ejm̧aan eo ekar debwilbwil ļo̧k jān kōjem̧ eo

Kōmeļeļe eo kōn lōb eo ejjeļo̧k kobban jān Maryna Kriuchenko

Eprōļ 11–17

Ijtō

“Enaaj Oran̄ļo̧k Mej n̄an Indeeo”

Ilo am̧ kōppopo n̄an katakin, kejakļo̧kjeņ kōn ekōjkan am̧ maron̄ jipan̄ ajri ro bōk juon jeļāļo̧kjeņ em̧ūlaļļo̧k im naan in kam̧ool kōn Pinmuur eo an Jisōs Kraist.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān ajri ro ta eo baam̧le ko rej kōm̧m̧an n̄an kam̧ōņōņōik Ijtō. Ta eo rej kōm̧m̧ane n̄an keememej jerkakpeje eo an Jisōs Kraist?

pija ej bōk jikin katakin

Katakin Katak eo: Ajri ro Reddikļo̧k

Jisōs Kraist ej aō Rilo̧mo̧o̧r.

Jabōt in Ijtō ejjuon iien eaorōk n̄an katakin ajri ro kōn Pinmuur eo an Rilo̧mo̧o̧r ilo Getsemane im Mej eo an ioon debwāāl. Menin emaron̄ jipan̄ er en̄jake iakwe eo an Jisōs n̄an er.

M̧akūtkūt ko Maron̄ Kōm̧m̧ani

• Kwaļo̧k pija ko an Rilo̧mo̧o̧r ilo unin tōl eo an wiik in ilo Itok, Ļoor Eō—N̄an Kajjojo im Baam̧le Ko ak pija ko jet kōn pinmuur eo an Rilo̧mo̧o̧r (lale Gospel Art Book, nos. 56, 57, 58), im kōtļo̧k bwe ajri ro ren kwaļo̧k n̄an eok ta eo rejeļā kake kōn m̧akūtkūt ko rej waļo̧k ilo pija in. Ba n̄an ajri ro kōn en̄taan eo an Jisōs ilo Getsemane im ioon debwāāl (lale Matu 26:36–46; 27:35–50; Luk 22:39–46; Jon 19:16–30; “Chapter 51: Jesus Suffers in the Garden of Gethsemane,” ilo New Testament Stories, 129–32). Kwaļo̧k naan in kam̧ool eo am̧ bwe Jisōs ekar m̧ōņōņō in en̄taan im mej kōn kōj kōnke E ej iakwe kōj. Kajjitōk ippān ajri ro n̄an kwaļo̧k ekōjkan aer en̄jake kōn Jisōs Kraist.

• Riiti Jon 10:9 n̄an ajri ro, kwaļo̧k aorōkin naan ko an Jisōs “N̄a kōjem̧ eo.” Kōnke Jisōs ekar en̄taan kōn jerawiwi ko ad, ekar mej, im ekar jerkakpeje, Ekar kōm̧m̧an bwe kōj kajjojo jen bar mour ippān Anij bar juon alen. Kōjerbal kōjem̧ eo an kūlaajruum eo am̧ n̄an katakin bwe Jisōs ej āinwōt juon kōjem̧ in deļon̄ ej kōtļo̧k bwe jen jepļaak n̄an Jemedwōj Ilan̄.

• Riiti Aisea 53:6 n̄an ajri ro, im kwaļo̧ki n̄an er juon pija ak jin̄n̄aik juon sip. Kōtļo̧k bwe juon iaan ajri ro en likūt pija eo ilo jabōn tata ilo ruum eo. Kōmeļeļeik bwe n̄e jej kōm̧m̧ani jokāālet ko rebōd, jej jebwābwe jān Jemedwōj Ilan̄ āinwōt sip ko rejabwābwe. Innem kajjitōk ippān ajri ro n̄an kōjepļaaktok sip eo, im kwaļo̧k am̧ naan in kam̧ool bwe kōnke Jisōs Kraist ekar en̄taan im mej kōn kōj, Emaron̄ kōjepļaak kōj n̄an Jemedwōj Ilan̄. (Kwomaron̄ kwaļo̧k juon pija in Jisōs āinwōt juon rilale sip, āinwōt pija 64 ilo Gospel Art Book.)

• Al ippān ajri ro juon al kōn Jisōs Kraist, āinwōt “I Feel My Savior’s Love” (Al ko Al in Ajri, 74–75). Jipan̄ er kile jabdewōt en̄jake in aeņōm̧m̧an im iakwe eo epād ippāer ilo aer al. Bar kwaļo̧k naan ko ilo al eo me ej kōmeļeļeik iakwe eo an Rilo̧mo̧o̧r. Ekōjkan ad maron̄ kwaļo̧k iakwe eo An n̄an ro jet?

