pijaan Jisōs ej Jibwe juon Laam̧ Ejebwābwe (Gospel Art Book, no. 64), im kwaļo̧k men ko rej āinwōt juon kaki ikōtaan Laam̧ me kar kōjerbale ilo Kwojkwoj in Kijoone eo im Jisōs Kraist, Laam̧ an Anij.
-
Kajjitōk ippān ajri ro n̄an kwaļo̧k etan men ko jej kōm̧m̧ani n̄an keememej m̧akūtkūt ko raorōk āinwōt iien kemeem ko im raan in alōte ko. Riit Exodus 13:10, im kōmeļeļe bwe Irooj ekar kajjitōk ippān ro nejin Israel n̄an kōļake ak kakeememej Kwojkwoj in Kijoone eo kajjojo iiō n̄an jipan̄ er keememej bwe Ekar lo̧mo̧o̧ren er jān ri Ijipt ro. Ta jet iaan wāween ko jemaron̄ keememej bwe Jisōs ekar lo̧mo̧o̧ren kōj jān jerawiwi im mej?
-
N̄e ekkar, loļo̧k tebōļ in kwojkwoj eo ippān ajri ro, im kōnono kōn wāween an kwojkwoj eo jipan̄ kōj keememej Jisōs Kraist. Al ippān doon “The Sacrament” (Al ko Al in Ajri, 72) ak bar juon al in kautiej kōn Jisōs Kraist. Jipan̄ ajri ro kile en̄jake in aeņōm̧m̧an eo ewōr ippāer ke rekar ļōmņak kōn Rilo̧mo̧o̧r, im kajjitōk ippāer n̄an kappukot en̄jake eo ke rekar bōk kwojkwoj eo.
-
Leļo̧k n̄an ajri ro m̧ōttan pepa ko kōn naan kein ie “Imaron̄ keememej Jisōs Kraist ilo iien kwojkwoj eo ilo aō …” je ilōn̄tata. Kajjitōk ippān ajri ro n̄an jin̄aik pija ko me remaron̄ kalimjōki ilo iien kwojkwoj eo n̄an jipan̄ er keememej Jisōs Kraist.
Katakin Katak eo: Ajri ro Rerūttoļo̧k
Irooj ewōr an kajoor n̄an kanemkwoj eō,
Ajri ro rej jelm̧ae apan̄ ko im aikuji Irooj n̄an jipan̄ er. Bwebwenato eo an nan̄inmej ko jon̄oul Irooj ekar jilkintok n̄an kanemkwoj ri Israel ro remaron̄ jipan̄ ajri ro meļeļe bwe E ej barāinwōt wōr an kajoor n̄an jipan̄ er.
M̧akūtkūt ko Maron̄ Kōm̧m̧ani
-
Leļo̧k n̄an kajjojo ajri ro juon peba em̧ōj ajeje n̄an 10 bukwōn ko, im kajjitōk ippān ajri ro n̄an jin̄n̄aik pijaan nan̄inmej ko me kar kōmeļeļeiki ilo eoon kein: Exodus 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7. Ta eo nan̄inmej ko rej katakin kōj kōn kajoor eo an Anij? Etke eaorōk n̄an jeļā kōn kajoor eo An?
-
Kajjitōk ippān ajri ro kōn iien ke rekar en̄jake ke rekar aikuj jipan̄ eo an Irooj. Ekōjkan An maron̄ jipan̄ kōj ilo jekjek kein? Kōketak er n̄an kōnono kōn iien ko ke rekar ak baam̧le ko aer rekar en̄jake kajoor eo an Irooj ilo mour ko aer. Kwaļo̧k am̧ naan in kam̧ool bwe Irooj ewōr an kajoor n̄an jipan̄ kōj.
Irooj emaron̄ jipan̄ eō bwe en ettā bōro.
Pero ekar kāālet n̄an kapen buruōn ke Irooj ekar ba n̄an e n̄an kōtļo̧k im kanemkwoj ajri ro nejin Israel. Ekōjkan am̧ im̧we ajri ro kwoj katakin n̄an kāālet bwe ren ettā bōro bwe en wōr aer ikdeleel n̄an jipan̄ Irooj im kōm̧m̧ane Ankilaan?
M̧akūtkūt ko Maron̄ Kōm̧m̧ani
-
Bōktok n̄an kūlaaj eo juon m̧en epen. āinwōt dōkā, im bar juon men me epidodo, āinwōt juon matmat. Riit ippān ajri ro jejjo eoon ko rej kōmeļeļe wāween an Pero kar ņa mejļan nan̄inmej ko me Irooj ekar jilkin laļtak (lale Exodus 8:28–32; 9:7), im kajjitōk ippān ajri ro ta men eo em̧m̧antata n̄an an bōk jikin buruō ak m̧wilin Pero. Ta meļeļe n̄an bōk juon bōro ettāt? (lale Mosaia 3:17).