Jisōs eaar mej im eaar bar jerkakpeje kōn eō.

Ekōjkan am̧ maron̄ jipan̄ ajri ro ekkatak bwe kōn jerkakpeje eo an Jisōs Kraist, kōj im ro rejitōnbōro ippād jenaaj bar jekakpeje juon raan?

Kraist ioon debwāāl eo

Raan eo Ekaburom̧ōjm̧ōj ilo Golgota, jan J. Kirk Richards

M̧akūtkūt ko Maron̄ Kōm̧m̧ani

• Ba n̄an ajri ro kōn mej eo im Jerkakpeje eo an Jisōs (lale Mark 15–16). Kōjerbal pija ko ilo unin tōl eo an wiik in, pija ko 57–60 ilo Gospel Art Book, or “Jōbta 54: Jesus Is Risen” ilo New Testament Stories (peij ko 139–44) n̄an jipan̄ ajri ro pijaikļo̧k ilo lo bwebwenato.

• Jipan̄ ajri ro meļeļe bwe jerkakpeje meļeļein bwe ālkin ad mej jenaaj bar mour bar juon alen n̄an indeeo kōn juon ānbwin eo ewānōk im ejamin bar mej. Kwaļo̧k naan in kam̧ool eo am̧ kōn jekakpeje, im kōtļo̧k bwe ajri ro ren jerbal ilo peij in m̧akūtkūt eo an wiik in. Kajjitōk ippān ajri ro n̄an kōjerbale n̄an kwaļo̧k ippān baam̧le ko aer bwebwenato in Jerkakpeje eo an Jisōs.

• Riiti ļo̧k Alma 40:23 n̄an ajri ro. Kwaļo̧k n̄an er pā ko ilo waan juon kulo̧b. Ba n̄an er bwe peim ej āinwōt jetōb im kulo̧b eo ej āinwōt ānbwin. Tūm̧i kulo̧b eo n̄an kwaļo̧k bwe n̄e jej mej, jetōb ko ad renaaj etal jān ānbwinnid. Bar kanōki kulo̧b eo n̄an bōk jikin Jerkakpeje.

• Al juon al kōn Jerkakpeje eo an Jisōs Kraist, āinwōt “Did Jesus Really Live Again?” ak “Jesus Has Risen” (Children’s Songbook, 64, 70). Kwaļo̧k naan in kam̧ool eo am̧ bwe kōn Jisōs Kraist jenaaj bar mour juon alen im bōk ānbwin ko rewānōk ālkin ad mej.

pija ej bōk jikin katakin

Katakin Katak eo: Ajri ro Rerūttoļo̧k

Jisōs Kraist eaar en̄taan kōn eō.

Ilo am̧ ekkatak kōn Pinmuur eo an Rilo̧mo̧o̧r, kejakļo̧kjeņ kōn ekōjkan am̧ jipan̄ ajri ro meļeļe ekōjkan an Rilo̧mo̧o̧r maron̄ kōjeraam̧m̧an im kōkajoorļo̧k er.

M̧akūtkūt ko Maron̄ Kōm̧m̧ani

• Kōjepelļo̧k ajri ro n̄an jilu kurup, im leļo̧k n̄an kajjojo iaan kurup ko juon iaan eoon ko rej ellaajrak: Aisea 53:4–12; Alma 7:11–13; im Katak im Bujen Ko 19:16–19. Kajjitōk ippān ajri ro n̄an kappukot naan ko me ej kōmeļeļe men ko Jisōs Kraist ekar en̄taan kaki kōn kōj. Kajjitōk ippāer n̄an je uwaak ko aer ioon bo̧o̧t eo im kwaļo̧k ekōjkan aer en̄jake kōn Rilo̧mo̧o̧r ālkin aer riit eoon kein.

• Kōpooj pepa jidik ko. Ilo jimettanier, je eoon in jipan̄ ko an Kallim̧ur M̧okta kōn kanaan ko kōn Jisōs Kraist. Ilo jimettan eo juon, je eoon in jipan̄ me reiookļo̧k ilo Kallim̧ur Ekāāl kōn ekōjkan an kanaan kein kar kūrm̧ool.. (Unin tōl eo an wiik in ilo Itok, Ļoor Eō—N̄an Kajjojo Armej im Baam̧le Ko ej kōlaajraki jet waanjon̄ak ko.) Karuwaineneik ajri ro n̄an riiti eoon ko im kōmāāji ippān kanaan ko ippān ta ko rekar kūrm̧ool.