-
Ippān kūlaaj eo, kōm̧m̧ane juon laajrak in jet m̧akūtkūt ko me remaron̄ kwaļo̧k ke epen buruōer (n̄an waanjon̄ak, akweel ippān ajri ro jeid im jatid ak jab kōņaan jar). Ekōjkan ad kwaļo̧k n̄an Irooj ke jekōņaan bwe en ettā buruōd?
Kwojkwoj in Kijoone eo ej bōk jikin kajoor in pinmuur eo an Jisōs Kraist.
Kwojkwoj in kijoone eo ej katakin ro nejin Israel bwe Irooj ekar kanemkwoj er jān Ijipt. Kwojkwoj in kijoone eo ej barāinwōt bōk jikin pinmuur eo an Jisōs Kraist, eo me ej kanemkwoj kōj jān jerawiwi im mej. Rainin, kwojkwoj eo ej jipan̄ kōj keememej katok eo an Jisōs Kraist n̄an kōj. Katak in ajri ro kōn Kwojkwoj in kijoone eo emaron̄ jipan̄ kōj bwe en wōr juon ad en̄jake eļap meļeļein kōn kwojkwoj eo.
M̧akūtkūt ko Maron̄ Kōm̧m̧ani
-
Kajjitōk ippān jet iaan ajri ro n̄an riiti Exodus 11:5–6 n̄an ekkatak kōn nan̄inmej eo āliktata me Irooj ekar jilkinlaļtak n̄an ioon ri Ijipt ro. Kajjitōk ippān ajri ro jet n̄an riiti Exodus 12:3, 5–7, 13 n̄an ekkatak kōn wāween an ro nejin Israel kar lo̧mo̧o̧ren jān nan̄inmej eo.
-
N̄an jipan̄ ajri ro meļeļe bwe Rilo̧mo̧o̧r ej Laam̧ eo ekar lo̧mo̧o̧ren kōj, kwaļo̧k juon pija in juon laam̧. Kajjitōk ippān ajri ro n̄an riiti Exodus 12:3–7 n̄an kappukolt kain laam̧ rōt eo Anij ekar kōņaan armej ro ren kōjerbal n̄an iien m̧ōn̄ā eo an Kwojkwoj in Kijoone eo. Ewi wāween an laam̧ in āinwōt Jisōs Kraist? (N̄an waanjon̄ak, Jisōs ewānōk, im Jisōs ekar tootļo̧k Bōtōktōkin n̄an lo̧mo̧o̧ren kōj. Ta kōkaļļe ko jet me rej jipan̄ kōj ļōmņak kōn Jisōs Kraist?
-
Riiti jar in kwojkwoj eo ippān doon (lale Katak im Bujen Ko 20:77, 79), im alooje pijaan alooj eo “Always Remember Him” (ChurchofJesusChrist.org). Ekōjkan an kwojkwoj eo āinwōt ļo̧k Kwojkwoj in Kijoone eo? Ta eo jemaron̄ kōm̧m̧ane n̄an ļōmņak kōn Jisōs ilo iien kwojkwoj eo?
-
Kwaļo̧k n̄an ajri ro juon iaan al in kwojkwoj eo em̧m̧antata ippāer (lale Hymns, nos. 169–96), im kōnono kōn ewi wāween an jipan̄ eok keememej katok eo an Rilo̧mo̧o̧r. Kajjitōk ippān ajri ro n̄an kwaļo̧k juon al me ejja āinwōt in n̄an er.
Kōketak Ekkatak ilo M̧weo
Kajjitōk ippān ajri ro n̄an kwaļo̧k ippān ajri ro juon men me rekar ekkatak kōn Jisōs Kraist ilo Būraimere rainin.
Kōkm̧anm̧anļo̧k Ad Katakin
Jipan̄ ajri ro lo ilo pija bwebwenato eo. N̄e ajri ro ewōr aer pija ko jej lali kōn ta eo rej ekkatak, enaaj ļapļo̧k aer keememeje. Kappukot wāween ko n̄an jipan̄ ajri ro bwe ren lo ilo pija bwebwenato ko ilo jeje ko rekwojarjar ilo aer kōjerbal men ko n̄an alooji ak lali āinwōt pija ko, jin̄n̄a ko, bitio ko, kein ikkure jiddik ko, ak tieta ko.