• Jipan̄ ajri ro kakilōklōke laajrak in tōmak kein kajilu. Ta eo eoon in ej katakin kōj kōn Pinmuur eo an Jisōs Kraist im karōk eo an Jemedwōj Ilan̄ n̄an ajri ro Nejin?

• Kajjitōk ippān ajri ro ewi wāween aer kōmeļeļeik Pinmuur eo an Jisōs Kraist n̄an bar juon armej. Kōketak er n̄an kōjerbal eoon ko, al ko, ak pija ko n̄an kwaļo̧k ta meļeļein pinmuur eo an Rilo̧mo̧o̧r n̄an er. Elmen ad kar jeraam̧m̧an kōn Pinmuur eo an Rilo̧mo̧o̧r?

Jisōs eaar mej im eaar bar jerkakpeje kōn eō.

M̧oolin Jerkakpeje eo an Jisōs Kraist emaron̄ bōktok n̄an kōj eļap kōjatdikdik im lan̄lōn̄—eļaptata n̄e jej en̄jake mej an juon eo ejitōnbōro ippād. Ekōjkan am̧ jipan̄ ajri ro lo aeņōm̧m̧an ilo Jerkakpeje eo?

M̧akūtkūt ko Maron̄ Kōm̧m̧ani

• Kwaļo̧ki pija ko 57–59 ilo Gospel Art Book. Kajjitōk ippān ajri ro n̄an māāje pija ko ippān eoon kein rej ellaajrak: Matu 27:29–38; Matu 27:59–60; im Jon 20:10–18. Innem karuwaineneik ajri ro n̄an ba bwebwenato eo kōn mej eo an Jisōs, kallūb eo, im Jerkakpejej eo ilo naan ko aer make.

• Riiti Job 14:14 ippān ajri ro. Kajjitōk ippān ajri ro n̄an kwaļo̧k ekōjkan aer naaj uwaak kajjitōk eo an Job. Jipan̄ er kappukot eoon ko me rej kam̧ool kōn Jerkakpeje eo (lale Unin Tōl eo n̄an Jeje ko Rekwojarjar, “Resurrection,” scriptures.ChurchofJesusChrist.org).

• Riiti Moses 1:39 ippān ajri ro. Kajjitōk ippāer eļan̄n̄e rejeļā ta oktak eo ikōtaan “mour in jab wabanban” im “mour indeeo.” Kajjitōk ippāer n̄an kappukot uwaak ko ilo pārookūrāāp eo jinointata ilo “Eternal Life” (Gospel Topics, topics.ChurchofJesusChrist.org). Wōn eo enaaj bōk mour in jab wabanban? Ta eo emenin aikuj n̄an bōk mour indeeo? Kwaļo̧k am̧ naan in kam̧ool bwe jim̧or menin letok kein remaron̄ kūrm̧ool kōn Pinmuur eo an Jisōs Kraist.

• Al ippān doon juon al in Ijtō, āinwōt “He Sent His Son” (Al ko Al in Ajri, 34–35) ak “He Is Risen!” (Hymns, no. 199). Kajjtōk ippān ajri ro n̄an kwaļo̧k ekōjkan aer en̄jake n̄e rej al al kein. Ta eo al kein rej katakin kōj kōn Jemedwōj Ilan̄ im Jisōs Kraist? Kajjitōk ippān ajri ro n̄an je naan in kam̧ool ko aer kōn Rilo̧mo̧o̧r n̄an jeere ilo m̧ōko m̧weer ippān baam̧le ko aer.

pija ej bōk jikin ekkatak

Kōketak Ekkatak ilo M̧weo

N̄an jipan̄ ajri ro kwaļo̧k n̄an baam̧le ko aer ta eo rekar ekkatak ilo kūlaaj eo, kōketak er n̄an al juon al ilo m̧weo wiik in kōn Pinmuur eo an Jisōs Kraist.

Kōkm̧anm̧anļo̧k Ad Katakin

Ajri ro remaron̄ kile im̧we eo an Jetōb. Katakin ajri ro bwe en̄jake in aenōm̧m̧an, iakwe, im okmāneen me rej en̄jake ilo aer kōnono ak al kōn Jisōs Kraist im gospel eo An ej itok jān Jetōb Kwojarjar (lale Teaching in the Savior’s Way, 11).

peij in m̧akūtkūt: Jisōs kar jerkakpeje kōn eō.